ವ್ಯಂಗ್ಯ ಚಿತ್ರಕಾರ ಮಂಜುಲ್ ಅವರ ಟ್ವಿಟ್ಟರ್ ಹ್ಯಾಂಡಲ್​ ವಿರುದ್ಧ ಕ್ರಮ ತೆಗೆದುಕೊಳ್ಳಲು ಟ್ಟಿಟ್ಟರ್​ಗೆ ಕೇಂದ್ರದ ಸೂಚನೆ

ನವದೆಹಲಿ: ಖ್ಯಾತ ವ್ಯಂಗ್ಯ ಚಿತ್ರಕಾರ ಮಂಜುಲ್ ಅವರ ಸಾಮಾಜಿಕ ಜಾಲತಾಣದ ಪ್ರೊಫೈಲ್ ವಿರುದ್ಧ ಕಾನೂನು ಕ್ರಮ ಕೆಗೆದುಕೊಳ್ಳುವಂತೆ ಭಾರತದ ಕಾನೂನು ಸಚಿವಾಲಯದಿಂದ ತನಗೆ ಲೀಗಲ್ ಮನವಿ ಬಂದಿದೆಯೆಂದು ಟ್ವಿಟ್ಟರ್​ ಸಂಸ್ಥೆಯು ಈ ಕಲಾವಿದನಿಗೆ ತಿಳಿಸಿದೆ. ಖುದ್ದು ಮಂಜುಲ್, ಸಂಸ್ಥೆಯಿಂದ ತಮಗೆ ಬಂದಿರುವ ಮೇಲನ್ನು ಶುಕ್ರವಾರದಂದು ಶೇರ್ ಮಾಡಿದ್ದಾರೆ. ‘ಈ ಮನವಿಯ ಹಿನ್ನೆಲೆಯಲ್ಲಿ ಮಂಜುಲ್ ಅವರ ವ್ಯಂಗ್ಯಚಿತ್ರಗಳ ಮೇಲೆ ನಾವು ಯಾವುದೇ ಕ್ರಮ ತೆಗೆದುಕೊಂಡಿಲ್ಲ ಎಂದು ಟ್ಚಿಟ್ಟರ್ ಹೇಳಿದೆ. ‘ಭಾರತದ ಕಾನೂನನ್ನು ಅವರ ಟ್ವೀಟ್​ ಉಲ್ಲಂಘಿಸುತ್ತದೆ’ ಎಂದಿರುವ ಭಾರತ ಸರ್ಕಾರವು ಮಂಜುಲ್ ಅವರ ನಿರ್ದಿಷ್ಟ ಟ್ಚೀಟ್​ ಬದಲಿಗೆ ಅವರ ಪ್ರೊಫೈಲ್ ವಿರುದ್ಧ ಕ್ರಮ ತೆಗೆದುಕೊಳ್ಳಬೇಕೆಂದು ಹೇಳಿದೆ.

ಸರ್ಕಾರದ ಮನವಿಯನ್ನು ನ್ಯಾಯಾಲಯದಲ್ಲಿ ಪ್ರಶ್ನಿಸಲು ಮಂಜುಲ್ ಅವರು ಕಾನೂನಿನ ನೆರವು ಪಡೆದುಕೊಳ್ಳಬಹುದು, ಅಥವಾ ನಾಗರಿಕ ಸಮಾಜ ಸಂಸ್ಥೆಗಳನ್ನು ಸಂಪರ್ಕಿಸಿ ವಿಷಯವನ್ನು ಬಗೆಹರಿಸಿಕೊಳ್ಳಬಹುದು ಇಲ್ಲವೇ ತಾನೇ ಖುದ್ದಾಗಿ ಆ ಟ್ವೀಟನ್ನು ತೆಗೆದುಹಾಕಬಹುದು, ಎಂದು ಟ್ವಿಟ್ಟರ್ ಸಂಸ್ಥೆ ಹೇಳಿದೆ.

ತಮ್ಮ ಮೇಲ್​ ಅನ್ನು ಶೇರ್ ಮಾಡುತ್ತಾ ಮಂಜುಲ್ ಅವರು, ‘ಜೈ ಹೋ ಮೋದಿ ಜೀ ಕಿ ಸರ್ಕಾರ್ ಕೀ,’ ಅಂತ ತಮ್ಮ ಟ್ವೀಟ್​ನಲ್ಲಿ ಬರೆದಿದ್ದಾರೆ. ತಮ್ಮ ಯಾವ ಟ್ವೀಟ್ ಸರ್ಕಾರಕ್ಕೆ ಮುಜುಗುರವನ್ನು ಉಂಟು ಮಾಡಿದೆ ಅಂತ ತಿಳಿಸಿದ್ದರೆ ಚೆನ್ನಾಗಿತ್ತು ಎಂದು ಅವರು ಹೇಳಿದ್ದಾರೆ.

ಮಂಜುಲ್ ಅವರು ಕೋವಿಡ್-19 ಸೋಂಕಿನ ಎರಡನೇ ಸೃಷ್ಟಿಸಿರುವ ಹಾಹಾಕಾರದ ವಾಸ್ತವಿಕತೆಯನ್ನು ತಮ್ಮ ವ್ಯಂಗ್ಯಚಿತ್ರಗಳಲ್ಲಿ ತೋರಿಸಿ ಆಮೆಗತಿಯಲ್ಲಿ ಸಾಗುತ್ತಿರುವ ಲಸಿಕಾ ಅಭಿಯಾನವನ್ನು ಟೀಕಿಸಿದ್ದರು.
ಸರ್ಕಾರದ ಆದೇಶದ ಮೇರೆಗೆ ಏಪ್ರಿಲ್​ನಲ್ಲಿ 52 ಟ್ವೀಟ್​ಗಳನ್ನು ಸಾಮಾಜಿಕ ಜಾಲತಾಣಗಳಿಂದ ತೆಗೆದು ಹಾಕಲಾಗಿತ್ತು. ಸದರಿ ಟ್ವೀಟ್​ಗಳಿ ಸುಳ್ಳು ಸುದ್ದಿಗಳನ್ನು ಹಬ್ಬುತ್ತಿವೆ ಎಂದು ಸರ್ಕಾರ ಹೇಳಿತ್ತಾದರೂ ಅವು ಎರಡನೇ ಅಲೆಯಲ್ಲಿ ರಾಜ್ಯಗಳು ಆಸ್ಪತ್ರೆಗಳಲ್ಲಿ ಎದುರಿಸುತ್ತಿರುವ ಬೆಡ್​ಗಳ ಕೊರತೆ, ಆಕ್ಸಿಜನ್ ಅಲಭ್ಯತೆ, ಔಷಧಿ ಮತ್ತು ಲಸಿಕೆಗಳ ಅಭಾವ ಮೊದಲಾದ ಸಮಸ್ಯೆಗಳನ್ನು ನಿರ್ವಹಿಸುವಲ್ಲಿ ಸರ್ಕಾರದ ವೈಫಲ್ಯವನ್ನು ಅವು ಖಂಡಿಸಿದ್ದವು

ಕಾಂಗ್ರೆಸ್ ಧುರೀಣರಾದ ಪವನ್ ಖೇರಾ, ರೇವಂತ್ ರೆಡ್ಡಿ, ಪಶ್ಚಿಮ ಬಂಗಾಳ ಸರ್ಕಾರದಲ್ಲಿ ಸಚಿವರಾಗಿರುವ ಮೊಲೊಯ್ ಘಾತಕ್, ನಟ ವಿನೀತ್​ ಕುಮಾರ್ ಸಿಂಗ್, ಸಿನಿಮಾ ನಿರ್ಮಾಪಕರಾದ ವಿನೋದ್ ಕಪ್ರಿ ಮತ್ತು ಅವಿನಾಶ್ ದಾಸ ಅವರ ಟ್ವಿಟ್ಟರ್​ ಖಾತೆಗಳನ್ನು ಬ್ಲಾಕ್ ಮಾಡಲಾಗಿತ್ತು.

ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಮತ್ತು ಟ್ವಿಟ್ಟರ್​ ನಡುವೆ ಕಾಂಗ್ರಸ್ ಪಕ್ಷದ ಟೂಲ್​ಕಿಟ್​ ಎಂದು ಅರೋಪಿಸಲಾಗಿರುವ ಡಾಕ್ಯುಮೆಂಟ್ ಮತ್ತು ಮಾಹಿತಿ ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಹೊಸ ಕಾನೂನುಗಳ ಹಿನ್ನೆಲೆಯಲ್ಲಿ ನಡೆಯುತ್ತಿರವ ಸಂಘರ್ಷದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ.

ಕೊರೊನಾ ವೈರಸ್ ನಿರ್ವಹಣೆಗೆ ಸಂಬಂಧಿಸಿದಂತೆ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮತ್ತು ಅವರು ಸರ್ಕಾರಕ್ಕೆ ಮಸಿ ಬಳಿಯುವ ಉದ್ದೇಶದಿಂದ ಕಾಂಗ್ರೆಸ್ ಪಕ್ಷವು ಟೂಲ್​ಕಿಟ್​ ಅಥವಾ ಅಪಪ್ರಚಾರ ಸಾಮಗ್ರಿ ಸೃಷ್ಟಿಸಿದೆಯೆಂದು ಅರೋಪಿಸಿ ಮೇ 18 ರಂದು ಬಿಜೆಪಿಯ ವಕ್ತಾರ ಸಂಬಿತ್ ಪಾತ್ರ ಟ್ವೀಟ್​ ಮಾಡಿದ್ದರು.

ಪಾತ್ರ ಅವರ ಟ್ವೀಟ್ ಅನ್ನು ಟ್ವಿಟ್ಟರ್, ‘ಮ್ಯಾನಿಪುಲೇಟೆಡ್ ಮಿಡಿಯಾ’ ಎಂದು ವರ್ಗೀಕರಿಸಿತ್ತು. ಆದರೆ ಕೆಲ ದಿನಗಳ ನಂತರ ದೆಹಲಿ ಪೊಲೀಸ್ ದಕ್ಷಿಣ ದೆಹಲಿಯ ಲಾಡೋ ಸರಾಯಿ ಮತ್ತು ಗುರುಗ್ರಾಮ್​ನಲ್ಲಿರುವ ಟ್ವಿಟ್ಟರ್​ ಕಚೇರಿಗಳ ಮೇಲೆ ದಾಳಿ ನಡೆಸಿ ಶೋಧ ಕಾರ್ಯಗಳನ್ನು ನಡೆಸಿತ್ತು.

ಸಾಮಾಜಿಕ ಜಾಲತಾಣ ಸಂಸ್ಥೆಗಳ ಮೇಲೆ ನಿಯಂತ್ರಣ ಸಾಧಿಸಲು ಮತ್ತು ಡಿಜಿಟಲ್ ಸುದ್ದಿ ಸರಕನ್ನು ಒಂದು ನಿರ್ದಿಷ್ಟ ಮಿತಿಯೊಳಗಿರಿಸಲು ಫೆಬ್ರುವರಿ 25ರಂದು ಹಲವಾರು ಹೊಸ ಕಾಯ್ದೆಗಳನ್ನು ಜಾರಿಗೊಳಿಸಲಾಗಿತ್ತು. ಈ ಹೊಸ ಕಾನೂನುಗಳಿಂದಾಗಿ ಈ ಜಾಲತಾಣಗಳು ಪ್ರಥಮ ಬಾರಿಗೆ ಸರ್ಕಾರದ ಮೇಲ್ವಿಚಾರಣೆ ವ್ಯಾಪ್ತಿಯಲ್ಲಿ ಬರುವಂತಾಗಿದೆ.

ಹೊಸ 2021 ಮಾಹಿತಿ ತಂತ್ರಜ್ಞಾನದ ( ಮಧ್ಯವರ್ತಿಗಳಿಗೆ ಮಾರ್ಗಸೂಚಿಗಳು ಮತ್ತು ಡಿಜಿಟಲ್ ಮೀಡಿಯಾ ನೀತಿ ಸಂಹಿತೆ) ಕಾನೂನುಗಳ ಪ್ರಕಾರ ಈ ಪ್ಲಾಟ್​ಫಾರ್ಮ್​ಗಳು; ಕಾನೂನುಗಳನ್ನು ಪಾಲಿಸುತ್ತಿರುವ ಬಗ್ಗೆ ಖಚಿತಪಡಿಸಿಕೊಳ್ಳಲು ಮುಖ್ಯ ಸಮನ್ವಯಾಧಿಕಾರಿ, ಕಾನೂನು ಎಜೆನ್ಸಿಗಳೊಂದಿಗೆ ಸಹಕರಿಸಲು ನೋಡಲ್ ಅಧಿಕಾರಿಗಳು ಮತ್ತು ಕುಂದು-ಕೊರತೆ ಅಧಿಕಾರಗಳನ್ನು ನೇಮಕ ಮಾಡಿಕೊಳ್ಳಬೇಕು. ಹಾಗೆಯೇ 50 ಲಕ್ಷಕ್ಕಿಂತ ಹೆಚ್ಚು ಫಾಲೋವರ್​ಗಳನ್ನು ಹೊಂದಿರುವ ಸಾಮಾಜಿಕ ಜಾಲತಾಣ ಸರ್ಕಾರದ ಮನವಿ ಮೇರೆಗೆ ಸುದ್ದಿಯೊಂದರ ಮೂಲ ಕರ್ತೃವನ್ನು ಗುರುತಿಸಲು ಶಕ್ತವಾಗಿರಬೇಕು.

ಇದನ್ನೂ ಓದಿ: ಮೋಹನ್​ ಭಾಗವತ್​ ಸೇರಿ ಆರ್​ಎಸ್​ಎಸ್​ನ ಪ್ರಮುಖ ನಾಯಕರ ಟ್ವಿಟರ್ ಖಾತೆಯ ಬ್ಲ್ಯೂಟಿಕ್ ಕೂಡ ಮಾಯ..!