ಕ್ವಿಕ್ ವೈಟ್ ಲಾಸ್​ನಿಂದ ದೇಹದಲ್ಲಿ ಏನೆಲ್ಲ ಬದಲಾವಣೆ ಆಗುತ್ತದೆ? ಕೂದಲು, ಮುಖ, ಸ್ನಾಯುಗಳ ಮೇಲೂ ಪರಿಣಾಮ!

ತೂಕ ಇಳಿಸಿಕೊಳ್ಳುವುದು (Weight Loss) ಹಲವರ ಗುರಿಯಾಗಿರುತ್ತದೆ. ಆದರೆ ಕಡಿಮೆ ಸಮಯದಲ್ಲಿ ತುಂಬಾ ವೇಗವಾಗಿ ತೂಕ ಇಳಿಸಿಕೊಳ್ಳುವುದು ದೇಹದ ಮೇಲೆ ಕೆಲವು ಅನಿರೀಕ್ಷಿತ ಪರಿಣಾಮಗಳನ್ನು ಉಂಟುಮಾಡಬಹುದು. ತೂಕದ ಸಂಖ್ಯೆ ಕಡಿಮೆಯಾಗುವುದರ ಜೊತೆಗೆ ಮುಖದ ಆಕಾರದಲ್ಲಿ ಬದಲಾವಣೆ, ಕೂದಲು ಉದುರುವಿಕೆ ಹಾಗೂ ಸ್ನಾಯುಗಳ ಪ್ರಮಾಣ ಕಡಿಮೆಯಾಗುವಂತಹ ಸಮಸ್ಯೆಗಳು ಕಾಣಿಸಿಕೊಳ್ಳುವ ಸಾಧ್ಯತೆಯಿದೆ ಎಂದು ತಜ್ಞರು ತಿಳಿಸಿದ್ದಾರೆ.

ಮುಖದ ಆಕಾರ ಬದಲಾಗಬಹುದು

ತೂಕ ವೇಗವಾಗಿ ಇಳಿದಾಗ ಮುಖದಲ್ಲಿರುವ ಕೊಬ್ಬಿನ ಪ್ರಮಾಣವೂ ಕಡಿಮೆಯಾಗಬಹುದು. ಕೆನ್ನೆ, ಕಣ್ಣಿನ ಕೆಳಭಾಗ ಮತ್ತು ಮುಖದ ಇತರ ಭಾಗಗಳಲ್ಲಿರುವ ಕೊಬ್ಬು ಮುಖಕ್ಕೆ ತುಂಬಿದ ನೋಟ ನೀಡಲು ಸಹಾಯ ಮಾಡುತ್ತದೆ. ಈ ಕೊಬ್ಬು ಕಡಿಮೆಯಾದಾಗ ಕೆನ್ನೆಗಳು ಒಳಗೆ ಹೋದಂತೆ ಅಥವಾ ಮುಖ ಸೊರಗಿದಂತೆ ಕಾಣಿಸಬಹುದು. ಚರ್ಮವು ಹೊಸ ಆಕಾರಕ್ಕೆ ಹೊಂದಿಕೊಳ್ಳಲು ಸಮಯ ಬೇಕಾಗುವುದರಿಂದ ಕೆಲವೊಮ್ಮೆ ಮುಖದ ಚರ್ಮ ಸಡಿಲವಾಗಿಯೂ ಕಾಣಿಸಿಕೊಳ್ಳಬಹುದು. ಇದರಿಂದ ವಯಸ್ಸು ಹೆಚ್ಚಾದಂತೆ ಕಾಣುವ ಸಾಧ್ಯತೆಯೂ ಇದೆ.

ಕೂದಲು ಉದುರುವ ಸಾಧ್ಯತೆ

ವೇಗವಾಗಿ ತೂಕ ಇಳಿಸಿಕೊಂಡ ನಂತರ ಕೆಲವರಲ್ಲಿ ಕೂದಲು ಉದುರುವಿಕೆ ಹೆಚ್ಚಾಗಬಹುದು. ತೂಕ ಇಳಿಕೆ ಮತ್ತು ಆಹಾರದಲ್ಲಿ ಪೋಷಕಾಂಶಗಳ ಕೊರತೆಯಿಂದ ದೇಹಕ್ಕೆ ಒತ್ತಡ ಉಂಟಾಗಬಹುದು. ಇದರ ಪರಿಣಾಮವಾಗಿ ಹೆಚ್ಚಿನ ಕೂದಲಿನ ಬೇರುಗಳು ವಿಶ್ರಾಂತಿ ಹಂತಕ್ಕೆ ಹೋಗಬಹುದು. ವಿಶೇಷವೆಂದರೆ ಈ ಬದಲಾವಣೆ ತಕ್ಷಣ ಕಾಣಿಸಿಕೊಳ್ಳುವುದಿಲ್ಲ. ಸಾಮಾನ್ಯವಾಗಿ ತೂಕ ಇಳಿಸಿಕೊಂಡ ಎರಡು ಅಥವಾ ಮೂರು ತಿಂಗಳ ನಂತರ ಕೂದಲು ಉದುರುವಿಕೆ ಗಮನಕ್ಕೆ ಬರಬಹುದು.

Mix Fruits: ಹಣ್ಣುಗಳನ್ನು ಮಿಕ್ಸ್ ಮಾಡಿ ತಿನ್ನುವ ಮುನ್ನ ಈ ವಿಷಯ ತಿಳಿಯಿರಿ

ಕೊಬ್ಬಿನ ಜೊತೆಗೆ ಸ್ನಾಯುಗಳೂ ಕಡಿಮೆಯಾಗಬಹುದು

ತೂಕ ಇಳಿಸುವಾಗ ದೇಹದಲ್ಲಿರುವ ಕೊಬ್ಬು ಮಾತ್ರ ಕಡಿಮೆಯಾಗುವುದಿಲ್ಲ. ಆಹಾರದಲ್ಲಿ ಸಾಕಷ್ಟು ಪ್ರೋಟೀನ್ ಇಲ್ಲದಿದ್ದರೆ ಅಥವಾ ಸ್ನಾಯುಗಳನ್ನು ಬಲಪಡಿಸುವ ವ್ಯಾಯಾಮ ಮಾಡದಿದ್ದರೆ ಸ್ನಾಯುಗಳ ಪ್ರಮಾಣವೂ ಕಡಿಮೆಯಾಗಬಹುದು. ಇದರಿಂದ ದೇಹದ ಆಕಾರ ಬದಲಾಗುವುದರ ಜೊತೆಗೆ ಚರ್ಮಕ್ಕೆ ಒಳಗಿನಿಂದ ಸಿಗುವ ಬೆಂಬಲವೂ ಕಡಿಮೆಯಾಗಬಹುದು. ಪರಿಣಾಮವಾಗಿ ಚರ್ಮ ಕೆಲವು ಭಾಗಗಳಲ್ಲಿ ಸಡಿಲವಾಗಿ ಕಾಣಿಸಿಕೊಳ್ಳಬಹುದು.

ಆರೋಗ್ಯಕರವಾಗಿ ತೂಕ ಇಳಿಸುವುದು ಮುಖ್ಯ

ತೂಕ ಇಳಿಸಿಕೊಳ್ಳುವಾಗ ತೂಕದ ಸಂಖ್ಯೆಯನ್ನಷ್ಟೇ ಗುರಿಯಾಗಿಸಿಕೊಳ್ಳದೆ ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳು ಸಿಗುವಂತೆ ನೋಡಿಕೊಳ್ಳುವುದು ಮುಖ್ಯ. ಸಾಕಷ್ಟು ಪ್ರೋಟೀನ್‌ ಇರುವ ಸಮತೋಲಿತ ಆಹಾರ ಸೇವಿಸುವುದು ಮತ್ತು ಸ್ನಾಯುಗಳನ್ನು ಬಲಪಡಿಸುವ ವ್ಯಾಯಾಮ ಮಾಡುವುದು ಸಹಾಯಕವಾಗಬಹುದು. ಅತಿಯಾದ ಆಹಾರ ನಿಯಂತ್ರಣ ಅಥವಾ ತ್ವರಿತ ತೂಕ ಇಳಿಕೆಯ ವಿಧಾನಗಳನ್ನು ಅನುಸರಿಸುವ ಮೊದಲು ತಜ್ಞರ ಸಲಹೆ ಪಡೆಯುವುದು ಉತ್ತಮ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ