ಕೇವಲ 32 ರನ್‌ಗಳಿಗೆ ಆಲೌಟ್..! ಟಿ20 ಪಂದ್ಯದಲ್ಲಿ 132 ರನ್ಗಳ ಹೀನಾಯ ಸೋಲುಂಡ ಬಾಂಗ್ಲಾ ತಂಡ
NZ Vs BAN: ಬಾಂಗ್ಲಾದೇಶ ಪರ ದಾಖಲಾದ ಅತಿ ಹೆಚ್ಚು ಸ್ಕೋರ್ ಎಂದರೆ ಅದು ಕೇವಲ 6 ರನ್ ಮಾತ್ರ. ಇನ್ನುಳಿದಂತೆ ಮೂವರು ಬ್ಯಾಟರ್ಗಳು ತಮ್ಮ ಖಾತೆಯನ್ನು ಸಹ ತೆರೆಯಲಿಲ್ಲ.
ನ್ಯೂಜಿಲೆಂಡ್ ಹಾಗೂ ಬಾಂಗ್ಲಾದೇಶ ನಡುವೆ ಮೊದಲ ಬಾರಿಗೆ ಮಹಿಳಾ ಟಿ 20 ಸರಣಿಯನ್ನು ಆಡಲಾಗುತ್ತಿದೆ. ಕ್ರೈಸ್ಟ್‌ಚರ್ಚ್‌ನಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಬಾಂಗ್ಲಾ ಮಹಿಳಾ ತಂಡ ಅತಿಥೇಯ ನ್ಯೂಜಿಲೆಂಡ್ ಎದುರು 132 ರನ್ಗಳ ಹೀನಾಯ ಸೋಲು ಕಂಡಿದೆ.
ಈ ಪಂದ್ಯದಲ್ಲಿ ಮೊದಲ ಬ್ಯಾಟ್ ಮಾಡಿದ ಕಿವೀಸ್ ತಂಡ ನಿಗದಿತ 20 ಓವರ್ಗಳಲ್ಲಿ 3 ವಿಕೆಟ್‌ಗಳ ನಷ್ಟಕ್ಕೆ 164 ರನ್ ಗಳಿಸಿತು. ತಂಡದ ಪರ ಕ್ಯಾಪ್ಟನ್ ಸೋಫಿ ಡಿವೈನ್ 34 ಎಸೆತಗಳಲ್ಲಿ 45 ರನ್ ಗಳಿಸಿದರೆ, ಮ್ಯಾಡಿ ಗ್ರೀನ್ ಅಜೇಯ ಇನ್ನಿಂಗ್ಸ್ ಆಡಿದ್ದು 23 ಎಸೆತಗಳಲ್ಲಿ 36 ರನ್ ಗಳಿಸಿದರು.
ಅನನುಭವಿ ಬಾಂಗ್ಲಾದೇಶ ತಂಡಕ್ಕೆ ಈ ಗುರಿ ಕಠಿಣವಾಗಿತ್ತು ಎಂಬುದು ಪಂದ್ಯ ಆರಂಭವಾದ ಕೆಲವೇ ಸಮಯದಲ್ಲಿ ಬಹಿರಂಗವಾಯಿತು. ಈ ಗುರಿ ಬೆನ್ನಟ್ಟಿದ ಬಾಂಗ್ಲಾ ತಂಡದ ಎಲ್ಲಾ ಆಟಗಾರರು 89 ಎಸೆತಗಳಲ್ಲಿ ಕೇವಲ 32 ರನ್ ಗಳಿಸಲಷ್ಟೇ ಶಕ್ತರಾದರು.
ಬಾಂಗ್ಲಾದೇಶ ಪರ ದಾಖಲಾದ ಅತಿ ಹೆಚ್ಚು ಸ್ಕೋರ್ ಎಂದರೆ ಅದು ಕೇವಲ 6 ರನ್ ಮಾತ್ರ. ಇನ್ನುಳಿದಂತೆ ಮೂವರು ಬ್ಯಾಟರ್ಗಳು ತಮ್ಮ ಖಾತೆಯನ್ನು ಸಹ ತೆರೆಯಲಿಲ್ಲ. ನ್ಯೂಜಿಲೆಂಡ್ ಪರ ಲೇಹ್ ತಾಹುಹು 4 ಓವರ್ಗಳಲ್ಲಿ ಕೇವಲ 6 ರನ್ ನೀಡಿ 4 ವಿಕೆಟ್ ಪಡೆದು ಮಿಂಚಿದರು.
ಈ ಉಭಯ ತಂಡಗಳ ನಡುವಿನ ಎರಡನೇ ಟಿ20 ಪಂದ್ಯ ನಾಳೆ ಅಂದರೆ, ಡಿ.4ರಂದು ನಡೆಯಲಿದೆ. ಈ ಪಂದ್ಯ ಬೆಳಿಗ್ಗೆ 6.30 ಗಂಟೆಗೆ ಆರಂಭವಾಗಲಿದೆ.
Published On - 12:38 pm, Sat, 3 December 22