ರೈಲ್ವೇ ಪ್ರಯಾಣಿಕರಿಗೆ ಗುಡ್‌ ನ್ಯೂಸ್: ಕೌಂಟರ್‌ ಟಿಕೆಟ್‌ಗಳಿಗೂ ರೂ. 10 ಲಕ್ಷ ಅಪಘಾತ ವಿಮೆ ವಿಸ್ತರಣೆ; ಪ್ರೀಮಿಯಂ ಕೇವಲ 45 ಪೈಸೆ

ಚೆನ್ನೈ, ಅ.28: ಭಾರತೀಯ ರೈಲ್ವೇ ಇಲಾಖೆಯು ಪ್ರಯಾಣಿಕರ ಸುರಕ್ಷತೆಯ ದೃಷ್ಟಿಯಿಂದ ಮಹತ್ವದ ನಿರ್ಧಾರ ಕೈಗೊಂಡಿದೆ. ಇಲ್ಲಿಯವರೆಗೆ ಕೇವಲ ಆನ್‌ಲೈನ್ (e-Ticket) ಮೂಲಕ ಬುಕ್ ಮಾಡುತ್ತಿದ್ದ ಟಿಕೆಟ್‌ಗಳಿಗೆ ಮಾತ್ರ ಲಭ್ಯವಿದ್ದ 10 ಲಕ್ಷ ರೂ. ಅಪಘಾತ ವಿಮೆ ಸೌಲಭ್ಯವನ್ನು ಇದೀಗ ರೈಲ್ವೇ ರಿಸರ್ವೇಶನ್ ಕೌಂಟರ್‌ಗಳಲ್ಲಿ (Paper Tickets) ಪಡೆಯುವ ಟಿಕೆಟ್‌ಗಳಿಗೂ ವಿಸ್ತರಿಸಲಾಗಿದೆ. ಸುಪ್ರೀಂ ಕೋರ್ಟ್ ನೀಡಿದ್ದ ನಿರ್ದೇಶನದ ಅನ್ವಯ ಅಕ್ಟೋಬರ್ 6ರ ಆದೇಶವನ್ನು ಅನುಸರಿಸಿ ರೈಲ್ವೇ ಮಂಡಳಿಯು ಈ ಯೋಜನೆಯನ್ನು ಜಾರಿಗೆ ತಂದಿದ್ದು, ಸಾರ್ವಜನಿಕರಿಂದ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.

ಡಿಜಿಟಲ್ ಪಾವತಿ ಕಡ್ಡಾಯ – ನಗದು ಪಾವತಿಗೆ ವಿಮೆ ಸಿಗಲ್ಲ:

ಪ್ರಯಾಣಿಕರು ತಮ್ಮ ಟಿಕೆಟ್ ಬುಕ್ ಮಾಡುವಾಗ ಐಚ್ಛಿಕವಾಗಿ ಈ ವಿಮೆಯನ್ನು ಆಯ್ಕೆ ಮಾಡಿಕೊಳ್ಳಬಹುದು. ಇದರ ಪ್ರೀಮಿಯಂ ದರ ಕೇವಲ 0.45 (45 ಪೈಸೆ) ಆಗಿರಲಿದೆ. ಈ ವಿಮೆ ಸೌಲಭ್ಯ ಪಡೆಯಬೇಕಾದರೆ ಟಿಕೆಟ್ ದರ ಹಾಗೂ ಪ್ರೀಮಿಯಂ ಮೊತ್ತವನ್ನು ಕಡ್ಡಾಯವಾಗಿ ಡಿಜಿಟಲ್ ಮಾದರಿಯಲ್ಲೇ ಪಾವತಿಸಬೇಕು. ನಗದು ನೀಡಿ ಟಿಕೆಟ್ ಖರೀದಿಸುವವರಿಗೆ ಈ ವಿಮೆ ಅನ್ವಯಿಸುವುದಿಲ್ಲ. ವಿಮೆ ಸೌಲಭ್ಯ ಆಯ್ಕೆ ಮಾಡಿಕೊಳ್ಳುವ ಪ್ರಯಾಣಿಕರು ಕೌಂಟರ್‌ನಲ್ಲಿ ತಮ್ಮ ಮೊಬೈಲ್ ಸಂಖ್ಯೆಯನ್ನು ನೀಡಬೇಕಾಗುತ್ತದೆ. ಪಾಲಿಸಿ ವಿವರಗಳನ್ನು ಎಸ್‌ಎಂಎಸ್ (SMS) ಮೂಲಕ ರವಾನಿಸಲು ಇದು ನೆರವಾಗಲಿದೆ. ಈ ಕ್ರಮದಿಂದ ಮುಂದಿನ ಕೆಲವೇ ತಿಂಗಳುಗಳಲ್ಲಿ ರಿಸರ್ವೇಶನ್ ಕೌಂಟರ್‌ಗಳು ಸಂಪೂರ್ಣ ಕ್ಯಾಶ್‌ಲೆಸ್ ಆಗುವ ನಿರೀಕ್ಷೆಯಿದೆ.

ವಿಮೆಯ ಪರಿಹಾರ ಮೊತ್ತದ ವಿವರಗಳು

ರೈಲು ಪ್ರಯಾಣದ ಸಮಯದಲ್ಲಿ ಸಂಭವಿಸುವ ಅನಿರೀಕ್ಷಿತ ಅಪಘಾತ ಅಥವಾ ದುರಂತಗಳ ಸಂದರ್ಭದಲ್ಲಿ ಈ ವಿಮೆಯು ಕೆಳಗಿನಂತೆ ಆರ್ಥಿಕ ಭದ್ರತೆ ನೀಡುತ್ತದೆ.

ಸಾವು ಅಥವಾ ಸಂಪೂರ್ಣ ಶಾಶ್ವತ ಅಂಗವಿಕಲತೆ: 10 ಲಕ್ಷ ರೂ. ಪರಿಹಾರ.

ಭಾಗಶಃ ಅಂಗವಿಕಲತೆ: 7.5 ಲಕ್ಷ ರೂ. ಪರಿಹಾರ.

ಗಾಯಗೊಂಡರೆ ಆಸ್ಪತ್ರೆ ವೆಚ್ಚ: 2 ಲಕ್ಷದವರೆಗೆ ಚಿಕಿತ್ಸಾ ವೆಚ್ಚ.

ದಕ್ಷಿಣ ಭಾರತದಲ್ಲಿ ರೈಲ್ವೇ ಟಿಕೆಟ್ ಬುಕಿಂಗ್ ಸ್ಥಿತಿ:

ದಕ್ಷಿಣ ರೈಲ್ವೇ ನೀಡಿರುವ ಮಾಹಿತಿಯಂತೆ, ಪ್ರಸ್ತುತ ತಮಿಳುನಾಡಿನಲ್ಲಿ ದಿನನಿತ್ಯ ಕೌಂಟರ್‌ಗಳಲ್ಲಿ ಸರಾಸರಿ 14,500 ಟಿಕೆಟ್‌ಗಳು ಬುಕ್ ಆಗುತ್ತಿದ್ದು, ಸುಮಾರು 30,000 ದಿಂದ 35,000 ಪ್ರಯಾಣಿಕರು ಈ ಹೊಸ ಯೋಜನೆಯ ನೇರ ಫಲಾನುಭವಿಗಳಾಗಲಿದ್ದಾರೆ. ರಾಜ್ಯದಲ್ಲಿ ಶೇ. 89 ರಷ್ಟು ಟಿಕೆಟ್‌ಗಳು ಐಆರ್‌ಸಿಟಿಸಿ ಪೋರ್ಟಲ್ ಹಾಗೂ ‘ರೈಲ್ ಒನ್’ ಆಪ್ ಮೂಲಕ ಆನ್‌ಲೈನ್‌ನಲ್ಲೇ ಬುಕ್ ಆಗುತ್ತಿದ್ದು, ಉಳಿದ ಶೇ. 11 ರಷ್ಟು ಟಿಕೆಟ್‌ಗಳು ಮಾತ್ರ ಕೌಂಟರ್‌ಗಳಲ್ಲಿ ಮಾರಾಟವಾಗುತ್ತಿವೆ. 2017 ರ ನಂತರ ಆನ್‌ಲೈನ್ ಬುಕಿಂಗ್‌ಗೆ ಪ್ರಯಾಣಿಕರು ಹೆಚ್ಚಿನ ಆದ್ಯತೆ ನೀಡುತ್ತಿದ್ದಾರೆ.

ಇದನ್ನೂ ಓದಿ: ಪದೇಪದೇ ಕೈಕೊಡುತ್ತಿರುವ ನಮ್ಮ ಮೆಟ್ರೋ ರೈಲುಗಳು: ಹಳೆಯ ರೈಲುಗಳ ಸರ್ವಿಸ್‌ಗೆ ಬಿಎಂಆರ್‌ಸಿಎಲ್ ಸಿದ್ಧತೆ

ಸಾಮಾನ್ಯ ದರ್ಜೆ ಪ್ರಯಾಣಿಕರಿಗೂ ವಿಸ್ತರಿಸಲು ಆಗ್ರಹ:

ಚೆನ್ನೈ ವಿಭಾಗೀಯ ರೈಲ್ವೇ ಬಳಕೆದಾರರ ಸಲಹಾ ಸಮಿತಿ (DRUCC) ಮಾಜಿ ಸದಸ್ಯ ನೈನಾ ಮಾಸಿಲಾಮಣಿ ಅವರು ಮಾತನಾಡಿ, “ಸಾಮಾನ್ಯ ದರ್ಜೆಯ ಟಿಕೆಟ್ ಪಡೆದು ಪ್ರಯಾಣಿಸುವ ಬಡ ಮತ್ತು ಮಧ್ಯಮ ವರ್ಗದ ಪ್ರಯಾಣಿಕರಿಗೂ ಈ ವಿಮೆ ಸೌಲಭ್ಯವನ್ನು ವಿಸ್ತರಿಸಬೇಕು. ಇದರಿಂದ ಕ್ಲೈಮ್‌ಗಳಿಗಾಗಿ ನ್ಯಾಯಾಲಯ ಹಾಗೂ ಟ್ರಿಬ್ಯೂನಲ್‌ಗಳಿಗೆ ಅಲೆಯುವುದು ತಪ್ಪುತ್ತದೆ” ಎಂದು ಇಲಾಖೆಯನ್ನು ಒತ್ತಾಯಿಸಿದ್ದಾರೆ.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ