ಬೆಂಗಳೂರಿನಿಂದ ಹೊರಟಿದ್ದ ಗೋ ಏರ್ ವಿಮಾನ ನಾಗ್ಪುರದಲ್ಲಿ ತುರ್ತು ಭೂಸ್ಪರ್ಶ; ಪ್ರಯಾಣಿಕರು ಸುರಕ್ಷಿತ
ಗೋ ಏರ್ ಫ್ಲೈಟ್ನ ವಕ್ತಾರ ಕೂಡ ಘಟನೆಯನ್ನು ವಿವರಿಸಿದ್ದು, ಬೆಂಗಳೂರಿನಿಂದ ಪಾಟ್ನಾಕ್ಕೆ ಹೋಗುತ್ತಿದ್ದ ವಿಮಾನ ತುರ್ತಾಗಿ ನಾಗ್ಪುರದ ಕಡೆ ತಿರುಗವಂತಾಗಲು ಕಾರಣ ಕಾಕ್ಪಿಟ್ನಲ್ಲಿ ಕಾಣಿಸಿಕೊಂಡ ಎಂಜಿನ್ ದೋಷ ಎಂದಿದ್ದಾರೆ.
ಪಾಟ್ನಾ ಮೂಲದ ಗೋ ಏರ್ ವಿಮಾನ ತಾಂತ್ರಿಕ ದೋಷದಿಂದ ನಾಗ್ಪುರ ಏರ್ಪೋರ್ಟ್ನಲ್ಲಿ ತುರ್ತು ಭೂಸ್ಪರ್ಶವಾಗಿದೆ. 139 ಪ್ರಯಾಣಿಕರನ್ನು ಹೊತ್ತ ಈ ವಿಮಾನ ಬೆಂಗಳೂರಿನಿಂದ ಹೊರಟಿತ್ತು. ಇದರ ಎಂಜಿನ್ನಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡ ಕಾರಣ ತುರ್ತು ಭೂಸ್ಪರ್ಶವಾಗಿದೆ ಎಂದು ಏರ್ಲೈನ್ಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಈ ಬಗ್ಗೆ ಪಿಟಿಐಗೆ ಮಾಹಿತಿ ನೀಡಿದ ನಾಗ್ಪುರ ಏರ್ಪೋರ್ಟ್ ನಿರ್ದೇಶಕ ಅಬಿಡ್ ರುಹಿ, G8 873 ಎಂಬ ಗೋ ಏರ್ ವಿಮಾನ ಇಂದು ಬೆಳಗ್ಗೆ 11.15ರ ಹೊತ್ತಿಗೆ ತುರ್ತಾಗಿ ಲ್ಯಾಂಡ್ ಆಗಿದ್ದಾಗಿ ಹೇಳಿದ್ದಾರೆ.
ವಿಮಾನದ ಎಂಜಿನ್ನಲ್ಲಿ ಏನೋ ದೋಷವುಂಟಾಗುತ್ತಿರುವ ಬಗ್ಗೆ ಗೋ ಏರ್ ವಿಮಾನದ ಪೈಲಟ್ ನಾಗ್ಪುರ ಏರ್ ಟ್ರಾಫಿಕ್ ಕಂಟ್ರೋಲರ್ಗೆ ಮಾಹಿತಿ ನೀಡಿದರು ಮತ್ತು ನಾಗ್ಪುರ ವಿಮಾನ ನಿಲ್ದಾಣದಲ್ಲಿ ಲ್ಯಾಂಡ್ ಆಗಲು ಅನುಮತಿ ಕೇಳಿದರು. ನಾವು ಅದಕ್ಕೆ ಅನುಮತಿ ಕೊಡುವ ಜತೆಗೆ ಮುಂದೆ ಆಗಬಹುದಾದ ಅನಾಹುತ ನಿಯಂತ್ರಿಸಲು ಎಲ್ಲ ರೀತಿಯ ವ್ಯವಸ್ಥೆಯನ್ನೂ ಮಾಡಿಕೊಂಡಿದ್ದೆವು. ಇದನ್ನು ತುರ್ತು ಸಂದರ್ಭವೆಂದು ಪರಿಗಣಿಸಿ ರನ್ವೇಯನ್ನು ಸಿದ್ಧಮಾಡಲಾಯಿತು. ವೈದ್ಯರು, ಆಂಬುಲೆನ್ಸ್ಗಳು, ಅಗ್ನಿಶಾಮಕದಳದ ಸಿಬ್ಬಂದಿಯನ್ನೂ ಸಜ್ಜುಗೊಳಿಸಲಾಯಿತು. ಆದರೆ ಅದೃಷ್ಟವಶಾತ್ ವಿಮಾನ ಸುರಕ್ಷಿತವಾಗಿ ಲ್ಯಾಂಡ್ ಆಯಿತು. ಯಾರಿಗೂ ಯಾವುದೇ ತೊಂದರೆಯಾಗಲಿಲ್ಲ ಎಂದು ರುಹಿ ಹೇಳಿದ್ದಾರೆ.
ಹಾಗೇ, ಗೋ ಏರ್ ಫ್ಲೈಟ್ನ ವಕ್ತಾರ ಕೂಡ ಘಟನೆಯನ್ನು ವಿವರಿಸಿದ್ದು, ಬೆಂಗಳೂರಿನಿಂದ ಪಾಟ್ನಾಕ್ಕೆ ಹೋಗುತ್ತಿದ್ದ ವಿಮಾನ ತುರ್ತಾಗಿ ನಾಗ್ಪುರದ ಕಡೆ ತಿರುಗವಂತಾಗಲು ಕಾರಣ ಕಾಕ್ಪಿಟ್ನಲ್ಲಿ ಕಾಣಿಸಿಕೊಂಡ ಎಂಜಿನ್ ದೋಷ. ಪೈಲಟ್ನ ಮುಂಜಾಗರೂಕತೆಯಿಂದ ವಿಮಾನ ಸುರಕ್ಷಿತವಾಗಿ ಭೂಸ್ಪರ್ಶವಾಗಿದೆ. ನಂತರ ಅದರಲ್ಲಿದ್ದ ಪ್ರಯಾಣಿಕರಿಗೆ ಬೇರೆ ವಿಮಾನ ವ್ಯವಸ್ಥೆ ಮಾಡಲಾಯಿತು ಎಂದು ಹೇಳಿದ್ದಾರೆ. ಹಾಗೇ, ಪ್ರಯಾಣಿಕರಿಗೆ ಆದ ಈ ಅನನಕೂಲಕ್ಕೆ ವಿಷಾದಿಸುತ್ತೇವೆ ಎಂದಿದ್ದಾರೆ.
ಇದನ್ನೂ ಓದಿ: Indonesia Open: ಮತ್ತೆ ಸೆಮಿಫೈನಲ್ನಲ್ಲಿ ಎಡವಿದ ಪಿವಿ ಸಿಂಧು; ಇಂಡೋನೇಷ್ಯಾ ಓಪನ್‌ ಪ್ರಶಸ್ತಿ ಕನಸು ಭಗ್ನ
Published On - 3:07 pm, Sat, 27 November 21