ರಾಹುಲ್ ದ್ರಾವಿಡ್ ಗರಡಿ ಹುಡುಗನ ಆರ್ಭಟ: ಎದುರಾಳಿ ತಂಡ 69 ರನ್ಗೆ ಆಲೌಟ್
Rahul dravid-Armaan Jaffer: ಬಾಂಗ್ಲಾದೇಶದಲ್ಲಿ ನಡೆದ 19 ವರ್ಷದೊಳಗಿನವರ ವಿಶ್ವಕಪ್‌ನಲ್ಲಿ ಟೀಮ್ ಇಂಡಿಯಾ ಸದಸ್ಯರಾಗಿದ್ದರು. ಆ ವೇಳೆ ತಂಡದ ಕೋಚ್ ಆಗಿದ್ದವರು ರಾಹುಲ್ ದ್ರಾವಿಡ್.
ದಿ ಲೆಜೆಂಡ್ ರಾಹುಲ್ ದ್ರಾವಿಡ್ ಗರಡಿಯಲ್ಲಿ ಪಳಗಿದ ಹಲವು ಆಟಗಾರರು ಈಗಾಗಲೇ ಟೀಮ್ ಇಂಡಿಯಾವನ್ನು ಪ್ರತಿನಿಧಿಸಿದ್ದಾರೆ. ಇನ್ನು ಕೆಲವರು ಐಪಿಎಲ್ನಲ್ಲಿ ಸಂಚಲನ ಸೃಷ್ಟಿಸುತ್ತಿದ್ದಾರೆ. ಇದೀಗ ಈ ಪಟ್ಟಿಗೆ ಮತ್ತೋರ್ವ ಯುವ ಆಟಗಾರ ಕೂಡ ಸೇರ್ಪಡೆಯಾಗಿದ್ದಾರೆ. ಆತನ ಹೆಸರು ಅರ್ಮಾನ್ ಜಾಫರ್.
ಮಸ್ಕತ್ನಲ್ಲಿ ಓಮಾನ್ ಹಾಗೂ ಮುಂಬೈ ನಡುವೆ ಏಕದಿನ ಸರಣಿ ನಡೆಯುತ್ತಿದೆ. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಮುಂಬೈ ತಂಡವು ಭರ್ಜರಿ ಪ್ರದರ್ಶನ ನೀಡಿತು. ಆರಂಭದಲ್ಲೇ ಓಪನರ್ ಯಶಸ್ವಿ ಜೈಸ್ವಾಲ್ (27) ಮತ್ತು ಡ್ರೂ ಗೊಮೆಲ್ (05) ಅವರ ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ತಂಡಕ್ಕೆ ಯುವ ಬ್ಯಾಟ್ಸ್ಮನ್ ಅರ್ಮಾನ್ ಜಾಫರ್ ಆಸರೆಯಾದರು. 22 ವರ್ಷದ ಬಲಗೈ ಬ್ಯಾಟ್ಸ್ಮನ್ ಓಮಾನ್ ಬೌಲರ್‌ಗಳನ್ನು ಅನಾಯಾಸವಾಗಿ ಎದುರಿಸಿದರು. ಅಲ್ಲದೆ ಚಿನ್ಮಯ್ ಸುತಾರ್ (37) ಜೊತೆಗೂಡಿ ಮೂರನೇ ವಿಕೆಟ್ಗೆ 63 ರನ್ಗಳ ಜೊತೆಯಾಟವಾಡಿದರು. ಬಳಿಕ ಮತ್ತೋರ್ವ ಯುವ ಬ್ಯಾಟರ್ ಸುಜಿತ್ ನಾಯಕ್ ಜೊತೆ ಪಾಟರ್ನರ್ಶಿಪ್ ಮುಂದುವರೆಸಿದ ಅರ್ಮಾನ್ 6ನೇ ವಿಕೆಟ್ಗೆ 122 ರನ್ ಕಲೆಹಾಕಿದರು.
114 ಎಸೆತಗಳನ್ನು ಎದುರಿಸಿದ ಅರ್ಮಾನ್ ಜಾಫರ್ 122 ರನ್ ಬಾರಿಸಿದರು. ಈ ಇನಿಂಗ್ಸ್ನಲ್ಲಿ ಯುವ ಬ್ಯಾಟ್ಸ್ಮನ್ ಬ್ಯಾಟ್ನಿಂದ 11 ಬೌಂಡರಿ ಹಾಗೂ 3 ಸಿಕ್ಸರ್ಗಳು ಮೂಡಿಬಂತು. ಮತ್ತೊಂದೆಡೆ ಸುಜಿತ್ ನಾಯಕ್ 70 ಎಸೆತಗಳಲ್ಲಿ ಅಜೇಯ 73 ರನ್ ಗಳಿಸಿದರು. ಪರಿಣಾಮ ನಿಗದಿತ 50 ಓವರ್ನಲ್ಲಿ ಮುಂಬೈ ತಂಡದ ಮೊತ್ತವು 300ಕ್ಕೆ ಬಂದು ನಿಂತಿತು.
ಈ ಬೃಹತ್ ಮೊತ್ತವನ್ನು ಬೆನ್ನತ್ತಿದ ಓಮಾನ್ ರಾಷ್ಟ್ರೀಯ ತಂಡವು ಕೇವಲ 69 ರನ್ ಗಳಿಗೆ ಆಲೌಟಾದರು. ಕೇವಲ 22.5 ಓವರ್‌ಗಳವರೆಗೆ ಮಾತ್ರ ಬ್ಯಾಟ್ ಬೀಸಿದ್ದ ಓಮಾನ್ನ ತಂಡದ 9 ಆಟಗಾರರು ಎರಡಂಕಿಯ ಮೊತ್ತವನ್ನು ಸಹ ದಾಖಲಿಸಿಲ್ಲ ಎಂಬುದು ವಿಶೇಷ. ಇನ್ನು ಮುಂಬೈ ಪರ ಮೋಹಿತ್ ಅವಸ್ತಿ (31 ಕ್ಕೆ 4) ಮತ್ತು ದೀಪಕ್ ಶೆಟ್ಟಿ (2 ಕ್ಕೆ 9) ವಿಕೆಟ್ ಉರುಳಿಸಿ ಮಿಂಚಿದರು.
ರಾಹುಲ್ ದ್ರಾವಿಡ್ ಶಿಷ್ಯ: ಅರ್ಮಾನ್ ಜಾಫರ್ 2016 ರಲ್ಲಿ ಬಾಂಗ್ಲಾದೇಶದಲ್ಲಿ ನಡೆದ 19 ವರ್ಷದೊಳಗಿನವರ ವಿಶ್ವಕಪ್‌ನಲ್ಲಿ ಟೀಮ್ ಇಂಡಿಯಾ ಸದಸ್ಯರಾಗಿದ್ದರು. ಆ ವೇಳೆ ತಂಡದ ಕೋಚ್ ಆಗಿದ್ದವರು ರಾಹುಲ್ ದ್ರಾವಿಡ್. ದ್ರಾವಿಡ್ ಅವರ ಗರಡಿಯಲ್ಲಿ ಪಳಗಿದ್ದ ಯುವ ಆಟಗಾರ ಏಕದಿನ ಕ್ರಿಕೆಟ್ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಾ ಬಂದಿದ್ದಾರೆ. ಅಲ್ಲದೆ ರಾಹುಲ್ ದ್ರಾವಿಡ್ ಅವರ ಸಲಹೆಯಂತೆ ನಾನು ಆಟದಲ್ಲಿ ಶಿಸ್ತು ಹಾಗೂ ಕಲಾತ್ಮಕತೆಯನ್ನು ಕಂಡುಕೊಂಡಿದ್ದೇನೆ.
ನನ್ನೆಲ್ಲಾ ಪ್ರದರ್ಶನದ ಶ್ರೇಯಸ್ಸು ದ್ರಾವಿಡ್ ಅವರಿಗೆ ಸಲ್ಲುತ್ತದೆ ಎಂದು ಅರ್ಮಾನ್ ಈ ಹಿಂದೆ ಸಂದರ್ಶನವೊಂದರಲ್ಲಿ ತಿಳಿಸಿದ್ದರು. ಅಂದಹಾಗೆ ಅರ್ಮಾನ್ ಜಾಫರ್, ಟೀಮ್ ಇಂಡಿಯಾ ಮಾಜಿ ಆಟಗಾರ, ಪಂಜಾಬ್ ಕಿಂಗ್ಸ್ ತಂಡದ ಬ್ಯಾಟಿಂಗ್ ಕೋಚ್ ವಾಸಿಂ ಜಾಫರ್ ಅವರ ಸೋದರಳಿಯ.