ಅಪ್ಪು ನಿರ್ಗಮನದ ಕಹಿ ನೆನಪು: ಕೊನೆಯ ಗಳಿಗೆಯಲ್ಲಿ ನಡೆದಿದ್ದೇನು? ವೈದ್ಯರ ಸತ್ಯಾವಲೋಕನ

ಕನ್ನಡದ ಹೆಮ್ಮೆಯ ನಟ, ‘ಪವರ್ ಸ್ಟಾರ್’ ಪುನೀತ್ ರಾಜ್‌ಕುಮಾರ್ ಅವರು ನಮ್ಮನ್ನಗಲಿ ಅರ್ಧ ದಶಕವೇ ಉರುಳಿದರೂ, ಅವರ ಅಗಲಿಕೆಯ ಆಘಾತದಿಂದ ಕನ್ನಡಿಗರು ಇಂದಿಗೂ ಹೊರಬಂದಿಲ್ಲ. ವ್ಯಾಯಾಮದ ಬಳಿಕ ಉಂಟಾದ ಅನಿರೀಕ್ಷಿತ ಹೃದಯಾಘಾತವೇ ಅವರ ಪ್ರಾಣಪಕ್ಷಿ ಹಾರಲು ಕಾರಣವಾಯಿತು ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ. ಆದರೆ, ಆ ದುರಂತದ ದಿನ ಅಸಲಿಗೆ ಏನಾಗಿತ್ತು ಎಂಬುದರ ಕುರಿತು ಅವರ ವೈಯಕ್ತಿಕ ವೈದ್ಯರಾದ ಡಾ. ರಮಣ ರಾವ್ ಅವರು ‘ರ್ಯಾಪಿಡ್ ರಶ್ಮಿ’ ಅವರ ಸಂದರ್ಶನದಲ್ಲಿ ವಿವರವಾಗಿ ಮಾತನಾಡಿದ್ದರು.

ಡಾ. ರಮಣ ರಾವ್ ಅವರು ಪುನೀತ್ ಅವರೊಂದಿಗಿನ ಭಾವನಾತ್ಮಕ ಬಾಂಧವ್ಯವನ್ನು ಸ್ಮರಿಸುತ್ತಾ, ‘ನನಗೆ ಅವರು ಸ್ವಂತ ಮಗನಿದ್ದಂತೆ’ ಎಂದು ಕಣ್ಣೀರಾದರು. ಅವರು ಅಂದು ಏನೇಲ್ಲ ಆಯಿತು ಎಂಬುದನ್ನು ಹೇಳಿದ್ದರು.

ಅತಿಯಾದ ಶ್ರಮ ಹಾಗೂ ಆಯಾಸ: ಆ ದಿನ ಪುನೀತ್ ಅವರು ನಿತ್ಯದ ಕಸರತ್ತಿಗಿಂತ ಭಿನ್ನವಾಗಿ, ಸತತ ಒಂದೂವರೆ ಗಂಟೆಗಳ ಕಾಲ ತೀವ್ರ ಸ್ವರೂಪದ ಕಿಕ್ ಬಾಕ್ಸಿಂಗ್ ಅಭ್ಯಾಸ ಮಾಡಿದ್ದರು. ಇದರಿಂದಾಗಿ ಸುಸ್ತಾಗಿ ನೇರವಾಗಿ ಚಿಕಿತ್ಸಾಲಯಕ್ಕೆ ಬಂದಿದ್ದರು.

ಸಂದೇಹ ಮೂಡಿಸಿದ ದೈಹಿಕ ಸ್ಥಿತಿ: ಕ್ಲಿನಿಕ್‌ಗೆ ಆಗಮಿಸಿದಾಗ ಅವರ ದೇಹ ಪೂರ್ತಿ ಬೆವರಿನಿಂದ ತೊಯ್ದು ತೊಪ್ಪೆಯಾಗಿತ್ತು. ಅವರ ಈ ಸ್ಥಿತಿಯನ್ನು ಗಮನಿಸಿದ ವೈದ್ಯರಿಗೆ ತಕ್ಷಣ ಅನುಮಾನಗೊಂಡು, ತಡಮಾಡದೇ ಇಸಿಜಿ ಪರೀಕ್ಷೆ ನಡೆಸಿದರು.

ಇಸಿಜಿ ವರದಿಯ ಆತಂಕ: ಪರೀಕ್ಷೆಯ ವರದಿಯಲ್ಲಿ ಅವರ ಹೃದಯದ ಮೇಲೆ ತೀವ್ರ ಪ್ರಮಾಣದ ಒತ್ತಡ ಬಿದ್ದಿರುವುದು ಸ್ಪಷ್ಟವಾಗಿ ಗೋಚರಿಸಿತು. ಅದು ಕೇವಲ ಸಾಮಾನ್ಯ ಮಾದರಿಯ ಹೃದಯಾಘಾತವಾಗಿರಲಿಲ್ಲ.

ತಕ್ಷಣದ ಸ್ಪಂದನೆ: ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ವೈದ್ಯರು ಕೂಡಲೇ ಪ್ರಾಥಮಿಕ ಚಿಕಿತ್ಸೆ ನೀಡಿ, ತುರ್ತಾಗಿ ಸುಸಜ್ಜಿತ ಆಸ್ಪತ್ರೆಗೆ ಕರೆದೊಯ್ಯಲು ಸೂಚಿಸಿದರು. ಪುನೀತ್ ಅವರು ತಮ್ಮದೇ ವಾಹನದಲ್ಲಿ ಆಸ್ಪತ್ರೆಯತ್ತ ಪ್ರಯಾಣ ಬೆಳೆಸಿದರು. ಪ್ರಯಾಣದ ವೇಳೆಯಲ್ಲಿ ಪತ್ನಿ ಅಶ್ವಿನಿ ಅವರ ಮಡಿಲಿನಲ್ಲಿ ತಲೆಯಿಟ್ಟು ಮಾತನಾಡುತ್ತಾ ವಿಶ್ರಮಿಸುತ್ತಿದ್ದರು.

ಅಂತಿಮ ಕ್ಷಣದ ದುರಂತ: ಆಸ್ಪತ್ರೆ ತಲುಪಲು ಕೇವಲ ಒಂದೇ ಒಂದು ನಿಮಿಷ ಬಾಕಿ ಇದೆಯೆನ್ನುವಾಗ ಪುನೀತ್ ಅವರ ಹೃದಯದ ಸ್ಪಂದನ ಸಂಪೂರ್ಣವಾಗಿ ನಿಂತುಹೋಯಿತು. ನಿರಂತರ ತೀವ್ರ ಯತ್ನಗಳ ಹೊರತಾಗಿಯೂ ವೈದ್ಯರಿಗೆ ಅವರನ್ನು ಬದುಕಿಸಿಕೊಳ್ಳಲು ಸಾಧ್ಯವಾಗಲಿಲ್ಲ.

ಇದನ್ನೂ ಓದಿ: ಪುನೀತ್ ರಾಜ್​​ಕುಮಾರ್ ಪುಣ್ಯಸ್ಮರಣೆ: ಅಪ್ಪು ಅಗಲಿ 5 ವರ್ಷ

ಈ ಘಟನೆಯನ್ನು ನೆನಪಿಸಿಕೊಂಡು ವೈದ್ಯರು ಇಂದಿಗೂ ತೀವ್ರ ಮನಸ್ಸಂತಾಪ ವ್ಯಕ್ತಪಡಿಸುತ್ತಾರೆ. ಪುನೀತ್ ಪುಣ್ಯ ಸ್ಮರಣೆ ಸಮಯದಲ್ಲಿ ಈ ಘಟನೆಯನ್ನು ವೈದ್ಯರು ನೆನಪಿಸಿಕೊಳ್ಳುತ್ತಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.