ಬಾತ್‌ ಟವೆಲ್‌ಗಳಲ್ಲಿ ವಿಶೇಷ ಪಟ್ಟಿ ಏಕಿರುತ್ತವೆ, ಅವುಗಳ ಕಾರ್ಯವಾದರೂ ಏನು ಗೊತ್ತಾ?

ಪ್ರತಿಯೊಂದು ಮನೆಗಳಲ್ಲೂ ಸಹ ಟವೆಲ್‌ಗಳು (towels) ಇದ್ದೇ ಇರುತ್ತವೆ. ಸ್ನಾನದ ನಂತರ ಮೈ ಒರೆಸಿಕೊಳ್ಳಲು ಮಾತ್ರವಲ್ಲ, ಆಗಾಗ್ಗೆ ಕೈ ಒರೆಸಿಕೊಳ್ಳಲು ಸಹ ಟವೆಲ್‌ಗಳನ್ನೇ ಬಳಸುತ್ತೇವೆ. ನಮ್ಮ ದೈನಂದಿನ ಜೀವನದ ಅತೀ ಅವಶ್ಯಕ ವಸ್ತುವಾದ ಈ ಟವೆಲ್‌ಗಳಲ್ಲಿ ಪಟ್ಟೆಗಳು ಇರುವುದನ್ನು ನೀವು ಗಮನಿಸಿದ್ದೀರಾ? ಹೌದು ಟವೆಲ್‌ಗಳ ಎರಡೂ ಅಂಚಿನಲ್ಲೂ ಈ ಗೆರೆಗಳು ಇರುತ್ತವೆ. ಅಷ್ಟಕ್ಕೂ ಆ ಗೆರೆಗಳು ಏಕಿರುತ್ತವೆ, ಇದು ಬರೀ ಅಲಂಕಾರಕ್ಕಾಗಿಯೇ ಅಥವಾ ಬೇರೆ ಏನಾದರೂ ಉದ್ದೇಶ ಇದೆಯೇ ಎಂಬುದರ ಸಂಕ್ಷಿಪ್ತ ವಿವರ ಇಲ್ಲಿದೆ ನೋಡಿ.

ಟವೆಲ್‌ಗಳ ಅಂಚಿನಲ್ಲಿ ಗೆರೆಗಳು ಏಕಿರುತ್ತವೆ?

ಟವೆಲ್‌ಗಳ ಎರಡೂ ಅಂಚಿನಲ್ಲಿರುವ ಈ ಪಟ್ಟೆಗಳು ನಯವಾಗಿ, ನೇರವಾಗಿ ಮತ್ತು ಸ್ವಲ್ಪ ಬಿಗಿಯಾಗಿರುತ್ತದೆ. ಈ ಪಟ್ಟಿಯನ್ನು ಡಾಬಿ ಬಾರ್ಡರ್‌ (dobby border) ಎಂದು ಕರೆಯಲಾಗುತ್ತದೆ. ಇದು ಟವಲ್‌ನ ಅಂಚುಗಳಲ್ಲಿ ಕಂಡುಬರುವ ವಿಶೇಷ ರೀತಿಯ ನೇಯ್ಗೆಯಾಗಿದೆ. ಈ ಬಾರ್ಡರ್ ಟವಲ್ ವಿನ್ಯಾಸಕ್ಕೆ ವಿಶಿಷ್ಟ ನೋಟವನ್ನು ನೀಡುತ್ತದೆ. ಅಷ್ಟೇ ಅಲ್ಲದೆ  ಇದು ಟವಲ್‌ನ ಅಂಚುಗಳಿಗೆ ರಕ್ಷಣೆಯಾಗಿ ಕಾರ್ಯನಿರ್ವಹಿಸುತ್ತದೆ ಮತ್ತು ಎಳೆಗಳು ಸವೆಯುವುದನ್ನು ತಡೆಯುತ್ತದೆ.

ಟವೆಲ್‌ಗಳಲ್ಲಿರುವ ಡಾಬಿ ಬಾರ್ಡರ್‌ನ ಕಾರ್ಯಗಳೇನು?

ಟವೆಲ್‌ಗಳು ಬೇಗನೆ ಹರಿದು ಹೋಗುವುದನ್ನು ತಡೆಯುತ್ತದೆ: ಟವಲ್ ಸುತ್ತ ಈ ಪಟ್ಟಿ ಇಲ್ಲದಿದ್ದರೆ, ಸ್ವಲ್ಪ ಸಮಯದೊಳಗೆಯೇ ಟವೆಲ್‌ನ ಅಂಚುಗಳು ಸವೆಯಲು ಪ್ರಾರಂಭಿಸುತ್ತದೆ. ಈ ಪಟ್ಟಿಯು ಟವಲ್ ನ ಹಿಡಿತವನ್ನು ಬಲಪಡಿಸುತ್ತದೆ ಮತ್ತು ಅದನ್ನು ಹೆಚ್ಚು ಕಾಲ ಬಾಳಿಕೆ ಬರುವಂತೆ ಮಾಡುತ್ತದೆ. ನೀವು ಟವಲ್ ಅನ್ನು ಗಟ್ಟಿಯಾಗಿ ಹಿಂಡಿದರೂ ಅಥವಾ ಪದೇ ಪದೇ ತೊಳೆದರೂ, ಈ ಬಾರ್ಡರ್‌ಗಳು ಹರಿದು ಹೋಗುವುದನ್ನು ತಡೆಯುತ್ತದೆ.

ಇದು ನೀರನ್ನು ಹೀರಿಕೊಳ್ಳುವಲ್ಲಿಯೂ ಸಹಾಯ ಮಾಡುತ್ತದೆ: ಟವೆಲ್ ಮೇಲಿನ ಈ ಪಟ್ಟಿಯು ಸ್ವಲ್ಪ ಅಸಾಮಾನ್ಯವಾಗಿ ಕಾಣಿಸಬಹುದು, ಇದು ಟವೆಲ್ ದೇಹದಿಂದ ನೀರನ್ನು ಹೆಚ್ಚು ಪರಿಣಾಮಕಾರಿಯಾಗಿ ಹೀರಿಕೊಳ್ಳಲು ಅನುವು ಮಾಡಿಕೊಡುತ್ತದೆ.

ಇದನ್ನೂ ಓದಿ: ನಾಯಿಗಳು ಕಾರ್‌, ಬೈಕನ್ನು ಅಟ್ಟಿಸಿಕೊಂಡು ಹೋಗುವುದೇಕೆ ಗೊತ್ತಾ?

ಟವಲ್‌ಗೆ ಬಲ ನೀಡುತ್ತದೆ: ನಾವು ವಾರದಲ್ಲಿ ಹಲವಾರು ಬಾರಿ ಟವೆಲ್ ತೊಳೆಯುತ್ತೇವೆ. ಈ ರೀತಿ ಪದೇ ಪದೇ ತೊಳೆದಾಗ ಕೆಲವೊಂದು ವಸ್ತ್ರಗಳು ಹರಿದುಹೋಗುವ ಸಾಧ್ಯತೆ ಇರುತ್ತದೆ. ಆದರೆ ಈ ಪಟ್ಟಿ ಟವೆಲ್‌ಗೆ ಬಲ ನೀಡುತ್ತದೆ. ಒಗೆದ ನಂತರವೂ ಹಾನಿಗೊಳಗಾಗುವುದನ್ನು ತಪ್ಪಿಸುತ್ತದೆ.

ಟವೆಲ್‌ಗೆ ಸುಂದರ ನೋಟ ನೀಡುತ್ತದೆ: ಟವಲ್ ಮೇಲಿನ ಪಟ್ಟೆಯು ಅದರ ನೋಟವನ್ನು ಹೆಚ್ಚಿಸುತ್ತದೆ. ಇದು ಟವೆಲ್ ಸರಳವಾಗಿ ಕಾಣುವ ಬದಲು ಸ್ಟೈಲಿಶ್ ಆಗಿ ಕಾಣುವಂತೆ ಮಾಡುತ್ತದೆ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ