ಪ್ಯಾರಾಗ್ಲೈಡಿಂಗ್ ಸುರಕ್ಷತೆ ಬಗ್ಗೆ ಮತ್ತೆ ಆತಂಕ, ಆರು ನಿಮಿಷದಲ್ಲೇ ಮುಗಿದ ಹಾರಾಟ, ನೋಯ್ಡಾ ಯುವಕ ಸಾವು

ಧರ್ಮಶಾಲಾ, ನವೆಂಬರ್ 12: ಹಿಮಾಚಲ ಪ್ರದೇಶದ ಪ್ರಸಿದ್ಧ ಪ್ರವಾಸಿ ತಾಣ ಬಿರ್-ಬಿಲ್ಲಿಂಗ್‌ನಲ್ಲಿ ಪ್ಯಾರಾಗ್ಲೈಡಿಂಗ್ ಮಾಡುವಾಗ ಸಂಭವಿಸಿದ ಅಪಘಾತದಲ್ಲಿ 26 ವರ್ಷದ ಯುವಕ ಮೃತಪಟ್ಟಿದ್ದಾರೆ. ಗ್ರೇಟರ್ ನೋಯ್ಡಾ ಮೂಲದ ಶುಭಂ ದೋಬ್ಲಿಯಾಲ್ ಮೃತ ದುರ್ದೈವಿ. ಅವರು ತಮ್ಮ ಸಹೋದರಿ ಮತ್ತು ಮೂವರು ಸಂಬಂಧಿಕರೊಂದಿಗೆ ಹಿಮಾಚಲ ಪ್ರದೇಶ ಪ್ರವಾಸಕ್ಕೆ ತೆರಳಿದ್ದಾಗ ಈ ಘಟನೆ ನಡೆದಿದೆ. ಪ್ಯಾರಾಗ್ಲೈಡಿಂಗ್ ವೇಳೆ ಟ್ಯಾಂಡಮ್ ಗ್ಲೈಡರ್‌ನಿಂದ ಕೆಳಗೆ ಬಿದ್ದ ಪರಿಣಾಮ ಶುಭಂ ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಶುಭಂ ಅವರು ತೈಲ ಮತ್ತು ನೈಸರ್ಗಿಕ ಅನಿಲ ನಿಗಮ (ONGC)ದಲ್ಲಿ ಉದ್ಯೋಗಿಯಾಗಿದ್ದರು.

ಪ್ಯಾರಾಗ್ಲೈಡಿಂಗ್ ವೇಳೆ ಆಗಿದ್ದೇನು? ನವೆಂಬರ್ 10ರಂದು ತುರ್ತು ಸಹಾಯವಾಣಿ 112ಕ್ಕೆ ಈ ಅಪಘಾತದ ಬಗ್ಗೆ ಮಾಹಿತಿ ಬಂದಿತ್ತು. ಶುಭಂ ಅವರ ಸ್ನೇಹಿತರೊಬ್ಬರು ಪ್ಯಾರಾಗ್ಲೈಡಿಂಗ್ ವೇಳೆ ಪ್ರವಾಸಿಯೊಬ್ಬರು ಕೆಳಗೆ ಬಿದ್ದಿದ್ದಾರೆ ಎಂದು ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಘಟನೆಗೆ ಸಂಬಂಧಿಸಿದಂತೆ ಗ್ರೇಟರ್ ನೋಯ್ಡಾದ 24 ವರ್ಷದ ಮಹಿಳೆಯ ಹೇಳಿಕೆಯನ್ನು ಪೊಲೀಸರು ದಾಖಲಿಸಿಕೊಂಡಿದ್ದಾರೆ. ನವೆಂಬರ್ 11ರಂದು ಕಾಂಗ್ರಾ ಜಿಲ್ಲೆಯ 45 ವರ್ಷದ ಪ್ಯಾರಾಗ್ಲೈಡಿಂಗ್ ಪೈಲಟ್ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗಿದೆ.

ಭಾರತೀಯ ನ್ಯಾಯ ಸಂಹಿತೆಯ ಸೆಕ್ಷನ್ 125 ಮತ್ತು 106ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರೆಸಲಾಗಿದೆ. ಅಪಘಾತಕ್ಕೆ ನಿಖರ ಕಾರಣವೇನು, ಪ್ಯಾರಾಗ್ಲೈಡಿಂಗ್ ವೇಳೆ ಸುರಕ್ಷತಾ ನಿಯಮಗಳನ್ನು ಪಾಲಿಸಲಾಗಿತ್ತೇ ಎಂಬುದನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ.

ಹಾರಾಟ ಆರಂಭಿಸಿದ ಆರು ನಿಮಿಷದಲ್ಲೇ ದುರಂತ ಪೊಲೀಸರ ಪ್ರಾಥಮಿಕ ಮಾಹಿತಿಯ ಪ್ರಕಾರ, ಶುಭಂ ಸ್ಥಳೀಯ ಪೈಲಟ್ ವಿನಯ್ ಕುಮಾರ್ ಅವರೊಂದಿಗೆ ಟ್ಯಾಂಡಮ್ ಪ್ಯಾರಾಗ್ಲೈಡಿಂಗ್ ಮಾಡುತ್ತಿದ್ದರು. ಬಿಲ್ಲಿಂಗ್‌ನಿಂದ ಹಾರಾಟ ಆರಂಭಿಸಿದ ಸುಮಾರು ಆರು ನಿಮಿಷಗಳಲ್ಲೇ ಅವರು ಗ್ಲೈಡರ್‌ನಿಂದ ಕೆಳಗೆ ಬಿದ್ದಿದ್ದಾರೆ.

ಪ್ರಯಾಣಿಕ ಕೆಳಗೆ ಬಿದ್ದರೂ ಪೈಲಟ್ ಸುರಕ್ಷಿತವಾಗಿ ಲ್ಯಾಂಡ್ ಆಗಿದ್ದಾರೆ. ಬಳಿಕ ಇತರ ಪೈಲಟ್‌ಗಳಿಗೆ ಮಾಹಿತಿ ನೀಡಿದ್ದಾರೆ. ತಕ್ಷಣ ಶೋಧ ಕಾರ್ಯಾಚರಣೆ ಆರಂಭಿಸಿದ ರಕ್ಷಣಾ ತಂಡಗಳು ಕಾಡಿನ ಪ್ರದೇಶದಲ್ಲಿ ಶುಭಂ ಅವರ ಮೃತದೇಹವನ್ನು ಪತ್ತೆಹಚ್ಚಿವೆ.

ಇದನ್ನೂ ಓದಿ:

ಮದುವೆ ಸಂಭ್ರಮದಲ್ಲಿದ್ದ ನಾಗಮಂಗಲದ ಕುಟುಂಬದಲ್ಲಿ ಸೂತಕ: ಕಮರಿಹೋಯ್ತು ಇಬ್ಬರು ಯುವತಿಯರ ಕನಸು

ಅಪಘಾತಕ್ಕೆ ಕಾರಣವೇನು? ಈ ದುರಂತಕ್ಕೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ. ತನಿಖಾಧಿಕಾರಿಗಳು ಹಲವು ಸಾಧ್ಯತೆಗಳನ್ನು ಪರಿಶೀಲಿಸುತ್ತಿದ್ದಾರೆ. – ಪ್ಯಾರಾಗ್ಲೈಡಿಂಗ್ ವೇಳೆ ಪ್ರಯಾಣಿಕನ ಸುರಕ್ಷತಾ ಬೆಲ್ಟ್ ಸಡಿಲವಾಗಿತ್ತೇ? – ಹಾರ್ನೆಸ್ ಅಥವಾ ಸುರಕ್ಷತಾ ಪಟ್ಟಿಯು ತುಂಡಾಗಿತ್ತೇ? – ಪೈಲಟ್ ನಡೆಸಿದ ಯಾವುದಾದರೂ ಹಾರಾಟದ ಚಲನೆಯಿಂದ ಅಪಘಾತ ಸಂಭವಿಸಿತೇ? – ಉಪಕರಣದಲ್ಲಿ ತಾಂತ್ರಿಕ ದೋಷವಿತ್ತೇ?

ಈ ಎಲ್ಲ ಆಯಾಮಗಳಲ್ಲಿ ತನಿಖೆ ನಡೆಯುತ್ತಿದೆ. ಸುರಕ್ಷತಾ ಬೆಲ್ಟ್ ಸಮಸ್ಯೆಯೇ ಅಪಘಾತಕ್ಕೆ ಕಾರಣ ಎಂದು ಸದ್ಯಕ್ಕೆ ಖಚಿತಪಡಿಸಿಲ್ಲ. ಹಿಮಾಚಲ ಪ್ರದೇಶದ ಕಾಂಗ್ರಾ ಜಿಲ್ಲೆಯ ಬಿರ್-ಬಿಲ್ಲಿಂಗ್ ವಿಶ್ವಪ್ರಸಿದ್ಧ ಪ್ಯಾರಾಗ್ಲೈಡಿಂಗ್ ತಾಣವಾಗಿದೆ. ಬಿಲ್ಲಿಂಗ್‌ನಿಂದ ಹಾರಾಟ ಆರಂಭಿಸಿ ಬಿರ್ ಪ್ರದೇಶದಲ್ಲಿ ಲ್ಯಾಂಡ್ ಆಗುವುದು ಇಲ್ಲಿನ ಪ್ರಮುಖ ಆಕರ್ಷಣೆ.

ಆದರೆ ಇತ್ತೀಚಿನ ದಿನಗಳಲ್ಲಿ ಈ ಪ್ರದೇಶದಲ್ಲಿ ಅಪಘಾತಗಳು ಹೆಚ್ಚುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. – ಅಕ್ಟೋಬರ್ 25ರಂದು 47 ವರ್ಷದ ಬಲ್ಗೇರಿಯಾ ಪ್ರಜೆ ಮ್ಯಾಕ್ಸಿಮ್ ವ್ಯಾಲೆಂಟಿನೋವಿಚ್ ಗವ್ರಿಲಿಚೆಂಕೊ ಪ್ಯಾರಾಗ್ಲೈಡಿಂಗ್ ಅಪಘಾತದಲ್ಲಿ ಮೃತಪಟ್ಟಿದ್ದರು. – ಅವರೊಂದಿಗೆ ಹಾರಾಟ ನಡೆಸುತ್ತಿದ್ದ 63 ವರ್ಷದ ಬ್ರಿಟಿಷ್ ಪ್ರಜೆಯನ್ನು ಸುರಕ್ಷಿತವಾಗಿ ರಕ್ಷಿಸಲಾಗಿತ್ತು. – ಅಕ್ಟೋಬರ್ 21 ಮತ್ತು 24ರಂದು ಬಿರ್‌ನಿಂದ ಹಾರಾಟ ನಡೆಸಿದ ಇಬ್ಬರು ಪ್ರವಾಸಿಗರು ಬೆಟ್ಟಗಳಲ್ಲಿ ಸಿಲುಕಿಕೊಂಡಿದ್ದರು. ಬಳಿಕ ಅವರನ್ನು ರಕ್ಷಿಸಲಾಗಿತ್ತು.

ಶುಭಂ ಅವರ ಸಾವಿನೊಂದಿಗೆ ಒಂದು ತಿಂಗಳ ಅವಧಿಯಲ್ಲಿ ಕಾಂಗ್ರಾ ಜಿಲ್ಲೆಯಲ್ಲಿ ವರದಿಯಾದ ಪ್ಯಾರಾಗ್ಲೈಡಿಂಗ್ ಸಂಬಂಧಿತ ಘಟನೆಗಳ ಸಂಖ್ಯೆ ನಾಲ್ಕಕ್ಕೆ ಏರಿದೆ ಎಂದು ವರದಿಯಾಗಿದೆ.

ಪ್ರವಾಸಿಗರ ಸುರಕ್ಷತೆ ಬಗ್ಗೆ ಮತ್ತೆ ಪ್ರಶ್ನೆ ಈ ಘಟನೆ ಸಾಹಸ ಕ್ರೀಡೆಗಳ ಸುರಕ್ಷತಾ ನಿಯಮಗಳ ಬಗ್ಗೆ ಹೊಸ ಚರ್ಚೆ ಹುಟ್ಟುಹಾಕಿದೆ. ವಿಶೇಷವಾಗಿ ಟ್ಯಾಂಡಮ್ ಪ್ಯಾರಾಗ್ಲೈಡಿಂಗ್‌ನಲ್ಲಿ ಪ್ರಯಾಣಿಕರು ಸಂಪೂರ್ಣವಾಗಿ ಪೈಲಟ್ ಮತ್ತು ಉಪಕರಣಗಳ ಸುರಕ್ಷತೆಯ ಮೇಲೆ ಅವಲಂಬಿತರಾಗಿರುತ್ತಾರೆ. ಪ್ರತಿ ಹಾರಾಟಕ್ಕೂ ಮೊದಲು ಸುರಕ್ಷತಾ ಬೆಲ್ಟ್ ಪರಿಶೀಲನೆ, ಉಪಕರಣಗಳ ನಿರ್ವಹಣೆ, ಪೈಲಟ್‌ಗಳ ಅರ್ಹತೆ ಮತ್ತು ಹವಾಮಾನದ ಪರಿಶೀಲನೆ ಕಡ್ಡಾಯವಾಗಿ ನಡೆಯಬೇಕು ಎಂಬ ಒತ್ತಾಯ ಕೇಳಿಬಂದಿದೆ.

2024ರಲ್ಲಿ ಲೋಕಸಭೆಯಲ್ಲಿ ನೀಡಿದ್ದ ಕೇಂದ್ರ ಪ್ರವಾಸೋದ್ಯಮ ಸಚಿವಾಲಯದ ಮಾಹಿತಿಯ ಪ್ರಕಾರ, ಬಿರ್-ಬಿಲ್ಲಿಂಗ್‌ನಲ್ಲಿ 2020ರಿಂದ 2024ರ ಜುಲೈ 19ರವರೆಗೆ ಟ್ಯಾಂಡಮ್ ಮತ್ತು ಸೋಲೋ ಪ್ಯಾರಾಗ್ಲೈಡಿಂಗ್‌ನಲ್ಲಿ ಒಟ್ಟು ಒಂಬತ್ತು ಸಾವುಗಳು ವರದಿಯಾಗಿದ್ದವು. ಪ್ರವಾಸದ ಸಂಭ್ರಮದಲ್ಲಿ ಪ್ಯಾರಾಗ್ಲೈಡಿಂಗ್‌ಗೆ ತೆರಳಿದ್ದ ಯುವಕನ ಜೀವ ಹಾರಾಟದ ಮಧ್ಯೆಯೇ ಅಂತ್ಯಗೊಂಡಿದೆ. ಅಪಘಾತಕ್ಕೆ ನಿಖರ ಕಾರಣ ತಿಳಿಯಲು ತನಿಖೆ ನಡೆಯುತ್ತಿದ್ದು, ಪ್ರವಾಸಿಗರ ಸುರಕ್ಷತೆಯೇ ಈಗ ಪ್ರಮುಖ ಪ್ರಶ್ನೆಯಾಗಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ