ಸಮ್ಮತಿಯೊಂದಿಗೆ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸುವ ಮೊದಲು ಒಂದು ವರ್ಷ ಕಾಯುವಿಕೆ ಅಸಾಂವಿಧಾನಿಕ: ಕೇರಳ ಹೈಕೋರ್ಟ್

ಪರಸ್ಪರ ಒಪ್ಪಿಗೆಯಿಂದ ವಿಚ್ಛೇದನ (Divorce)ಕ್ಕೆ ಅರ್ಜಿ ಸಲ್ಲಿಸುವ ಮೊದಲು ಕನಿಷ್ಠ ಒಂದು ವರ್ಷದ ಪ್ರತ್ಯೇಕತೆಯನ್ನು ಕಡ್ಡಾಯಗೊಳಿಸಿದ ಕ್ರೈಸ್ತರಿಗೆ ಅನ್ವಯವಾಗುವ ವಿಚ್ಛೇದನ ಕಾಯ್ದೆ 1869 (Divorce act 1869)ರ ನಿಬಂಧನೆಯನ್ನು ಕೇರಳ ಹೈಕೋರ್ಟ್ (Kerala High Court) ರದ್ದುಗೊಳಿಸಿದೆ. ವಿಚ್ಛೇದನ ಕಾಯ್ದೆ, 1869 ರ ಸೆಕ್ಷನ್ 10 ಎ ಅಡಿಯಲ್ಲಿ ಪರಸ್ಪರ ಒಪ್ಪಿಗೆಯಿಂದ ವಿಚ್ಛೇದನ ಅರ್ಜಿಯನ್ನು ಸಲ್ಲಿಸಲು ಒಂದು ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಅವಧಿಯ ಅವಧಿಯನ್ನು ನಿಗದಿಪಡಿಸುವುದು ಮೂಲಭೂತ ಹಕ್ಕುಗಳನ್ನು ಉಲ್ಲಂಘಿಸುತ್ತದೆ ಮತ್ತು ಅಸಾಂವಿಧಾನಿಕವಾಗಿದೆ ಎಂದು ಕೇರಳ ಹೈಕೋರ್ಟ್‌ನ ವಿಭಾಗೀಯ ಪೀಠ ಶುಕ್ರವಾರ ಹೇಳಿದೆ. ಕಾಯ್ದೆಯು ಮೊದಲು ಎರಡು ವರ್ಷಗಳನ್ನು ಕಡ್ಡಾಯಗೊಳಿಸಿತ್ತು ಆದರೆ 2010 ರಲ್ಲಿ ಅದೇ ನ್ಯಾಯಾಲಯವು ಒಂದು ಪ್ರಕರಣದಲ್ಲಿ ಅದನ್ನು ಒಂದು ವರ್ಷಕ್ಕೆ ಇಳಿಸಿತ್ತು.

ಕೇಂದ್ರ ಸರ್ಕಾರವು ವೈವಾಹಿಕ ವಿವಾದಗಳಲ್ಲಿ ಸಂಗಾತಿಗಳ ಸಾಮಾನ್ಯ ಹಿತಾಸಕ್ತಿಯನ್ನು ಉತ್ತೇಜಿಸಲು ಭಾರತದಲ್ಲಿ ಏಕರೂಪದ ವಿವಾಹ ಸಂಹಿತೆಯನ್ನು ಗಂಭೀರವಾಗಿ ಪರಿಗಣಿಸಬೇಕು ಎಂದು ನ್ಯಾಯಮೂರ್ತಿಗಳಾದ ಎ. ಮುಹಮ್ಮದ್ ಮುಸ್ತಾಕ್ ಮತ್ತು ಶೋಬಾ ಅನ್ನಮ್ಮ ಈಪೆನ್ ಅವರಿದ್ದ ಪೀಠವು ಹೇಳಿದೆ.

ಇದನ್ನೂ ಓದಿ: ಕೇರಳದ ಪೊಲೀಸ್​ ತಮಿಳಿನ ‘ಮುಂಬೇ ವಾ’ ಹಾಡಿದ್ದಕ್ಕೆ ನೆಟ್ಟಿಗರೆಲ್ಲ ವಾಹ್​

30 ವರ್ಷದ ಯುವಕ ಮತ್ತು 28 ವರ್ಷದ ಯುವತಿ ಇದೇ ವರ್ಷದ ಜನವರಿಯಲ್ಲಿ ಮದುವೆಯಾಗಿದ್ದರು. ಆದರೆ ಮೇ 31ರಂದು ಪರಪಸ್ಪರ ಸಮ್ಮತಿ ಮೇರೆಗೆ ವಿಚ್ಛೇದನ ಕೋರಿ ಎರ್ನಾಕುಲಂನ ಕೌಟುಂಬಿಕ ನ್ಯಾಯಾಲಯದ ಮೊರೆ ಹೋಗಿದ್ದರು. ಆದರೆ ಸೆಕ್ಷನ್ 10 ಎ ಅಡಿಯಲ್ಲಿ ಮದುವೆಯ ನಂತರ ಒಂದು ವರ್ಷದೊಳಗೆ ಜಂಟಿ ಅರ್ಜಿಯನ್ನು ಸಲ್ಲಿಸುವ ನಿರ್ಬಂಧವನ್ನು ಗಮನಿಸಿ ಮದುವೆಯ ನಂತರ ಒಂದು ವರ್ಷದ ಪ್ರತ್ಯೇಕತೆಯು ಅತ್ಯಗತ್ಯ ಷರತ್ತಾಗಿದೆ ಎಂಬುದನ್ನು ಗಮನಿಸಿ ಕೋರ್ಟ್ ಅರ್ಜಿಯನ್ನು ತಿರಸ್ಕರಿಸಿತ್ತು.

ಹೀಗಾಗಿ ದಂಪತಿಗಳು ಸೆಕ್ಷನ್ 151 ರ ಅಡಿಯಲ್ಲಿ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದರು. ಅಲ್ಲದೆ, ಕಾಯ್ದೆಯ ಸೆಕ್ಷನ್ 10A (1) ಅಡಿಯಲ್ಲಿ ನಿಗದಿಪಡಿಸಲಾದ ಒಂದು ವರ್ಷದ ಕಾಯುವ ಅವಧಿಯು ಅಸಾಂವಿಧಾನಿಕ ಎಂದು ಘೋಷಿಸಲು ದಂಪತಿಗಳು ಮತ್ತೊಂದು ಅರ್ಜಿಯನ್ನು ಸಲ್ಲಿಸಿದರು. ಅರ್ಜಿಗಳನ್ನು ವಿವರವಾಗಿ ಪರಿಶೀಲಿಸಿದ ಹೈಕೋರ್ಟ್, ಪರಸ್ಪರ ಒಪ್ಪಿಗೆ ಮೇರೆಗೆ ವಿಚ್ಛೇದನ ಕೋರಿ ಅರ್ಜಿದಾರರು ಸಲ್ಲಿಸಿರುವ ಅರ್ಜಿಯನ್ನು ಎರಡು ವಾರಗಳಲ್ಲಿ ವಿಲೇವಾರಿ ಮಾಡುವಂತೆ ಕೌಟುಂಬಿಕ ನ್ಯಾಯಾಲಯಕ್ಕೆ ಸೂಚಿಸಿದೆ.

ಇದನ್ನೂ ಓದಿ: Vizhinjam Protest ವಿಝಿಞಂ ಬಂದರು ವಿರುದ್ಧ ನಡೆಯುತ್ತಿದ್ದ ಮುಷ್ಕರ ಹಿಂಪಡೆದ ಹೋರಾಟ ಸಮಿತಿ; ಬಂದರು ನಿರ್ಮಾಣ ನಿಲ್ಲಿಸುವುದಿಲ್ಲ ಎಂದ ಕೇರಳ ಸರ್ಕಾರ

ವಿಚ್ಛೇದನದ ಶಾಸನವು ವಿವಾದಕ್ಕಿಂತ ಹೆಚ್ಚಾಗಿ ದಂಪತಿಗಳ ಮೇಲೆ ಕೇಂದ್ರೀಕರಿಸಬೇಕು ಎಂದು ನ್ಯಾಯಾಲಯ ಹೇಳಿದೆ. ವೈವಾಹಿಕ ವಿವಾದಗಳಲ್ಲಿ ನ್ಯಾಯಾಲಯದ ನೆರವಿನೊಂದಿಗೆ ಭಿನ್ನಾಭಿಪ್ರಾಯಗಳನ್ನು ಪರಿಹರಿಸಲು ಕಾನೂನು ಸಹಾಯ ಮಾಡಬೇಕು. ಪರಿಹಾರವು ಸಾಧ್ಯವಾಗದಿದ್ದರೆ ದಂಪತಿಗಳಿಗೆ ಯಾವುದು ಉತ್ತಮ ಎಂದು ನಿರ್ಧರಿಸಲು ಕಾನೂನು ಅನುಮತಿಸಬೇಕು. ಸೆಕ್ಷನ್ 10ಎ ಅಡಿಯಲ್ಲಿ ನಿಗದಿಪಡಿಸಿದಂತೆ ಒಂದು ವರ್ಷದ ಪ್ರತ್ಯೇಕತೆಯ ಕನಿಷ್ಠ ಅವಧಿಯನ್ನು ನಿಗದಿಪಡಿಸುವುದು ಮೂಲಭೂತ ಹಕ್ಕನ್ನು ಉಲ್ಲಂಘಿಸುತ್ತದೆ ಎಂದು ಕೋರ್ಟ್ ಹೇಳಿದೆ.

ಕಾಯುವ ಅವಧಿಯು ಇಬ್ಬರಿಗೂ ಕಷ್ಟವನ್ನು ಉಂಟುಮಾಡುತ್ತದೆ. ಇಬ್ಬರಿಗೂ ಯಾತನೆ ಅನುಭವಿಸಲು ಕಾನೂನು ಅವಕಾಶ ಕೊಡಬಹುದೇ ಎಂದು ನ್ಯಾಯಾಲಯವು ಕೇಳಿದೆ. ಜಾತ್ಯತೀತ ದೇಶದಲ್ಲಿ ಕಾನೂನು ವಿಧಾನವು ಧರ್ಮವನ್ನು ಆಧರಿಸಿರುವುದಕ್ಕಿಂತ ನಾಗರಿಕರ ಸಾಮಾನ್ಯ ಒಳಿತಿನ ಮೇಲೆ ಇರಬೇಕು ಎಂದು ಕೋರ್ಟ್ ಅಭಿಪ್ರಾಯ ವ್ಯಕ್ತಪಡಿಸಿದೆ.

ಮತ್ತಷ್ಟು ದೇಶದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ