40ರ ನಂತರ ಡಯಟ್ನಲ್ಲಿ ಇರಬೇಕಾದ 5 ಆಹಾರಗಳಿವು! ಆರೋಗ್ಯಕರ ಏಜಿಂಗ್ಗೆ ಸಹಾಯ ಮಾಡಬಹುದು
40ರ ನಂತರ ದೇಹದ ಆರೋಗ್ಯ ಕಾಪಾಡಿಕೊಳ್ಳಲು ಆಹಾರ ಬಗ್ಗೆ ಹೆಚ್ಚಿನ ಗಮನ ಅಗತ್ಯ. ಬೆರ್ರಿ ಹಣ್ಣುಗಳು, ಮೊಟ್ಟೆ, ಕೊಬ್ಬಿನ ಮೀನು, ಕ್ವಿನೋವಾ ಮತ್ತು ಹಸಿರು ಸೊಪ್ಪುಗಳು ಪ್ರೋಟೀನ್, ಫೈಬರ್, ಆ್ಯಂಟಿಆಕ್ಸಿಡೆಂಟ್ಗಳು, ಒಮೆಗಾ-3 ಹಾಗೂ ಹಲವು ಪೋಷಕಾಂಶಗಳನ್ನು ಒದಗಿಸಬಹುದು. ಇದರ ಜೊತೆಗೆ ವ್ಯಾಯಾಮ, ಉತ್ತಮ ನಿದ್ರೆ ಮತ್ತು ಸಮತೋಲಿತ ಆಹಾರ ಯಂಗ್ ಆಗಿ ಕಾಣಲು ನೆರವಾಗಬಹುದು.
ವಯಸ್ಸು ಹೆಚ್ಚಾಗುತ್ತಿದ್ದಂತೆ ದೇಹದಲ್ಲಿ ಹಲವು ಸಹಜ ಬದಲಾವಣೆಗಳು ಕಾಣಿಸಿಕೊಳ್ಳುತ್ತವೆ. 40ರ ನಂತರ ಸ್ನಾಯುಗಳ ಆರೋಗ್ಯ, ಹೃದಯ, ಮೆದುಳು, ಮೂಳೆಗಳು ಮತ್ತು ಚರ್ಮದ ಆರೋಗ್ಯದ ಬಗ್ಗೆ ಹೆಚ್ಚಿನ ಗಮನ ನೀಡುವುದು ಬಹಳ ಮುಖ್ಯ. ವಯಸ್ಸನ್ನು ನಿಲ್ಲಿಸುವ ಯಾವುದೇ ಸೂಪರ್ಫುಡ್ ಇಲ್ಲ. ಆದರೆ ಆ್ಯಂಟಿಆಕ್ಸಿಡೆಂಟ್ಗಳು, ಪ್ರೋಟೀನ್, ಫೈಬರ್, ಆರೋಗ್ಯಕರ ಕೊಬ್ಬುಗಳು, ವಿಟಮಿನ್ಗಳು ಮತ್ತು ಖನಿಜಗಳು ಸಮೃದ್ಧವಾಗಿರುವ ಆಹಾರಗಳು ಆರೋಗ್ಯ ಕಾಪಾಡಿಕೊಳ್ಳಲು ನೆರವಾಗಬಹುದು. ಹಾಗಾದರೆ 40ರ ನಂತರದ ಆಹಾರದಲ್ಲಿ ಯಾವ ಆಹಾರಗಳಿಗೆ ಪ್ರಮುಖ ಸ್ಥಾನ ನೀಡಬಹುದು, ಯಂಗ್ ಆಗಿ ಕಾಣಿಸಿಕೊಳ್ಳಲು ಆಹಾರಕ್ರಮ ಹೇಗಿರಬೇಕು ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.
ಬೆರ್ರಿ ಹಣ್ಣುಗಳು
ಸ್ಟ್ರಾಬೆರಿ, ಬ್ಲೂಬೆರ್ರಿ ಸೇರಿದಂತೆ ಬೆರ್ರಿ ಹಣ್ಣುಗಳಲ್ಲಿ ಫೈಬರ್ ಮತ್ತು ವಿವಿಧ ಆ್ಯಂಟಿಆಕ್ಸಿಡೆಂಟ್ಗಳು ಕಂಡುಬರುತ್ತವೆ. ಇವುಗಳನ್ನು ಸಮತೋಲಿತ ಆಹಾರದ ಭಾಗವಾಗಿ ಸೇವಿಸುವುದರಿಂದ ಒಟ್ಟಾರೆ ಆರೋಗ್ಯಕ್ಕೆ ಒಳ್ಳೆಯದು. ತಾಜಾ ಹಣ್ಣುಗಳನ್ನು ಮೊಸರು ಅಥವಾ ಓಟ್ಸ್ ಜೊತೆ ಸೇವಿಸಬಹುದು. ಹಣ್ಣಿನ ಹೆಸರಿನಲ್ಲಿ ಸಕ್ಕರೆ ಸೇರಿಸಿದ ಜ್ಯೂಸ್ಗಿಂತ ಸಂಪೂರ್ಣ ಹಣ್ಣು ಉತ್ತಮ ಆಯ್ಕೆ.
ಮೊಟ್ಟೆ
40ರ ನಂತರ ಸ್ನಾಯುಗಳ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಸಾಕಷ್ಟು ಪ್ರೋಟೀನ್ ಸೇವನೆ ಮಾಡುವುದು ಬಹಳ ಮುಖ್ಯ. ಮೊಟ್ಟೆ ಉತ್ತಮ ಗುಣಮಟ್ಟದ ಪ್ರೋಟೀನ್ನ ಮೂಲವಾಗಿದ್ದು, ಹಲವು ಅಗತ್ಯ ಪೋಷಕಾಂಶಗಳನ್ನು ಹೊಂದಿದೆ. ಬೇಯಿಸಿದ ಮೊಟ್ಟೆ, ತರಕಾರಿಗಳೊಂದಿಗೆ ಆಮ್ಲೆಟ್ ಅಥವಾ ಇತರ ಸಮತೋಲಿತ ಆಹಾರದ ಭಾಗವಾಗಿ ಇದನ್ನು ಸೇವಿಸಬಹುದು.
ಕೊಬ್ಬಿನ ಮೀನು
ಸಾಲ್ಮನ್, ಸಾರ್ಡಿನ್, ಮ್ಯಾಕೆರೆಲ್ನಂತಹ ಕೊಬ್ಬಿನ ಮೀನುಗಳಲ್ಲಿ ಒಮೆಗಾ-3 ಕೊಬ್ಬಿನಾಮ್ಲಗಳು ಇರುತ್ತವೆ. ಇವು ಹೃದಯ ಮತ್ತು ಮೆದುಳಿನ ಆರೋಗ್ಯಕ್ಕೆ ಸಂಬಂಧಿಸಿದ ಪೌಷ್ಟಿಕಾಂಶಗಳನ್ನು ಒದಗಿಸುತ್ತವೆ. ಕೆಲವು ಮೀನುಗಳಲ್ಲಿ ವಿಟಮಿನ್ ಡಿ ಕೂಡ ಸಿಗುತ್ತದೆ. ವಾರದಲ್ಲಿ ಒಮ್ಮೆ ಮೀನು ಸೇವನೆ ಮಾಡುವುದು ಒಟ್ಟಾರೆ ಆರೋಗ್ಯಕ್ಕೆ ಒಳ್ಳೆಯದು.
ಇದನ್ನೂ ಓದಿ: ಕಸದಂತೆ ಎಸೆಯುವ ಕಲ್ಲಂಗಡಿ ಬೀಜವೇ ಪೌಷ್ಟಿಕ ಸ್ನ್ಯಾಕ್! ಸೇವಿಸುವ ಸರಿಯಾದ ವಿಧಾನ ತಿಳಿಯಿರಿ
ಕ್ವಿನೋವಾ
ಸಾಮಾನ್ಯವಾಗಿ ಕ್ವಿನೋವಾದಲ್ಲಿ ಪ್ರೋಟೀನ್ ಮತ್ತು ಫೈಬರ್ ದೊರೆಯುತ್ತದೆ. ಫೈಬರ್ ಹೊಟ್ಟೆ ತುಂಬಿದ ಅನುಭವವನ್ನು ಹೆಚ್ಚಿಸಲು ಮತ್ತು ಜೀರ್ಣಕ್ರಿಯೆಯ ಆರೋಗ್ಯಕ್ಕೆ ಸಹಾಯ ಮಾಡಬಹುದು. ತೂಕ ನಿಯಂತ್ರಣಕ್ಕೆ ಇದು ಉಪಯುಕ್ತ ಆಹಾರದ ಆಯ್ಕೆಯಾಗಬಹುದು, ಆದರೆ ಕ್ವಿನೋವಾ ಮಾತ್ರ ತೂಕ ಕಡಿಮೆ ಮಾಡಲು ಸಹಾಯ ಮಾಡುವುದಿಲ್ಲ.
ಹಸಿರು ಸೊಪ್ಪುಗಳು
ಪಾಲಕ್ ಸೊಪ್ಪು, ಮೆಂತ್ಯ ಸೊಪ್ಪು ಸೇರಿದಂತೆ ವಿವಿಧ ಹಸಿರು ಸೊಪ್ಪುಗಳಲ್ಲಿ ಫೋಲೇಟ್, ವಿಟಮಿನ್ ಕೆ, ವಿಟಮಿನ್ ಸಿ ಮತ್ತು ಇತರ ಸೂಕ್ಷ್ಮ ಪೋಷಕಾಂಶಗಳು ದೊರೆಯುತ್ತವೆ. ನಿಯಮಿತವಾಗಿ ವಿವಿಧ ಬಗೆಯ ಸೊಪ್ಪುಗಳನ್ನು ಆಹಾರದಲ್ಲಿ ಸೇರಿಸುವುದು ಆರೋಗ್ಯಕರ ಆಹಾರ ಪದ್ಧತಿಗೆ ಉತ್ತಮ ಸೇರ್ಪಡೆಯಾಗಿದೆ.
ಆಹಾರ ಮಾತ್ರ ಸಾಕಾಗುವುದಿಲ್ಲ
ಯೌವನವನ್ನು ಕಾಪಾಡಿಕೊಳ್ಳಲು ಕೇವಲ ಒಂದು ಆಹಾರವನ್ನು ಅವಲಂಬಿಸುವುದು ಸರಿಯಲ್ಲ. ಸಾಕಷ್ಟು ಪ್ರೋಟೀನ್, ತರಕಾರಿ, ಹಣ್ಣು, ಸಂಪೂರ್ಣ ಧಾನ್ಯಗಳು ಮತ್ತು ಆರೋಗ್ಯಕರ ಕೊಬ್ಬುಗಳಿರುವ ಸಮತೋಲಿತ ಆಹಾರ, ನಿಯಮಿತ ದೈಹಿಕ ಚಟುವಟಿಕೆ, ಉತ್ತಮ ನಿದ್ರೆ, ಒತ್ತಡ ನಿಯಂತ್ರಣ ಮತ್ತು ಧೂಮಪಾನದಿಂದ ದೂರವಿದ್ದರೆ ನಿಮ್ಮಿಂದ ವೃದ್ಧಾಪ್ಯವೂ ದೂರವಿರುತ್ತದೆ.
ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ