ಕೋಲಾರ ಪೊಲೀಸರ ಕನ್ನಡಾಭಿಮಾನ: ಕ್ವಾಟ್ರಸ್​ಗಳಲ್ಲಿ ರಾರಾಜಿಸುತ್ತಿದೆ ಕನ್ನಡ ಕವಿಗಳ ರಂಗು

ಕೋಲಾರ: ನವೆಂಬರ್ ತಿಂಗಳು ಬಂದರೆ ಸಾಕು ಎಲ್ಲರಲ್ಲೂ ಕನ್ನಡ ಮೇಲಿನ ಪ್ರೀತಿ ಜಾಗೃತವಾಗುತ್ತೆ. ಕೆಲವರು ಅದನ್ನೇ ತೋರಿಕೆಗಾಗಿ ಬಂಡವಾಳ ಮಾಡಿಕೊಂಡರೆ ಮತ್ತೆ ಕೆಲವರು ನಿಷ್ಟೆಯಿಂದ ಕನ್ನಡಾಂಬೆಯ ಪೂಜೆ ಮಾಡುವವರೂ ಇದ್ದಾರೆ. ಇನ್ನು ಕೆಲವರು ಕನ್ನಡವೇ ಸತ್ಯ, ಕನ್ನಡವೇ ನಿತ್ಯ ಕನ್ನಡಕ್ಕಾಗಿ ಎಲ್ಲವೂ ಅರ್ಪಣೆ ಎಂದು ತಮ್ಮ ಕೊನೆ ಉಸಿರಿರುವ ವರೆಗೂ ಸೇವೆ ಮಾಡಿ ಕನ್ನಡಾಂಬೆಯ ಮಡಿಲು ಸೇರ್ತಾರೆ. ಇಂಥ ಮನಸ್ಥಿತಿಗಳ ನಡುವೆ ಕೋಲಾರದಲ್ಲಿ ಪೊಲೀಸರಲ್ಲೊಂದು ವಿಭಿನ್ನ ಕನ್ನಡಾಭಿಮಾನ ಹೊರ ಬಂದಿದೆ.

ಕನ್ನಡ ರಾಜ್ಯೋತ್ಸವದಂದು ಮಾತ್ರ ಅಬ್ಬರಿಸಿ ಮತ್ತೊಂದು ವರ್ಷ ಸುಮ್ಮನಾಗುವ ಮಂದಿಯೇ ಹೆಚ್ಚಾಗಿರುವವರ ನಡುವೆ ನಗರದ ಪೊಲೀಸ್ ಇಲಾಖೆಯ ವಸತಿಗೃಹಗಳಲ್ಲಿ ಸದಾ ಕನ್ನಡದ ಸಾಹಿತ್ಯ ಪರಂಪರೆಯನ್ನು ಶಾಶ್ವತಗೊಳಿಸುವ ಕೆಲಸ ನಡೆದಿದೆ. ನಗರದ ಮೆಕ್ಕೆ ವೃತ್ತದ ಸಮೀಪದ ಜಿಲ್ಲಾ ಸಶಸ್ತ್ರ ಮೀಸಲು ಪಡೆಯ ಎದುರು ಹೊಸದಾಗಿ ನಿರ್ಮಿಸಿರುವ ಪೊಲೀಸ್ ವಸತಿ ಗೃಹಗಳ ಕಾಂಪ್ಲೆಕ್ಸ್‌ನ ಫ್ಲಾಟ್‌ಗಳಿಗೆ ವಿವಿಧ ಕನ್ನಡ ಕವಿಗಳ ಹೆಸರುಗಳನ್ನು ನಾಮಕರಣ ಮಾಡಲಾಗಿದೆ. ಹಾಗೂ ಆ ಮನೆಗಳಲ್ಲಿ ವಾಸಿಸುವವರಿಗೆ ಮತ್ತು ಆ ಭಾಗದಲ್ಲಿ ಸಂಚರಿಸುವವರಲ್ಲಿ ಕನ್ನಡದ ಕಂಪು ಬಿತ್ತರಿಸುವ ಕೆಲಸ ಆಗಿದೆ.

ಬ್ರಿಟಿಷರ ಕಾಲದಲ್ಲಿ ನಿರ್ಮಿಸಿದ್ದ ಹಳೆಯ ಹಂಚಿನ ಮನೆಗಳನ್ನು ಕೆಡವಿದ ಪೊಲೀಸ್ ಇಲಾಖೆಯು ಹತ್ತು ಕೋಟಿ ರೂಪಾಯಿ ವೆಚ್ಚದಲ್ಲಿ ಪೊಲೀಸ್ ಪೇದೆಗಳಿಗೆ ಅತ್ಯಾಧುನಿಕ ರೀತಿಯಲ್ಲಿ ವಸತಿ ಗೃಹಗಳನ್ನು ನಿರ್ಮಿಸಿದೆ. ಈ ವಸತಿ ಸಮುಚ್ಚಯದಲ್ಲಿ ಕನ್ನಡದ ಆದಿಕವಿಗಳು, ರಾಷ್ಟ್ರಕವಿಗಳು, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತರ ಹೆಸರುಗಳನ್ನು ಬರೆಸಲಾಗಿದೆ.

ಆದಿಕವಿ ರನ್ನ ಹಾಗೂ ಪಂಪನ ಹೆಸರಿನ ಜತೆಗೆ ವಿ.ಕೃ.ಗೋಕಾಕ್, ಕುವೆಂಪು, ಡಿ.ವಿ.ಜಿ, ದ.ರಾ.ಬೇಂದ್ರೆ, ಮಾಸ್ತಿ ವೆಂಕಟೇಶ್​ ಅಯ್ಯಂಗಾರ್, ಶಿವರಾಮ ಕಾರಂತ, ಪು.ತಿ.ನರಸಿಂಹಾಚಾರ್, ಚಂದ್ರಶೇಖರ್ ಕಂಬಾರ, ಗಿರೀಶ್ ಕಾರ್ನಾಡ್, ಯು.ಆರ್.ಅನಂತಮೂರ್ತಿ ಅವರುಗಳ ಹೆಸರುಗಳನ್ನು ನಾಮಕರಣ ಮಾಡುವ ಮೂಲಕ ಕನ್ನಡದ ಸಾಹಿತ್ಯ ಪರಂಪರೆಯನ್ನು ನೆನಪಿಸುವ ಕೆಲಸ ಮಾಡಲಾಗಿದೆ.