ಯಾವ ನ್ಯಾಯಮೂರ್ತಿಗಳು ಬಿಜೆಪಿಯವರು, ಯಾರು ಟಿಎಂಸಿಯವರು ಪಟ್ಟಿ ಕೊಡಿ, ಅಭಿಷೇಕ್ ಬ್ಯಾನರ್ಜಿ ಪರ ವಕೀಲರನ್ನು ತರಾಟೆ ತೆಗೆದುಕೊಂಡ ಹೈಕೋರ್ಟ್

ಕೋಲ್ಕತ್ತಾ, ನವೆಂಬರ್ 13: ಪಶ್ಚಿಮ ಬಂಗಾಳದ ರಾಜಕೀಯದಲ್ಲಿ ಮತ್ತೊಂದು ವಿವಾದ ಶುರುವಾಗಿದೆ. ತೃಣಮೂಲ ಕಾಂಗ್ರೆಸ್ ಸಂಸದ ಅಭಿಷೇಕ್ ಬ್ಯಾನರ್ಜಿ ಅವರ ಭದ್ರತೆ ಕಡಿತಗೊಳಿಸಿರುವುದನ್ನು ಪ್ರಶ್ನಿಸಿ ಸಲ್ಲಿಸಿರುವ ಅರ್ಜಿಯ ವಿಚಾರಣೆ ಕೋಲ್ಕತ್ತಾ ಹೈಕೋರ್ಟ್‌ನಲ್ಲಿ ನಡೆದಿದೆ. ಈ ವೇಳೆ ನ್ಯಾಯಾಂಗದ ವಿರುದ್ಧ ಅಭಿಷೇಕ್ ಬ್ಯಾನರ್ಜಿ ನೀಡಿದ ಹೇಳಿಕೆಗಳೂ ಚರ್ಚೆಗೆ ಬಂದಿವೆ.

ವಿಚಾರಣೆ ವೇಳೆ ರಾಜ್ಯ ಸರ್ಕಾರವು ಅಭಿಷೇಕ್ ಬ್ಯಾನರ್ಜಿ ವಿರುದ್ಧ ಕ್ರಿಮಿನಲ್ ನ್ಯಾಯಾಂಗ ನಿಂದನೆ ಪ್ರಕ್ರಿಯೆ ಆರಂಭಿಸುವಂತೆ ನ್ಯಾಯಾಲಯವನ್ನು ಕೋರಿದೆ. ಮತ್ತೊಂದೆಡೆ, ಅಭಿಷೇಕ್ ಪರ ವಕೀಲರು ನ್ಯಾಯಾಂಗದ ಒಂದು ವರ್ಗ ಬಿಜೆಪಿಯ ಪರವಾಗಿ ವರ್ತಿಸುತ್ತಿದೆ ಎಂದು ಆರೋಪಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿ ಕೃಷ್ಣ ರಾವ್ ಅವರ ಪೀಠ, ಯಾವ ನ್ಯಾಯಮೂರ್ತಿಗಳು ಬಿಜೆಪಿಯವರು, ಯಾವ ನ್ಯಾಯಮೂರ್ತಿಗಳು ತೃಣಮೂಲ ಕಾಂಗ್ರೆಸ್‌ನವರು ಎಂಬುದಕ್ಕೆ ಪಟ್ಟಿ ನೀಡಲು ಸಾಧ್ಯವೇ ಎಂದು ಪ್ರಶ್ನಿಸಿದೆ.

ನ್ಯಾಯಾಲಯದಲ್ಲಿ ನಡೆದಿದ್ದೇನು?

ನವೆಂಬರ್ 12ರಂದು ನಡೆದ ವಿಚಾರಣೆಯ ವೇಳೆ ಪಶ್ಚಿಮ ಬಂಗಾಳ ಸರ್ಕಾರದ ಪರ ವಕೀಲರು ಅಭಿಷೇಕ್ ಬ್ಯಾನರ್ಜಿ ಅವರ ಇತ್ತೀಚಿನ ಸಂದರ್ಶನದ ವಿಡಿಯೋ ಮತ್ತು ಅದರ ಪ್ರತಿಲಿಪಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದರು. ನ್ಯಾಯಾಂಗದ ಬಗ್ಗೆ ಅವರು ಮಾಡಿರುವ ಹೇಳಿಕೆಗಳು ನ್ಯಾಯಾಲಯದ ಗೌರವಕ್ಕೆ ಧಕ್ಕೆ ತರುವಂತಿವೆ ಎಂದು ಆರೋಪಿಸಿದರು. ರಾಜ್ಯದ ಹೆಚ್ಚುವರಿ ಅಡ್ವೊಕೇಟ್ ಜನರಲ್ ಬಿಲ್ವಾಡಲ್ ಭಟ್ಟಾಚಾರ್ಯ ಅವರು, ಈ ಹೇಳಿಕೆಗಳು ಕ್ರಿಮಿನಲ್ ನ್ಯಾಯಾಂಗ ನಿಂದನೆಗೆ ಒಳಪಡುತ್ತವೆ. ಹೀಗಾಗಿ ಅಭಿಷೇಕ್ ಬ್ಯಾನರ್ಜಿ ವಿರುದ್ಧ ನ್ಯಾಯಾಲಯವೇ ಸ್ವಯಂಪ್ರೇರಿತವಾಗಿ ಕ್ರಮ ಕೈಗೊಳ್ಳಬೇಕು ಎಂದು ಮನವಿ ಮಾಡಿದರು.

ಇದನ್ನೂ ಓದಿ: ಎಸ್​ಐಆರ್​ಗೂ ಮೊದಲಿನ ಹಳೆ ಮತದಾರರ ಪಟ್ಟಿಯಲ್ಲೇ ಜಿಬಿಎ ಚುನಾವಣೆ ನಡೆಸಲು ಸುಪ್ರೀಂ ಕೋರ್ಟ್​ಗೆ ರಾಜ್ಯ ಚುನಾವಣಾ ಆಯೋಗ ಮನವಿ!

ಇದಕ್ಕೆ ಪ್ರತಿಯಾಗಿ ಅಭಿಷೇಕ್ ಪರ ವಕೀಲರು, ತಮ್ಮ ಕಕ್ಷಿದಾರರು ಮತ್ತು ಕುಟುಂಬದ ಮೇಲೆ ಪದೇಪದೇ ದಾಳಿಗಳು ನಡೆದಿವೆ. ಭದ್ರತೆ ಕಡಿತಗೊಂಡಿರುವುದರಿಂದ ಆತಂಕಗೊಂಡು ಅವರು ಆ ರೀತಿ ಮಾತನಾಡಿದ್ದಾರೆ ಎಂದು ಸಮರ್ಥಿಸಿಕೊಂಡರು. ವಕೀಲರು, ಅದಾನಿ ಪ್ರಕರಣದ ವಿಚಾರಣೆ ತ್ವರಿತವಾಗಿ ನಡೆಯುತ್ತದೆ, ಆದರೆ ಅಭಿಷೇಕ್ ಅವರ ಭದ್ರತೆಗೆ ಸಂಬಂಧಿಸಿದ ಅರ್ಜಿ ತಿಂಗಳುಗಳಿಂದ ಬಾಕಿ ಉಳಿದಿದೆ ಎಂಬ ವಾದವನ್ನೂ ಮುಂದಿಟ್ಟರು. ನ್ಯಾಯಾಂಗದ ಒಂದು ವರ್ಗ ಬಿಜೆಪಿಗೆ ಮಣಿದಿದೆ ಎಂಬ ಆರೋಪವನ್ನೂ ಮಾಡಿದರು.

ನ್ಯಾಯಮೂರ್ತಿ ಕೃಷ್ಣ ರಾವ್ ಹೇಳಿದ್ದೇನು? ಈ ಆರೋಪಗಳಿಗೆ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿ ಕೃಷ್ಣ ರಾವ್, ನ್ಯಾಯಾಧೀಶರನ್ನು ರಾಜಕೀಯ ಪಕ್ಷಗಳೊಂದಿಗೆ ಗುರುತಿಸುವ ಆರೋಪಕ್ಕೆ ಆಧಾರವೇನು ಎಂದು ಪ್ರಶ್ನಿಸಿದರು.

“ಬಿಜೆಪಿಯ ಜೊತೆ ಇರುವ ನ್ಯಾಯಾಧೀಶರು ಯಾರು? ತೃಣಮೂಲ ಕಾಂಗ್ರೆಸ್‌ನ ಜೊತೆ ಇರುವ ನ್ಯಾಯಾಧೀಶರು ಯಾರು? ನಿಮ್ಮ ಕಕ್ಷಿದಾರರಿಂದ ಪಟ್ಟಿ ಕೇಳಿ” ಎಂಬರ್ಥದಲ್ಲಿ ವಕೀಲರಿಗೆ ಹೇಳಿದರು. ಅಲ್ಲದೆ, ಅಭಿಷೇಕ್ ಬ್ಯಾನರ್ಜಿ ನ್ಯಾಯಮೂರ್ತಿಗಳ ವಾರ್ಷಿಕ ಕಾರ್ಯಮೌಲ್ಯಮಾಪನ ವರದಿ ಬರೆಯುವಂತೆ ವರ್ತಿಸುತ್ತಿದ್ದಾರೆ ಎಂಬ ಕಟು ಅಭಿಪ್ರಾಯವನ್ನೂ ವ್ಯಕ್ತಪಡಿಸಿದರು.

ನ್ಯಾಯಮೂರ್ತಿಗಳು ಮತ್ತೊಂದು ಮಹತ್ವದ ಮಾತನ್ನೂ ಹೇಳಿದರು: ಹೈಕೋರ್ಟ್‌ನಲ್ಲಿ ತ್ವರಿತ ಪರಿಹಾರ ಸಿಗದಿದ್ದರೆ ಸುಪ್ರೀಂ ಕೋರ್ಟ್ ಸೇರಿದಂತೆ ಇತರ ಕಾನೂನು ಮಾರ್ಗಗಳಿವೆ. ಸಾಮಾನ್ಯ ವ್ಯಕ್ತಿಗೂ ಜನಪ್ರತಿನಿಧಿಗೂ ಒಂದೇ ರೀತಿಯಲ್ಲಿ ನೋಡಲು ಸಾಧ್ಯವಿಲ್ಲ; ಜನಪ್ರತಿನಿಧಿಗಳು ಮಾತನಾಡುವಾಗ ಹೆಚ್ಚಿನ ಜವಾಬ್ದಾರಿ ಇರಬೇಕು ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದರು.

ಪ್ರಕರಣದ ಹಿನ್ನೆಲೆ ಏನು? ಅಭಿಷೇಕ್ ಬ್ಯಾನರ್ಜಿ ಅವರಿಗೆ ಈ ಹಿಂದೆ ಝಡ್ ಪ್ಲಸ್ ವರ್ಗದ ಭದ್ರತೆ ನೀಡಲಾಗಿತ್ತು. ಪಶ್ಚಿಮ ಬಂಗಾಳದಲ್ಲಿ ಸರ್ಕಾರ ಬದಲಾದ ಬಳಿಕ, ಮೇ 12ರಂದು ಅವರ ಭದ್ರತೆಯನ್ನು ಝಡ್ ಪ್ಲಸ್​ನಿಂದ ಎಕ್ಸ್​ ವರ್ಗಕ್ಕೆ ಇಳಿಸಲಾಯಿತು ಎಂದು ವರದಿಯಾಗಿದೆ.

ಈ ನಿರ್ಧಾರವನ್ನು ಪ್ರಶ್ನಿಸಿ ಅವರು ಕೋಲ್ಕತ್ತಾ ಹೈಕೋರ್ಟ್ ಮೊರೆ ಹೋಗಿದ್ದರು. ತಮ್ಮ ಭದ್ರತೆ ಕಡಿತಗೊಂಡ ನಂತರ ತಮ್ಮ ಮತ್ತು ಕುಟುಂಬದವರ ಮೇಲೆ ಆರು ಬಾರಿ ದಾಳಿಗೆ ಯತ್ನಿಸಲಾಗಿದೆ. ಮನೆ ಮತ್ತು ಕಚೇರಿಯ ಹೊರಗಿನ ಪೊಲೀಸ್ ಭದ್ರತೆಯನ್ನೂ ಹಿಂಪಡೆಯಲಾಗಿದೆ ಎಂದು ಅವರು ಅರ್ಜಿಯಲ್ಲಿ ಆರೋಪಿಸಿದ್ದಾರೆ.

ಇದಕ್ಕೆ ಪ್ರತಿಯಾಗಿ ರಾಜ್ಯ ಸರ್ಕಾರ, ಭದ್ರತೆಯ ನಿರ್ಧಾರವನ್ನು ಬೆದರಿಕೆಯ ಮೌಲ್ಯಮಾಪನದ ಆಧಾರದ ಮೇಲೆ ತೆಗೆದುಕೊಳ್ಳಲಾಗುತ್ತದೆ. ಪ್ರತಿಯೊಬ್ಬರಿಗೂ ನಿರ್ದಿಷ್ಟ ಭದ್ರತಾ ವರ್ಗದ ಹಕ್ಕು ಇರುವುದಿಲ್ಲ ಎಂದು ವಾದಿಸಿದೆ. ಮೇ 29ರಂದು ಭದ್ರತಾ ಪರಿಶೀಲನೆ ನಡೆಸಲಾಗಿದೆ ಎಂದೂ ತಿಳಿಸಿದೆ.

ಈಗ ನ್ಯಾಯಾಲಯದ ನಿರ್ಧಾರ ಏನು? ಕೋಲ್ಕತ್ತಾ ಹೈಕೋರ್ಟ್ ಅಭಿಷೇಕ್ ಬ್ಯಾನರ್ಜಿ ಅವರ ಭದ್ರತೆ ಕುರಿತ ಅರ್ಜಿಯ ವಿಚಾರಣೆಯನ್ನು ಪೂರ್ಣಗೊಳಿಸಿ ತೀರ್ಪನ್ನು ಕಾಯ್ದಿರಿಸಿದೆ. ಅಂದರೆ, ಇನ್ನೂ ಅಂತಿಮ ಆದೇಶ ಪ್ರಕಟವಾಗಿಲ್ಲ. ಮುಖ್ಯವಾಗಿ, ನ್ಯಾಯಮೂರ್ತಿ ಕೃಷ್ಣ ರಾವ್ ಅವರು ನ್ಯಾಯಾಂಗದ ಕುರಿತ ಹೇಳಿಕೆಗಳ ವಿವಾದವು ಭದ್ರತೆ ಕುರಿತ ಅರ್ಜಿಯ ತೀರ್ಪಿನ ಮೇಲೆ ಪರಿಣಾಮ ಬೀರುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ