ಸ್ಮಿತ್ ಮಚ್ಚರ್ ಕುಟುಂಬದ ಜತೆ ಮೋದಿ ಮಾತುಕತೆ: ಮತ್ತೊಂದು 9/11 ಮಾದರಿಯ ಘಟನೆ ನಡೆಯದಂತೆ ಸ್ಮಿತ್ ತಡೆದಿದ್ದಾರೆ ಎಂದ ಪ್ರಧಾನಿ
ಫ್ಲೈದುಬೈ ವಿಮಾನದಲ್ಲಿ ಸಹ-ಪೈಲಟ್ ದಾಳಿಗೆ ಒಳಗಾದರೂ, ಭಾರತೀಯ ಪೈಲಟ್ ಸ್ಮಿತ್ ಮಚ್ಚರ್ ತಮ್ಮ ಧೈರ್ಯದಿಂದ ಭಾರಿ ದುರಂತ ತಪ್ಪಿಸಿದರು. ಪ್ರಧಾನಿ ಮೋದಿ ಕುಟುಂಬದೊಂದಿಗೆ ಮಾತನಾಡಿ, ಸ್ಮಿತ್ ಅವರನ್ನು 'ಹೀರೋ' ಎಂದು ಶ್ಲಾಘಿಸಿ, 9/11 ಮಾದರಿಯ ಘಟನೆ ತಪ್ಪಿಸಿದ್ದಕ್ಕಾಗಿ ಧನ್ಯವಾದ ತಿಳಿಸಿದರು. ಸರ್ಕಾರದಿಂದ ಸಂಪೂರ್ಣ ನೆರವು ನೀಡುವುದಾಗಿ ಭರವಸೆ ನೀಡಿದರು.
Updated on: Oct 01, 2026 | 12:23 PM
ನವದೆಹಲಿ, ಅಕ್ಟೋಬರ್ 1: ಫ್ಲೈದುಬೈ ವಿಮಾನದಲ್ಲಿ ಸಹ ಪೈಲಟ್ನ ಹಠಾತ್ ದಾಳಿಯಿಂದ ಗಂಭೀರವಾಗಿ ಗಾಯಗೊಂಡ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರ ಪತ್ನಿ ಮತ್ತು ಪೋಷಕರೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಮಾತನಾಡಿದ್ದಾರೆ. ಈ ವೇಳೆ ಸ್ಮಿತ್ ಅವರ ಧೈರ್ಯವನ್ನು ಶ್ಲಾಘಿಸಿದ ಮೋದಿ, ಅವರು ಮತ್ತೊಂದು 9/11 ಮಾದರಿಯ ದೊಡ್ಡ ದುರಂತ ಸಂಭವಿಸುವುದನ್ನು ತಡೆದಿದ್ದಾರೆ ಎಂದು ಹೇಳಿದ್ದಾರೆ ಎಂದು ವರದಿಯಾಗಿದೆ.
ಕುಟುಂಬಕ್ಕೆ ಸರ್ಕಾರ ಮತ್ತು ಭಾರತೀಯ ರಾಯಭಾರ ಕಚೇರಿಗಳಿಂದ ಸಾಧ್ಯವಿರುವ ಎಲ್ಲ ನೆರವು ನೀಡುವುದಾಗಿ ಮೋದಿ ಭರವಸೆ ನೀಡಿದ್ದಾರೆ. ಮಚ್ಚರ್ ಅವರ ಆರೋಗ್ಯದ ಬಗ್ಗೆ ಮಾಹಿತಿ ಪಡೆದುಕೊಂಡ ಮೋದಿ, ಕುಟುಂಬಕ್ಕೆ ಬೆಂಬಲ ನೀಡುವುದರ ಜೊತೆಗೆ ಸಾಧ್ಯವಿರುವ ಎಲ್ಲ ನೆರವು ನೀಡುವುದಾಗಿ ಭರವಸೆ ನೀಡಿದ್ದಾರೆ. ಪ್ರಧಾನಿ ಮೋದಿ ಅವರು ಸ್ಮಿತ್ ಮಚ್ಚರ್ ಅವರ ಧೈರ್ಯವನ್ನು ಕೂಡ ಶ್ಲಾಘಿಸಿದ್ದಾರೆ. ಗಂಭೀರ ಅಪಾಯದ ನಡುವೆಯೂ ಇತರರ ಜೀವಗಳನ್ನು ರಕ್ಷಿಸುವ ಸಂಕಲ್ಪದಿಂದ ಅವರು ಕಾರ್ಯನಿರ್ವಹಿಸಿದ್ದಾರೆ ಎಂದು ಮೋದಿ ಹೇಳಿದ್ದಾರೆ.
ಫ್ಲೈದುಬೈ ವಿಮಾನದಲ್ಲಿ ನಡೆದಿದ್ದೇನು?
ದುಬೈನಿಂದ ಟೆಲ್ ಅವೀವ್‌ಗೆ ತೆರಳುತ್ತಿದ್ದ FZ1073 ವಿಮಾನದಲ್ಲಿ ಕಾಕ್‌ಪಿಟ್‌ನಲ್ಲಿ ಗಂಭೀರ ಘಟನೆ ನಡೆದಿದೆ. ವರದಿಗಳ ಪ್ರಕಾರ, ಸಹ-ಪೈಲಟ್‌ನೊಂದಿಗಿನ ಘರ್ಷಣೆಯಲ್ಲಿ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಗಾಯಗೊಂಡರು. ಗಾಯಗೊಂಡಿದ್ದರೂ ಮಚ್ಚರ್ ಕಾಕ್‌ಪಿಟ್ ಬಾಗಿಲು ತೆರೆಯಲು ಸಾಧ್ಯವಾಯಿತು. ಇದರಿಂದ ಪ್ರಯಾಣಿಕರು ಮತ್ತು ಸಿಬ್ಬಂದಿ ಒಳಗೆ ಪ್ರವೇಶಿಸಿ ಪರಿಸ್ಥಿತಿಯನ್ನು ನಿಯಂತ್ರಿಸಲು ನೆರವಾದರು. ನಂತರ ವಿಮಾನವನ್ನು ಸೌದಿ ಅರೇಬಿಯಾದ ತಬೂಕ್‌ಗೆ ತಿರುಗಿಸಿ ತುರ್ತು ಭೂಸ್ಪರ್ಶ ಮಾಡಲಾಯಿತು. ವಿಮಾನದಲ್ಲಿದ್ದ 174 ಪ್ರಯಾಣಿಕರು ಸುರಕ್ಷಿತವಾಗಿದ್ದರು ಎಂದು ವರದಿಯಾಗಿದೆ.
ಗಂಭೀರ ಗಾಯಗಳ ನಡುವೆಯೂ ಪ್ರಯಾಣಿಕರ ಸುರಕ್ಷತೆಗೆ ಆದ್ಯತೆ
ವರದಿಗಳ ಪ್ರಕಾರ, ಘಟನೆಯ ಸಂದರ್ಭದಲ್ಲಿ ವಿಮಾನವು ಕೆಲವೇ ಕ್ಷಣಗಳಲ್ಲಿ ಸುಮಾರು 14,300 ಅಡಿ ಎತ್ತರ ಕಳೆದುಕೊಂಡಿತ್ತು. ಬಳಿಕ ವಿಮಾನವನ್ನು ನಿಯಂತ್ರಣಕ್ಕೆ ತಂದು ತಬೂಕ್‌ನಲ್ಲಿ ಸುರಕ್ಷಿತವಾಗಿ ಇಳಿಸಲಾಯಿತು. ಸ್ಮಿತ್ ಮಚ್ಚರ್ ಅವರನ್ನು ತಬೂಕ್‌ನ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಭಾರತೀಯ ರಾಯಭಾರ ಕಚೇರಿಯೂ ಅವರ ಆರೋಗ್ಯದ ಬೆಳವಣಿಗೆಗಳನ್ನು ಗಮನಿಸುತ್ತಿದೆ ಎಂದು ವರದಿಯಾಗಿದೆ. ಈ ಹಿಂದೆ ಪ್ರಧಾನಿ ಮೋದಿ ಸಾಮಾಜಿಕ ಮಾಧ್ಯಮ ಪೋಸ್ಟ್‌ನಲ್ಲಿ ಮಚ್ಚರ್ ಅವರನ್ನು ಹೀರೋ ಎಂದು ಕರೆದಿದ್ದರು. ಗಂಭೀರವಾಗಿ ಗಾಯಗೊಂಡಿದ್ದರೂ ಅವರು ತೋರಿದ ಧೈರ್ಯ ಮತ್ತು ಇತರರ ಜೀವಗಳನ್ನು ರಕ್ಷಿಸುವ ಸಂಕಲ್ಪವನ್ನು ಮೋದಿ ಶ್ಲಾಘಿಸಿದ್ದರು.
ಪೋಸ್ಟ್
#WATCH | Delhi: Prime Minister Narendra Modi says, “… The incident that occurred yesterday, Captain Smit of India demonstrated remarkable patience, presence of mind, and courage; indeed, as the Prime Minister of Israel stated today, an Indian prevented a 9/11-style tragedy.”… https://t.co/mirnEuyxzs pic.twitter.com/Q3JyfmnhOc
— ANI (@ANI) October 1, 2026
13 ವರ್ಷಕ್ಕೂ ಹೆಚ್ಚು ವಿಮಾನಯಾನ ಅನುಭವ
ಸ್ಮಿತ್ ಮಚ್ಚರ್ ಭಾರತೀಯ ಪೈಲಟ್ ಆಗಿದ್ದು, ಫ್ಲೈದುಬೈ ಸೇರುವ ಮೊದಲು ಸ್ಪೈಸ್‌ಜೆಟ್‌ನಲ್ಲಿ ಸುಮಾರು 11 ವರ್ಷ ಕೆಲಸ ಮಾಡಿದ್ದರು. ವರದಿಗಳ ಪ್ರಕಾರ, ಅವರಿಗೆ ಬೋಯಿಂಗ್ 737 ವಿಮಾನಗಳಲ್ಲಿ ಸುಮಾರು 9,750 ಗಂಟೆಗಳ ಹಾರಾಟದ ಅನುಭವವಿದೆ. ಘಟನೆಯ ಕುರಿತು ತನಿಖೆ ಮುಂದುವರೆದಿದ್ದು, ಸಹ-ಪೈಲಟ್ನ ಕೃತ್ಯದ ನಿಖರ ಕಾರಣದ ಬಗ್ಗೆ ಅಂತಿಮ ಮಾಹಿತಿ ಇನ್ನೂ ಹೊರಬಂದಿಲ್ಲ.
ಮ್ತಷ್ಟು ಓದಿ: ಸ್ಮಿತ್ ನಿಜವಾದ ಹೀರೋ, ಅವರಿಗೆ ನನ್ನ ಸಲ್ಯೂಟ್: ಫ್ಲೈದುಬೈ ಬಿಕ್ಕಟ್ಟು ತಪ್ಪಿಸಿದ ಭಾರತೀಯ ಕ್ಯಾಪ್ಟನ್ ಸಾಹಸ ಕೊಂಡಾಡಿದ ನೆತನ್ಯಾಹು
9/11 ಘಟನೆ ಎಂದರೇನು? ಅಂದು ಏನಾಗಿತ್ತು?
2001ರ ಸೆಪ್ಟೆಂಬರ್ 11ರಂದು ಅಲ್-ಖೈದಾಗೆ ಸೇರಿದ 19 ಮಂದಿ ನಾಲ್ಕು ವಾಣಿಜ್ಯ ವಿಮಾನಗಳನ್ನು ಅಪಹರಿಸಿದ್ದರು. ಎರಡು ವಿಮಾನಗಳನ್ನು ನ್ಯೂಯಾರ್ಕ್‌ನ ವಿಶ್ವ ವಾಣಿಜ್ಯ ಕೇಂದ್ರದ ಟ್ವಿನ್ ಟವರ್ಸ್ಗೆಗೆ ಅಪ್ಪಳಿಸಲಾಯಿತು. ಮೂರನೇ ವಿಮಾನವನ್ನು ವಾಷಿಂಗ್ಟನ್ ಸಮೀಪದ ಪೆಂಟಗಾನ್ ಕಟ್ಟಡಕ್ಕೆ ಅಪ್ಪಳಿಸಲಾಯಿತು. ನಾಲ್ಕನೇ ವಿಮಾನ ಫ್ಲೈಟ್ 93ನಲ್ಲಿ ಪ್ರಯಾಣಿಕರು ಅಪಹರಣಕಾರರ ವಿರುದ್ಧ ಪ್ರತಿರೋಧ ತೋರಿದರು. ನಂತರ ವಿಮಾನ ಪೆನ್ಸಿಲ್ವೇನಿಯಾದಲ್ಲಿ ಪತನಗೊಂಡಿತು.
ಹಾಗಾದರೆ ಸ್ಮಿತ್ ಮಚ್ಚರ್ ಪ್ರಕರಣಕ್ಕೆ 9/11 ಹೋಲಿಕೆ ಏಕೆ?
ಸ್ಮಿತ್ ಮಚ್ಚರ್ ಘಟನೆಗೆ ಸಂಬಂಧಿಸಿದಂತೆ, ವಿಮಾನವನ್ನು ಒಳಗಿನಿಂದಲೇ ನಿಯಂತ್ರಣ ಕಳೆದುಕೊಳ್ಳುವಂತಹ ಪರಿಸ್ಥಿತಿ ಉಂಟಾಗಿತ್ತು ಎಂಬ ವರದಿಗಳ ಹಿನ್ನೆಲೆಯಲ್ಲಿ 9/11ರ ಘಟನೆಗೆ ಹೋಲಿಕೆ ಮಾಡಲಾಗಿದೆ. 9/11ರಲ್ಲಿ ನಾಲ್ಕು ವಿಮಾನಗಳ ಅಪಹರಣ ಮತ್ತು ಉದ್ದೇಶಪೂರ್ವಕ ದಾಳಿ ನಡೆದಿತ್ತು. ಸ್ಮಿತ್ ಮಚ್ಚರ್ ಪ್ರಕರಣದಲ್ಲಿ ವಿಮಾನದೊಳಗಿನ ದಾಳಿ ಬಳಿಕ ಪರಿಸ್ಥಿತಿಯನ್ನು ನಿಯಂತ್ರಿಸಿ ವಿಮಾನವನ್ನು ತುರ್ತು ಭೂಸ್ಪರ್ಶ ಮಾಡಿಸಲಾಯಿತು.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
