World Hydrography Day 2024 : ಪರಿಸರ ರಕ್ಷಣೆ, ಸಮುದ್ರದ ಸಂರಕ್ಷಣೆಯಲ್ಲಿ ಹೈಡ್ರೋಗ್ರಫಿಯ ಪಾತ್ರವೇನು?
ಹೈಡ್ರೋಗ್ರಫಿಯು ಭೂಮಿಯ ಜಲಮೂಲಗಳ ಭೌತಿಕ ಲಕ್ಷಣಗಳನ್ನು ವಿವರಿಸುವ ವಿಜ್ಞಾನವಾಗಿದೆ. ಪ್ರತಿ ವರ್ಷ, ಜೂನ್ 21 ರಂದು ವಿಶ್ವ ಹೈಡ್ರೋಗ್ರಫಿ ದಿನ (ವಿಶ್ವ ಜಲವಿಜ್ಞಾನ ದಿನ) ವನ್ನಾಗಿ ಆಚರಿಸಲಾಗುತ್ತದೆ. ಹಾಗಾದ್ರೆ ಈ ದಿನದ ಇತಿಹಾಸ ಹಾಗೂ ಮಹತ್ವದ ಕುರಿತಾದ ಸಂಪೂರ್ಣ ಮಾಹಿತಿಯೂ ಇಲ್ಲಿದೆ.
ಸಮುದ್ರದಾಳದ ರಹಸ್ಯಗಳನ್ನು ಬಲ್ಲವರು ಯಾರು ಹೇಳಿ, ಶಾಂತತೆಯಿಂದ ಕೂಡಿದ ಸಮುದ್ರವು ಏಕಾಏಕಿ ರೌದ್ರತೆಯನ್ನು ತೋರುತ್ತದೆ. ಈ ಹೈಡ್ರೋಗ್ರಫಿಯು ಸಾಗರಗಳು, ಸಮುದ್ರಗಳು, ನದಿಗಳು ಮತ್ತು ವಿವಿಧ ಜಲರಾಶಿಗಳ ಭೌತಿಕ ಗುಣಲಕ್ಷಣಗಳನ್ನು ಅಳೆಯಲು ಸಹಕಾರಿಯಾಗಿದೆ. ಈ ಹೈಡ್ರೋಗ್ರಾಫಿಕ್ ಸಮೀಕ್ಷೆಯಲ್ಲಿ ನೀರಿನ ದೇಹದ ಆಳ, ತಳದ ಪ್ರಕಾರ, ಪ್ರವಾಹಗಳು, ಉಬ್ಬರವಿಳಿತಗಳಂತಹ ವಿವಿಧ ಗುಣಲಕ್ಷಣಗಳ ಮಾಹಿತಿಯನ್ನು ಪಡೆಯಬಹುದಾಗಿದೆ. ಈ ಮಾಹಿತಿಯನ್ನು ಭದ್ರತೆ ಹಾಗೂ ಪರಿಸರ ಸಂರಕ್ಷಣೆಯಂತಹ ವಿವಿಧ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ. ಹೀಗಾಗಿ ಹೈಡ್ರೋಗ್ರಾಫರ್‌ಗಳು ನಮ್ಮನ್ನು ಸುರಕ್ಷಿತವಾಗಿರಿಸುವಲ್ಲಿ ಮತ್ತು ಪರಿಸರವನ್ನು ರಕ್ಷಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.
ವಿಶ್ವ ಹೈಡ್ರೋಗ್ರಫಿ ದಿನದ ಇತಿಹಾಸ
ಹೈಡ್ರೋಗ್ರಫಿ ಮತ್ತು ಪ್ರಪಂಚದಾದ್ಯಂತ ಹೈಡ್ರೋಗ್ರಾಫರ್‌ಗಳ ಕೆಲಸದ ಬಗ್ಗೆ ಜಾಗೃತಿ ಮೂಡಿಸಲು ಜೂನ್ 21 ರಂದು ವಿಶ್ವ ಹೈಡ್ರೋಗ್ರಫಿ ದಿನವನ್ನು ಆಚರಿಸಲಾಗುತ್ತದೆ. ಇಂಟರ್ನ್ಯಾಷನಲ್ ಹೈಡ್ರೋಗ್ರಾಫಿಕ್ ಆರ್ಗನೈಸೇಶನ್ (IHO) 2005 ರಲ್ಲಿ ಸಂಸ್ಥಾಪನಾ ದಿನದ ಸಂದರ್ಭದಲ್ಲಿ ವಿಶ್ವ ಹೈಡ್ರೋಗ್ರಾಫಿ ದಿನವನ್ನು ಆಚರಿಸಲು ನಿರ್ಧರಿಸಿತು. ಈ ದಿನವನ್ನು 2006 ರಲ್ಲಿ ಮೊದಲ ಬಾರಿಗೆ ಆಚರಿಸಲಾಯಿತು. ಅಂದಿನಿಂದ ಪ್ರಪಂಚದಾದ್ಯಂತ ಜಲಶಾಸ್ತ್ರಜ್ಞರು ಮತ್ತು ಇತರ ಸಾಗರ ವೃತ್ತಿಪರರು ಈ ದಿನವನ್ನು ಆಚರಿಸುತ್ತಾರೆ.
ಇದನ್ನೂ ಓದಿ: ಯೋಗ ಮಾಡುವ ವೇಳೆ ಪಾಲಿಸಲೇಬೇಕಾದ ನಿಯಮಗಳಿವು
ವಿಶ್ವ ಹೈಡ್ರೋಗ್ರಫಿ ದಿನದ ಮಹತ್ವ
ಹೈಡ್ರೋಗ್ರಾಫರ್‌ಗಳ ಕೆಲಸ, ಹೈಡ್ರೋಗ್ರಫಿಯ ಪ್ರಾಮುಖ್ಯತೆ ಹಾಗೂ ಕಡಲ ಭದ್ರತೆ, ಪರಿಸರ ಸಂರಕ್ಷಣೆ, ಆರ್ಥಿಕ ಅಭಿವೃದ್ಧಿ ಮತ್ತು ವೈಜ್ಞಾನಿಕ ಸಂಶೋಧನೆಯಂತಹ ವಿವಿಧ ಅಂಶಗಳಲ್ಲಿ ಅದರ ಪ್ರಮುಖ ಪಾತ್ರದ ಬಗ್ಗೆ ಜಾಗೃತಿ ಮೂಡಿಸುವ ಉದ್ದೇಶದಿಂದ ಈ ದಿನವನ್ನು ಆಚರಿಸಲಾಗುತ್ತಿದೆ. ಹೀಗಾಗಿ ಈ ದಿನದಂದು ಚಟುವಟಿಕೆಗಳು, ಪ್ರದರ್ಶನಗಳು, ಕಾರ್ಯಾಗಾರ ಸೇರಿದಂತೆ ವಿವಿಧ ರೀತಿಯ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತದೆ.
ಜೀವನಶೈಲಿಗೆ ಸಂಬಂಧಿಸಿದ ಇನ್ನಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ: