Indian Army: ಗಾಲ್ವಾನ್​ ಸಂಘರ್ಷದಲ್ಲಿ ಹುತಾತ್ಮರಾದ ಯೋಧರಿಗಾಗಿ ಭಾರತೀಯ ಸೇನೆಯಿಂದ ಗಾಯನ ನಮನ; ವಿಡಿಯೋ ವೈರಲ್​

ಗಾಲ್ವಾನ್​ ಸಂಘರ್ಷಕ್ಕೆ ನಿನ್ನೆಗೆ ಒಂದು ವರ್ಷ ಕಳೆದಿದೆ. 2020 ಜೂ.15ರಂದು ಗಾಲ್ವಾನ್ ಕಣಿವೆಯಲ್ಲಿ ಭಾರತ-ಚೀನಾ ಯೋಧರ ನಡುವೆ ಸಂಘರ್ಷ ನಡೆದು, 20 ಭಾರತೀಯ ಯೋಧರು ಹುತಾತ್ಮರಾಗಿದ್ದಾರೆ. ಅಂದು ಮಡಿದ ಯೋಧರಿಗಾಗಿ ಭಾರತೀಯ ಸೇನೆ ಒಂದು ವಿಡಿಯೋ ಹಾಡಿನ ಮೂಲಕ ಗೌರವ ಸಲ್ಲಿಸಿದೆ. ಭಾರತೀಯ ಸೇನೆ ಸಾರ್ವಜನಿಕ ಮಾಹಿತಿ ವಿಭಾಗದ ಹೆಚ್ಚುವರಿ ಡೈರಕ್ಟರೇಟ್​ ಜನರಲ್​ ಟ್ವಿಟರ್​​ನಲ್ಲಿ ಈ ವಿಡಿಯೋವನ್ನು ಪೋಸ್ಟ್ ಮಾಡಲಾಗಿದೆ.

‘ಗಾಲ್ವಾನ್​ ಕೆ ವೀರ್​..’ ಎಂಬ ಹಾಡನ್ನು ಖ್ಯಾತ ಗಾಯಕ ಹರಿಹರನ್​ ಹಾಡಿದ್ದಾರೆ. ಭಾರತೀಯ ಯೋಧರ ಸಾಹಸದ ದೃಶ್ಯಗಳೊಂದಿಗೆ ಈ ಹಾಡನ್ನು ಸಂಯೋಜಿಸಲಾಗಿದೆ. ಲಡಾಖ್​​ನಲ್ಲಿ ನಿಯೋಜಿಸಲಾಗಿರುವ ಭಾರತೀಯ ಯೋಧರ ತರಬೇತಿ, ಯುದ್ಧ ಸಿದ್ಧತೆಗಳ ದೃಶ್ಯಗಳನ್ನು ಈ 5 ನಿಮಿಷಗಳ ವಿಡಿಯೋದಲ್ಲಿ ಸೆರೆಹಿಡಿಯಲಾಗಿದೆ. ವಿಡಿಯೋ ಮತ್ತು ಹಾಡಿನ ಸಾಹಿತ್ಯ ಒಂದಕ್ಕೊಂದು ತುಂಬ ಚೆನ್ನಾಗಿ ಹೊಂದಾಣಿಕೆಯಾಗಿದ್ದು, ಅದನ್ನು ಕೇಳಿದರೆ ರೋಮಾಂಚನವಾಗದೆ ಇರದು.

ಗಾಲ್ವಾನ್​ ಸಂಘರ್ಷದಲ್ಲಿ ಚೀನಾ ಯೋಧರ ದಾಳಿಯಲ್ಲಿ ಮಡಿದ ಸೈನಿಕರಿಗೆ ಲೇಹ್​ನ 14 ಕಾರ್ಪ್ಸ್​​ (ಫೈರ್​ ಆ್ಯಂಡ್ ಫ್ಯೂರಿ ಕಾರ್ಪ್ಸ್​​)ನ ಯೋಧರು ಗೌರವ ಸಮರ್ಪಿಸಿದ್ದಾರೆ ಎಂದು ಉತ್ತರ ವಿಭಾಗದ ಕಮಾಂಡ್​​ ತಿಳಿಸಿದ್ದಾರೆ. ಹಾಗೇ, ಹುತಾತ್ಮ ಯೋಧರಿಗಾಗಿ ಪೂರ್ವ ಲಡಾಖ್​​ನ ಪೋಸ್ಟ್​ 120ರಲ್ಲಿ ಗಾಲ್ವಾನ್ ಧೀರರು ಎಂಬ ಹೆಸರಿನಲ್ಲಿ ಸ್ಮಾರಕವನ್ನೂ ಕಳೆದವರ್ಷವೇ ಕಟ್ಟಲಾಗಿದೆ.
ಇಲ್ಲಿದೆ ನೋಡಿ ಚೀನಾ ಯೋಧರೊಂದಿಗೆ ಶೌರ್ಯದಿಂದ ಹೋರಾಡಿ, ಹುತಾತ್ಮರಾದ ಭಾರತದ ಯೋಧರಿಗಾಗಿ ರಚಿಸಲಾದ ವಿಡಿಯೋ ಹಾಡು..

ಇದನ್ನೂ ಓದಿ: Corona 3rd Wave: ಬೆಂಗಳೂರಿನಲ್ಲಿ 4,500 ಐಸಿಯು ಬೆಡ್​ಗಳನ್ನು ಸಿದ್ಧಪಡಿಸಿಕೊಳ್ಳಿ; ರಾಜ್ಯ ಸರ್ಕಾರಕ್ಕೆ ತಜ್ಞರ ಸಲಹೆ