ಕೋಟೆನಾಡಿನಲ್ಲಿ ದಶಕಗಳಿಂದ ಪುರಾತನ ಸಾಮಗ್ರಿ ಸಂಗ್ರಹಿಸಿ, ಮುಂದಿನ ಪೀಳಿಗೆಗೆ ಪರಿಚಯಿಸುವುದನ್ನೇ ಉದ್ದೇಶಿಸಿಕೊಂಡಿದೆ ಈ ಕುಟುಂಬ!
Home Museum: ಹಳೇ ಕಾಲದ ವಸ್ತುಗಳನ್ನು ಮ್ಯೂಸಿಯಂಗಳಲ್ಲಿ ಸಂಗ್ರಹಿಸಿಡಲಾಗುತ್ತದೆ. ಆದ್ರೆ, ಐತಿಹಾಸಿಕ ಕೋಟೆನಾಡು ಚಿತ್ರದುರ್ಗದ ಮನೆಯೊಂದರಲ್ಲಿ ಹಳೇ ಕಾಲದ ಅನೇಕ ಸಂಗ್ರಹಗಳಿವೆ. ಅಸಲಿಗೆ ಆ ಮನೆಯೇ ಒಂದು ಪುಟ್ಟ ಮ್ಯೂಸಿಯಂನಂತಾಗಿದೆ. ಈ ಕುರಿತು ವರದಿ ಇಲ್ಲಿದೆ.
ಹಳೇ ಕಾಲದ ವಸ್ತುಗಳನ್ನು ಮ್ಯೂಸಿಯಂಗಳಲ್ಲಿ ಸಂಗ್ರಹಿಸಿಡಲಾಗುತ್ತದೆ. ಆದ್ರೆ, ಐತಿಹಾಸಿಕ ಕೋಟೆನಾಡು ಚಿತ್ರದುರ್ಗದ ಮನೆಯೊಂದರಲ್ಲಿ ಹಳೇ ಕಾಲದ ಅನೇಕ ಸಂಗ್ರಹಗಳಿವೆ. ಅಸಲಿಗೆ ಆ ಮನೆಯೇ ಒಂದು ಪುಟ್ಟ ಮ್ಯೂಸಿಯಂನಂತಾಗಿದೆ. ಈ ಕುರಿತು ವರದಿ ಇಲ್ಲಿದೆ.
ಟಿಪ್ಪು ಸುಲ್ತಾನರ ಕಾಲದ ನಾಣ್ಯದಿಂದ ಹಿಡಿದು ಈವರೆಗಿನ ನಾಣ್ಯ, ರೂಪಾಯಿಗಳು, ಪುರಾತನ ಕಾಲದ ಗೃಹಬಳಕೆ ವಸ್ತುಗಳಿಂದ ಈವರೆಗಿನ ವಸ್ತುಗಳು, ವಿಗ್ರಹಗಳಿಂದ ಆಟಿಕೆ ವಸ್ತುಗಳವರೆಗಿನ ಅಪರೂಪದ ವಸ್ತುಗಳ ಸಂಗ್ರಹ ಇದಾಗಿದೆ.
ಇದ್ಯಾವುದೋ ಮ್ಯೂಸಿಯಂನ ದೃಶ್ಯಗಳಲ್ಲ. ಕೋಟೆನಾಡು ಚಿತ್ರದುರ್ಗ ನಗರದ ಗುಮಾಸ್ತ ಕಾಲೋನಿಯಲ್ಲಿರುವ ಯಶೋದಾ ರಂಗಣ್ಣ ಅವರ ಮನೆಯಲ್ಲಿನ ಸಂಗ್ರಹ. ಹೌದು, ಸುಮಾರು ಮೂರ್ನಾಲ್ಕು ತಲೆಮಾರುಗಳ ಅಡುಗೆ ವಸ್ತುಗಳನ್ನು ಸಂಗ್ರಹಿಸಿಟ್ಟಿದ್ದಾರೆ. (ವರದಿ: ಬಸವರಾಜ ಮುದನೂರ್, ಟಿವಿ9, ಚಿತ್ರದುರ್ಗ)
ಅಷ್ಟೇ ಅಲ್ಲದೆ, ಟಿಪ್ಪು-ಹೈದರಾಲಿ, ಮೈಸೂರು ಒಡೆಯರ್, ಕೃಷ್ಣ ದೇವರಾಯ. ನಿಜಾಮ, ದುರ್ಗದ ಪಾಳೇಗಾರರ ಕಾಲದ ನಾಣ್ಯಗಳು ಇಲ್ಲಿವೆ. ಪುರಾತನ ಸಾಮಗ್ರಿಗಳನ್ನು ಸಂಗ್ರಹಿಸಿ ಮುಂದಿನ ಪೀಳಿಗೆಗೆ ಪರಿಚಯಸಬೇಕೆಂಬ ಏಕೈಕ ಉದ್ದೇಶದಿಂದ ಇಡೀ ಕುಟುಂಬ ಐದಾರು ದಶಕಗಳಿಂದ ಶ್ರಮಿಸುತ್ತಿದೆ.
ಯಶೋದಾ ಅವರ ಪತಿ ರಂಗಣ್ಣ ಅವ್ರಿಗೆ ಪುರಾತನ ಕಾಲದ ವಸ್ತುಗಳು ಸಂಗ್ರಹಿಸುವುದೆಂದರೆ ಇಷ್ಟದ ಕೆಲಸ. ಹೀಗಾಗಿ, ರಂಗಣ್ಣ ಅವರ ಸವಿನೆನಪಿಗಾಗಿ ಇಡೀ ಕುಟುಂಬ ಹಳೇ ಕಾಲದ ವಸ್ತುಗಳನ್ನು ಸಂಗ್ರಹಿಸಿದೆ. ಅಲ್ಲದೆ ವಸ್ತು ಸಂಗ್ರಹಾಲಯ ಮಾಡುವ ಉದ್ದೇಶವಿದೆ.
ನಾಣ್ಯಗಳು, ರೂಪಾಯಿಗಳು, ಸ್ಟಾಂಪ್ಗಳು, ಅಡುಗೆ ಸಾಮಗ್ರಿಗಳು, ಎಲೆಕ್ಟ್ರಾನಿಕ್ ವಸ್ತುಗಳು, ಆಟಿಕೆಗಳು, ಪೂಜಾ ಸಾಮಗ್ರಿಗಳು, ವಿಗ್ರಹಗಳು ಸೇರಿ ಸುಮಾರು 50ಕ್ಕೂ ಹೆಚ್ಚು ಬಗೆಯ ವಿವಿಧ ಸಂಗ್ರಹಗಳಿದ್ದು ಮ್ಯೂಸಿಯಂ ನಿರ್ಮಿಸುವ ಉದ್ದೇಶವಿದೆ ಅಂತಾರೆ ಇವ್ರು.
ಒಟ್ಟಾರೆಯಾಗಿ ಕೋಟೆನಾಡು ಚಿತ್ರದುರ್ಗದ ಗುಮಾಸ್ತ ಕಾಲೋನಿಯ ಯಶೋಧಾ ಅವರ ನಿವಾಸವೇ ಒಂದು ಪುಟ್ಟ ಮ್ಯೂಸಿಯಂನಂತಾಗಿದೆ. ಅಂತೆಯೇ ತಮ್ಮಲ್ಲಿರುವ ಅಪರೂಪದ ಸಂಗ್ರಹಗಳ ಮೂಲಕ ಮ್ಯೂಸಿಯಂ ಒಂದನ್ನು ನಿರ್ಮಾಣ ಮಾಡುವ ಕನಸನ್ನು ಹೊಂದಿದೆ. ಅಪರೂಪದ ಮ್ಯೂಸಿಯಂ ನಿರ್ಮಿಸುವ ಕನಸು ಕೈಗೂಡಲಿ ಎಂಬುದು ನಮ್ಮ ಆಶಯ.