ಹಾಲು, ಮೊಸರು, ಪನ್ನೀರ್ ಇತ್ಯಾದಿ ಡೈರಿ ಉತ್ಪನ್ನಗಳ ಪ್ಯಾಕೆಟ್​ಗಳಿಗೆ ಹೊಸ ಲೋಗೋ; 2028ರ ಜುಲೈ 1ರಿಂದ ನಿಯಮ ಜಾರಿ

ನವದೆಹಲಿ, ನವೆಂಬರ್ 13: ಗ್ರಾಹಕರು ಹಾಲು ಮತ್ತು ಡೈರಿ ಉತ್ಪನ್ನಗಳನ್ನು ಸುಲಭವಾಗಿ ಗುರುತಿಸಲು ಅನುಕೂಲವಾಗುವಂತೆ ಎಫ್‌ಎಸ್‌ಎಸ್‌ಎಐ (FSSAI) ಹೊಸ ಏಕರೂಪದ ಗುರುತಿನ ಲೋಗೋವನ್ನು ಪರಿಚಯಿಸಿದೆ. ಈ ಹೊಸ ಲೋಗೋವು ನೀಲಿ ಬಣ್ಣದ ಚೌಕಾಕಾರದ ಹಿನ್ನೆಲೆಯಲ್ಲಿ ಬಿಳಿ ಬಣ್ಣದ ಹನಿ (White droplet on a blue square background) ವಿನ್ಯಾಸವನ್ನು ಹೊಂದಿದೆ ಎನ್ನುವ ಮಾಹಿತಿ ಸದ್ಯಕ್ಕೆ ತಿಳಿದುಬಂದಿದೆ.

‘ಫುಡ್ ಸೇಫ್ಟಿ ಅಂಡ್ ಸ್ಟ್ಯಾಂಡರ್ಡ್ಸ್ (ಲೇಬಲಿಂಗ್ ಮತ್ತು ಡಿಸ್ಪ್ಲೇ) ಎರಡನೇ ತಿದ್ದುಪಡಿ ನಿಯಮಗಳು, 2026’ ರ ಅಡಿಯಲ್ಲಿ ಈ ಅಧಿಸೂಚನೆ ಹೊರಡಿಸಲಾಗಿದೆ. ಎಲ್ಲಾ ರೀತಿಯ ಹಾಲು, ಹಾಲಿನ ಉತ್ಪನ್ನಗಳು, ಮೊಸರು, ಪನ್ನೀರ್ ಹಾಗೂ ಇತರೆ ಡೈರಿ ಉತ್ಪನ್ನಗಳ ಪ್ಯಾಕೆಟ್‌ಗಳ ಮೇಲೆ ಈ ಲೋಗೋ ಮುದ್ರಿಸುವುದು 2028ರ ಜುಲೈ 1ರಿಂದ ಕಡ್ಡಾಯವಾಗಲಿದೆ. ತಯಾರಕರಿಗೆ ತಮ್ಮ ಪ್ಯಾಕೇಜಿಂಗ್ ಬದಲಾಯಿಸಿಕೊಳ್ಳಲು ಕಾಲಾವಕಾಶ ನೀಡಲಾಗಿದೆ.

ಇದನ್ನೂ ಓದಿ: ಎಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ಅಮೆಜಾನ್ ಭರ್ಜರಿ ಕೊಡುಗೆ: 4 ವರ್ಷಕ್ಕೆ 2 ಲಕ್ಷ ವಿದ್ಯಾರ್ಥಿವೇತನ, ಉಚಿತ ಲ್ಯಾಪ್‌ಟಾಪ್ ಜೊತೆಗೆ ಇಂಟರ್ನ್‌ಶಿಪ್ ಅವಕಾಶ

ಲೋಗೋದ ಉದ್ದೇಶ ಹಾಗೂ ಅಳತೆಗಳು

ವಿವಿಧ ಉತ್ಪನ್ನಗಳ ಮಧ್ಯೆ ಡೈರಿ ಉತ್ಪನ್ನಗಳನ್ನು ಗುರುತಿಸಲು ಈ ಲೋಗೊ ನೆರವಾಗುತ್ತದೆ. ವಿವಿಧ ಬ್ರ್ಯಾಂಡ್‌ಗಳ ನಡುವೆ ಡೈರಿ ಉತ್ಪನ್ನಗಳ ಗುಣಮಟ್ಟ ಹಾಗೂ ನಿಯಂತ್ರಕ ಗುರುತನ್ನು ಗ್ರಾಹಕರು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳಲು ಇದು ಸಹಾಯ ಮಾಡುತ್ತದೆ.

ಪ್ಯಾಕೆಟ್‌ಗಳ ಗಾತ್ರಕ್ಕೆ ಅನುಗುಣವಾಗಿ ಲೋಗೋದ ಕನಿಷ್ಠ ಅಳತೆಗಳನ್ನು ಪ್ರಾಧಿಕಾರವು ನಿಗದಿಪಡಿಸಿದೆ. ಉದಾಹರಣೆಗೆ ಪ್ಯಾಕೆಟ್ ಗಾತ್ರದ ಆಧಾರದ ಮೇಲೆ 6 ಮಿಮೀ ನಿಂದ 16 ಮಿಮೀ ವರೆಗೆ ಲೋಗೋ ಗಾತ್ರ ಇರುತ್ತದೆ.

ಪ್ಯಾಕೆಟ್​ನ ಗಾತ್ರ ಮತ್ತು ಲೋಗೋ ಗಾತ್ರ

• 100 ಚದರ ಸೆಂಟಿಮೀಟರ್​ವರೆಗೆ ಡಿಸ್​ಪ್ಲೇ ಪ್ಯಾನೆಲ್ ಇರುವ ಪ್ಯಾಕ್​ಗಳಿಗೆ 6 ಎಂಎಂ ಲೋಗೋ ಹಾಕಬೇಕು
• 100ರಿಂದ 500 ಚದರ ಸೆಂಟಿಮೀಟರ್ ಗಾತ್ರದ ಪ್ಯಾನೆಲ್ ಇರುವ ಪ್ಯಾಕ್​ಗಳಿಗೆ 8 ಎಂಎಂ ಲೋಗೊ ಹಾಕಬೇಕು.
• 500ರಿಂದ 2,500 ಚದರ ಸೆಂಟಿಮೀಟರ್ ಇರುವ ಪ್ಯಾನಲ್​ಗಳಿಗೆ 12 ಎಂಎಂ ಲೋಗೋ ಹಾಕಬೇಕು.
• 2,500 ಚದರ ಸೆಂಟಿಮೀಟರ್​ಗಿಂತ ಹೆಚ್ಚಿರುವ ಪ್ಯಾನಲ್​ಗಳಿಗೆ 16 ಎಂಎಂ ಲೋಗೋ ಹಾಕಬೇಕು.

ಇದನ್ನೂ ಓದಿ: ಶಿವಮೊಗ್ಗದಂತಹ ಪ್ರಾದೇಶಿಕ ವಿಮಾನ ನಿಲ್ದಾಣಗಳು ಉಳಿವಿಗಾಗಿ ಹೆಣಗಾಡುತ್ತಿರುವುದೇಕೆ? ಪ್ರಾದೇಶಿಕ ವಾಯುಯಾನದ ಸವಾಲುಗಳು

ಲೋಗೋದಲ್ಲಿ ಬಿಳಿ ಹನಿಯ ಗಾತ್ರಕ್ಕೂ ನಿಯಮ…

• 6 ಎಂಎಂ ಲೋಗೋದಲ್ಲಿ ಬಿಳಿ ಹನಿಯ ಕನಿಷ್ಠ ಎತ್ತರ 4.56 ಎಂಎಂ ಮತ್ತು ಅಗಲ 3 ಎಂಎಂ ಇರಬೇಕು.
• 8 ಎಂಎಂ ಲೋಗೋದಲ್ಲಿ ಬಿಳಿ ಹನಿಯ ಗಾತ್ರ 6.08 ಎಂಎಂ ಎತ್ತರ ಮತ್ತು 4 ಎಂಎಂ ಅಗಲ ಇರಬೇಕು.
• 12 ಎಂಎಂ ಲೋಗೋದಲ್ಲಿ ಬಿಳಿ ಹನಿಯ ಗಾತ್ರವು 9.12 ಎಂಎಂ ಎತ್ತರ, 6 ಎಂಎಂ ಅಗಲ ಇರಬೇಕು.
• 16 ಎಂಎಂ ಲೋಗೋದಲ್ಲಿ ಬಿಳಿ ಹನಿ ಗಾತ್ರವು 12.16 ಎಂಎಂ ಎತ್ತರ, 16 ಎಂಎಂ ಅಗಲ ಇರಬೇಕು.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ