ಕರ್ನಾಟಕದ ಜನತೆಗೆ ಬಿಗ್‌ ಶಾಕ್‌: ಹಾಲಿನ ದರ 8 ರೂ.ಹೆಚ್ಚಳಕ್ಕೆ ಸಂಪುಟ ತೀರ್ಮಾನ

ಬೆಂಗಳೂರು, (ಅಕ್ಟೋಬರ್ 29): ಕೊನೆಗೂ  ನಂದಿನಿ ಹಾಲಿನ ದರವನ್ನು 8 ರೂ. ಹೆಚ್ಚಳಕ್ಕೆ  ಸಚಿವ ಸಂಪುಟ ಒಪ್ಪಿಗೆ ನೀಡಿದೆ. ಇಂದು (ಅಕ್ಟೋಬರ 29) ನಡೆದ ಸಚಿವ ಸಂಪುಟದಲ್ಲಿ ಪ್ರತಿ ಲೀಟರ್ ನಂದಿನಿ ಹಾಲಿಗೆ ಬರೋಬ್ಬರಿ ಎಂಟು ರೂಪಾಯಿ ಹೆಚ್ಚಳ ಮಾಡಲು ತೀರ್ಮಾನಿಸಲಾಗಿದೆ. ಈ 8 ರೂಪಾಯಿ ಪೈಕಿ ರೈತರಿಗೆ 7 ರೂಪಾಯಿ ಮತ್ತು ಉಳಿದ 1 ರೂಪಾಯಿ ಒಕ್ಕೂಟಗಳಿಗೆ ಸಿಗಲಿದ್ದು,  ನವೆಂಬರ್ 1 ರಿಂದ ಪರಿಸ್ಕೃತ ದರ ಜಾರಿಗೆ ಬರಲಿದೆ. ಸರ್ಕಾರಕ್ಕೆ 70:30 ರಂತೆ ದರ ಏರಿಕೆಗೆ ಒಕ್ಕೂಟಗಳು ಮನವಿ ಮಾಡಿದ್ದವು. ಆದರೆ, 80:20 ರಂತೆ ದರ ಏರಿಕೆ ಮಾಡಲಾಗುವುದು ಎಂದು ಸಿಎಂ ಡಿ.ಕೆ.ಶಿವಕುಮಾರ್‌ ಹೇಳಿದ್ದರು. ಆದ್ರೆ, ಅಂತಿಮವಾಗಿ 90:10ರಂತೆ ದರ ಏರಿಸಲಾಗಿದೆ.

ರೈತರಿಗೆ 7 ರೂಪಾಯಿ

ದರ ಏರಿಕೆಯ 8 ರೂಪಾಯಿಯಲ್ಲಿ 7 ರೂಪಾಯಿಯನ್ನು ರೈತರಿಗೆ ಸಹಾಯಧನವಾಗಿ ನೀಡಲು ನಿರ್ಧರಿಸಲಾಗಿದೆ. ರೈತರಿಗೆ ಬಮುಲ್ ವ್ಯಾಪ್ತಿಯಲ್ಲಿ ಸದ್ಯ ಪ್ರತಿ ಲೀಟರ್‌ಗೆ 33 ರೂ. ದಿಂದ 35 ರೂ. ನೀಡಲಾಗುತ್ತಿದ್ದು, ಆ ಮೊತ್ತ 40 ರಿಂದ 42 ರೂಪಾಯಿಗೆ ಹೆಚ್ಚಳವಾಗಲಿದೆ. ಹೆಚ್ಚುವರಿ 1 ರೂಪಾಯಿಯನ್ನು ಹಾಲು ಮಂಡಳಿಗಳ ಪಾಲಾಗಿದೆ.

ಇದನ್ನೂ ಓದಿ: ರಾಜ್ಯದ ಹಾಲಿನ ಒಕ್ಕೂಟಗಳ ಪೈಕಿ ನಾಲ್ಕು ತಿಂಗಳಲ್ಲಿ ಬಮೂಲ್​ಗೆ ಅತಿ ಹೆಚ್ಚು ಲಾಭ! 5 ಒಕ್ಕೂಟಗಳಿಗೆ ತೀವ್ರ ನಷ್ಟ

ಇನ್ನು ಬಸ್ ಟಿಕೆಟ್ ದರ ಏರಿಕೆ ಬಗ್ಗೆಯೂ ಸಂಪುಟದಲ್ಲಿ ಚರ್ಚೆಯಾಗಿದೆ. ಆದ್ರೆ, ಸಂಪುಟ ಟಿಕೆಟ್ ದರ ಏರಿಕೆಯನ್ನು ಸಾರಿಗೆ ಇಲಾಖೆಗೆ ಬಿಟ್ಟಿದ್ದು, ಇಲಾಖೆ ಪರಿಸ್ಥಿತಿ ಅವಲೋಕಿಸಿ ನಿರ್ಧಾರ ಕೈಗೊಳ್ಳುವ ಸಾಧ್ಯತೆಗಳಿದ್ದು, ನವೆಂಬರ್ 5 ರಂದು ಸಾರಿಗೆ ದರ ಹೆಚ್ಚಳ ತೀರ್ಮಾನವಾಗಲಿದೆ.

ಯಾವ್ಯಾವ ಹಾಲಿನ ದರ ಎಷ್ಟು ಏರಿಕೆ?

• ಟೋನ್ಡ್‌ ಹಾಲು (1 ಲೀಟರ್) (ನೀಲಿ ಪ್ಯಾಕೆಟ್): 46ರಿಂದ 54 ರೂಪಾಯಿಗೆ ಏರಿಕೆ.
• ಹೋಮೋಜಿನೈಸ್ಡ್‌ ಟೋನ್ಡ್‌ ಹಾಲು (ಹಸಿರು ಪ್ಯಾಕೇಟ್) : 47ರಿಂದ 55 ರೂ.
• ಹೋಮೋಜಿನೈಸ್ಡ್‌ ಹಸುವಿನ ಹಾಲು: 50ರಿಂದ 58 ರೂ.
• ಶುಭಂ ಹಾಲು (ಕಿತ್ತಳೆ ಪ್ಯಾಕೆಟ್): 52ರಿಂದ 60 ರೂ.
• ಸಮೃದ್ಧಿ ಹಾಲು (ನೇರಳೆ ಪ್ಯಾಕೆಟ್) :55ರಿಂದ 64 ರೂ.
• ಸ್ಪೆಷಲ್‌ ಹಾಲು: 52ರಿಂದ 60 ರೂ.
• ಡಬಲ್‌ ಟೋನ್ಡ್‌ ಹಾಲು: 43ರಿಂದ 51 ರೂ.

ಹಾಲಿನ ದರ ಏರಿಕೆ ಬಗ್ಗೆ ಕೃಷ್ಣಭೈರೇಗೌಡ ಮಾಹಿತಿ

10 ರೂ. ಏರಿಸಬೇಕೆಂಬ ಬೇಡಿಕೆ ಇತ್ತು. ಒಕ್ಕೂಟಗಳ ಸ್ವಾಯತ್ತತೆ ಮೊಟಕು ಮಾಡಬಾರದು. ಆದರೂ ನಾವು 8 ರೂ.ಗೆ ಇಳಿಸಿ ನಿರ್ಧಾರ ಮಾಡಿದ್ದು, 7 ರೂ. ರೈತರಿಗೆ ನೀಡುತ್ತೇವೆ. ಇನ್ನುಳಿದ 1 ರೂ. ಒಕ್ಕೂಟಕ್ಕೆ ನೀಡುತ್ತೇವೆ. ಸರ್ವಾನುಮತದಿಂದ ನಾವು ನಿರ್ಧಾರ ಮಾಡಿದ್ದೇವೆ. ಇದರೊಂದಿಗೆ ಪ್ರತಿ ಲೀಟರ್​​ ಹಾಲಿಗೆ 35ರೂ. ರೈತರಿಗೆ ಸಿಗುತ್ತಿತ್ತು. ಈಗ ಸರ್ಕಾರದ 5 ರೂ. ಸಹಾಯಧನ ಸೇರಿ 42 ರೂ. ಸಿಗಲಿದೆ. ಬರಗಾಲದ ಮಧ್ಯೆ ರೈತರಿಗೆ ಅನುಕೂಲ ಆಗಲಿದೆ ಎಂದು ತಿಳಿಸಿದರು.

ಕರ್ನಾಟಕದ ಮತ್ತಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ