ಆಂತರಿಕ ಕಚ್ಚಾಟದಲ್ಲಿ ತೊಡಗಿರುವ ಎಲ್​ಜೆಪಿಗೆ ಬಿಗ್​ ಶಾಕ್​ ಕೊಟ್ಟ ಚುನಾವಣಾ ಆಯೋಗ; ಪಕ್ಷದ ಗುರುತು ನಿಷ್ಕ್ರಿಯ

ಬಿಹಾರದ ಲೋಕ ಜನಶಕ್ತಿ ಪಕ್ಷದ ಗುರುತನ್ನು (Lok Janshakti Party Symbol) ಚುನಾವಣಾ ಆಯೋಗ ಇಂದು ನಿಷ್ಕ್ರಿಯ (freezed)ಗೊಳಿಸಿದೆ. ಲೋಕ ಜನಶಕ್ತಿ ಪಕ್ಷದಲ್ಲೀಗ ಎರಡು ಬಣಗಳಾಗಿದ್ದು ಗೊತ್ತಾ ಇದೆ. ಒಂದು ಬಣ ಚಿರಾಗ್​ ಪಾಸ್ವಾನ್​​ರದ್ದಾದರೆ ಇನ್ನೊಂದು ಕೇಂದ್ರ ಸಚಿವ ಪಶುಪತಿ ಕುಮಾರ್ ಪಾರಸ್​ ಅವರದ್ದು. ಈ ಎರಡೂ ಬಣಗಳ ನಡುವೆ ಕಿತ್ತಾಟ ನಡೆಯುತ್ತಿರುವ ಬೆನ್ನಲ್ಲೇ ಚುನಾವಣಾ ಆಯೋಗ ಇಂಥದ್ದೊಂದು ಮಹತ್ವದ ಆದೇಶ ಹೊರಡಿಸಿದೆ. ಇಷ್ಟು ದಿನ ಲೋಕ ಜನಶಕ್ತಿ ಪಕ್ಷದ ಗುರುತಾಗಿದ್ದ ಬಂಗಲೆಯ ಚಿತ್ರವನ್ನು ಇನ್ನು ಮುಂದೆ ಚಿರಾಗ್​ ಪಾಸ್ವಾನ್ ಬಣವೂ ಬಳಸಿಕೊಳ್ಳುವಂತಿಲ್ಲ, ಪಶುಪತಿಯವರ ಬಣವೂ ಬಳಸುವಂತಿಲ್ಲ ಎಂದು ಸೂಚನೆ ನೀಡಿದೆ.   

ಲೋಕ ಜನಶಕ್ತಿ ಪಕ್ಷವನ್ನು 2000ರಲ್ಲಿ ರಾಮ್​ ವಿಲಾಸ್​ ಪಾಸ್ವಾನ್​ ಸ್ಥಾಪನೆ ಮಾಡಿದ್ದಾರೆ. ಇದು ಎನ್​ಡಿಎ ಮತ್ರಿಕೂಟದ ಪಕ್ಷಗಳಲ್ಲಿ ಒಂದು. ರಾಮ್​ ವಿಲಾಸ್ ಪಾಸ್ವಾನ್​ ಪುತ್ರ ಚಿರಾಗ್ ಪಾಸ್ವಾನ್​ಗೆ ಪಶುಪತಿ ಕುಮಾರ್​ ಪಾರಸ್​ ಚಿಕ್ಕಪ್ಪನೇ ಆಗಬೇಕು. ರಾಮ್​ ವಿಲಾಸ್​ ಪಾಸ್ವಾನ್​ ನಿಧನದ ಬಳಿಕ ಎಲ್​ಜೆಪಿಯಲ್ಲಿ ಆಂತರಿಕ ಕಲಹ ಶುರುವಾಯಿತು. ವೈಷಮ್ಯ ತಾರಕಕ್ಕೆ ಏರಿದ ನಂತರ ಪಕ್ಷದ ಹೊಣೆ ಹೊತ್ತಿದ್ದ ಪಶುಪತಿ ಕುಮಾರ್​, ಚಿರಾಗ್​​ ಪಾಸ್ವಾನ್​​ರನ್ನು ಉಚ್ಚಾಟಿಸಿದರು. ಅಲ್ಲಿಂದ ಪಕ್ಷವು ಎರಡು ಬಣಗಳಾಗಿ ಬದಲಾಯಿತು. ಈ ಎರಡೂ ಗುಂಪುಗಳು ಎಲ್​ಜೆಪಿ ಪಕ್ಷ, ಅದರ ಗುರುತು ತಮ್ಮದು ಎಂದು ಕಿತ್ತಾಟದಲ್ಲಿ ತೊಡಗಿಕೊಂಡಿದ್ದವು. ಹಾಗೇ, ಕೆಲವು ದಿನಗಳ ಹಿಂದೆ ಚಿರಾಗ್​ ಪಾಸ್ವಾನ್ ಚುನಾವಣಾ ಆಯೋಗಕ್ಕೆ ಪತ್ರ ಬರೆದು ದೂರು ನೀಡಿದ್ದರು. ಪಕ್ಷದ ಗುರುತನ್ನು ನಾವು ಬಳಸಿಕೊಳ್ಳಲು ಅನುಮತಿ ನೀಡಬೇಕು ಎಂದು ಹೇಳಿದ್ದರು.

ಉಪಚುನಾವಣೆ ಹೊತ್ತಲ್ಲಿ ಮಹತ್ವದ ನಿರ್ಧಾರ
ಬಿಹಾರದಲ್ಲಿ ಮುಂಗೇರದ ತಾರಾಪುರ ಮತ್ತು ದರ್ಭಾಂಗದ ಕುಶೇಶ್ವರಸ್ಥಾನ ವಿಧಾನಸಭಾ ಕ್ಷೇತ್ರಗಳಿಗೆ ಅಕ್ಟೋಬರ್​ 30ರಂದು ಉಪಚುನಾವಣೆ ನಡೆಯಲಿದೆ. ಈ ಹೊತ್ತಲ್ಲೇ ಚುನಾವಣಾ ಆಯೋಗ ಲೋಕ ಜನಶಕ್ತಿ ಪಾರ್ಟಿಗೆ ಶಾಕ್​ ನೀಡಿದೆ. ಉಪಚುನಾವಣೆಗೆ ನಾಮಪತ್ರ ಸಲ್ಲಿಕೆ ಪ್ರಕ್ರಿಯೂ ಶುರುವಾಗಿದ್ದು, ಎಲ್​ಜೆಪಿ ಆದಷ್ಟು ಬೇಗ ತನ್ನ ಆಂತರಿಕ ಕಲಹವನ್ನು ಕೊನೆಗೊಳ್ಳಿಸಬೇಕಿದೆ.

ಚುನಾವಣಾ ಆಯೋಗ ಹೇಳಿದ್ದೇನು?
ಇಂದು ಚುನಾವಣಾ ಆಯೋಗ ಎಲ್​ಜೆಪಿಯ ಗುರುತನ್ನು ನಿಷ್ಕ್ರಿಯಗೊಳಿಸಿದೆ. ಲೋಕ ಜನಶಕ್ತಿ ಪಕ್ಷದ ಗುರುತನ್ನು ರದ್ದುಗೊಳಿಸಿದ್ದೇವೆ. ಅದರ ಎರಡೂ ಬಣಗಳು ಪಕ್ಷದ ಹೆಸರನ್ನು ಬೇಷರತ್ತಾಗಿ ಬಳಸಲು ಅನುಮತಿ ಕೊಡುವುದಿಲ್ಲ. ಹಾಗೇ, ಪಕ್ಷದ ಸಂಕೇತವಾಗಿದ್ದ ಬಂಗಲೆಯ ಚಿತ್ರವನ್ನೂ ಯಾರೊಬ್ಬರೂ ಬಳಸುವಂತಿಲ್ಲ ಎಂದು ಹೇಳಿದೆ. ಹೀಗಾಗಿ ಎಲ್​ಜೆಪಿ ತನ್ನ ಆಂತರಿಕ ಸಮಸ್ಯೆಗಳನ್ನು ಪರಿಹರಿಸಿಕೊಳ್ಳದೆ ಇಬ್ಭಾಗವಾಗಿಯೇ ಮುಂದಿನ ಚುನಾವಣೆಗಳಲ್ಲಿ ಭಾಗವಹಿಸುತ್ತದೆ ಎಂದರೆ, ಎರಡೂ ಬಣಗಳು ಪಕ್ಷದ ಹೆಸರು ಮತ್ತು ಗುರುತನ್ನು ಬೇರೆಬೇರೆಯೇ ಸೃಷ್ಟಿಸಿಕೊಳ್ಳಬೇಕಾಗುತ್ತದೆ.

ಇದನ್ನೂ ಓದಿ: ಮದುವೆಯಲ್ಲಿ ಒಂದು ಪೀಸ್ ಜಾಸ್ತಿ ಕೇಕ್ ತಿಂದ ವ್ಯಕ್ತಿಯ ಬಳಿ ಹಣ ಕೇಳಿದ ಜೋಡಿ; ಏನಿದು ಪ್ರಕರಣ?

ನಾಲ್ಕು ವ್ಯಕ್ತಿಗಳು, 20 ಜಾನುವಾರುಗಳನ್ನು ಕೊಂದ ನರಭಕ್ಷಕ ಹುಲಿಯ ಬೇಟೆಗೆ ಅರಣ್ಯ ಇಲಾಖೆ ಆದೇಶ