ಲೈಸೆನ್ಸ್ ರದ್ದಾದ ಮಾತ್ರಕ್ಕೆ ಅಪಘಾತಕ್ಕೆ ಚಾಲಕನ ನಿರ್ಲಕ್ಷ್ಯವೇ ಕಾರಣವೆಂದಲ್ಲ: ಕರ್ನಾಟಕ ಹೈ ಕೋರ್ಟ್

ತುಮಕೂರು, ಡಿಸೆಂಬರ್ 07: ಸುಮಾರು 7 ವರ್ಷದ ಹಿಂದೆ ತುಮಕೂರಿನಲ್ಲಿ (Tumkur) ನಡೆದ ರಸ್ತೆ ಅಪಘಾತಕ್ಕೆ ಸಂಬಂಧಿಸಿದಂತೆ ಕರ್ನಾಟಕ ಹೈ ಕೋರ್ಟ್​ (Karnataka High Court) ಮಹತ್ವದ ತೀರ್ಪು ನೀಡಿದ್ದು, ವಾಹನ ಸವಾರನ ಬಳಿ ಲೈಸೆನ್ಸ್ ಇಲ್ಲವೆಂಬ ಕಾರಣಕ್ಕೆ ಆತನ ನಿರ್ಲಕ್ಷ್ಯದಿಂದಲೇ ಅಪಘಾತ ಸಂಭವಿಸಿದೆ ಎಂದರ್ಥವಲ್ಲ ಎಂದು ಹೇಳಿದೆ. ವಾಹನ ಸವಾರನ ಲೈಸೆನ್ಸ್ ರದ್ದಾದ ಎಂಟು ದಿನಗಳೊಳಗೆ ಈ ಅಪಘಾತ ಸಂಭವಸಿದ್ದು, ಈ ಹಿನ್ನೆಲೆ ಸವಾರನಿಗೆ ದಂಡ ವಿಧಿಸಲಾಗಿತ್ತು.

ಡಿಎಲ್ ರದ್ದಾದ ಕಾರಣ ಸವಾರನಿಗೆ ದಂಡ

ತುಮಕೂರಿನ ಹೊನ್ನವಳ್ಳಿ ಗ್ರಾಮದ ನಿವಾಸಿಯಾದ ರಂಜಿತ್, 2018ರ ಏಪ್ರಿಲ್ 25 ರಂದು ತಿಪಟೂರು- ಹುಲಿಯೂರ್ ರಸ್ತೆಯಲ್ಲಿ ಅಪಘಾತಕ್ಕೊಳಗಾಗಿದ್ದರು. ಅವರು ಆರೋಪಿಸುವಂತೆ ಇನ್ನೋರ್ವ ಬೈಕ್ ಸವಾರ ಬಸವರಾಜ್ ಎನ್ನುವವರ ನಿರ್ಲಕ್ಷ್ಯದಿಂದ ಈ ಅಪಘಾತ ಸಂಭವಿಸಿತ್ತು. ಆಕ್ಸಿಡೆಂಟ್​ನಲ್ಲಿ ಗಂಭೀರ ಗಾಯಗೊಂಡಿದ್ದ ರಂಜಿತ್, ತಿಪಟೂರು ಮೋಟಾರ್ ಅಪಘಾತ ಪರಿಹಾರ ನ್ಯಾಯ ಮಂಡಳಿಯ ಮೆಟ್ಟಿಲೇರಿ 15 ಲಕ್ಷ ರೂ. ಪರಿಹಾರಕ್ಕೆ ಒತ್ತಾಯಿಸಿದ್ದರು. ಈ ಹಿನ್ನಲೆ 2021 ಮಾರ್ಚ್​ 23ರಂದು ನ್ಯಾಯಮಂಡಳಿಯು ಬಸವರಾಜ್​ನ ಡ್ರೈವಿಂಗ್ ಲೈಸೆನ್ಸ್ ರದ್ದಾಗಿದ್ದ ಕಾರಣ ದಂಡ ವಿಧಿಸಿತ್ತು. ವಿಮಾದಾರರಿಗೆ 7 ಪ್ರತಿಶತ ಬಡ್ಡಿಯೊಂದಿಗೆ 6,22,295 ರೂ. ಪರಿಹಾರ ನೀಡುವಂತೆ ಸೂಚಿಸಿತ್ತು. ಇಷ್ಟಕ್ಕೆ ಸಮಾಧಾನ ಪಡದ ರಂಜಿತ್, ಹೆಚ್ಚಿನ ಪರಿಹಾರದ ಆಶಯದಿಂದ ಹೈಕೋರ್ಟ್​ ಮೆಟ್ಟಿಲೇರಿದ್ದರು.

ಲೈಸೆನ್ಸ್ ರದ್ದಾದ 1 ತಿಂಗಳಿನ ವರೆಗೆ ನವೀಕರಣಕ್ಕೆ ಅವಕಾಶ

ವೆಹಿಕಲ್ ಆ್ಯಕ್ಟ್ ಸೆಕ್ಷನ್ 14ರ ನಿಂಭದನೆಯಡಿಯಲ್ಲಿ ಡ್ರೈವಿಂಗ್ ಲೈಸೆನ್ಸ್ ಮುಗಿದು 30 ದಿನಗಳ ಒಳಗೆ ಪರವಾನಗಿ ನವೀಕರಣಗೊಳ್ಳಬೇಕು. ಅಲ್ಲಿಯವರೆಗೆ ಲೈಸೆನ್ಸ್​ ಅನ್ನು ವಿಸ್ತರಿಸಲಾಗುತ್ತದೆ. ಹೀಗಿರುವಾಗ ಬಸವರಾಜ್​ನ ಲೈಸೆನ್ಸ್ ರದ್ದಾಗಿ ಕೇವಲ 8 ದಿನಗಳಾಗಿದ್ದನ್ನು ಗಮನಿಸಿದ ನ್ಯಾ. ಉಮೇಶ್ ಅಡಿಗಾ, ಚಾಲಕನ ಲೈಸೆನ್ಸ್ ರದ್ದಾಗಿ 1 ತಿಂಗಳವರೆಗೆ ಪರವಾನಗಿ ನವೀಕರಣಕ್ಕೆ ಅವಕಾಶವಿದ್ದು, ಈ ವೇಳೆ ಯಾವುದೇ ಅಪಘಾತ ಸಂಭವಿಸಿದಲ್ಲಿ ಚಾಲಕನ ಡಿಎಲ್​ ಮೇಲೆ ದಂಡ ವಿಧಿಸುವಂತಿಲ್ಲ ಎಂದರು. ಅದಲ್ಲದೆ ಕೇವಲ ಲೈಸೆನ್ಸ್ ರದ್ದಾದ ಮಾತ್ರಕ್ಕೆ ಚಾಲಕನ ನಿರ್ಲಕ್ಷ್ಯದಿಂದಲೇ ಅಪಘಾತ ಸಂಭವಿಸಿದೆ ಎನ್ನುವುದು ತಪ್ಪು ಎಂದರು.

ಕರ್ನಾಟಕದ ರಾಜ್ಯ ಕಾನೂನು ಪ್ರಾಧಿಕಾರದ ಆದಾಯ ಪಟ್ಟಿಯಂತೆ ರಂಜಿತ್ ಕೃಷಿಕನಾಗಿದ್ದು, ತಿಂಗಳಿಗೆ 12,500 ರೂ.ಗಳಿಸುವುದರಿಂದ 6 ಪ್ರತಿಶತ ಬಡ್ಡಿಯೊಂದಿಗೆ ಹೆಚ್ಚಿನ 2,79,000 ರೂ. ಪರಿಹಾರ ನೀಡುವಂತೆ ವಿಮಾದಾರರಿಗೆ ಹೇಳಲಾಯಿತು. ಅದರೊಂದಿಗೆ ಬಸವರಾಜ್​ನ ಕುಟುಂಬವಿಟ್ಟಿದ್ದ ಠೇವಣಿ ಹಣವನ್ನು ಹಿಂದಿರುಗಿಸುವಂತೆ ಆದೇಶಿಸಲಾಯಿತು.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.