ಪ್ರಭಾಸ್ ಬಳಿಕ ಈಗ ಮಣಿರತ್ನಂ ಸಿನಿಮಾನಲ್ಲಿ ಚೈತ್ರಾ ಆಚಾರ್

ಇತ್ತೀಚೆಗಿನ ವರ್ಷಗಳಲ್ಲಿ ಹಲವು ಕನ್ನಡದ ನಟಿಯರು ಪರಭಾಷೆಗಳಲ್ಲಿ ಮಿಂಚುತ್ತಿದ್ದಾರೆ. ರಶ್ಮಿಕಾ ಮಂದಣ್ಣ, ಶ್ರೀಲೀಲಾ ಅವರುಗಳಂತೂ ಕನ್ನಡದಿಂದ ಹೋಗಿ ಈಗ ಪ್ಯಾನ್ ಇಂಡಿಯಾ ಸ್ಟಾರ್ ನಟಿಯರೇ ಆಗಿಬಿಟ್ಟಿದ್ದಾರೆ. ಇವರುಗಳ ಜೊತೆಗೆ ‘ಕೆಜಿಎಫ್’ ಬೆಡಗಿ ಶ್ರೀನಿಧಿ ಶೆಟ್ಟಿ, ರುಕ್ಮಿಣಿ ವಸಂತ್, ಶ್ರದ್ಧಾ ಶ್ರೀನಾಥ್ ಇನ್ನೂ ಹಲವು ಕನ್ನಡದ ನಟಿಯರು ಪರಭಾಷೆಗಳಲ್ಲಿ ಅದ್ಭುತ ಅವಕಾಶಗಳನ್ನು ಪಡೆಯುತ್ತಾ ತಮ್ಮ ಪ್ರತಿಭೆ ಸಾಬೀತು ಮಾಡಿದ್ದಾರೆ. ಇದೀಗ ಇದೇ ಸಾಲಿಗೆ ಸೇರಿದ್ದಾರೆ ಕನ್ನಡದ ನಟಿ ಚೈತ್ರಾ ಜೆ ಆಚಾರ್.

ಚೈತ್ರಾ ಆಚಾರ್ ಸಹ ಪರ ಭಾಷೆ ಸಿನಿಮಾಗಳಲ್ಲಿ ಅದ್ಭುತ ಅವಕಾಶಗಳನ್ನು ತಮ್ಮ ಪ್ರತಿಭೆ ಮಾತ್ರದಿಂದಲೇ ಪಡೆದುಕೊಳ್ಳುತ್ತಿದ್ದಾರೆ. ತಮಿಳಿನ ‘3 ಬಿಎಚ್​​ಕೆ’ ಸಿನಿಮಾನಲ್ಲಿ ನಟಿಸಿದ್ದ ಚೈತ್ರಾ ಆಚಾರ್, ಪ್ರಭಾಸ್ ನಟನೆಯ ‘ಫೌಜಿ’ ಸಿನಿಮಾನಲ್ಲಿ ಅವಕಾಶ ಗಿಟ್ಟಿಸಿಕೊಂಡಾಗ ಹಲವರು ಹುಬ್ಬೇರಿಸಿದ್ದರು. ಇದೀಗ ಚೈತ್ರಾ ಅವರು ಭಾರತದ ಸ್ಟಾರ್ ನಿರ್ದೇಶಕ ಮಣಿರತ್ನಂ ಅವರ ಹೊಸ ಸಿನಿಮಾನಲ್ಲಿ ಪ್ರಮುಖ ಪಾತ್ರವೊಂದರಲ್ಲಿ ನಟನೆ ಮಾಡಿದ್ದಾರೆ. ಅದುವೇ ‘ಇಂಜಿ ವೆಲ್ಲಂ’.

ಸಾಯಿ ಪಲ್ಲವಿ ಮತ್ತು ವಿಜಯ್ ಸೇತುಪತಿ ಪ್ರಮುಖ ಪಾತ್ರಗಳಲ್ಲಿ ನಟನೆ ಮಾಡಿರುವ ‘ಇಂಜಿ ವೆಲ್ಲಂ’ ಸಿನಿಮಾನಲ್ಲಿ ಚೈತ್ರಾ ಆಚಾರ್ ಅವರದ್ದು ಸಹ ಪ್ರಮುಖವಾದ ಪಾತ್ರ. ಈ ಬಗ್ಗೆ ಮಾತನಾಡಿರುವ ಚೈತ್ರಾ ಆಚಾರ್, ‘ಖುದ್ದು ಲಿಜೆಂಡರಿ ನಿರ್ದೇಶಕ ಮಣಿರತ್ನಂ ಅವರೇ ಕರೆ ಮಾಡಿ ಅವಕಾಶ ಕೊಟ್ಟಾಗ ನನಗೆ ಆದ ಖುಷಿಗೆ ಪಾರವೇ ಇಲ್ಲ. ‘ನನ್ನ ಸಿನಿಮಾನಲ್ಲಿ ಪಾತ್ರವೊಂದಿದೆ ಅದರಲ್ಲಿ ನೀವು ನಟಿಸಬೇಕು ಎಂಬುದು ನನ್ನ ಇಚ್ಛೆ’ ಎಂದು ಮಣಿ ಅವರು ಹೇಳಿದಾಗ ಕೂಡಲೇ ಒಪ್ಪಿಕೊಂಡೆ’ ಎಂದಿದ್ದಾರೆ ಚೈತ್ರಾ.

ಇದನ್ನೂ ಓದಿ:‘ಮದುವೆ ಆಗು ಪ್ಲೀಸ್’ ಅಂತ ವಿಜಯ್ ಬಳಿ 100 ಬಾರಿ ಕೇಳಿಕೊಂಡಿದ್ದ ರಶ್ಮಿಕಾ ಮಂದಣ್ಣ

‘ಇಂಜಿ ವೆಲ್ಲಂ’ ಸಿನಿಮಾನಲ್ಲಿ ನಾನು ನಟಿಸಿದ ಬಹುತೇಕ ಭಾಗಗಳು ವಿಜಯ್ ಸೇತುಪತಿ ಅವರೊಟ್ಟಿಗೆ ಇವೆ. ಅದೊಂದು ಅದ್ಭುತವಾದ, ಬಹಳ ಫ್ಯಾಷನೇಟ್ ಆದ ವಾತಾವರಣ. ನನಗೆ ಬಹಳ ವಿಭಿನ್ನವಾದ ಅನುಭವ ಅದಾಗಿತ್ತು. ಮಣಿರತ್ನಂ ಅವರ ಸಿನಿಮಾನಲ್ಲಿ ನನ್ನನ್ನು ನಾನು ನೋಡಲು ಎದುರು ನೋಡುತ್ತಿದ್ದೇನೆ. ಸಿನಿಮಾದ ಚಿತ್ರೀಕರಣ ಪೂರ್ಣಗೊಂಡಿದ್ದು, ಬಿಡುಗಡೆಗೆ ಕಾಯುತ್ತಿದ್ದೇನೆ’ ಎಂದಿದ್ದಾರೆ. ಸಿನಿಮಾ ಜನವರಿ 29ಕ್ಕೆ ರಿಲೀಸ್ ಆಗಲಿದೆ.

ಚೈತ್ರಾ ಆಚಾರ್ ಅವರು ಪ್ರಭಾಸ್ ನಟನೆಯ ‘ಫೌಜಿ’ ಸಿನಿಮಾನಲ್ಲಿಯೂ ಸಹ ನಟನೆ ಮಾಡಿದ್ದಾರೆ. ಫೌಜಿ ಸಿನಿಮಾನಲ್ಲಿ ಅಮೆರಿಕ ಮೂಲದ ಹೊಸ ಯುವತಿಯೊಬ್ಬರು ನಾಯಕಿಯಾಗಿ ನಟನೆ ಮಾಡಿದ್ದಾರೆ. ಆದರೆ ಚೈತ್ರಾ ಅವರಿಗೂ ಸಹ ಸಿನಿಮಾನಲ್ಲಿ ಮಹತ್ವದ ಪಾತ್ರ ಇದೆಯಂತೆ. ‘ಫೌಜಿ’ ಸಿನಿಮಾದ ಚಿತ್ರೀಕರಣವನ್ನೂ ಸಹ ಚೈತ್ರಾ ಮುಗಿಸಿದ್ದಾರೆ. ಆದರೆ ಪೋಸ್ಟ್ ಪ್ರೊಡಕ್ಷನ್​​ನ ಕೊನೆಯ ಹಂತ ಮಾತ್ರ ಬಾಕಿ ಇದೆಯಂತೆ. ಆ ಸಿನಿಮಾದ ಬಗ್ಗೆಯೂ ಬಹಳ ಕುತೂಹಲದಿಂದ ಇದ್ದಾರೆ ನಟಿ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ