ಅದ್ಭುತ ಆಟ ಆಡಿದ ಅರ್ಹರಿಗೇ ಸಿಕ್ಕಿತು ಮನೆಯ ಕ್ಯಾಪ್ಟೆನ್ಸಿ: ಯಾರದು?

ಬಿಗ್​​ಬಾಸ್ ಮನೆಯಲ್ಲಿ ಪ್ರತಿ ವಾರವೂ ಜಗಳ, ಗೊಂದಲ, ಕಿತ್ತಾಟ, ಅರಚಾಟ, ಟಾಸ್ಕ್ ರದ್ದು ಹೀಗೆ ಒಂದಲ್ಲ ಒಂದು ನಡೆಯುತ್ತಲೇ ಇತ್ತು. ಆದರೆ ಈ ವಾರ ಭಿನ್ನ ರೀತಿಯ ವಾತಾವರಣ ಮನೆಯಲ್ಲಿತ್ತು. ಅಲ್ಲೊಮ್ಮೆ ಇಲ್ಲೊಮ್ಮೆ ಸಣ್ಣ ಜನಗಳು ಆದವಾದರೂ ಇಡೀ ವಾರ ಪ್ರೇಕ್ಷಕರಿಗಂತೂ ಬಹಳ ಎಂಟರ್ಟೈನಿಂಗ್ ಆಗಿತ್ತು. ಈ ವಾರದ ಟಾಸ್ಕ್ ಇದ್ದಿದ್ದೇ ಹಾಗೆ. ‘ರಾಕ್ಷಸ-ಗಂಧರ್ವ’ ರೀತಿಯ ಹೊಡೆದಾಡಲು-ಬಡಿದಾಡಲು ಪ್ರೇರೇಪಿಸುವ ಟಾಸ್ಕ್ ಅಲ್ಲದೆ, ಬುದ್ಧಿವಂತಿಕೆ, ಜಾಣತನ ಬಳಸಿ ಆಡುವ ಟಾಸ್ಕ್ ಅನ್ನು ನೀಡಲಾಗಿತ್ತು. ಲೂಟಿಕೋರರು, ಮತ್ತು ಕಾವಲುಗಾರರ ನಡುವೆ ನಡೆದ ಟಾಸ್ಕ್​​ನಲ್ಲಿ ಅಂತಿಮವಾಗಿ ಲೂಟಿಕೋರರು ಗೆದ್ದರು.

ಲೂಟಿಕೋರರ ಬಳಗದಲ್ಲಿದ್ದ ತಾಂಡವ್, ಆಸಿಯಾ, ಸೌಂದರ್ಯಾ, ಲಕ್ಷ್ಮಿ ಮತ್ತು ಸೋನಿಕಾ ಅವರ ನಡುವೆ ಕ್ಯಾಪ್ಟೆನ್ಸಿಗೆ ಸ್ಪರ್ಧೆ ನಡೆಯಿತು. ಸೂಚನೆಗಳನ್ನು ಆಲಿಸಿ ಅಕ್ಷರಗಳನ್ನು ಜೋಡಿಸುವ ರೌಂಡ್​​ನಲ್ಲಿ ಆಸಿಯಾ ಮತ್ತು ಸೌಂದರ್ಯಾ ಗೆದ್ದರು. ಅಂತಿಮವಾಗಿ ಸೌಂದರ್ಯಾ ಮತ್ತು ಆಸಿಯಾ ಅವರುಗಳೇ ಕ್ಯಾಪ್ಟೆನ್ಸಿ ಪಟ್ಟಕ್ಕೆ ಸ್ಪರ್ಧೆ ಮಾಡುವಂತಾಯ್ತು. ಕ್ಯಾಪ್ಟೆನ್ಸಿಗಾಗಿ ನಡೆದ ಬ್ಯಾಲೆನ್ಸಿಂಗ್ ಟಾಸ್ಕ್​​ನಲ್ಲಿ ಸೌಂದರ್ಯಾ ಅದ್ಭುತವಾಗಿ ಆಟ ಆಡಿ ಗೆದ್ದರು. ಆ ಮೂಲಕ ಎರಡನೇ ಬಾರಿ ಆಸಿಯಾ ಫಿನಾಲೆ ವರೆಗೆ ಬಂದು ಸೋತರೆ, ಸೌಂದರ್ಯಾ ಮೊದಲ ಬಾರಿಗೆ ಮನೆಯ ಕ್ಯಾಪ್ಟನ್ ಆದರು.

ಈ ವಾರ ಸೌಂದರ್ಯಾ ಅದ್ಭುತವಾಗಿ ಆಟ ಆಡಿದ್ದರು. ಸೌಂದರ್ಯಾ ಅವರು ಟಾಸ್ಕ್​​ನ ವೇಳೆ ಸಹ ಅದ್ಭುತವಾದ ಪ್ರದರ್ಶನ ನೀಡಿದರು. ಇಡೀ ವಾರ ಎನರ್ಜಿಯಿಂದ ಆಟ ಆಡಿದ್ದು ಮಾತ್ರವೇ ಅಲ್ಲದೆ ಇಡೀ ಮನೆಯಲ್ಲಿ ಎನರ್ಜಿ ಇರುವಂತೆ ನೋಡಿಕೊಂಡರು. ಜೊತೆಗೆ ಲೂಟಿಕೋರರ ತಂಡ ಟಾಸ್ಕ್​​ ಗೆಲ್ಲುವಲ್ಲಿ ಬಹಳ ಪ್ರಮುಖವಾದ ಪಾತ್ರ ಸಹ ವಹಿಸಿದರು. ಇದೇ ಕಾರಣಕ್ಕೆ ಅವರಿಗೆ ಈ ವಾರದ ಉತ್ತಮ ಸಹ ದೊರಕಿತು. ಅದರ ಬೆನ್ನಲ್ಲೆ ಅವರಿಗೆ ಕ್ಯಾಪ್ಟೆನ್ಸಿ ಸಹ ದೊರಕಿದ್ದು, ಅರ್ಹರಿಗೆ ಪಟ್ಟ ದೊರೆತಂತೆ ಆಯ್ತು.

ಇದನ್ನೂ ಓದಿ:ಬಿಗ್​​ಬಾಸ್ ಮನೆಯಲ್ಲಿ ಫ್ಯಾಷನ್ ಶೋ, ಸೌಂದರ್ಯಾ-ಆಸಿಯಾ ಕ್ಯಾಟ್ ವಾಕ್: ವಿಡಿಯೋ

ಸೌಂದರ್ಯಾ ಅವರು ಕ್ಯಾಪ್ಟೆನ್ಸಿ ಗೆದ್ದ ಕೂಡಲೇ ಎಲ್ಲರಿಗೂ ಈ ವಾರ ಫ್ರೀ, ನಿಮ್ಮಷ್ಟದಂತೆ ಇರಿ ಎಂದರು. ಅಂದಹಾಗೆ ಈ ವಾರದ ಕಿಚ್ಚನ ಚಪ್ಪಾಳೆಯೂ ಸಹ ಸೌಂದರ್ಯಾ ಅವರಿಗೇ ಹೋಗುವ ಸಾಧ್ಯತೆ ದಟ್ಟವಾಗಿದೆ. ಏಕೆಂದರೆ ಅವರು ಅಷ್ಟು ಅದ್ಭುತವಾಗಿ ಈ ವಾರ ಆಟ ಆಡಿದ್ದಾರೆ. ನಾಳೆ (ಶನಿವಾರ) ವೀಕೆಂಡ್ ಎಪಿಸೋಡ್ ಎದುರಾಗಲಿದ್ದು, ಈ ವಾರ ಎಲ್ಲರೂ ಚೆನ್ನಾಗಿ ಪ್ರದರ್ಶನ ನೀಡಿದ್ದು, ಸುದೀಪ್ ಅವರು ಯಾವ ವಿಷಯವನ್ನು ಎತ್ತಿಕೊಳ್ಳಲಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 11:04 pm, Fri, 23 October 26