Hoysala: ಶಿವಣ್ಣ ನಟಿಸಿದ್ದ ಆ ಪೊಲೀಸ್ ಪಾತ್ರದಲ್ಲಿ ನಟಿಸುವಾಸೆ: ಡಾಲಿ ಧನಂಜಯ್
ಹಲವು ಭಿನ್ನ ಭಿನ್ನ ಪಾತ್ರಗಳಲ್ಲಿ ನಟಿಸಿರುವ ನಟ ಡಾಲಿ ಧನಂಜಯ್, ಶಿವಣ್ಣ ನಟಿಸಿರುವ ಹಳೆಯ ಸಿನಿಮಾ ಒಂದರ ರೀತಿಯ ಪಾತ್ರದಲ್ಲಿ ನಟಿಸುವ ಆಸೆ ವ್ಯಕ್ತಪಡಿಸಿದ್ದಾರೆ.
ಡಾಲಿ ಧನಂಜಯ್ (Daali Dhananjay) ಪ್ರಯೋಗಗಳಿಗೆ ಒಡ್ಡಿಕೊಳ್ಳುತ್ತಾ ಬಂದಿರುವ ನಟ. ವಿಲನ್, ಪೋಷಕ ಪಾತ್ರ, ಡಿ ಗ್ಲಾಮರೈಸ್ ಆಗಿರುವ ಪಾತ್ರ, ಒರಟನ ರೀತಿಯ ಪಾತ್ರ, ಮಧ್ಯಮವರ್ಗ ಪ್ರತಿನಿಧಿಸುವ ಪಾತ್ರ ಹೀಗೆ ಹಲವು ರೀತಿಯ ಪಾತ್ರಗಳಿಗೆ ತಮ್ಮನ್ನು ಒಪ್ಪಿಸಿಕೊಂಡಿದ್ದಾರೆ. ಇದೀಗ ಹೊಯ್ಸಳ ಸಿನಿಮಾ ಮೂಲಕ ಮೊದಲ ಬಾರಿಗೆ ಪೂರ್ಣ ಪ್ರಮಾಣದ ಪೊಲೀಸ್ ಪಾತ್ರಧಾರಿ ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ. ಈ ಹಿಂದೆ ಸಲಗ ಸಿನಿಮಾದಲ್ಲಿ ಪೊಲೀಸ್ ಪಾತ್ರದಲ್ಲಿ ನಟಿಸಿದ್ದರಾದರೂ ಅದು ನಾಯಕನ ಪಾತ್ರವಾಗಿರಲಿಲ್ಲ. ಆದರೆ ಮುಂದೊಮ್ಮೆ ಶಿವಣ್ಣ (Shiva Rajkumar) ನಟಿಸಿರುವ ಪಾತ್ರವೊಂದನ್ನು ಹೋಲುವ ಪಾತ್ರದಲ್ಲಿ ನಟಿಸುವ ಆಸೆಯನ್ನು ಡಾಲಿ ಧನಂಜಯ್ ವ್ಯಕ್ತಪಡಿಸಿದ್ದಾರೆ.
ಟಿವಿ9 ಜೊತೆಗೆ ಮಾತನಾಡಿರುವ ಡಾಲಿ ಧನಂಜಯ್, ಈ ಹಿಂದೆ ಹಲವು ದಿಗ್ಗಜರು ಪೊಲೀಸ್ ಪಾತ್ರಗಳನ್ನು ಅದ್ಭುತವಾಗಿ ನಿರ್ವಹಿಸಿದ್ದಾರೆ. ರಾಜ್ಕುಮಾರ್, ಶಂಕರ್ ನಾಗ್, ಅಂಬರೀಶ್, ಶಿವರಾಜ್ ಕುಮಾರ್, ಸಾಯಿ ಕುಮಾರ್ ಅವರ ಸಿನಿಮಾಗಳನ್ನು ನೋಡಿಯೇ ಬೆಳೆದವನು. ಮಾಸ್ ಪ್ರೇಕ್ಷಕನಾಗಿ ನನಗೆ ಸಿನಿಮಾವನ್ನು ಸೆಲೆಬ್ರೇಟ್ ಮಾಡುವುದು ಇಷ್ಟ. ಹಾಗಾಗಿ ಎಲ್ಲ ಪೊಲೀಸ್ ಕತೆಯುಳ್ಳ ಸಿನಿಮಾಗಳನ್ನು ಎಂಜಾಯ್ ಮಾಡಿಕೊಂಡು ನೋಡುತ್ತೀನಿ” ಎಂದಿದ್ದಾರೆ.
ಪಾತ್ರಗಳ ವಿಷಯಕ್ಕೆ ಬಂದರೆ ನನಗೆ ಬೇರೆ-ಬೇರೆ ರೀತಿಯ ಪಾತ್ರಗಳಲ್ಲಿ ನಟಿಸುವುದು ಬಹಳ ಇಷ್ಟ. ನನ್ನ ಫಿಲ್ಮಾಗ್ರಫಿ ಗಮನಿಸಿದರೆ ಡಾಲಿ, ಮಿಠಾಯಿ ಸೂರಿ, ರತ್ನಾಕರ ಇಂಥಹಾ ಬೇರೆ ಬೇರೆ ಪಾತ್ರಗಳಿವೆ. ಇದಕ್ಕೆ ಗುರುದೇವ ಹೊಯ್ಸಳ ಸಹ ಸೇರಿಕೊಳ್ಳಲಿದೆ. ಇನ್ನು ಪಾತ್ರವನ್ನು ನಟಿಸಲು ತಯಾರಿಯ ವಿಷಯಕ್ಕೆ ಬಂದರೆ ಈ ಹಿಂದೆ ನೋಡಿದ ಸಿನಿಮಾಗಳ ಜೊತೆಗೆ ನನಗೆ ಕೆಲವು ಪೊಲೀಸ್ ಗೆಳೆಯರಿದ್ದಾರೆ ಅವರೊಟ್ಟಿಗೆ ಮಾತನಾಡಿರುತ್ತೇನೆ, ಅವರೊಟ್ಟಿಗೆ ಬೆರೆತಾಗ ನಾನು ಗಮನಿಸಿದ ಕೆಲವು ಅಂಶಗಳು ತಲೆಯಲ್ಲಿ ರಿಜಿಸ್ಟರ್ ಆಗಿರುತ್ತವೆ. ಜೊತೆಗೆ ನಿರ್ದೇಶಕರು ಪಾತ್ರವನ್ನು ಬರೆದಿರುವ ರೀತಿ ಎಲ್ಲವೂ ಒಂದಾಗಿ ಪಾತ್ರವನ್ನು ಅಪ್ರೋಚ್ ಮಾಡುತ್ತೇನೆ ಎಂದಿದ್ದಾರೆ ಧನಂಜಯ್.
ನನಗೆ ವೈಯಕ್ತಿಕವಾಗಿ ಪೊಲೀಸ್ ಅಧಿಕಾರಿ ಪಾತ್ರ ಮಾಡುವುದು ಬಹಳ ಇಷ್ಟ. ಸಲಗ ಸಿನಿಮಾದಲ್ಲಿ ಮಾಡಿದ್ದ ಸಾಮ್ರಾಟ್ ಪಾತ್ರ ಬಹಳ ಸೀರಿಯಸ್ ಆದ ಪೊಲೀಸ್ ಅಧಿಕಾರಿ ಪಾತ್ರವಾಗಿತ್ತು. ಇಲ್ಲಿಯೂ ಸಹ ಗುರುದೇವ್ ಹೊಯ್ಸಳ ಬಹಳ ಗಂಭೀರವಾದ ಪೊಲೀಸ್ ಅಧಿಕಾರಿ. ಮುಂದೆ ಪೊಲೀಸ್ ಅಧಿಕಾರಿ ಪಾತ್ರ ಮಾಡಿದರೆ ಇನ್ಸ್ಪೆಕ್ಟರ್ ವಿಕ್ರಂ ಸಿನಿಮಾದಲ್ಲಿ ಶಿವಣ್ಣ ಮಾಡಿದ್ದರಲ್ಲ, ಜಾಲಿಯಾಗಿರುವ, ಚಿಲ್ಡ್, ಎಂಜಾಯ್ ಮಾಡಿಕೊಂಡಿರುವ ಪೊಲೀಸ್ ಅಧಿಕಾರಿಯ ಪಾತ್ರದಲ್ಲಿ ನಟಿಸುತ್ತೇನೆ ಎಂದಿದ್ದಾರೆ ಡಾಲಿ ಧನಂಜಯ್.
ಇದನ್ನೂ ಓದಿ: Dhananjay: ‘ಯಾಕ್ರಿ ಹೊಟ್ಟೆ ಬಿಟ್ಕೊಂಡು ಓಡಾಡ್ತಾ ಇದೀರಿ?’: ಡಾಲಿ ಧನಂಜಯ್ಗೆ ಸುದೀಪ್ ನೇರ ಪ್ರಶ್ನೆ
1989 ರಲ್ಲಿ ಶಿವರಾಜ್ ಕುಮಾರ್ ನಟಿಸಿದ್ದ ಇನ್ಸ್ಪೆಕ್ಟರ್ ವಿಕ್ರಂ ಸಿನಿಮಾ ಬಿಡುಗಡೆ ಆಗಿತ್ತು. ಆ ಸಿನಿಮಾದಲ್ಲಿ ಜಾಲಿಯಾಗಿರುವ ಇನ್ಸ್ಪೆಕ್ಟರ್ ಪಾತ್ರದಲ್ಲಿ ಶಿವಣ್ಣ ನಟಿಸಿದ್ದರು. ಆ ಆಕ್ಷನ್ ಕಾಮಿಡಿ ಸಿನಿಮಾವನ್ನು ದಿನೇಶ್ ಬಾಬು ನಿರ್ದೇಶನ ಮಾಡಿದ್ದರು. ಅದೇ ಸಿನಿಮಾದ ಹೆಸರನ್ನಿಟ್ಟುಕೊಂಡು ಎರಡು ವರ್ಷದ ಹಿಂದೆ ಪ್ರಜ್ವಲ್ ದೇವರಾಜ್ ನಟನೆಯ ಇನ್ಸ್ಪೆಕ್ಟರ್ ವಿಕ್ರಂ ಸಿನಿಮಾ ಬಿಡುಗಡೆ ಆಗಿತ್ತು. ಆದರೆ ಆ ಸಿನಿಮಾ ದೊಡ್ಡ ಹಿಟ್ ಆಗಲಿಲ್ಲ.
ಇನ್ನು ಡಾಲಿ ನಟನೆಯ ಹೊಯ್ಸಳ ಸಿನಿಮಾ ಮಾರ್ಚ್ 30 ರಂದು ಬಿಡುಗಡೆ ಆಗಲಿದೆ. ಹೊಂಬಾಳೆಯ ಸಹೋದರ ಸಂಸ್ಥೆಯಾಗಿರುವ ಕೆಆರ್ಜಿ ಸಂಸ್ಥೆಯು ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದು ಸಿನಿಮಾವನ್ನು ವಿಜಯ್ ನಿರ್ದೇಶನ ಮಾಡಿದ್ದಾರೆ. ಸಿನಿಮಾದಲ್ಲಿ ಅಮೃತಾ ಐಯ್ಯಂಗಾರ್ ನಾಯಕಿ. ಅಚ್ಯುತ್ ಕುಮಾರ್, ರಾಜೇಶ್ ನಟರಂಗ, ನಾಗಭೂಷಣ್ ಇನ್ನೂ ಹಲವರು ಸಿನಿಮಾದಲ್ಲಿ ನಟಿಸಿದ್ದಾರೆ.