Independence Day: ಭಾರತದ ಜೊತೆ ಈ ದೇಶಗಳಿಗೂ ಇಂದು ರಾಷ್ಟೀಯ ದಿನದ ಸಂಭ್ರಮ
75th Indian Independence Day: ಆಗಸ್ಟ್ 15ರಂದು ಕೇವಲ ಭಾರತವಷ್ಟೇ ಅಲ್ಲದೆ ಇತರ ನಾಲ್ಕು ದೇಶಗಳು ಸ್ವಾತಂತ್ರ್ಯವನ್ನು ಪಡೆದುಕೊಂಡಿವೆ. ಹೀಗಾಗಿ ಈ ದಿನ ಬಹಳ ವಿಶೇಷ.
ಸುಮಾರು 190 ವರ್ಷಗಳ ಕಾಲ ಬ್ರಿಟಿಷರ ಆಡಳಿತಕ್ಕೆ ಒಳಗಾಗಿದ್ದ ಭಾರತ ಕೊನೆಗೂ 1947ರ ಆಗಸ್ಟ್ 14 ಮಧ್ಯರಾತ್ರಿ ಅಂದ್ರೆ ಸರಾಸರಿ 75 ವರ್ಷಗಳ ಹಿಂದೆ ಸ್ವಾತಂತ್ರ್ಯ ಪಡೆಯಿತು. ಇಂದು ನಾವು ಲಕ್ಷಾಂತರ ದೇಶ ಭಕ್ತರ ಬಲಿದಾನವನ್ನು ಸ್ಮರಿಸುತ್ತ ಬ್ರಿಟಿಷರಿಂದ ಸ್ವತಂತ್ರರಾದ ಹಬ್ಬವನ್ನು ಆಚರಿಸುತ್ತಿದ್ದೇವೆ. ಇನ್ನು ಇದೇ ದಿನ ಅಂದ್ರೆ ಆಗಸ್ಟ್ 15ರಂದು ಕೇವಲ ಭಾರತವಷ್ಟೇ ಅಲ್ಲದೆ ಇತರ ನಾಲ್ಕು ದೇಶಗಳು ಸ್ವಾತಂತ್ರ್ಯವನ್ನು ಪಡೆದುಕೊಂಡಿವೆ. ಹೀಗಾಗಿ ಈ ದಿನ ಬಹಳ ವಿಶೇಷ.
ಬಹ್ರೇನ್ (Bahrain): ಬಹ್ರೇನ್ ಕೂಡ ಬ್ರಿಟಿಷರ ಆಳ್ವಿಕೆಗೆ ಒಳಪಟ್ಟಿತ್ತು. ಬ್ರಿಟಿಷ್ ಸರ್ಕಾರವು 1960 ರ ಆರಂಭದಲ್ಲಿ ಸೂಯೆಜ್‌ನ ಪೂರ್ವದಿಂದ ತಮ್ಮ ಸೈನ್ಯವನ್ನು ಹಿಂತೆಗೆದುಕೊಳ್ಳುವುದಾಗಿ ಘೋಷಿಸಿತು. ಬಳಿಕ ಬಹ್ರೇನ್ ಆಗಸ್ಟ್ 15, 1971 ರಂದು ಬ್ರಿಟಿಷ್ ಆಡಳಿತದಿಂದ ಸ್ವಾತಂತ್ರ್ಯವನ್ನು ಘೋಷಿಸಿತು. ಬಹ್ರೇನ್, ಬ್ರಿಟಿಷರಿಂದ ಸ್ವಾತಂತ್ರ್ಯ ಪಡೆದ ನಿಜವಾದ ದಿನ ಆಗಸ್ಟ್ 14. ಆದ್ರೆ ಬಹ್ರೇನ್ ಆ ದಿನದಂದು ಸ್ವಾತಂತ್ರ್ಯ ದಿನಾಚರಣೆಯನ್ನು ಆಚರಿಸುವುದಿಲ್ಲ. ಬದಲಿಗೆ ಡಿಸೆಂಬರ್ 16 ಅನ್ನು ತನ್ನ ರಾಷ್ಟ್ರೀಯ ದಿನವನ್ನಾಗಿ ಆಚರಿಸುತ್ತದೆ.
ಲಿಚ್ಟೆನ್‌ಸ್ಟೈನ್(Liechtenstein): ಆಸ್ಟ್ರಿಯಾ ಮತ್ತು ಸ್ವಿಜರ್ಲೆಂಡ್ ದೇಶದ ನಡುವೆ ಇರುವ ಲೀಚ್ಟೆನ್‌ಸ್ಟೈನ್ ತನ್ನ ರಾಷ್ಟ್ರೀಯ ದಿನವನ್ನು ಆಗಸ್ಟ್ 15 ರಂದು ಆಚರಿಸುತ್ತದೆ. ಇದನ್ನು 1940 ರಿಂದ ಆಚರಿಸಲಾಗುತ್ತಿದೆ. ಇಲ್ಲಿ ಆಡಳಿತ ನಡೆಸುತ್ತಿದ್ದ ರಾಜಕುಮಾರ 2ನೇ ಫ್ರಾಂಜ್-ಜೋಸೆಫ್ ಆಗಸ್ಟ್ 15 ರಂದು ಜನಿಸಿದ ಎನ್ನಲಾಗಿದೆ.
ಉತ್ತರ ಮತ್ತು ದಕ್ಷಿಣ ಕೊರಿಯಾ(North and South Korea): ಆಗಸ್ಟ್ 15 ಕೊರಿಯಾದ ರಾಷ್ಟ್ರೀಯ ವಿಮೋಚನಾ ದಿನವಾಗಿದೆ. ಇದು ಉತ್ತರ ಮತ್ತು ದಕ್ಷಿಣ ಕೊರಿಯಾದಲ್ಲಿ ಪ್ರತಿ ವರ್ಷ ಆಚರಿಸುವ ರಜಾದಿನವಾಗಿದೆ. ಇದು 2ನೇ ಮಹಾಯುದ್ಧದ ಕೊನೆಯಲ್ಲಿ ಆಗಸ್ಟ್ 15ರಂದು ಜಪಾನಿಯರಿಂದ ಸ್ವಾತಂತ್ರ್ಯಗೊಂಡ ಉತ್ತರ ಮತ್ತು ದಕ್ಷಿಣ ಕೊರಿಯಾ ಈ ದಿನವನ್ನು ಕೊರಿಯಾದ ರಾಷ್ಟ್ರೀಯ ವಿಮೋಚನಾ ದಿನವಾಗಿ ಘೋಷಿಸಿದೆ.
ರಿಪಬ್ಲಿಕ್ ಆಫ್ ಕಾಂಗೋ(Republic of Congo): ರಿಪಬ್ಲಿಕ್ ಆಫ್ ಕಾಂಗೋ ಆಗಸ್ಟ್ 15 ರಂದು ಸ್ವಾತಂತ್ರ್ಯವನ್ನು ಪಡೆಯಿತು. 1960ರ ಆಗಸ್ಟ್ 15ರಂದು ಫ್ರೆಂಚ್ರಿಂದ ಸ್ವಾತಂತ್ರ್ಯ ಪಡೆದ ಕಾಂಗೋ ದೇಶ ಬಳಿಕ ರಿಪಬ್ಲಿಕ್ ಆಫ್ ಕಾಂಗೋವಾಗಿ ಉಗಮಗೊಂಡಿತು. ಈ ದೇಶ 1880ರಲ್ಲಿ ಫ್ರೆಂಚರ ಆಳ್ವಿಕೆಗೆ ಒಳಪಟ್ಟಿತ್ತು. ಫ್ರೆಂಚರು ಸುಮಾರು 80 ವರ್ಷ ಆಳ್ವಿಕೆ ಮಾಡಿದ್ದಾರೆ.
Published On - 2:17 pm, Sun, 15 August 21