IND vs WI: ರನ್ ಗಳಿಸಬೇಡ ಅಷ್ಟೇ… ಸಿರಾಜ್ ವಾರ್ನಿಂಗ್..!
India vs West Indies, 2nd Test: ವೆಸ್ಟ್ ಇಂಡೀಸ್ ವಿರುದ್ಧದ ಎರಡನೇ ಟೆಸ್ಟ್ ಪಂದ್ಯ ಗೆಲ್ಲಲು ಟೀಮ್ ಇಂಡಿಯಾಗೆ ಕೇವಲ 58 ರನ್ಗಳ ಅವಶ್ಯಕತೆಯಿದೆ. ನಾಲ್ಕನೇ ದಿನದಾಟದ ಅಂತ್ಯಕ್ಕೆ ಭಾರತ ತಂಡವು 1 ವಿಕೆಟ್ ಕಳೆದುಕೊಂಡು 63 ರನ್ಗಳಿಸಿದ್ದು, ಐದನೇ ದಿನದಾಟದಲ್ಲಿ ಕೆಎಲ್ ರಾಹುಲ್ ಹಾಗೂ ಸಾಯಿ ಸುದರ್ಶನ್ ಬ್ಯಾಟಿಂಗ್ ಮುಂದುವರೆಸಲಿದ್ದಾರೆ.
ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಣ 2ನೇ ಟೆಸ್ಟ್ ಪಂದ್ಯವು ಮುಕ್ತಾಯದ ಹಂತಕ್ಕೆ ಬಂದು ನಿಂತಿದೆ. ನಾಲ್ಕನೇ ದಿನದಾಟದಲ್ಲೇ ಮುಗಿಯಬೇಕಿದ್ದ ಈ ಪಂದ್ಯವನ್ನು ಐದನೇ ದಿನದಾಟಕ್ಕೆ ಕೊಂಡೊಯ್ದ ಶ್ರೇಯಸ್ಸು ವೆಸ್ಟ್ ಇಂಡೀಸ್ನ ಜಸ್ಟಿನ್ ಗ್ರೀವ್ಸ್ಗೆ ಸಲ್ಲಬೇಕು. ಇದೇ ಕಾರಣದಿಂದಾಗಿ ಸಿರಾಜ್ ಗ್ರೀವ್ಸ್ ಅವರಿಗೆ ವಾರ್ನಿಂಗ್ ನೀಡಿದ ಸ್ವಾರಸ್ಯಕರ ಘಟನೆ ಕೂಡ ನಡೆದಿದೆ.
ಈ ಪಂದ್ಯದ ದ್ವಿತೀಯ ಇನಿಂಗ್ಸ್ನಲ್ಲಿ 7ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಜಸ್ಟಿನ್ ಗ್ರೀವ್ಸ್ ಭಾರತೀಯ ಬೌಲರ್ಗಳ ವಿರುದ್ಧ ಸೆಟೆದು ನಿಂತಿದರು. ಪರಿಣಾಮ 311 ರನ್ಗಳಿಗೆ ಆಲೌಟ್ ಆಗಬೇಕಿದ್ದ ವೆಸ್ಟ್ ಇಂಡೀಸ್ ತಂಡವು ಅಂತಿಮ ವಿಕೆಟ್ಗೆ ಬರೋಬ್ಬರಿ 89 ರನ್ ಕಲೆಹಾಕಿತು. ಇತ್ತ ಗ್ರೀವ್ಸ್ ವಿಕೆಟ್ ಪಡೆಯಲು ಮೊಹಮ್ಮದ್ ಸಿರಾಜ್ ಕೂಡ ಹರಸಾಹಸ ಪಟ್ಟಿದ್ದರು.
ಅದರಲ್ಲೂ ಟೀ ಬ್ರೇಕ್ ವೇಳೆ ಮೊಹಮ್ಮದ್ ಸಿರಾಜ್ ಜಸ್ಟಿನ್ ಗ್ರೀವ್ಸ್ ಬಳಿ ಹೋಗಿ ರನ್ ಗಳಿಸಬೇಡ, ಔಟಾಗು ಎಂದು ತಮಾಷೆಗೆ ಎಚ್ಚರಿಕೆ ನೀಡುತ್ತಿರುವುದು ಕಂಡು ಬಂತು. ಸಿರಾಜ್ ಮಾತಿಗೆ ಗ್ರೀವ್ಸ್ ನಗುವಿನ ಉತ್ತರ ನೀಡಿದರು. ಇದಾಗ್ಯೂ ಜಸ್ಟಿನ್ ಗ್ರೀವ್ಸ್ ವಿಕೆಟ್ ಪಡೆಯಲು ಟೀಮ್ ಇಂಡಿಯಾಗೆ ಸಾಧ್ಯವಾಗಲೇ ಇಲ್ಲ.
ಈ ಪಂದ್ಯದ ಸೆಕೆಂಡ್ ಇನಿಂಗ್ಸ್ನ ಅಂತಿಮ ಹಂತದಲ್ಲಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ ಜಸ್ಟಿನ್ ಗ್ರೀವ್ಸ್ 85 ಎಸೆತಗಳನ್ನು ಎದುರಿಸಿ 3 ಫೋರ್ಗಳೊಂದಿಗೆ ಅಜೇಯ 50 ರನ್ ಬಾರಿಸಿದರು. ಈ ಅರ್ಧಶತಕದ ನೆರವಿನೊಂದಿಗೆ ವೆಸ್ಟ್ ಇಂಡೀಸ್ ತಂಡವು ದ್ವಿತೀಯ ಇನಿಂಗ್ಸ್ನಲ್ಲಿ 390 ರನ್ಗಳಿಸಿ ಆಲೌಟ್ ಆಗಿದೆ.
ಮೊದಲ ಇನಿಂಗ್ಸ್ನಲ್ಲಿನ 270 ರನ್ಗಳ ಮುನ್ನಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ನಲ್ಲಿ 121 ರನ್ಗಳ ಗುರಿ ಪಡೆದಿರುವ ಟೀಮ್ ಇಂಡಿಯಾ ನಾಲ್ಕನೇ ದಿನದಾಟದ ಅಂತ್ಯಕ್ಕೆ 1 ವಿಕೆಟ್ ಕಳೆದುಕೊಂಡು 63 ರನ್ ಕಲೆಹಾಕಿದೆ. ಇನ್ನು ಕೊನೆಯ ದಿನದಾಟದಲ್ಲಿ 58 ರನ್ಗಳಿಸಿದರೆ ಟೀಮ್ ಇಂಡಿಯಾ ಜಯಿಸಲಿದೆ.