ಏಕದಿನ ವಿಶ್ವಕಪ್ ಟ್ರೋಫಿ ಬಗ್ಗೆ ನಿಮಗೆಷ್ಟು ಗೊತ್ತು? ಇಲ್ಲಿದೆ ಇಂಟ್ರೆಸ್ಟಿಂಗ್ ಮಾಹಿತಿ
ICC World Cup 2023: ಏಕದಿನ ವಿಶ್ವಕಪ್ನ ಫೈನಲ್ ಪಂದ್ಯವು ನವೆಂಬರ್ 19 ರಂದು ಭಾನುವಾರ ನಡೆಯಲಿದೆ. ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಫೈನಲ್ ಫೈಟ್ನಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ಮುಖಾಮುಖಿಯಾಗಲಿದೆ.
ಕ್ರಿಕೆಟ್ ಅಂಗಳದ ಮಹಾಸಮರ ಏಕದಿನ ವಿಶ್ವಕಪ್ನ ಫೈನಲ್ ಫೈಟ್ಗಾಗಿ ಕ್ಷಣಗಣನೆ ಶುರುವಾಗಿದೆ. ಭಾನುವಾರ ಅಹಮದಾಬಾದ್ನಲ್ಲಿ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಭಾರತ-ಆಸ್ಟ್ರೇಲಿಯಾ ಮುಖಾಮುಖಿಯಾಗಲಿದೆ. ಈ ಪಂದ್ಯದಲ್ಲಿ ಗೆಲ್ಲುವ ತಂಡ ಅತ್ಯಾಕರ್ಷಕ ಟ್ರೋಫಿಯನ್ನು ಎತ್ತಿ ಹಿಡಿಯಲಿದೆ. ಈ ಟ್ರೋಫಿ ಕುರಿತಾದ ಆಸಕ್ತಿದಾಯಕ ಸಂಗತಿಗಳು ಈ ಕೆಳಗಿನಂತಿದೆ...
ಏಕದಿನ ವಿಶ್ವಕಪ್ 1975 ರಲ್ಲಿ ಶುರುವಾಗಿದ್ದರೂ, ಅಧಿಕೃತ ಟ್ರೋಫಿಯನ್ನು ವಿನ್ಯಾಸಗೊಳಿಸಿದ್ದು 1999 ರಲ್ಲಿ. ಅಂದರೆ 1975-1996 ರ ನಡುವೆ ನಡೆದ 6 ವರ್ಲ್ಡ್ಕಪ್ನಲ್ಲಿ ವಿಭಿನ್ನ ವಿನ್ಯಾಸದ ಟ್ರೋಫಿಗಳನ್ನು ನೀಡಲಾಗಿತ್ತು. 1999 ರ ವಿಶ್ವಕಪ್ನಲ್ಲಿ ಐಸಿಸಿ ವರ್ಲ್ಡ್ಕಪ್ ಟ್ರೋಫಿಯನ್ನು ವಿನ್ಯಾಸಗೊಳಿಸಿ, ಅದನ್ನು ಅಧಿಕೃತಗೊಳಿಸಿತು.
ಪ್ರಸ್ತುತ ಕ್ರಿಕೆಟ್ ವಿಶ್ವಕಪ್ ಟ್ರೋಫಿಯನ್ನು ವಿನ್ಯಾಸಗೊಳಿಸಿದ್ದು ಲಂಡನ್ನ ಗೆರಾರ್ಡ್ ಮತ್ತು ಕಂಪೆನಿ. ಅದರಂತೆ ಕಳೆದ 24 ವರ್ಷಗಳಿಂದ ಏಕದಿನ ವಿಶ್ವಕಪ್ ಟ್ರೋಫಿಯಾಗಿ ಇದನ್ನೇ ಬಳಸಲಾಗಿದೆ.
ಏಕದಿನ ವಿಶ್ವಕಪ್ ಟ್ರೋಫಿಯ ಎತ್ತರ 65 ಸೆಂಟಿಮೀಟರ್. ಅಲ್ಲದೆ ಇದರ ಮಧ್ಯ ಭಾಗದಲ್ಲಿ ವಿಶ್ವವನ್ನು ಸಾರುವ ಹಾಗೂ ಚೆಂಡನ್ನು ಪ್ರತಿನಿಧಿಸುವ ಗೋಲಾಕಾರವನ್ನು ನೀಡಿರುವುದು ವಿಶೇಷ.
ಇನ್ನು ವಿಶ್ವಕಪ್ ಗೆದ್ದಾಗ ಮೂಲ ಟ್ರೋಫಿಯನ್ನು ನೀಡಲಾಗುತ್ತದೆ. ಇದಾದ ಬಳಿಕ ಗೆದ್ದ ತಂಡಕ್ಕೆ ಅದೇ ಮಾದರಿಯಲ್ಲಿ ಪ್ರತಿರೂಪದ ಟ್ರೋಫಿ ನೀಡಲಾಗುತ್ತದೆ. ಅಲ್ಲದೆ ಮೂಲ ಟ್ರೋಫಿಯನ್ನು ಯುಎಇಯಲ್ಲಿರುವ ಐಸಿಸಿಯ ಪ್ರಧಾನ ಕಛೇರಿಗೆ ಹಿಂತಿರುಗಿಸಲಾಗುತ್ತದೆ.