‘ನನಗೆ ಹುದ್ದೆ ಕೊಡಲಿ..ಬಿಡಲಿ, ರಾಹುಲ್​ ಗಾಂಧಿ, ಪ್ರಿಯಾಂಕಾ ಗಾಂಧಿ ವಾದ್ರಾ ಬೆಂಬಲಕ್ಕೆ ಸದಾ ನಿಲ್ಲುತ್ತೇನೆ‘-ನವಜೋತ್​ ಸಿಂಗ್ ಸಿಧು

ನನಗೆ ಕಾಂಗ್ರೆಸ್​​ನಲ್ಲಿ ಯಾವುದೇ ಹುದ್ದೆ ಇರಲಿ, ಬಿಡಲಿ ನಾನು ರಾಹುಲ್​ ಗಾಂಧಿ ಮತ್ತು ಪ್ರಿಯಾಂಕಾ ಗಾಂಧಿ ಜತೆ ಸದಾ ನಿಲ್ಲುತ್ತೇನೆ ಎಂದು ನವಜೋತ್​ ಸಿಂಗ್​ ಸಿಧು (Navjot Singh Sidhu) ಹೇಳಿದ್ದಾರೆ. ಪಂಜಾಬ್​ ಕಾಂಗ್ರೆಸ್ (Punjab Congress)​​ನಲ್ಲಿ ಇತ್ತೀಚೆಗೆ ಏನೂ ಸರಿಯಿಲ್ಲ. ಕ್ಯಾಪ್ಟನ್​ ಅಮರಿಂದರ್ ಸಿಂಗ್​ ಸಿಧು ರಾಜೀನಾಮೆ ನೀಡಲೂ ಈ ನವಜೋತ್​ ಸಿಂಗ್ ಸಿಧು ಅವರೇ ಕಾರಣ ಎಂಬುದು ಜಗಜ್ಜಾಹೀರಾದ ವಿಷಯ. ಅಮರಿಂದರ್​ ನಂತರ ಅವರ ಸ್ಥಾನಕ್ಕೆ ಚರಣಜಿತ್​ ಸಿಂಗ್ ಛನ್ನಿ ಬರುತ್ತಿದ್ದಂತೆ ಈ ನವಜೋತ್​ ಸಿಂಗ್ ಸಿಧು ತಮ್ಮ ಪಂಜಾಬ್​ ಕಾಂಗ್ರೆಸ್ ಪ್ರದೇಶ ಸಮಿತಿ ಅಧ್ಯಕ್ಷನ ಸ್ಥಾನಕ್ಕೂ ರಾಜೀನಾಮೆ ಕೊಟ್ಟಿದ್ದಾರೆ. ಆದರೆ ಆ ರಾಜೀನಾಮೆ ಅಂಗೀಕಾರವಾಗಿಲ್ಲ ಎಂದು ಮೂಲಗಳು ತಿಳಿಸಿವೆ. ಅದರ ಬೆನ್ನಲ್ಲೇ ಇಂದು ಟ್ವೀಟ್ ಮಾಡಿರುವ ಸಿಧು,  ರಾಹುಲ್​ ಗಾಂಧಿ, ಪ್ರಿಯಾಂಕಾ ಗಾಂಧಿ ವಾದ್ರಾ ಬೆಂಬಲಕ್ಕೆ ಸದಾ ನಿಲ್ಲುತ್ತೇನೆ ಎಂದಿದ್ದಾರೆ.  

ಇಂದು ಮಹಾತ್ಮ ಗಾಂಧಿ ಮತ್ತು ಲಾಲ್​ ಬಹದ್ದೂರ್​ ಶಾಸ್ತ್ರಿಯವರ ಜನ್ಮ ದಿನ. ಈ ದಿನದಂದು ಇಬ್ಬರೂ ನಾಯಕರ ತತ್ವಗಳನ್ನು ನಾವು ಎತ್ತಿಹಿಡಿಯಬೇಕು. ನನಗೆ ಕಾಂಗ್ರೆಸ್​​ನಲ್ಲಿ ಹುದ್ದೆ ಇರಲಿ, ಇಲ್ಲದೆ ಇರಲಿ ರಾಹುಲ್​ ಗಾಂಧಿ ಮತ್ತು ಪ್ರಿಯಾಂಕಾ ಗಾಂಧಿ ವಾದ್ರಾ ಅವರೊಂದಿಗೆ ಸದಾ ಇರುತ್ತೇನೆ. ಎಲ್ಲ ನಕಾರಾತ್ಮಕ ಶಕ್ತಿಗಳೂ ಒಟ್ಟಾಗಿ ನನ್ನನ್ನು ಸೋಲಿಸಲು ಪ್ರಯತ್ನಿಸಲಿ. ಆದರೆ ನನ್ನಲ್ಲಿರುವ ಧನಾತ್ಮಕ ಶಕ್ತಿಯ ಪ್ರತಿ ಔನ್ಸ್​ ಕೂಡ ಪಂಜಾಬ್​​ ಗೆಲ್ಲುವಂತೆ ಮಾಡುತ್ತದೆ. ಪಂಜಾಬಿಯತ್​ (ಸಾರ್ವತ್ರಿಕ ಸಹೋದರತ್ವ) ಗೆಲ್ಲುತ್ತದೆ ಮತ್ತು ಪ್ರತಿಯೊಬ್ಬ ಪಂಜಾಬಿಯೂ ಗೆಲ್ಲುತ್ತಾನೆ ಎಂದು ಸಿಧು ಟ್ವೀಟ್ ಮಾಡಿದ್ದಾರೆ.

ಸಿಧು ರಾಜೀನಾಮೆ ನೀಡಿದ್ದೇಕೆ?
ಕ್ಯಾಪ್ಟನ್​ ಅಮರಿಂದರ್​ ಸಿಂಗ್​ರನ್ನು ಬದಲಿಸಿದ ಬಳಿಕ ಎಲ್ಲವೂ ಸರಿಯಾಗಬಹುದು ಎಂದು ಭಾವಿಸಿದ್ದ ಕಾಂಗ್ರೆಸ್​ಗೆ ಸೆಪ್ಟೆಂಬರ್​ 28ರಂದು ನವಜೋತ್​ ಸಿಂಗ್​ ಸಿಧು ಶಾಕ್​ ನೀಡಿದ್ದರು. ಚರಣಜಿತ್​ ಸಿಂಗ್ ಛನ್ನಿ ಮುಖ್ಯಮಂತ್ರಿಯಾದ ಬಳಿಕ ರಾಜ್ಯದ ನೂತನ ಡಿಜಿಪಿಯನ್ನಾಗಿ ಐಪಿಎಸ್ ಅಧಿಕಾರಿ ಇಕ್ಬಾಲ್​ ಪ್ರೀತ್​ ಸಿಂಗ್​​ರನ್ನು ನೇಮಕ ಮಾಡಿದ್ದರು. ಅಷ್ಟೇ ಅಲ್ಲ, ರಾಣಾ ಗುರ್ಜಿತ್​ ಸಿಂಗ್​ರಿಗೆ ಕ್ಯಾಬಿನೆಟ್​ನಲ್ಲಿ ಸ್ಥಾನ ನೀಡಲಾಗಿತ್ತು. ಈ ಎರಡೂ ವಿಷಯಗಳಿಂದ ಕ್ರೋಧಗೊಂಡ ನವಜೋತ್​ ಸಿಂಗ್​ ಸಿಧು ಏಕಾಏಕಿ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ.  ಅದಾದ ಬಳಿಕ ಚರಣಜಿತ್​ ಸಿಂಗ್​ ಛನ್ನಿ ನವಜೋತ್​ ಸಿಂಗ್​ರ ಕೆಲವು ಬೇಡಿಕೆಗಳನ್ನು ಈಡೇರಿಸಲು ಒಪ್ಪಿಕೊಂಡಿದ್ದಾರೆ. ಹೀಗಾಗಿ ಸಿಧು ಅಧ್ಯಕ್ಷ ಸ್ಥಾನದಲ್ಲಿ ಮುಂದುವರಿಯಲಿದ್ದಾರೆ ಎಂದು ಮೂಲಗಳಿಂದ ಮಾಹಿತಿ ಲಭ್ಯವಾಗಿದೆ. ಆದರೆ ಸ್ಪಷ್ಟವಾಗಿ ಚಿತ್ರಣ ಸಿಕ್ಕಿಲ್ಲ.

ಇದನ್ನೂ ಓದಿ: ಪಂಜಾಬ್​ ಕಾಂಗ್ರೆಸ್​​ನಲ್ಲಿ ಮುಗಿಯದ ಗೊಂದಲ; ಹರೀಶ್​ ರಾವತ್​ ಸ್ಥಾನಕ್ಕೆ ಬರಲಿದ್ದಾರಾ ಹರೀಶ್ ಚೌಧರಿ?

ಡಿವೋರ್ಸ್ ಬಗ್ಗೆ ಸ್ಯಾಮ್ ಫ್ಯಾನ್ಸ್ ಮಾತನಾಡುವಂತಿಲ್ಲ; ಇದು ಸಮಂತಾ ಸೂಚನೆ