ರೈಡ್ ಮುಗಿಸಿ ಫೋನ್ ಮರೆತ ಪ್ರಯಾಣಿಕ: ಮೊಬೈಲ್ ವಾಪಸ್ ಬೇಕಿದ್ರೆ 18,000 ಕೊಡು ಎಂದ ರ‍್ಯಾಪಿಡೋ ಚಾಲಕ!
ಬೆಂಗಳೂರಿನಲ್ಲಿ ರ‍್ಯಾಪಿಡೋ ಚಾಲಕನೊಬ್ಬ ಪ್ರಯಾಣಿಕ ವಾಹನದಲ್ಲೇ ಮರೆತು ಬಿಟ್ಟಿದ್ದ ಬೆಲೆಬಾಳುವ ಮೊಬೈಲ್ ಫೋನ್‌ನೊಂದಿಗೆ ಪರಾರಿಯಾಗಿದ್ದಾನೆ. ಅದನ್ನು ವಾಪಸ್ ನೀಡಲು 18,000 ರೂಪಾಯಿ ನೀಡುವಂತೆ ಚಾಲಕ ಬ್ಲಾಕ್‌ಮೇಲ್ ಮಾಡಿದ್ದು, ಈ ಸಂಬಂಧ ಸಂತ್ರಸ್ತ ಪ್ರಯಾಣಿಕ ಆ್ಯಪ್ ಸಂಸ್ಥೆ ಹಾಗೂ ಸ್ಥಳೀಯ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾನೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.
ಮುಖ್ಯಾಂಶಗಳು
- ಪ್ರಯಾಣಿಕ ಮರೆತು ಬಿಟ್ಟ ಮೊಬೈಲ್‌ನೊಂದಿಗೆ ಪರಾರಿಯಾದ ರ‍್ಯಾಪಿಡೋ ಚಾಲಕ.
- ಫೋನ್ ವಾಪಸ್ ನೀಡಲು 18,000 ರೂಪಾಯಿ ನೀಡುವಂತೆ ಬ್ಲಾಕ್‌ಮೇಲ್.
- ಚಾಲಕನ ವಿರುದ್ಧ ರ‍್ಯಾಪಿಡೋ ಮತ್ತು ಪೊಲೀಸ್ ಠಾಣೆಗೆ ದೂರು ಸಲ್ಲಿಕೆ.
ಬೆಂಗಳೂರು, ಸೆಪ್ಟೆಂಬರ್ 13: ನಗರದಲ್ಲಿ ರ‍್ಯಾಪಿಡೋ ಬೈಕ್ ಟ್ಯಾಕ್ಸಿ ಚಾಲಕನೊಬ್ಬ ಪ್ರಯಾಣಿಕನ ದುಬಾರಿ ಮೊಬೈಲ್ ಫೋನ್‌ನೊಂದಿಗೆ ಪರಾರಿಯಾಗಿರುವ ಘಟನೆ ಬೆಳಕಿಗೆ ಬಂದಿದೆ. ರೈಡ್ ಮುಗಿದ ನಂತರ ಪ್ರಯಾಣಿಕ ಆಕಸ್ಮಿಕವಾಗಿ ಬೈಕ್‌ನಲ್ಲೇ ಮರೆತು ಬಿಟ್ಟಿದ್ದ ಫೋನ್ ಅನ್ನು ವಾಪಸ್ ತಂದುಕೊಡಲು ಚಾಲಕ 18,000 ರೂ. ಹಣಕ್ಕೆ ಬೇಡಿಕೆಯಿಟ್ಟು ಬ್ಲಾಕ್‌ಮೇಲ್ ಮಾಡಿದ್ದಾನೆ. ಈ ಆಘಾತಕಾರಿ ಘಟನೆಯಿಂದ ಬೇಸತ್ತ ಪ್ರಯಾಣಿಕನು ಆ್ಯಪ್ ಸಂಸ್ಥೆಗೆ ದೂರು ನೀಡುವುದರ ಜೊತೆಗೆ ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಪೊಲೀಸರು ಚಾಲಕನ ಪತ್ತೆಗೆ ತನಿಖೆ ಆರಂಭಿಸಿದ್ದಾರೆ.
ನಡೆದಿದ್ದೇನು?
ಪ್ರಯಾಣಿಕನು ನಗರದಲ್ಲಿ ರ‍್ಯಾಪಿಡೋ ರೈಡ್ ಬುಕ್ ಮಾಡಿಕೊಂಡು ಪ್ರಯಾಣ ಮುಗಿಸಿದ ನಂತರ, ಆಕಸ್ಮಿಕವಾಗಿ ತನ್ನ ಬೆಲೆಬಾಳುವ ಮೊಬೈಲ್ ಫೋನ್ ಅನ್ನು ವಾಹನದಲ್ಲೇ ಮರೆತು ಬಿಟ್ಟಿದ್ದ. ಕೇವಲ ಕೆಲವೇ ನಿಮಿಷಗಳಲ್ಲಿ ತಾನು ಫೋನ್ ಮರೆತಿರುವುದು ನೆನಪಿಗೆ ಬಂದು ತಕ್ಷಣವೇ ಚಾಲಕನನ್ನು ಸಂಪರ್ಕಿಸಲು ಯತ್ನಿಸಿದ್ದಾನೆ.
ಮೊಬೈಲ್ ನೀಡುವಂತೆ ಚಾಲಕನನ್ನು ಕೇಳಿದಾಗ, ಆತ ಉಚಿತವಾಗಿ ಫೋನ್ ವಾಪಸ್ ತಂದುಕೊಡಲು ಸಾಧ್ಯವಿಲ್ಲವೆಂದು ವಾದಿಸಿದ್ದಾನೆ. ಮೊಬೈಲ್ ಮರಳಿಸಬೇಕಾದರೆ ತನಗೆ 18,000 ರೂ. ನೀಡಬೇಕು ಎಂದು ಬ್ಲಾಕ್‌ಮೇಲ್ ಮಾಡಲು ಪ್ರಾರಂಭಿಸಿದ್ದಾನೆ. ಪ್ರಯಾಣಿಕನು ಎಷ್ಟೇ ಮನವಿ ಮಾಡಿದರೂ ಚಾಲಕ ಹಣ ನೀಡದೆ ಫೋನ್ ನೀಡಲು ನಿರಾಕರಿಸಿದ್ದಾನೆ.
ಪೊಲೀಸ್ ದೂರು ದಾಖಲು
ಚಾಲಕನ ಈ ವರ್ತನೆಯಿಂದ ಬೇಸತ್ತ ಪ್ರಯಾಣಿಕನು ತಕ್ಷಣವೇ ರ‍್ಯಾಪಿಡೋ ಆ್ಯಪ್‌ನ ಕಸ್ಟಮರ್ ಕೇರ್‌ಗೆ ದೂರು ನೀಡಿದ್ದಾನೆ. ಅಲ್ಲದೆ, ಸ್ಥಳೀಯ ಪೊಲೀಸ್ ಠಾಣೆಗೆ ತೆರಳಿ ಚಾಲಕನ ವಿರುದ್ಧ ಅಧಿಕೃತ ದೂರು ದಾಖಲಿಸಿದ್ದಾನೆ. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ಪೊಲೀಸರು, ಮೊಬೈಲ್ ಕದ್ದು ಬ್ಲಾಕ್‌ಮೇಲ್ ಮಾಡುತ್ತಿರುವ ರ‍್ಯಾಪಿಡೋ ಚಾಲಕನ ಪತ್ತೆಗೆ ಜಾಲ ಬೀಸಿದ್ದು, ತನಿಖೆ ಚುರುಕುಗೊಳಿಸಿದ್ದಾರೆ.
ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ