ಮದುವೆಯಲ್ಲಿ ಒಂದು ಪೀಸ್ ಜಾಸ್ತಿ ಕೇಕ್ ತಿಂದ ವ್ಯಕ್ತಿಯ ಬಳಿ ಹಣ ಕೇಳಿದ ಜೋಡಿ; ಏನಿದು ಪ್ರಕರಣ?

ಮದುವೆಗಳನ್ನು ಭರ್ಜರಿಯಾಗಿ ಅದ್ದೂರಿಯಿಂದ ಆಚರಿಸುವವರಿದ್ದಾರೆ. ಮತ್ತೆ ಕೆಲವರು ಇದ್ಯಾವುದರ ಗೋಜಿಗೆ ಹೋಗದೇ ಸರಳವಾಗಿ ತಮ್ಮಿಚ್ಚೆಯಂತೆ ವಿವಾಹವಾಗುತ್ತಾರೆ. ವಿದೇಶಗಳಲ್ಲೂ ಹೀಗೆಯೇ. ಆದರೆ ಅಲ್ಲಿ ಕೆಲವು ವಿಚಿತ್ರ ಪದ್ಧತಿಗಳಿರುತ್ತವೆ. ಜೊತೆಗೆ ಏನಾದರೂ ಹೆಚ್ಚು ಕಡಿಮೆಯಾದಾಗ ಮುಜುಗರವಿಲ್ಲದೇ, ಪ್ರಶ್ನೆಯನ್ನೂ ಮಾಡುತ್ತಾರೆ. ಭಾರತದಲ್ಲಿ ಮದುವೆ ಮನೆಗಳಲ್ಲಿ ಊಟ, ತಿಂಡಿಗಳು ಯಥೇಚ್ಛ. ಒತ್ತಾಯಪೂರ್ವಕವಾಗಿ ಬಡಿಸಿ, ಆತಿಥ್ಯ ನೀಡಿ ಕಳುಹಿಸುತ್ತಾರೆ. ಆದರೆ, ಈ ಘಟನೆ ನೋಡಿದರೆ ಆಶ್ಚರ್ಯವಾಗಬಹುದು. ಕಾರಣ, ಮದುವೆ ಮನೆಯಲ್ಲಿ ವ್ಯಕ್ತಿಯೊಬ್ಬ ಒಂದು ಪೀಸ್ ಕೇಕ್ ಜಾಸ್ತಿ ತಿಂದನೆಂದು ಆ ಜೋಡಿ, ಆತನಿಗೆ ಹಣ ಕಟ್ಟಲು ಹೇಳಿದ್ದಾರೆ. ಈ ಪ್ರಕರಣ ಸದ್ಯ ಎಲ್ಲೆಡೆ ಸುದ್ದಿಯಾಗಿದ್ದು, ಕುತೂಹಲ ಕೆರಳಿಸಿದೆ.

ರೆಡ್ಡಿಟ್​ನಲ್ಲಿ ಹಂಚಿಕೊಳ್ಳಲಾದ ಸ್ಟೋರಿಯೊಂದರಲ್ಲಿ ಈ ವಿಚಿತ್ರ ಘಟನೆಯ ಬಗ್ಗೆ ಬರೆಯಲಾಗಿದೆ. ಮೆಸೇಜ್ ಮುಖಾಂತರ ಜೋಡಿಯು ವ್ಯಕ್ತಿಯೊಬ್ಬನಿಗೆ, ನೀನು ಒಂದಕ್ಕಿಂತ ಹೆಚ್ಚು ಕೇಕ್ ಪೀಸ್ ತಿಂದಿದ್ದೀಯ. ಸಿಸಿಟಿವಿ ಮೂಲಕ ಅದು ಪತ್ತೆಯಾಗಿದೆ. ಆದ್ದರಿಂದ 3.66 ಪೌಂಡ್​​ ಹಣ ನೀಡಬೇಕು ಎಂದು ಕಳುಹಿಸಿದ್ದಾರೆ. ಈ ಮೆಸೇಜ್​ನ್ನು ಆ ವ್ಯಕ್ತಿ ರೆಡ್ಡಿಟ್​ನಲ್ಲಿ ಹಂಚಿಕೊಂಡಿದ್ದಾನೆ.

ಜೋಡಿ ಆ ವ್ಯಕ್ತಿಗೆ ಕಳುಹಿಸಿದ್ದು ಹೀಗೆ. ‘‘ಹೇ, ನಾವು ಈಗಷ್ಟೇ ಸಿಸಿಟಿವಿ ವೀಕ್ಷಿಸುತ್ತಿದ್ದೆವು. ಆಗ ನೀನು ಮದುವೆ ಮನೆಯಲ್ಲಿ 2 ಪೀಸ್ ಕೇಕ್ ತಿಂದದ್ದು ತಿಳಿಯಿತು. ನಾವು ಈ ಮೊದಲು ಪ್ರತಿ ವ್ಯಕ್ತಿಗೂ ಒಂದೊಂದು ಪೀಸ್ ಕೇಕ್ ಎಂದು ತಿಳಿಸಿದ್ದೆವು. ಅದರಲ್ಲಿ ನೀನು ಒಂದೇ ಕೇಕ್​ಗೆ ಹಣ ಪಾವತಿ ಮಾಡಿ, ಎರಡು ಪೀಸ್ ತಿಂದಿದ್ದೀಯ. ಆದ್ದರಿಂದ ಆದಷ್ಟು ಶೀಘ್ರದಲ್ಲಿ 3.66 ಪೌಂಡ್ ಹಣವನ್ನು ನನಗೆ ಕಳುಹಿಸು’’ ಎಂದು ಬರೆಯಲಾಗಿದೆ. ಈ ಪೋಸ್ಟ್ ನೆಟ್ಟಿಗರ ಗಮನ ಸೆಳೆದಿದ್ದು, ಅಚ್ಚರಿಯ ಕಾಮೆಂಟ್ ಮಾಡುತ್ತಿದ್ದಾರೆ.

ಈಗಾಗಲೇ ಆ ಪೋಸ್ಟ್​​ಗೆ 8,000ಕ್ಕೂ ಅಧಿಕ ಅಪ್​ವೋಟ್ ಲಭಿಸಿದೆ. ಜೊತೆಗೆ ಮುಜುಗರವಿಲ್ಲದೇ ಆ ಜೋಡಿ ಕೇಳಿರುವುದಕ್ಕೆ ಹಲವರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ಮತ್ತಷ್ಟು ಜನ ಈ ಘಟನೆ ತಮಾಷೆಯಾಗಿದೆ ಎಂದು ಬರೆದಿದ್ದಾರೆ. ಹಲವರು ಈ ವಿಚಿತ್ರ ಪದ್ಧತಿಯ ಬಗ್ಗೆ ಕುತೂಹಲದಿಂದ ಪ್ರಶ್ನೆ ಮಾಡಿದ್ದಾರೆ.

ಇದನ್ನೂ ಓದಿ:

ಅಬ್ಬಬ್ಬಾ.. ಕಾರಿನ ಮೇಲೆ ಹರಿದು ಬಂತು ಹಾವು! ವಿಡಿಯೋ ವೈರಲ್

Viral Video: ದೆಹಲಿಯ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದೊಳಗೆ ಕಾಣಿಸಿಕೊಂಡ ಮಂಗ; ವಿಡಿಯೊ ವೈರಲ್

‘ನೀವು ಸಾಯಿ ಪಲ್ಲವಿಯನ್ನು ಮದುವೆಯಾಗಿ, ಅವರೇ ಸರಿಯಾದ ಜೋಡಿ’; ವಿಚ್ಛೇದನದ ದಿನವೇ ನಾಗ ಚೈತನ್ಯಗೆ ಹೊಸ ಸಲಹೆ