ಬಾಲಕಿ ಮೇಲಿನ ಲೈಂಗಿಕ ದೌರ್ಜನ್ಯ: ವಿವಾದದ ತೀರ್ಪು ನೀಡಿದ್ದ ನ್ಯಾಯಾಧೀಶೆಗೆ 150 ಕಾಂಡೋಮ್ ಪಾರ್ಸೆಲ್ ಬಂತು!
Justice Pushpa V Ganediwala ತೀರ್ಪಿನ ಬಗ್ಗೆ ಸೋಷಿಯಲ್ ಮೀಡಿಯಾಗಳಲ್ಲಿ ಸಿಕ್ಕಾಪಟೆ ಚರ್ಚೆ ಆಗಿತ್ತು. ಇದೀಗ ಅಹ್ಮದಾಬಾದ್ನ ಮಹಿಳೆ ಒಂದು ಹೆಜ್ಜೆ ಮುಂದುವರಿದು 150 ಕಾಂಡೋಮ್ ಕಳಿಸಿದ್ದಾರೆ.
ದೆಹಲಿ: ಬಾಂಬೆ ಹೈಕೋರ್ಟ್ನ ನಾಗ್ಪುರ ಪೀಠದ ಹೆಚ್ಚುವರಿ ನ್ಯಾಯಾಧೀಶೆ ಪುಷ್ಪಾ ವಿ ಗನೇಡಿವಾಲಾಗೆ ಅಹ್ಮದಾಬಾದ್ನ ಮಹಿಳೆಯೊಬ್ಬರು 150 ಕಾಂಡೋಮ್ಗಳನ್ನು ಕಳಿಸುವ ಮೂಲಕ, ಅವರ ತೀರ್ಪುಗಳಿಗೆ ವಿರೋಧ ವ್ಯಕ್ತಪಡಿಸಿದ್ದಾರೆ. ಕೆಲವು ದಿನಗಳ ಹಿಂದೆ ನ್ಯಾಯಾಧೀಶೆ ಪುಷ್ಪಾ ನೀಡಿದ್ದ ಎರಡು ತೀರ್ಪುಗಳು ವಿವಾದಕ್ಕೆ ಕಾರಣವಾಗಿದ್ದವು. ಈ ತೀರ್ಪುಗಳ ಕಾರಣದಿಂದಾಗಿ ಅವರ ವೃತ್ತಿಯಲ್ಲೂ ಹಿನ್ನಡೆಯಾಗಿತ್ತು. ಪುಷ್ಪಾ ಅವರನ್ನು ನ್ಯಾಯಾಲಯದ ಖಾಯಂ ನ್ಯಾಯಾಧೀಶರನ್ನಾಗಿ ನೇಮಕ ಮಾಡುವ ಪ್ರಸ್ತಾಪವನ್ನು ಸುಪ್ರೀಂಕೋರ್ಟ್ನ ಕೊಲಿಜಿಯಂ ಹಿಂಪಡೆದಿತ್ತು. ಈಗ ಮಹಿಳೆಯರೊಬ್ಬರು ಕಾಂಡೋಮ್ ಕಳಿಸುವ ಮೂಲಕ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಅಪ್ರಾಪ್ತ ವಯಸ್ಸಿನ ಬಾಲಕಿಯರ ಮೇಲಿನ ಲೈಂಗಿಕ ದೌರ್ಜನ್ಯದ ಎರಡು ಪ್ರಕರಣದ ತೀರ್ಪು ನೀಡಿದ್ದ ಪುಷ್ಪಾ ಗನೇಡಿವಾಲಾ, ಒಂದು ಕೇಸ್ನಲ್ಲಿ ಅಪ್ರಾಪ್ತ ವಯಸ್ಸಿನ ಬಾಲಕಿಯ ಬಟ್ಟೆಯ ಮೇಲಿಂದ ಖಾಸಗಿ ಅಂಗ ಸ್ಪರ್ಶಿಸುವುದು ಲೈಂಗಿಕ ದೌರ್ಜನ್ಯ ಎನ್ನಿಸಿಕೊಳ್ಳುವುದಿಲ್ಲ ಎಂದಿದ್ದರು. ಹಾಗೇ ಇನ್ನೊಂದು ಪ್ರಕರಣದಲ್ಲಿ, ಬಾಲಕಿಯ ಕೈ ಹಿಡಿದುಕೊಂಡು, ಪ್ಯಾಂಟ್ ಜಿಪ್ ತೆರೆಯುವುದು POCSO ಕಾಯ್ದೆಯಡಿ ಲೈಂಗಿಕ ದೌರ್ಜನ್ಯ ಎನ್ನಿಸಿಕೊಳ್ಳುವುದಿಲ್ಲ ಎಂದು ತೀರ್ಪು ನೀಡಿದ್ದರು. ಈ ಎರಡೂ ಪ್ರಕರಣಗಳಲ್ಲಿ ಆರೋಪಿಗಳ ಶಿಕ್ಷೆಯನ್ನು ಕಡಿಮೆ ಮಾಡಿದ್ದರು. ಆದರೆ ಮೊದಲ ಕೇಸ್ ತೀರ್ಪಿಗೆ ಸುಪ್ರೀಂಕೋರ್ಟ್ ತಡೆ ನೀಡಿತ್ತು.
ಪುಷ್ಪಾ ಅವರ ಈ ತೀರ್ಪನ್ನು ಸೋಷಿಯಲ್ ಮೀಡಿಯಾದಲ್ಲಿ ನೆಟ್ಟಿಗರು ಅಪಾರವಾಗಿ ಖಂಡಿಸಿದ್ದರು. ಇದೆಂಥಾ ತೀರ್ಪು ಎಂದು ಪ್ರಶ್ನಿಸಿದ್ದರು. ಈಗ ಅಹ್ಮದಾಬಾದ್ನ ದೇವಶ್ರೀ ತ್ರಿವೇದಿ 150 ಕಾಂಡೋಮ್ನ್ನು ಜಡ್ಜ್ಗಾಗಿ ಕಳಿಸಿದ್ದಾಗಿ ತಿಳಿಸಿದ್ದಾರೆ. ರಾಜಕೀಯ ವಿಶ್ಲೇಷಕರಾಗಿರುವ ದೇವಶ್ರೀ ತ್ರಿವೇದಿ, ಪುಷ್ಪಾ ಗನೇಡಿವಾಲಾ ಅವರ ಛೇಂಬರ್, ನಾಗ್ಪುರ ಪೀಠದ ನೋಂದಣಿ ಮತ್ತು ಮುಂಬೈನ ಪ್ರಧಾನ ಪೀಠ ಸೇರಿ ಒಟ್ಟು 12 ಕಡೆಗೆ ಕಾಂಡೋಮ್ ಕಳಿಸಿದ್ದಾಗಿ ತಿಳಿಸಿದ್ದಾರೆ.
ಪುಷ್ಪಾ ಗನೇಡಿವಾಲಾ ನೀಡಿದ ತೀರ್ಪನ್ನು ನನಗಂತೂ ಸಹಿಸಿಕೊಳ್ಳಲು ಸಾಧ್ಯವಿಲ್ಲ. ದೌರ್ಜನ್ಯಕ್ಕೆ ಒಳಗಾದ ಅಪ್ರಾಪ್ತ ವಯಸ್ಸಿನ ಬಾಲಕಿಯ ಈ ತೀರ್ಪುಗಳಿಂದ ನ್ಯಾಯ ಪಡೆಯಲು ಸಾಧ್ಯವಿಲ್ಲ. ಇಂತಹ ತೀರ್ಪು ನೀಡಿದ ಜಡ್ಜ್ನ್ನು ಅಮಾನತು ಮಾಡಬೇಕು ಎಂಬುದು ನನ್ನ ಆಗ್ರಹ ಎಂದು ತ್ರಿವೇದಿ ತಿಳಿಸಿದ್ದಾರೆ. ನಾನು ಫೆ. 9ರಂದು 12 ಕಡೆಗಳಿಗೆ ಕಾಂಡೋಮ್ ಕಳಿಸಿದ್ದೇನೆ. ಕೆಲವು ಕಡೆ ಅದು ತಲುಪಿದೆ. ನನಗೆ ಡೆಲಿವರಿ ಮೆಸೇಜ್ ಬಂದಿದೆ ಎಂದೂ ದೇವಶ್ರೀ ತ್ರಿವೇದಿ ಹೇಳಿದ್ದಾರೆ.
ಬಡ್ತಿ ಹಿಂಪಡೆತ
ಪುಷ್ಪಾ ಗನೇಡಿವಾಲಾ 2019ರ ಫೆಬ್ರವರಿಯಲ್ಲಿ ಬಾಂಬೆ ಹೈಕೋರ್ಟ್ ನಾಗ್ಪುರ ಪೀಠಕ್ಕೆ ಹೆಚ್ಚುವರಿ ಜಡ್ಜ್ ಆಗಿ ನೇಮಕಗೊಂಡಿದ್ದಾರೆ. ಸುಪ್ರೀಂಕೋರ್ಟ್ ಮುಖ್ಯ ನ್ಯಾಯಮೂರ್ತಿ ಎಸ್.ಎ.ಬಾಬ್ಡೆ ನೇತೃತ್ವದ ಕೊಲಿಜಿಯಂ ತನ್ನ ಶಿಫಾರಸ್ಸನ್ನು ಹಿಂಪಡೆದ ಕಾರಣ ಸದ್ಯ ಅವರು ಕಾಯಂ ನ್ಯಾಯಾಧೀಶರಾಗಲು ಸಾಧ್ಯವಿಲ್ಲ. ಇನ್ನೂ ಒಂದು ವರ್ಷ ಹೆಚ್ಚುವರಿ ಜಡ್ಜ್ ಆಗಿಯೇ ಮುಂದುವರಿಯಲಿ ಎಂದು ಸರ್ಕಾರ ಹೇಳಿದೆ.
ಇದನ್ನೂ ಓದಿ: ಬಟ್ಟೆ ಹಾಕಿದ್ದಾಗ ಸ್ಪರ್ಶಿಸುವುದು ಲೈಂಗಿಕ ದೌರ್ಜನ್ಯವಲ್ಲ ಎಂಬ ಬಾಂಬೇ ಹೈ ಕೋರ್ಟ್ ಆದೇಶಕ್ಕೆ ಸುಪ್ರೀಂ ತಡೆ
Published On - 4:15 pm, Thu, 18 February 21