ಬಯಲು ಶೌಚದ ವಿರುದ್ಧ ಸಮರ ಸಾರಿದ್ದ ‘ಸುಲಭ್’ ಸಂಸ್ಥಾಪಕ ಬಿಂದೇಶ್ವರ್ ಪಾಠಕ್ ನಿಧನ

ದೆಹಲಿ ಆಗಸ್ಟ್ 15: ಬಯಲು ಶೌಚದ ವಿರುದ್ಧ ಸಮರದಲ್ಲಿ ಸಮುದಾಯ ಶೌಚಾಲಯಗಳನ್ನು ನಿರ್ಮಿಸಿದ ಸುಲಭ್ ಇಂಟರ್‌ನ್ಯಾಶನಲ್ (Sulabh International) ಸಂಸ್ಥಾಪಕ ಬಿಂದೇಶ್ವರ್ ಪಾಠಕ್ (Bindeshwar Pathak) ಅವರು ಮಂಗಳವಾರ ಹೃದಯಾಘಾತದಿಂದ (cardiac arrest) ನಿಧನರಾಗಿದ್ದಾರೆ ಎಂದು ಪಿಟಿಐ ವರದಿ ಮಾಡಿದೆ. ಪಾಠಕ್ ಅವರು ಮಾನವ ಹಕ್ಕುಗಳು, ಪರಿಸರ ನೈರ್ಮಲ್ಯ, ತ್ಯಾಜ್ಯ ನಿರ್ವಹಣೆ ಮತ್ತು ಶಿಕ್ಷಣದ ಮೂಲಕ ಸುಧಾರಣೆಗಳನ್ನು ಉತ್ತೇಜಿಸಲು ಕೆಲಸ ಮಾಡುವ ಸಾಮಾಜಿಕ ಸಂಸ್ಥೆಯಾದ ಸುಲಭ್ ಇಂಟರ್‌ನ್ಯಾಷನಲ್‌ನ ಸಂಸ್ಥಾಪಕರಾಗಿದ್ದರು. ಪಾಠಕ್ ಅವರು ಸ್ವಾತಂತ್ರ್ಯ ದಿನಾಚರಣೆಯಂದು ಬೆಳಗ್ಗೆ ರಾಷ್ಟ್ರಧ್ವಜಾರೋಹಣ ಮಾಡಿದ್ದು ಆನಂತರ ಕುಸಿದು ಬಿದ್ದಿದ್ದಾರೆ. ತಕ್ಷಣವೇ ಅವರನ್ನು ದೆಹಲಿಯ ಏಮ್ಸ್‌ಗೆ ರವಾನಿಸಲಾಯಿತು. ಮಧ್ಯಾಹ್ನ 1.42ಕ್ಕೆ ಪಾಠಕ್ ಮೃತಪಟ್ಟಿದ್ದಾರೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.

ಪಾಠಕ್ ಅವರ ನಿಧನಕ್ಕೆ ಪ್ರಧಾನಿ ನರೇಂದ್ರ ಮೋದಿ ಸಂತಾಪ ಸೂಚಿಸಿದ್ದಾರೆ. ಡಾ. ಬಿಂದೇಶ್ವರ್ ಪಾಠಕ್ ಜಿ ಅವರ ನಿಧನವು ನಮ್ಮ ದೇಶಕ್ಕೆ ತುಂಬಲಾರದ ನಷ್ಟ. ಅವರು ಸಾಮಾಜಿಕ ಪ್ರಗತಿಗಾಗಿ ಮತ್ತು ದೀನದಲಿತರ ಸಬಲೀಕರಣಕ್ಕಾಗಿ ವ್ಯಾಪಕವಾಗಿ ಕೆಲಸ ಮಾಡಿದ ದಾರ್ಶನಿಕರಾಗಿದ್ದರು. ಬಿಂದೇಶ್ವರ್ ಜಿ ಅವರು ಸ್ವಚ್ಛ ಭಾರತವನ್ನು ನಿರ್ಮಿಸಲು ತಮ್ಮ ಧ್ಯೇಯವನ್ನು ಮಾಡಿದರು. ಅವರು ಸ್ವಚ್ಛ ಭಾರತ್ ಮಿಷನ್‌ಗೆ  ಬೆಂಬಲವನ್ನು ನೀಡಿದರು. ನಮ್ಮ ವಿವಿಧ ಸಂಭಾಷಣೆಗಳ ಸಮಯದಲ್ಲಿ, ಸ್ವಚ್ಛತೆಯ ಕಡೆಗೆ ಅವರ ಉತ್ಸಾಹವು ಯಾವಾಗಲೂ ಗೋಚರಿಸುತ್ತದೆ. ಅವರ ಕೆಲಸವು ಹಲವಾರು ಜನರಿಗೆ ಸ್ಫೂರ್ತಿ ನೀಡುತ್ತದೆ. ಈ ಕಷ್ಟದ ಸಮಯದಲ್ಲಿ ಅವರ ಕುಟುಂಬ ಮತ್ತು ಪ್ರೀತಿಪಾತ್ರರಿಗೆ ನನ್ನ ಸಂತಾಪಗಳು. ಓಂ ಶಾಂತಿ ಎಂದು ಮೋದಿ ಟ್ವೀಟ್ ಮಾಡಿದ್ದಾರೆ.

ಬಿಂದೇಶ್ವರ್ ಪಾಠಕ್ ಪರಿಚಯ

1. ಬಿಂದೇಶ್ವರ್ ಪಾಠಕ್ ಅವರು ಬಿಹಾರದ ವೈಶಾಲಿ ಜಿಲ್ಲೆಯ ರಾಮ್‌ಪುರ ಬಾಘೇಲ್ ಗ್ರಾಮದಲ್ಲಿ ಬ್ರಾಹ್ಮಣ ಕುಟುಂಬದಲ್ಲಿ ಜನಿಸಿದರು. ಅವರ ತಾಯಿ ಯೋಗಮಾಯಾ ದೇವಿ ಮತ್ತು ಅವರ ತಂದೆ ರಮಾಕಾಂತ್ ಪಾಠಕ್.

2. ಪಾಠಕ್ ಪಾಟ್ನಾಗೆ ಸ್ಥಳಾಂತರಗೊಂಡರು. ಬಿ.ಎನ್ ಕಾಲೇಜಿನಲ್ಲಿ ಅವರು ಸಮಾಜಶಾಸ್ತ್ರದಲ್ಲಿ ಪದವಿ ಪಡೆದರು, ಪಾಟ್ನಾದ ಗಾಂಧಿ ಶತಮಾನೋತ್ಸವ ಸಮಿತಿಯಲ್ಲಿ ಸ್ವಯಂಸೇವಕರಾಗಿ ಸೇರುವ ಮೊದಲು ಅವರು ಸ್ವಲ್ಪ ಕಾಲ ಶಿಕ್ಷಕರಾಗಿ ಕೆಲಸ ಮಾಡಿದರು.

3. ಸುಲಭ್ ಇಂಟರ್ನ್ಯಾಷನಲ್ ವೆಬ್‌ಸೈಟ್ ಪ್ರಕಾರ, ಪಾಠಕ್ ಅವರು ಮಹಾತ್ಮ ಗಾಂಧಿಯವರಿಂದ ಪ್ರೇರಿತರಾಗಿದ್ದರು. ಕಳೆದ 50 ವರ್ಷಗಳಲ್ಲಿ, ಅವರು ಭಾರತದ ಜಾತಿ-ಆಧಾರಿತ ವ್ಯವಸ್ಥೆಯ ಅತ್ಯಂತ ಕೆಳಸ್ತರದಿಂದ ಬರುವ ಮತ್ತು ಹೆಚ್ಚಾಗಿ ಮಹಿಳೆಯರ, ಮಾನವ ಹಕ್ಕುಗಳಿಗಾಗಿ ಕೆಲಸ ಮಾಡಿದರು.

ಇದನ್ನೂ ಓದಿ: ವಿಶೇಷ ಸಂದರ್ಶನ: ಪ್ರಧಾನಿ ಮೋದಿಯವರ ದೂರದೃಷ್ಟಿ, ಮಧ್ಯಮ ವರ್ಗ ಮತ್ತು ಆರ್ಥಿಕ ಸುಧಾರಣೆಗಳ ಬಗ್ಗೆ ಅಶ್ವಿನಿ ವೈಷ್ಣವ್ ಹೇಳಿದ್ದೇನು?

4. 1973 ರಲ್ಲಿ, ಬಿಂದೇಶ್ವರ್ ಪಾಠಕ್ ಅವರು ಅಂದಿನ ಪ್ರಧಾನಿ ಇಂದಿರಾ ಗಾಂಧಿಯವರಿಗೆ ಪತ್ರ ಬರೆಯಲು ಶಾಸಕರ ಮನವೊಲಿಸಿದರು. ಶೌಚಗುಂಡಿ ಸ್ವಚ್ಛತಾ ಕಾರ್ಮಿಕರು (manual scavengers) ಪರಿಸ್ಥಿತಿಯ ಬಗ್ಗೆ ಅವರ ಗಮನ ಸೆಳೆದರು. ಈ ವಿಷಯದ ಬಗ್ಗೆ ವೈಯಕ್ತಿಕ ಗಮನ ಹರಿಸಲು ಮುಖ್ಯಮಂತ್ರಿಗಳಿಗೆ ಪತ್ರ ಬರೆಯುತ್ತಿದ್ದೇನೆ ಎಂದು ಇಂದಿರಾ ಗಾಂಧಿ ಉತ್ತರಿಸಿದರು.

5. 1973 ರಲ್ಲಿ, ಬಿಹಾರದ ಸಣ್ಣ ಪಟ್ಟಣವಾದ ಅರಾಹ್ ಪುರಸಭೆಯ ಅಧಿಕಾರಿಯೊಬ್ಬರು ಪಾಠಕ್ ಅವರಿಗೆ ಅದರ ಆವರಣದಲ್ಲಿ ಪ್ರದರ್ಶನಕ್ಕಾಗಿ ಎರಡು ಶೌಚಾಲಯಗಳನ್ನು ನಿರ್ಮಿಸಲು 500 ರೂಪಾಯಿಗಳನ್ನು ನೀಡಿದರು. ಆ ಶೌಚಾಲಯವನ್ನು ನೋಡಿ ಮೆಚ್ಚಿದ ಅಧಿಕಾರಿಗಳು ಅದರ ವ್ಯಾಪಕ ನಿರ್ಮಾಣಕ್ಕೆ ಸಮ್ಮತಿ ಸೂಚಿಸಿದ್ದರು.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ