ಮಡಿಕೇರಿ: 32ನೇ ಬಾರಿಗೆ ಮೊದಲಿಗನಾಗಿ ಮತ ಚಲಾಯಿಸಿದ 82ರ ವಿಶೇಷ ಚೇತನ ಮಿಟ್ಟು ಚಂಗಪ್ಪ

ಕೊಡಗು, ಏಪ್ರಿಲ್​ 26: ಪ್ರತಿ ಸಾರ್ವತ್ರಿಕ ಚುನಾವಣೆಯ ಮತದಾನದ ದಿನ ಒಂದೊಂದು ವಿಶೇಷತೆಗೆ ಸಾಕ್ಷಿಯಾಗುತ್ತದೆ. ಈ ಬಾರಿಯ 2024ರ ಲೋಕಸಭೆ ಚುನವಾಣೆಯ (Lok Sabha Election) ಎರಡನೇ ಹಂತದ ಮತದಾನ ನಡೆಯುತ್ತಿದೆ. ಮಡಿಕೇರಿ (Madikeri) ನಗರದ ವಿಶೇಷ ಚೇತನ ಮಿಟ್ಟು ಚಂಗಪ್ಪ (82 ವರ್ಷ) ಇವರು ಮಡಿಕೇರಿ ನಗರದ ಮತಗಟ್ಟೆ ಸಂಖ್ಯೆ 225 ರಲ್ಲಿ 32ನೇ ಬಾರಿಗೆ ಮತ ಚಲಾಯಿಸಿದ್ದಾರೆ. ವಿಶೇಷ ಅಂದರೆ ಯಾವುದೇ ಚುನಾವಣೆ ಇರಲಿ ಮಿಟ್ಟು ಚಂಗಪ್ಪ ಮೊದಲು ಮತ ಚಲಾಯಿಸಿದ್ದಾರೆ.

1962ರಲ್ಲಿ ಪಂಚಾಯಿತಿ ಚುನಾವಣೆಯಲ್ಲಿ ಮೊದಲ ಬಾರಿಗೆ ಮತ ಚಲಾಯಿಸಿದ್ದರು. ಈಗ 2024ರವರೆಗೆ ನಡೆದ ಪಂಚಾಯಿತಿ, ನಗರಸಭೆ, ವಿಧಾನಸಭೆ, ಲೋಕಸಭೆಗೆ ಕಳೆದ 60 ವರ್ಷದಲ್ಲಿ ನಡೆದ 30 ಚುನಾವಣೆಯಲ್ಲಿ ಮಿಟ್ಟು ಚಂಗಪ್ಪ ಮೊದಲಿಗರಾಗಿ ಮತ ಹಾಕುತ್ತಿದ್ದಾರೆ.

ಕೊಡಗು ಜಿಲ್ಲಾ ಕಾಂಗ್ರೆಸ್ ಮುಖಂಡರಾಗಿರುವ ಮಿಟ್ಟು ಚಂಗಪ್ಪ ಒಮ್ಮೆ ವಿಧಾನ ಪರಿಷತ್ ಚುನಾವಣೆಗೆ ಸ್ಪರ್ಧಿಸಿದ್ದರು. ಕಳೆದ ವರ್ಷದಿಂದ ದೃಷ್ಟಿ ಹೀನರಾಗಿರುವ 82 ವರ್ಷದ ಮಿಟ್ಟು ಚಂಗಪ್ಪ ಅವರಿಗೆ ಮನೆಯಲ್ಲೆ ಮತದಾನ ಮಾಡುವ ಅವಕಾಶ ಇದ್ದರೂ ಮತಗಟ್ಟೆಯಲ್ಲೆ ಮೊದಲ ಮತದಾನ ಮಾಡಬೇಕು ಎಂಬ ಆಸೆಯಿಂದ ತಮ್ಮ ಪತ್ನಿಯ ಸಹಕಾರದಿಂದ ಮಡಿಕೇರಿ ನಗರದ ಸಂತ ಮೈಕಲರ ಶಾಲಾ ಮತಗಟ್ಟೆಗೆ ಬೆಳಿಗ್ಗೆ 6:45ಕ್ಕೆ ಬಂದು ಮೊದಲ ಮತ ಚಲಾಯಿಸಿದರು. ಇವರ ಈ ಉತ್ಸಾಹ ಯುವ ಮತ್ತು ಮತದಾನ ಮಾಡಲು ನಿರ್ಲಕ್ಷ್ಯವಹಿಸುವ ಮತದಾರರಿಗೆ ಪ್ರೇರಣೆಯಾಗಿದ್ದಾರೆ.

ಇದನ್ನೂ ಓದಿ: ಕರ್ನಾಟಕ ಲೋಕಸಭೆ ಚುನಾವಣೆಗೆ Rapidoದಿಂದ ಉಚಿತ ಸೇವೆ, ಯಾರಿಗೆಲ್ಲ ಲಭ್ಯ, ಇಲ್ಲಿದೆ ಮಾಹಿತಿ

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ