IPL 2024: ಐಪಿಎಲ್ನಲ್ಲಿ ಮಹತ್ವದ ಬದಲಾವಣೆ: 2 ಹೊಸ ನಿಯಮ ಜಾರಿ
IPL 2024: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಲ್ 2024) ಸೀಸನ್ 17 ಶುಕ್ರವಾರದಿಂದ ಶುರುವಾಗಲಿದೆ. ಚೆನ್ನೈನಲ್ಲಿ ನಡೆಯಲಿರುವ ಐಪಿಎಲ್ನ ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಸಿಎಸ್ಕೆ ವಿರುದ್ಧ ಆರ್ಸಿಬಿ ತಂಡ ಕಣಕ್ಕಿಳಿಯಲಿದೆ. ಈ ಪಂದ್ಯದೊಂದಿಗೆ ಐಪಿಎಲ್ನಲ್ಲಿ ಎರಡು ಹೊಸ ನಿಯಮಗಳು ಜಾರಿಗೆ ಬರಲಿದೆ. ಆ ನಿಯಮಗಳ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2024) ಸೀಸನ್-17 ರಲ್ಲಿ ಎರಡು ಹೊಸ ನಿಯಮಗಳು ಜಾರಿಗೆ ಬರಲಿದೆ. ಈ ನಿಯಮಗಳಿಂದ ಅಂಪೈರ್‌ಗಳು ಮತ್ತು ಬೌಲರ್‌ಗಳು ಮತ್ತಷ್ಟು ನಿರಾಳರಾಗಲಿರುವುದು ವಿಶೇಷ. ಹಾಗಿದ್ರೆ ಈ ಬಾರಿಯ ಐಪಿಎಲ್ನಲ್ಲಿ ಜಾರಿಗೆ ಬರಲಿರುವ ಹೊಸ ರೂಲ್ಸ್ಗಳು ಯಾವುದೆಂದು ತಿಳಿಯೋಣ...
1- SRS ನಿಯಮ: ಈ ಬಾರಿಯ ಐಪಿಎಲ್ನಲ್ಲಿ ಡಿಸಿಷನ್ ರಿವ್ಯೂ ಸಿಸ್ಟಂ (DRS) ತೀರ್ಪಿನಲ್ಲಿನ ಲೋಪದೋಷಗಳನ್ನು ಸರಿಪಡಿಸಲು ಸ್ಮಾರ್ಟ್ ರಿಪ್ಲೇ ಸಿಸ್ಟಂ (SRS) ಪರಿಚಯಿಸಲಾಗುತ್ತಿದೆ. ಎಸ್ಆರ್ಎಸ್ ನಿಯಮದ ಜಾರಿಯಿಂದ ಈ ಬಾರಿಯ ಐಪಿಎಲ್ನಲ್ಲಿ ಮೂರನೇ ಅಂಪೈರ್ ತೀರ್ಪು ಮತ್ತಷ್ಟು ನಿಖರವಾಗಿರಲಿದೆ. ಏಕೆಂದರೆ ಇದಕ್ಕಾಗಿ ಮೈದಾನದಲ್ಲಿ ಒಟ್ಟು 8 ಹಾಕ್-ಐ ಕ್ಯಾಮೆರಾಗಳನ್ನು ಇಡಲಿದ್ದು, ಈ ಮೂಲಕ ಮೈದಾನದಲ್ಲಿನ ಪ್ರತಿ ಸನ್ನಿವೇಶವನ್ನು ಚಿತ್ರೀಕರಿಸಲಾಗುತ್ತದೆ. ಅಲ್ಲದೆ ಹಾಕ್-ಐ ಅಪರೇಟ್ಗಳ ನೆರವಿನಿಂದ ಸ್ಪಷ್ಟ ಚಿತ್ರಣದೊಂದಿಗೆ ಮೂರನೇ ಅಂಪೈರ್ ತಕ್ಷಣವೇ ತೀರ್ಪು ಪ್ರಕಟಿಸಲಿದ್ದಾರೆ.
ಸ್ಮಾರ್ಟ್ ರಿಪ್ಲೇ ಸಿಸ್ಟಂ ಅನುಕೂಲವೇನು?: ಸ್ಮಾರ್ಟ್ ರಿಪ್ಲೇ ಸಿಸ್ಟಂ ಬಳಕೆಯಿಂದ ಮೂರನೇ ಅಂಪೈರ್ ಹಲವು ಆ್ಯಂಗಲ್ನಿಂದ ವಿಡಿಯೋವನ್ನು ಪರಿಶೀಲಿಸಬಹುದು. ಅಂದರೆ ಇಲ್ಲಿ ಹಾಕ್-ಐ ಆಪರೇಟರ್ಗಳು ಸ್ಪ್ಲಿಟ್-ಸ್ಕ್ರೀನ್ಗಳನ್ನು ಬಳಸಲಿದ್ದಾರೆ. ಇದರಿಂದ ತಕ್ಷಣವೇ ತೀರ್ಪು ನೀಡಲು ಆಯಾ ಸನ್ನಿವೇಶದ ಸ್ಕ್ರೀನ್ನ ನೆರವು ಪಡೆಯಬಹುದು.
ಉದಾಹರಣೆಗೆ, ಬೌಂಡರಿ ಲೈನ್ನಲ್ಲಿ ಫೀಲ್ಡರ್ ಕ್ಯಾಚ್ ಹಿಡಿದಿದ್ದಾರೆ ಎಂದಿಟ್ಟುಕೊಳ್ಳಿ. ಈ ವೇಳೆ ಫೀಲ್ಡರ್ನ ಕಾಲು ಬೌಂಡರಿ ಲೈನ್ಗೆ ತಾಗಿದೆಯಾ ಇಲ್ಲವಾ ಎಂದು ತಿಳಿದುಕೊಳ್ಳಲು, ತಕ್ಷಣವೇ ಕಾಲಿನ ಭಾಗದ ವಿಡಿಯೋವನ್ನು ಸ್ಪ್ಲಿಟ್ ಸ್ಕ್ರೀನ್ನಲ್ಲಿ ಪರಿಶೀಲಿಸಬಹುದು. ಅಲ್ಲದೆ ಪಾದದ ಯಾವ ಭಾಗ ಬೌಂಡರಿ ಲೈನ್ಗೆ ತಾಗಿದೆ ಎಂಬುದರ ತುಣುಕಿನ ಭಾಗದೊಂದಿಗೆ ಸ್ಪಷ್ಟ ತೀರ್ಪು ನೀಡಲು ಸಾಧ್ಯವಾಗಲಿದೆ.
2- ಬೌನ್ಸರ್ ನಿಯಮ: ಈ ಬಾರಿಯ ಐಪಿಎಲ್ನಲ್ಲಿ ಒಂದೇ ಓವರ್‌ನಲ್ಲಿ 2 ಬೌನ್ಸರ್‌ಗಳನ್ನು ಎಸೆಯುವ ಅವಕಾಶ ಇರಲಿದೆ. ಈ ಹಿಂದೆ ಒಂದು ಓವರ್‌ನಲ್ಲಿ ಕೇವಲ 1 ಬೌನ್ಸರ್ ಮಾತ್ರ ಎಸೆಯಬಹುದಿತ್ತು. ಇದೀಗ ಐಪಿಎಲ್ಗಾಗಿ ಈ ನಿಯಮವನ್ನು ಬದಲಿಸಲಾಗಿದ್ದು, ಈ ಮೂಲಕ ಒಂದು ಓವರ್‌ನಲ್ಲಿ ಎರಡು ಬೌನ್ಸರ್‌ಗಳನ್ನು ಬೌಲ್ ಮಾಡಲು ಅವಕಾಶ ನೀಡಲಾಗುತ್ತದೆ.
ಎರಡು ಬೌನ್ಸರ್ ನಿಯಮದ ಜಾರಿಯಿಂದ ಬೌಲರ್‌ಗಳು ಹೆಚ್ಚಿನ ಅನುಕೂಲ ಪಡೆಯಲಿದ್ದಾರೆ. ಈ ಹಿಂದೆ ಒಂದು ಓವರ್‌ನಲ್ಲಿ ಒಂದೇ ಬೌನ್ಸರ್ ಎಸೆಯಲು ಮಾತ್ರ ಅವಕಾಶವಿತ್ತು. 2ನೇ ಬೌನ್ಸರ್ ಅನ್ನು ಅಂಪೈರ್ ನೋ ಬಾಲ್ ಎಂದು ಪರಿಗಣಿಸುತ್ತಿದ್ದರು. ಇದೀಗ ಒಂದು ಓವರ್‌ನಲ್ಲಿ 2 ಬೌನ್ಸರ್ಗಳು ಇರುವುದರಿಂದ ಬ್ಯಾಟ್ಸ್ಮನ್ನ ಚಿಂತೆ ಹೆಚ್ಚಾಗಲಿದೆ.
ಏಕೆಂದರೆ ಈ ಹಿಂದೆ ಒಂದು ಬೌನ್ಸರ್ ಮುಗಿದ ಬಳಿಕ ಮತ್ತೆ ಬೌನ್ಸರ್ ಎಸೆಯುವುದಿಲ್ಲ ಎಂಬುದು ಬ್ಯಾಟರ್ಗಳಿಗೆ ಗೊತ್ತಿರುತ್ತಿತ್ತು. ಆದರೆ ಈ ಬಾರಿ 6 ಎಸೆತಗಳಲ್ಲಿ 2 ಬೌನ್ಸರ್ ಇರುವುದರಿಂದ ಬೌಲರ್‌ಗಳು ಪರಿಸ್ಥಿತಿಗೆ ತಕ್ಕಂತೆ ಬೌನ್ಸರ್ ಪ್ರಯೋಗಿಸಲಿದ್ದಾರೆ. ಹೀಗಾಗಿ ಅಂತಿಮ ಓವರ್ಗಳ ವೇಳೆ ಪಂದ್ಯವು ರೋಚಕತೆ ಪಡೆಯಲಿರುವುದನ್ನು ನಿರೀಕ್ಷಿಸಬಹುದು.