ಹನುಮಾನ್ ಚಾಲೀಸಾ ಉಗಮದ ರೋಚಕ ಕಥೆ: ಬಂದೀಖಾನೆಯಲ್ಲಿ ತುಳಸಿದಾಸರು ರಚಿಸಿದ ದಿವ್ಯ ಸ್ತೋತ್ರದ ಇತಿಹಾಸ

ಹಿಂದೂ ಆಧ್ಯಾತ್ಮಿಕ ಸಂಪ್ರದಾಯದಲ್ಲಿ ಹನುಮಾನ್ ಚಾಲೀಸಾಗೆ ಅತ್ಯಂತ ಪವಿತ್ರವಾದ ಸ್ಥಾನವಿದೆ. ಜಗತ್ತಿನಾದ್ಯಂತ ಲಕ್ಷಾಂತರ ಭಕ್ತರು ಪ್ರತಿದಿನ ಪಠಿಸುವ ಈ ಅಪೂರ್ವ ಸ್ತೋತ್ರದ ಹಿಂದಿರುವುದು ಕೇವಲ ಕಾವ್ಯ ಪ್ರತಿಭೆಯಲ್ಲ, ಬದಲಾಗಿ 16ನೇ ಶತಮಾನದ ಮಹಾನ್ ಸಂತ ತುಳಸಿದಾಸರ ಅಚಲ ರಾಮಭಕ್ತಿ ಮತ್ತು ಆಂಜನೇಯನ ಸಾಕ್ಷಾತ್ಕಾರದ ಅದ್ಭುತ ಕಥೆ. ಇದೀಗ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರಿಂದ ಮತ್ತೆ ಹನುಮಾನ್ ಚಾಲೀಸಾ ಬಗ್ಗೆ ಸುದ್ದಿಗಳು ಹರಿದಾಡುತ್ತಿದೆ. ಆಸ್ಪತ್ರೆಯ ಹಾಸಿಗೆಯಿಂದಲೇ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ವೀಡಿಯೊ ಕರೆಯಲ್ಲಿ ಮಾತನಾಡಿದಾಗ ಸ್ಮಿತ್, “ನನಗೆ ಸಂಕಷ್ಟ ಮತ್ತು ನೋವು ಎದುರಾದಾಗಲೆಲ್ಲಾ ನಾನು ಹನುಮಾನ್ ಚಾಲೀಸಾ ಪಠಿಸುತ್ತೇನೆ, ಆ ರಕ್ತಸಿಕ್ತ ಕ್ಷಣದಲ್ಲೂ ನಾನು ಹನುಮಾನ್ ಚಾಲೀಸಾವನ್ನೇ ಜಪಿಸುತ್ತಿದ್ದೆ ಎಂದು ಹೇಳಿ ಭಾವುಕರಾಗಿದ್ದಾರೆ.

ಹನುಮಂತನ ದರ್ಶನ ಮತ್ತು ಸಂತ ತುಳಸಿದಾಸರು:

ಸಂತ ತುಳಸಿದಾಸರು ಶ್ರೀರಾಮನ ಪರಮ ಭಕ್ತರಾಗಿದ್ದರು. ರಾಮಚರಿತಮಾನಸ ಗ್ರಂಥವನ್ನು ರಚಿಸುವ ಅವಧಿಯಲ್ಲಿ, ಶ್ರೀರಾಮನ ದರ್ಶನ ಪಡೆಯಬೇಕೆಂಬ ತೀವ್ರ ಆಕಾಂಕ್ಷೆ ಅವರಲ್ಲಿ ಮೂಡಿತು. ಸಂಪ್ರದಾಯದ ಪ್ರಕಾರ, ಶ್ರೀರಾಮನನ್ನು ಕಾಣಲು ಹನುಮಂತನೇ ಏಕೈಕ ಮಾರ್ಗದರ್ಶಿ ಎಂಬುದನ್ನು ಅರಿತ ತುಳಸಿದಾಸರು ಹನುಮಂತನ ದರ್ಶನಕ್ಕಾಗಿ ತಪಸ್ಸನ್ನು ಪ್ರಾರಂಭಿಸಿದರು. ಅವರ ನಿಷ್ಠಾವಂತ ಭಕ್ತಿಗೆ ಮೆಚ್ಚಿದ ಹನುಮಂತನು ವೃದ್ಧ ಬ್ರಾಹ್ಮಣನ ರೂಪದಲ್ಲಿ ಪ್ರತ್ಯಕ್ಷನಾಗಿ, ತುಳಸಿದಾಸರಿಗೆ ಶ್ರೀರಾಮನ ದರ್ಶನ ಪಡೆಯಲು ಆಶೀರ್ವದಿಸಿದನು ಎಂಬ ಪ್ರತೀತಿ ಇದೆ.

ಅಕ್ಬರ್ ಚಕ್ರವರ್ತಿಯ ಬಂದೀಖಾನೆ ಮತ್ತು ಪವಾಡ:

ಜನಪ್ರಿಯ ಕಥಾನಕಗಳ ಪ್ರಕಾರ, ತುಳಸಿದಾಸರ ಭಕ್ತಿ ಮತ್ತು ಅವರು ನಡೆಸುತ್ತಿದ್ದರೆನ್ನಲಾದ ಪವಾಡಗಳ ಸುದ್ದಿ ಮೊಘಲ್ ಚಕ್ರವರ್ತಿ ಅಕ್ಬರನಿಗೆ ತಲುಪಿತು. ಚಕ್ರವರ್ತಿಯು ತುಳಸಿದಾಸರನ್ನು ತನ್ನ ಆಸ್ಥಾನಕ್ಕೆ ಕರೆಸಿ, ತನ್ನ ಮುಂದೆ ದೈವಿಕ ಪವಾಡವೊಂದನ್ನು ಪ್ರದರ್ಶಿಸುವಂತೆ ಆಜ್ಞಾಪಿಸಿದನು. ಆದರೆ, “ನಾನು ಯಾವುದೇ ಪವಾಡ ಪುರುಷನಲ್ಲ, ನನ್ನಲ್ಲೇನಿದ್ದರೂ ಶ್ರೀರಾಮನ ನಾಮಸ್ಮರಣೆ ಮಾತ್ರ” ಎಂದು ತುಳಸಿದಾಸರು ನಮ್ರವಾಗಿ ನಿರಾಕರಿಸಿದರು. ಇದರಿಂದ ಕೋಪಗೊಂಡ ಚಕ್ರವರ್ತಿಯು ಅವರನ್ನು ದೆಹಲಿಯ ಬಂದೀಖಾನೆಯಲ್ಲಿ ಬಂಧಿಸಲು ಆದೇಶಿಸಿದನು.

ಬಂದೀಖಾನೆಯಲ್ಲಿ ಹನುಮಾನ್ ಚಾಲೀಸಾದ ಉಗಮ:

ಕಾರಾಗೃಹದ ಕತ್ತಲ ಕೋಣೆಯಲ್ಲಿದ್ದಾಗ ತುಳಸೀದಾಸರು ಧೃತಿಗೆಡದೆ, ಸಂಕಟ ಹರನಾದ ಹನುಮಂತನನ್ನು ನೆನೆದು ಪ್ರಾರ್ಥಿಸಲು ಪ್ರಾರಂಭಿಸಿ ಸಂಪೂರ್ಣವಾಗಿ ಹನುಮಂತನಿಗೆ ಶರಣಾದರು. ಅಲ್ಲಿ ಅವರು ಆಂಜನೇಯನ ಶೌರ್ಯ, ಭಕ್ತಿ ಮತ್ತು ಶಕ್ತಿಯನ್ನು ಕೊಂಡಾಡುವ 40 ಪದ್ಯಗಳ (ಚೌಪಾಯಿ) ಈ ಅದ್ಭುತ ಸ್ತೋತ್ರವನ್ನು ರಚಿಸಿದರು. ಹಿಂದಿಯಲ್ಲಿ 40 ಕ್ಕೆ ‘ಚಾಲೀಸ್’ ಎನ್ನುವುದರಿಂದ ಇದಕ್ಕೆ ‘ಹನುಮಾನ್ ಚಾಲೀಸಾ’ ಎಂಬ ಹೆಸರು ಬಂದಿತು. ಅವರು ಜೈಲಿನಲ್ಲಿದ್ದ 40 ದಿನಗಳಲ್ಲಿ ದಿನಕ್ಕೊಂದು ಸಾಲಿನಂತೆ ಇದನ್ನು ಪೂರ್ಣಗೊಳಿಸಿದರು ಎಂಬ ನಂಬಿಕೆಯೂ ಇದೆ.

ಇದನ್ನೂ ಓದಿ: ಹಸ್ತಸಾಮುದ್ರಿಕ ಶಾಸ್ತ್ರ: ಅದೃಷ್ಟವಂತರ ಕೈಯಲ್ಲಿ ಮಾತ್ರ ಇರುತ್ತವೆ ಈ ‘ರಾಜಯೋಗ’ ತರುವ ಶುಭ ರೇಖೆಗಳು!

ತುಳಸಿದಾಸರು ಚಾಲೀಸಾ ಪಠಣವನ್ನು ಪೂರ್ಣಗೊಳಿಸುತ್ತಿದ್ದಂತೆ, ದೆಹಲಿ ನಗರ ಮತ್ತು ರಾಜಮನೆತನದ ಸುತ್ತಲೂ ಸಾವಿರಾರು ವಾನರಗಳು (ಕೋತಿಗಳು) ಪ್ರತ್ಯಕ್ಷವಾಗಿ ಆಕ್ರಮಣ ಮಾಡಲು ಪ್ರಾರಂಭಿಸಿದವು ಎಂದು ಕಥೆಗಳು ವಿವರಿಸುತ್ತವೆ. ರಾಜಮನೆತನಕ್ಕೆ ಈ ಸನ್ನಿವೇಶದ ಗಂಭೀರತೆ ಅರ್ಥವಾಗಿ, ಇದು ಹನುಮಂತನ ಕೋಪ ಮತ್ತು ಪವಾಡವೆಂದು ಅರಿತ ಚಕ್ರವರ್ತಿಯು ತಕ್ಷಣವೇ ತುಳಸಿದಾಸರನ್ನು ಗೌರವಪೂರ್ವಕವಾಗಿ ಬಿಡುಗಡೆ ಮಾಡಿದನು.

ಶತಮಾನಗಳಿಂದ ಮುಂದುವರಿದ ಭಕ್ತಿ ಪರಂಪರೆ:

ಬಂಧನದಿಂದ ಬಿಡುಗಡೆಯಾದ ನಂತರ, ಹನುಮಾನ್ ಚಾಲೀಸಾವು ಕೇವಲ ಒಂದು ಸ್ತೋತ್ರವಾಗಿ ಉಳಿಯದೆ, ಕಷ್ಟದ ಸಮಯದಲ್ಲಿ ಮಾನಸಿಕ ಧೈರ್ಯ, ಶಕ್ತಿ ಮತ್ತು ಅಭಯ ನೀಡುವ ದಿವ್ಯ ಮಂತ್ರವಾಗಿ ಪ್ರಸಿದ್ಧಿಯಾಯಿತು. ತುಳಸಿದಾಸರು ರಚಿಸಿದ ಈ 40 ಚೌಪಾಯಿಗಳು ಇಂದಿಗೂ ಭಕ್ತರಲ್ಲಿ ಭಕ್ತಿ ಮತ್ತು ಶ್ರದ್ಧೆಯನ್ನು ತುಂಬುತ್ತಿವೆ.

ಪ್ರತಿಯೊಂದು ಭಾಗವೂ ಹನುಮನ ಗುಣಗಳು, ಬಲ, ಬುದ್ಧಿವಂತಿಕೆ ಮತ್ತು ಶ್ರೀರಾಮನ ಸೇವೆಯನ್ನು ಕೊಂಡಾಡುತ್ತದೆ. ಕಷ್ಟ ಕಾಲದಲ್ಲಿ ಹನುಮಾನ್ ಚಾಲೀಸಾವನ್ನು ಭಕ್ತಿಯಿಂದ ಪಠಿಸಿದರೆ ಸಕಲ ಭಯ ಹಾಗೂ ನಕಾರಾತ್ಮಕ ಶಕ್ತಿಗಳು ದೂರವಾಗುತ್ತವೆ ಎಂಬ ನಂಬಿಕೆ ಶತಮಾನಗಳಿಂದ ಜೀವಂತವಾಗಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 12:30 pm, Sun, 4 October 26