ಹುಬ್ಬಳ್ಳಿಯಲ್ಲಿ ಮಾಂಜಾ ದಾರಕ್ಕೆ ಬ್ರೇಕ್: ಆನ್‌ಲೈನ್‌ನಲ್ಲಿ ಭರ್ಜರಿ ಮಾರಾಟ; ವ್ಯಾಪಾರಿಗಳು ಆಕ್ರೋಶ

ಹುಬ್ಬಳ್ಳಿ, ಅಕ್ಟೋಬರ್​​ 24: ನಗರದಲ್ಲಿ ಮಾಂಜಾ ದಾರದಿಂದ ಸಾಲು ಸಾಲು ಅವಘಡಗಳು ಸಂಭವಿಸಿದ ಬೆನ್ನಲ್ಲೇ ಪೊಲೀಸರು ಸಾಕಷ್ಟು ಕ್ರಮಗಳನ್ನು ಕೈಗೊಂಡಿದ್ದಾರೆ. ಮಾಂಜಾ ಮಾರಾಟ ಮಾಡುವವರು ಮತ್ತು ಬಳಕೆ ಮಾಡುವವರ ವಿರುದ್ಧ ಕ್ರಿಮಿನಲ್ ಕೇಸ್ ದಾಖಲಿಸುತ್ತಿದ್ದಾರೆ. ಆದರೆ ಇದೇ ಮಾಂಜಾ ದಾರ ಇದೀಗ ಗಾಳಿಪಟ ವ್ಯಾಪರಕ್ಕೆ ಹೊಡೆತ ನೀಡಿದೆ. ಇನ್ನೊಂದೆಡೆ ಆನಲೈನ್​ನಲ್ಲಿ ಮಾಂಜಾ ಸಿಗುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ.

ಕ್ರಿಮಿನಲ್ ಕೇಸ್​​ ಹಾಕುವ ಎಚ್ಚರಿಕೆ ನೀಡಿದ ಪೊಲೀಸ್​ 

ಹುಬ್ಬಳ್ಳಿಯಲ್ಲಿ ಮೊನ್ನೆಯಷ್ಟೇ ಮಾಂಜಾದಾರಕ್ಕೆ ಸಿಲುಕಿ ವಿದ್ಯಾ ಗೌಡರ ಎನ್ನುವ 38 ವರ್ಷದ ಮಹಿಳೆ ಮೃತಪಟ್ಟಿದ್ದರು. ಇನ್ನು ಹುಬ್ಬಳ್ಳಿಯಲ್ಲಿ ಮಾಂಜಾದಾರದಿಂದ ಸಾಲು ಸಾಲು ಅವಘಡಗಳು ಸಂಭವಿಸಿವೆ. ಹೀಗಾಗಿ ಹುಬ್ಬಳ್ಳಿ-ಧಾರವಾಡ ಪೊಲೀಸರು ಕಠಿಣ ಕ್ರಮಕ್ಕೆ ಮುಂದಾಗಿದ್ದಾರೆ. ಮಾಂಜಾ ಮಾರಾಟ ಮಾಡುತ್ತಿದ್ದ ಅಂಗಡಿಗಳ ಮೇಲೆ ದಾಳಿ ಮಾಡಿ ಮಾಂಜಾ ಜಪ್ತಿ ಮಾಡಿದ್ದಾರೆ. ಯಾರು ಮಾಂಜಾದಾರ ಮಾರಾಟ ಮಾಡುತ್ತಾರೋ, ಯಾರು ಬಳಕೆ ಮಾಡುತ್ತಾರೋ ಅವರ ವಿರುದ್ಧ ಕ್ರಿಮಿನಲ್ ಕೇಸ್ ಹಾಕುವ ಎಚ್ಚರಿಕೆ ನೀಡಿದ್ದಾರೆ. ಹೀಗಾಗಿ ಹುಬ್ಬಳ್ಳಿಯಲ್ಲಿ ಇದೀಗ ಮಾಂಜಾಕ್ಕೆ ಬ್ರೇಕ್ ಬಿದ್ದಂತಾಗಿದೆ.

ಗಾಳಿಪಟ ವ್ಯಾಪಾರಕ್ಕೆ ಹೊಡೆತ

ಇದೇ ಮಾಂಜಾ ಇದೀಗ ಗಾಳಿಪಟ ವ್ಯಾಪಾರಕ್ಕೆ ಹೊಡೆತ ನೀಡಿದೆ. ಸೀಗೆ ಹುಣ್ಣಿಮೆ ಸಮಯದಲ್ಲಿ ಹೆಚ್ಚಿನ ಗಾಳಿಪಟಗಳು ಮಾರಾಟವಾಗುತ್ತಿದ್ದವು. ಅನೇಕ ಜನರು ಗಾಳಿಪಟ ಖರೀದಿಸಿ ತಮ್ಮ ಜಮೀನಿನಲ್ಲಿ ಹಾರಿಸುತ್ತಿದ್ದರು. ಆದರೆ ಮಾಂಜಾದಿಂದಾಗಿ ಹೆಚ್ಚಿನ ಜನರು ಗಾಳಿಪಟ ಖರೀದಿಸಲು ಹಿಂದೇಟು ಹಾಕ್ತಿದ್ದಾರೆ. ಮತ್ತೊಂದಡೆ ಪೊಲೀಸರು ಕೂಡ ಕೆಲ ದಿನಗಳ ಮಟ್ಟಿಗೆ ಗಾಳಿಪಟಗಳನ್ನು ಮಾರಾಟ ಮಾಡದಂತೆ ವ್ಯಾಪರಸ್ಥರಿಗೆ ಸೂಚನೆ ನೀಡಿದ್ದಾರಂತೆ. ಹೀಗಾಗಿ ವ್ಯಾಪರವಾಗುತ್ತದೆ ಅಂತ ತಯಾರಿಸಿದ್ದ ಸಾವಿರಾರು ಗಾಳಿಪಟ ಹಾಗೆ ಉಳಿದಿವೆ. ಗಾಳಿಪಟಗಳನ್ನೇ ಮಾರಾಟ ಮಾಡಿ ಬದುಕು ಕಟ್ಟಿಕೊಂಡಿದ್ದ ಅನೇಕರು ಇದೀಗ ಕಂಗಾಲಾಗಿದ್ದಾರೆ.

ಆನ್ಲೈನ್​ನಲ್ಲಿ ಎಗ್ಗಿಲ್ಲದೆ ಮಾಂಜಾ ದಾರ ಮಾರಾಟ 

ಇತ್ತ ಪೊಲೀಸರ ಕಠಿಣ ಕ್ರಮದಿಂದಾಗಿ ಹುಬ್ಬಳ್ಳಿ-ಧಾರವಾಡ ಅವಳಿ ನಗರದಲ್ಲಿ ಮಾಂಜಾ ದಾರಕ್ಕೆ ಬ್ರೇಕ್ ಬಿದ್ದಿದೆ. ವ್ಯಾಪರಸ್ಥರು ಕೇಸ್ ಭಯದಿಂದ ಮಾಂಜಾ ಮಾರಾಟ ಮಾಡುಲು ಹಿಂದೇಟು ಹಾಕ್ತಿದ್ದಾರೆ. ಬದಲಾಗಿ ಹತ್ತಿ ದಾರವನ್ನು ಮಾರಾಟ ಮಾಡಲಾಗುತ್ತಿದೆ. ಆದರೆ ಇದೇ ಮಾಂಜಾ ಆನಲೈನ್​ನಲ್ಲಿ ಸಿಗುತ್ತಿದೆ. ಸಾವಿರ ರೂ. ನೀಡಿದರೆ ಅನೇಕ ಆನ್ಲೈನ್ ಮಾರ್ಕೆಟ್​ನಲ್ಲಿ ಸುಲಭವಾಗಿ ಮಾಂಜಾ ದಾರ ಸಿಗುತ್ತಿದ್ದು, ಕೆಲವರು ಆನಲೈನ್ ಆರ್ಡರ್ ಮಾಡಿ ತರಿಸಿಕೊಳ್ಳುತ್ತಿದ್ದಾರೆ.

ಆನಲೈನ್ ಮಾರಾಟಕ್ಕೂ ಬ್ರೇಕ್ ಹಾಕುವಂತೆ ವ್ಯಾಪಾರಸ್ಥರ ಆಗ್ರಹ 

ರಾಜ್ಯದಲ್ಲಿ ಮಾಂಜಾ ದಾರ ಮಾರಾಟ ಮತ್ತು ಬಳಕೆಗೆ ಸರ್ಕಾರ ಸಂಪೂರ್ಣವಾಗಿ ನಿಷೇಧ ಹಾಕಿದೆ. ಆದರೆ ಆನಲೈನ್ ಮಾರಾಟಕ್ಕೆ ಯಾವುದೇ ಬ್ರೇಕ್ ಹಾಕಿಲ್ಲ. ಹೀಗಾಗಿ ‘ಆನಲೈನ್ ಮಾರಾಟಕ್ಕೂ ಬ್ರೇಕ್ ಹಾಕಬೇಕು. ಎಲ್ಲೇ ಮಾಂಜಾ ಸಿಕ್ಕರೂ ಸ್ಥಳೀಯ ವ್ಯಾಪರಸ್ಥರು ಮಾರಾಟ ಮಾಡಿದ್ದಾರೆ ಅಂತ ತಿಳಿದುಕೊಳ್ಳುತ್ತಾರೆ. ನಾವು ಮಾಂಜಾ ಮಾರಾಟ ನಿಲ್ಲಿಸಿ ಅನೇಕ ತಿಂಗಳುಗಳೇ ಆಗಿವೆ. ಆದರೂ ಆನಲೈನ್​ನಲ್ಲಿ ಸಿಗುತ್ತಿರುವುದರಿಂದ  ಹುಬ್ಬಳ್ಳಿ-ಧಾರವಾಡದಲ್ಲಿ ಮಾಂಜಾ ಸಿಗುತ್ತಿದೆ. ಈ ಬಗ್ಗೆ ಸರ್ಕಾರ ಮತ್ತು ಪೊಲೀಸರು ಕ್ರಮ ಕೈಗೊಳ್ಳಬೇಕು’ ಎಂದು ವ್ಯಾಪಾರಸ್ಥರಾದ ತೌಸೀಪ್ ಅವರು ಹೇಳಿದ್ದಾರೆ.

ಇದನ್ನೂ ಓದಿ: ಮಾಂಜಾ ದಾರಕ್ಕೆ ಹುಬ್ಬಳ್ಳಿಯಲ್ಲಿ ಮಹಿಳೆ ಬಲಿ: ಸ್ಕೂಟಿಯಲ್ಲಿ ಹೋಗ್ತಿದ್ದ ಲ್ಯಾಬ್ ಟೆಕ್ನಿಷಿಯನ್ ಕುತ್ತಿಗೆ ಕಟ್

ಇನ್ನು ಹುಬ್ಬಳ್ಳಿಯಲ್ಲಿ ಇಂದು ಕೂಡ ಅನೇಕ ಕಡೆ ಮಾಂಜಾ ದಾರ ಮತ್ತು ಗಾಳಿಪಟವನ್ನು ಸಂಗ್ರಹಿಸಿ ಯುವಕರು ಬೆಂಕಿ ಹಚ್ಚಿದ್ದಾರೆ. ಆ ಮೂಲಕ ಜೀವ ತೆಗೆಯುವ ಮಾಂಜಾ ಬಳಕೆ ಮಾಡಲ್ಲಾ ಅಂತ ಪ್ರತಿಜ್ಞೆ ಮಾಡಿದ್ದಾರೆ. ಆದರೆ ಆನಲೈನ್​ನಲ್ಲಿ ಮಾಂಜಾ ಸಿಗುತ್ತಿದ್ದು, ಈ ಬಗ್ಗೆ ಸರ್ಕಾರ ಕ್ರಮ ಕೈಗೊಳ್ಳಬೇಕಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.