ದೊಡ್ಡ ಕಾರ್ಯಕ್ರಮಕ್ಕೂ ಮುನ್ನ ಹೇರ್‌ಕಟ್ ಮಾಡಿಸಬೇಕೆ? ಯಾವಾಗ ಮಾಡಿದರೆ ಸೂಕ್ತ?

ಮದುವೆ, ನಿಶ್ಚಿತಾರ್ಥ, ಹುಟ್ಟುಹಬ್ಬ, ಪಾರ್ಟಿ ಅಥವಾ ಯಾವುದೇ ವಿಶೇಷ ಕಾರ್ಯಕ್ರಮವಿರಲಿ, ಅದಕ್ಕೂ ಮುನ್ನ ಬಟ್ಟೆ, ಆಭರಣ, ಮೇಕಪ್ ಸೇರಿದಂತೆ ಹಲವು ವಿಚಾರಗಳ ಬಗ್ಗೆ ನಾವು ಗಮನ ಕೊಡುತ್ತೇವೆ. ಆದರೆ ಕೂದಲಿನ ಬಗ್ಗೆ ಕೊನೆಯ ಕ್ಷಣದಲ್ಲಿ ಯೋಚಿಸುವುದು ಸಾಮಾನ್ಯ. ಕಾರ್ಯಕ್ರಮದ ದಿನ ಕೂದಲು ಚೆನ್ನಾಗಿ ಕಾಣಬೇಕು ಎಂದರೆ, ಹೇರ್‌ಕಟ್ (Haircut) ಮಾಡಿಸುವ ಸಮಯವೂ ಮುಖ್ಯವಾಗುತ್ತದೆ. ಕಾರ್ಯಕ್ರಮಕ್ಕೆ ಎಷ್ಟು ದಿನ ಮೊದಲು ಹೇರ್‌ಕಟ್ ಮಾಡಿಸಬೇಕು ಎಂಬುದು ಕೂದಲಿನ ಉದ್ದ, ಆಯ್ಕೆ ಮಾಡಿಕೊಂಡಿರುವ ಶೈಲಿ ಮತ್ತು ಅದನ್ನು ನಿರ್ವಹಿಸುವ ವಿಧಾನವನ್ನು ಅವಲಂಬಿಸಿರುತ್ತದೆ ಎಂದು ಹೇರ್‌ಕಟ್ ತಜ್ಞೆ ಕೋಮಲ್ ಪಾಂಡೆ ತಿಳಿಸಿದ್ದಾರೆ.

ಸಾಮಾನ್ಯ ಹೇರ್‌ಕಟ್ ಅಥವಾ ಟ್ರಿಮ್‌?

ಕೇವಲ ಕೂದಲಿನ ಉದ್ದವನ್ನು ಸ್ವಲ್ಪ ಕಡಿಮೆ ಮಾಡಿಸುವುದು ಅಥವಾ ಸಾಮಾನ್ಯ ಟ್ರಿಮ್‌ ಮಾಡಿಸುವುದಾದರೆ, ಕಾರ್ಯಕ್ರಮಕ್ಕೆ 5ರಿಂದ 7 ದಿನಗಳ ಮೊದಲು ಹೇರ್‌ಕಟ್ ಮಾಡಿಸಿಕೊಳ್ಳುವುದು ಸೂಕ್ತ. ಇದರಿಂದ ಹೊಸ ಹೇರ್‌ಕಟ್‌ಗೆ ಕೂದಲು ಹೊಂದಿಕೊಳ್ಳಲು ಸಮಯ ಸಿಗುತ್ತದೆ. ಜೊತೆಗೆ, ಕೂದಲನ್ನು ತೊಳೆದು ಸ್ವತಃ ಹೇಗೆ ಸಿದ್ಧಪಡಿಸಿಕೊಳ್ಳಬಹುದು ಎಂಬುದನ್ನೂ ಮುಂಚಿತವಾಗಿಯೇ ತಿಳಿದುಕೊಳ್ಳಬಹುದು. ಹೊಸ ಉದ್ದ ಅಥವಾ ಆಕಾರ ನಿಮಗೆ ಇಷ್ಟವಾಗಿದೆಯೇ ಎಂಬುದನ್ನು ಪರಿಶೀಲಿಸಲು ಕೂಡ ಇದು ಅವಕಾಶ ನೀಡುತ್ತದೆ.

ಸಂಪೂರ್ಣವಾಗಿ ಹೊಸ ಹೇರ್‌ಸ್ಟೈಲ್‌ ಮಾಡಿಸುತ್ತಿದ್ದರೆ?

ಕೂದಲನ್ನು ತುಂಬಾ ಚಿಕ್ಕದಾಗಿ ಕತ್ತರಿಸುವುದು ಅಥವಾ ಇದುವರೆಗೆ ಮಾಡಿಸದ ಹೊಸ ಶೈಲಿಯನ್ನು ಪ್ರಯತ್ನಿಸುವುದಾದರೆ, ಕಾರ್ಯಕ್ರಮಕ್ಕೆ ಕೇವಲ ಒಂದು-ಎರಡು ದಿನ ಮೊದಲು ಹೇರ್‌ಕಟ್ ಮಾಡಿಸಿಕೊಳ್ಳುವುದು ಸೂಕ್ತವಲ್ಲ. ಇಂತಹ ಬದಲಾವಣೆಗೆ ಒಂದರಿಂದ ಎರಡು ವಾರಗಳ ಸಮಯ ಇಟ್ಟುಕೊಳ್ಳುವುದು ಉತ್ತಮ. ಮೊದಲ ಬಾರಿ ಕೂದಲು ತೊಳೆದ ನಂತರ ಅದರ ಗಾತ್ರ ಅಥವಾ ವಿನ್ಯಾಸದಲ್ಲಿ ಸ್ವಲ್ಪ ಬದಲಾವಣೆ ಕಾಣಿಸಬಹುದು.

ಚಿಕ್ಕ ಕೂದಲಿಗೆ ಸಮಯದ ಆಯ್ಕೆ ಇನ್ನಷ್ಟು ಮುಖ್ಯ

ಚಿಕ್ಕ ಕೂದಲಿನ ಹೇರ್‌ಸ್ಟೈಲ್‌ಗಳಲ್ಲಿ ನಿಖರವಾದ ಆಕಾರ ಮತ್ತು ಅಂಚುಗಳು ಮುಖ್ಯವಾಗಿರುವುದರಿಂದ ಅವುಗಳಿಗೆ ಹೆಚ್ಚಿನ ನಿರ್ವಹಣೆ ಬೇಕಾಗಬಹುದು. ಹೇರ್‌ಕಟ್ ಮಾಡಿದ ತಕ್ಷಣ ಕೂದಲು ತುಂಬಾ ಅಚ್ಚುಕಟ್ಟಾಗಿ ಕಾಣಿಸಬಹುದು. ಆದರೆ ಕೆಲವು ದಿನಗಳ ಬಳಿಕ ಅದು ಸ್ವಲ್ಪ ಸಹಜವಾದ ರೂಪಕ್ಕೆ ಬರುತ್ತದೆ. ಹೀಗಾಗಿ ಕಾರ್ಯಕ್ರಮದ ದಿನ ಯಾವ ರೀತಿಯ ಲುಕ್ ಬೇಕು ಎಂಬುದನ್ನು ಗಮನದಲ್ಲಿಟ್ಟುಕೊಂಡು ಹೇರ್‌ಕಟ್‌ನ ಸಮಯವನ್ನು ಆಯ್ಕೆ ಮಾಡಬೇಕು.

World Vegetarian Day: ಸಸ್ಯಾಹಾರ ಎಂದರೆ ಕೇವಲ ತರಕಾರಿ ತಿನ್ನುವುದಲ್ಲ; ತಟ್ಟೆಯಲ್ಲಿ ಈ ಆಹಾರಗಳೂ ಇರಲಿ

ಉದ್ದ ಕೂದಲಿದ್ದರೆ?

ಉದ್ದ ಕೂದಲಿಗೆ ಸಾಮಾನ್ಯವಾಗಿ ಪ್ರತಿದಿನದ ನಿರ್ವಹಣೆ ಮತ್ತು ಕೂದಲಿನ ಅಂಚುಗಳ ನಿಖರತೆಯ ಬಗ್ಗೆ ಹೆಚ್ಚಿನ ಚಿಂತೆ ಇರುವುದಿಲ್ಲ. ಆದರೆ ಲೇಯರ್‌ಗಳನ್ನು ಮಾಡಿಸುವುದು ಅಥವಾ ಕೂದಲಿನ ಆಕಾರವನ್ನು ಬದಲಾಯಿಸುವುದಾದರೆ ಮುಂಚಿತವಾಗಿ ಮಾಡಿಸಿಕೊಳ್ಳುವುದು ಉತ್ತಮ. ಕಾರ್ಯಕ್ರಮದ ದಿನ ಕೂದಲನ್ನು ಕಟ್ಟಿಕೊಳ್ಳಬೇಕಿದ್ದರೆ ಅಥವಾ ನಿರ್ದಿಷ್ಟ ರೀತಿಯಲ್ಲಿ ಸಿದ್ಧಪಡಿಸಬೇಕಿದ್ದರೆ, ಅದನ್ನು ಒಂದು ಬಾರಿ ಮೊದಲೇ ಪ್ರಯತ್ನಿಸಿ ನೋಡಬಹುದು.

ಕಾರ್ಯಕ್ರಮದ ಸ್ವರೂಪವನ್ನೂ ಗಮನಿಸಿ

ಕಾರ್ಯಕ್ರಮ ಎಷ್ಟು ಔಪಚಾರಿಕವಾಗಿದೆ ಎಂಬುದೂ ಮುಖ್ಯ. ಫೋಟೋಶೂಟ್, ಮದುವೆ ಅಥವಾ ವಿಶೇಷ ಕಾರ್ಯಕ್ರಮದಂತಹ ಸಂದರ್ಭಗಳಲ್ಲಿ ಕೂದಲಿನ ಶೈಲಿ ಬಹಳ ಮುಖ್ಯವಾಗಿದ್ದರೆ, ಹೇರ್‌ಕಟ್‌ ಮತ್ತು ಸ್ಟೈಲಿಂಗ್‌ ಅನ್ನು ಮುಂಚಿತವಾಗಿ ಪರೀಕ್ಷಿಸಿಕೊಳ್ಳುವುದು ಉತ್ತಮ. ಇದರಿಂದ ಕೊನೆಯ ಕ್ಷಣದಲ್ಲಿ ಕೂದಲಿನ ಶೈಲಿಯಲ್ಲಿ ಬದಲಾವಣೆ ಮಾಡುವ ಅನಿವಾರ್ಯತೆ ಕಡಿಮೆಯಾಗುತ್ತದೆ.

ಕಾರ್ಯಕ್ರಮದ ದಿನ ಹೊಸ ಪ್ರಯೋಗ ಬೇಡ

ಕಾರ್ಯಕ್ರಮಕ್ಕೆ ಸಿದ್ಧಪಡಿಸುವ ಕೂದಲಿನ ಶೈಲಿಯನ್ನು ಮುಂಚಿತವಾಗಿ ಒಮ್ಮೆ ಪ್ರಯತ್ನಿಸಿ ನೋಡುವುದು ಒಳ್ಳೆಯದು. ಬೇರೆ ಯಾರಾದರೂ ಕೂದಲನ್ನು ಸಿದ್ಧಪಡಿಸುತ್ತಿದ್ದರೆ, ನಿಮಗೆ ಬೇಕಾದ ರೀತಿಯ ಬಗ್ಗೆ ಅವರಿಗೆ ಸ್ಪಷ್ಟವಾಗಿ ತಿಳಿಸಿ. ನೀವೇ ಕೂದಲನ್ನು ಸಿದ್ಧಪಡಿಸಿಕೊಳ್ಳುವುದಾದರೆ, ಕಾರ್ಯಕ್ರಮಕ್ಕೂ ಮುನ್ನ ಒಮ್ಮೆ ಪ್ರಯತ್ನಿಸಿ ನೋಡಿದರೆ ಎಷ್ಟು ಸಮಯ ಬೇಕಾಗುತ್ತದೆ ಮತ್ತು ಕೂದಲು ಹೇಗೆ ಹೊಂದಿಕೊಳ್ಳುತ್ತದೆ ಎಂಬುದು ತಿಳಿಯುತ್ತದೆ.

ಇನ್ನಷ್ಟು ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್‌ ಮಾಡಿ