ಮತ್ತೆ ಒಂದಾದ ‘ಸೂರರೈ ಪೋಟ್ರು’ ಜೋಡಿ, ಸೂರ್ಯ ಜೊತೆಗೆ ಇನ್ನೂ ಮೂವರು ಸೆಲೆಬ್ರಿಟಿ ನಟರು

ತಮಿಳಿನ ಖ್ಯಾತ ನಟ ಸೂರ್ಯ (Suriya) ತಮ್ಮ ವಾರಗೆಯ ಸ್ಟಾರ್​ಗಳಾದ ವಿಜಯ್, ಅಜಿತ್ ಅವರ ಮಾದರಿಯನ್ನು ಅನುಸರಿಸದೇ ತಮ್ಮದೇ ಹಾದಿ ಮಾದರಿಯಲ್ಲಿ ನಡೆಯುತ್ತಿದ್ದಾರೆ. ತಲೆ ಬುಡವಿಲ್ಲದ ಮಾಸ್, ಮಸಾಲೆ ಸಿನಿಮಾಗಳ ಮೂಲಕ ರಂಜನೆ ಒದಗಿಸುವ ಹಾದಿ ಬಿಟ್ಟು ಕಂಟೆಂಟ್ ಆಧರಿತ, ಸಮಾಜ ತಿದ್ದುವ ಅಂಶಗಳುಳ್ಳ ಕತೆಗಳನ್ನು ಆಯ್ದುಕೊಂಡು ನಟಿಸುತ್ತಿದ್ದಾರೆ. ‘ಜೈ ಭೀಮ್’, ‘ಸೂರರೈ ಪೊಟ್ರು’ ಇದಕ್ಕೆ ಉದಾಹರಣೆ. ವಿಶೇಷವೆಂದರೆ ಇದೀಗ ‘ಸೂರರೈ ಪೊಟ್ರು’ ಸಿನಿಮಾ ತಂಡದೊಟ್ಟಿಗೆ ಮತ್ತೊಮ್ಮೆ ಕೈ ಜೋಡಿಸಿದ್ದಾರೆ ನಟ ಸೂರ್ಯ.

‘ಸೂರರೈ ಪೋಟ್ರು’ ಸಿನಿಮಾ ನಿರ್ದೇಶಿಸಿದ್ದ ನಿರ್ದೇಶಕಿ ಸುಧಾ ಕೊಂಗರ ಮತ್ತೊಮ್ಮೆ ಸೂರ್ಯಗಾಗಿ ಸಿನಿಮಾ ಮಾಡಲಿದ್ದಾರೆ. ಕನ್ನಡಿಗ ಕ್ಯಾಪ್ಟನ್ ಗೋಪಿನಾಥ್ ಜೀವನ ಆಧಾರಿತ ಸಿನಿಮಾ ‘ಸೂರರೈ ಪೋಟ್ರು’ ಮೂಲಕ ಸಂಚಲನ ಸೃಷ್ಟಿಸಿದ್ದ ಈ ಜೋಡಿ ಮತ್ತೊಮ್ಮೆ ಅದೇ ಮ್ಯಾಜಿಕ್ ಸೃಷ್ಟಿಸಲಿದೆ ಎಂಬ ನಿರೀಕ್ಷೆ ಸಿನಿಮಾ ಅಭಿಮಾನಿಗಳದ್ದು. ಅಂದಹಾಗೆ ಈ ಸಿನಿಮಾದಲ್ಲಿ ಸೂರ್ಯ ಜೊತೆಗೆ ಇನ್ನೂ ಇಬ್ಬರು ಸ್ಟಾರ್ ಗಳು ಇರಲಿದ್ದಾರೆ.

ಸುಧಾ ಕೊಂಗರಾ ಹಾಗೂ ಸೂರ್ಯಾ ಅವರು ‘ಸೂರರೈ ಪೋಟ್ರು’ ಸಿನಿಮಾ ಪ್ರೇಕ್ಷಕರು ಹಾಗೂ ವಿಮರ್ಷಕರಿಂದ ಭರಪೂರ ಮೆಚ್ಚುಗೆ ಪಡೆದುಕೊಂಡಿತ್ತು. ಆಸ್ಕರ್ ರೇಸ್​ಗೂ ಇಳಿದಿದ್ದ ಈ ಚಿತ್ರ ಹಲವು ವಿಭಾಗದಲ್ಲಿ ರಾಷ್ಟ್ರಪ್ರಶಸ್ತಿ ಬಾಚಿಕೊಂಡಿತ್ತು. ಅತ್ಯುತ್ತಮ ನಟ, ಅತ್ಯುತ್ತಮ ನಟಿ, ಅತ್ಯುತ್ತಮ ಹಿನ್ನೆಲೆ ಸಂಗೀತ, ಅತ್ಯುತ್ತಮ ಚಿತ್ರ ಪ್ರಶಸ್ತಿಗಳನ್ನು ಬಾಚಿಕೊಂಡಿತ್ತು. ಇದೀಗ ಹೊಸ ಸಿನಿಮಾಕ್ಕೂ ‘ಸೂರರೈ ಪೋಟ್ರು’ವಿನ ಅದೇ ತಂತ್ರಜ್ಞರ ತಂಡ ಒಟ್ಟಾಗುತ್ತಿದೆ. ಕೆಲವು ನಟ-ನಟಿಯರಷ್ಟೆ ಬದಲಾಗುತ್ತಿದ್ದಾರೆ.

ಇದನ್ನೂ ಓದಿ:Suriya: ಫ್ಯಾಮಿಲಿ ಸಮೇತ ಮುಂಬೈನಲ್ಲಿ ಸೆಟ್ಲ್​ ಆದ ನಟ ಸೂರ್ಯ; ಚೆನ್ನೈ ತೊರೆಯುವಂಥದ್ದು ಏನಾಯ್ತು?

‘ಸೂರರೈ ಪೋಟ್ರೂ’ ಮೂಲಕ ಧಮಾಕ ಎಬ್ಬಿಸಿದ್ದ ಸೂರ್ಯ ಹಾಗೂ ಸುಧಾ ಕೊಂಗರ ಹೊಸ ಸಿನಿಮಾದಲ್ಲಿ ದೊಡ್ಡ ತಾರಾಬಳಗವೇ ಇದೆ. ಮಲಯಾಳಂ ಚಿತ್ರರಂಗದಿಂದ ಬಂದು ತಮಿಳು, ತೆಲುಗು, ಹಿಂದಿಯಲ್ಲಿಯೂ ತಮ್ಮದೇ ಆದ ಛಾಪು ಮೂಡಿಸಿರುವ ಹ್ಯಾಂಡ್ಸಮ್ ನಟ ದುಲ್ಕರ್ ಸಲ್ಮಾನ್, ಮಲಯಾಳಂ ಮೂಲದ ನಟಿ ನಜ್ರಿಯಾ ಫಹದ್ ಹಾಗೂ ಬಾಲಿವುಡ್​ನ ನಟ ವಿಜಯ್ ವರ್ಮಾ ಅವರುಗಳು ಸಿನಿಮಾದ ಭಾಗವಾಗಿದ್ದು ಸಿನಿಮಾಕ್ಕೆ ‘ಪುರನಾನೂರು’ ಎಂದು ಹೆಸರಿಡಲಾಗಿದೆ. ಪ್ರತಿಭಾವಂತ ನಟರ ದಂಡನ್ನೇ ಸುಧಾ ಕೊಂಗರಾ ಒಟ್ಟು ಮಾಡಿಕೊಂಡಿದ್ದು, ಪವರ್​ಫುಲ್ ಕತೆಯನ್ನು ಹೇಳಲು ಮುಂದಾಗಿದ್ದಾರೆ.

‘ಪುರನಾನೂರು’ ಎಂದು ಸಿನಿಮಾಕ್ಕೆ ಹೆಸರಿಡಲಾಗಿದೆಯಾದರೂ ಇದು ಸಿನಿಮಾದ ಪೂರ್ತಿ ಹೆಸರಲ್ಲ. ಸಿನಿಮಾದ ಟೈಟಲ್​ ಕಾರ್ಡ್​ನಲ್ಲಿ ಸಿನಿಮಾದ ಹೆಸರಿನ ಮೊದಲಾರ್ಧವನ್ನು ಬಹಿರಂಗಗೊಳಿಸಲಾಗಿಲ್ಲ. ಸಿನಿಮಾದ ಹೆಸರು ಪೂರ್ತಿ ತಿಳಿಯಲು ಸಿನಿಮಾವನ್ನೇ ನೋಡಬೇಕಿದೆ ಅನಿಸುತ್ತದೆ. ಸೂರ್ಯ ಒಡೆತನದ 2D ಎಂಟರ್‌ಟೈನ್‌ಮೆಂಟ್ ಅಡಿಯಲ್ಲಿ ಸೂರ್ಯರ ಪತ್ನಿ ಜ್ಯೋತಿಕಾ, ಸೂರ್ಯ ಮತ್ತು ರಾಜಶೇಖರ್ ಕರ್ಪೂರ, ಸುಂದರಪಾಂಡಿಯನ್ ಅವರುಗಳು ಈ ಸಿನಿಮಾ ನಿರ್ಮಿಸಲಿದ್ದಾರೆ. ಸಂಗೀತ ಮಾಂತ್ರಿಕ ಜಿವಿ ಪ್ರಕಾಶ್ ಸಂಗೀತ ನಿರ್ದೇಶನ ಮಾಡಲಿದ್ದಾರೆ. ಇದು ಇವರ 100 ಸಿನಿಮಾ ಎಂಬುದು ಮತ್ತೊಂದು ವಿಶೇಷ. ಸೂರರೈ ಪೋಟ್ರೂ ಮೂಲಕ ಮೋಡಿ ಮಾಡಿದ್ದ ಸೂರ್ಯ, ಸುಧಾ ಹಾಗೂ ಜಿವಿ ಪ್ರಕಾಶ್ ಹೊಸ ಪ್ರಾಜೆಕ್ಟ್ ಮೇಲೆ ನಿರೀಕ್ಷೆ ಇಮ್ಮಡಿಯಾಗಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ