Lord Shiva Temples: ವನವಾಸದ ಸಮಯದಲ್ಲಿ ಪಾಂಡವರು ಕಟ್ಟಿದ ಶಿವ ದೇವಾಲಯಗಳು
ಯಾವುದೇ ಕಷ್ಟಗಳಿದ್ದರೂ, ಎಷ್ಟೇ ಸಮಸ್ಯೆಗಳಾದರೂ ಮೊದಲು ನೆನಪಾಗುವುದೇ ಸಂಕಟ ಹರ ಮಹಾದೇವ. ಅತ್ಯಂತ ಪ್ರಿಯ, ಭೋಲೇನಾಥನನ್ನು ಶ್ರದ್ಧೆ, ಭಕ್ತಿಯಿಂದ ಬೇಡಿಕೊಂಡರೆ ಎಂತಹ ವರವನ್ನಾದರೂ ಕರುಣಿಸುತ್ತಾನೆ ಶಿವ. ಸದ್ಯ ನಾವಿಂದು ಮಹಾಭಾರತದ ಸಮಯದಲ್ಲಿ ಪಾಂಡವರು ಕೈಗೊಂಡ 12 ವರ್ಷಗಳ ವನವಾಸದ ಸಮಯದಲ್ಲಿ ಅವರು ಸ್ಥಾಪಿಸಿದ ಶಿವಲಿಂಗಗಳ ಬಗ್ಗೆ ಹಾಗೂ ಅವುಗಳ ಪ್ರಾಮುಖ್ಯತೆಯ ಬಗ್ಗೆ ತಿಳಿಸಿಕೊಡಲಿದ್ದೇವೆ.
ಮಮ್ಮಲೇಶ್ವರ ಮಹಾದೇವ, ಹಿಮಾಚಲ ಪ್ರದೇಶ(Mamleshwar Mahadev Temple): ಪಾಂಡವರು ವನವಾಸದಲ್ಲಿದ್ದಾಗ ಹಿಮಾಚಲ ಪ್ರದೇಶದಲ್ಲಿ ಸ್ವಲ್ಪ ಸಮಯ ಕಳೆಯುತ್ತಾರೆ. ಈ ವೇಳೆ ಪಾಂಡವರು ಮಮ್ಮಲೇಶ್ವರ ಮಹಾದೇವನನ್ನು ಸ್ಥಾಪಿಸುತ್ತಾರೆ. ಇಲ್ಲಿ ಭೀಮನು ಹಿಡಿಂಬೆಯನ್ನು ಭೇಟಿಯಾದ ಬಳಿಕ ಆಕೆ ಅವನ ಹೆಂಡತಿಯಾದಳು. ಈ ದೇವಾಲಯವು 5000 ವರ್ಷಗಳಿಗಿಂತಲೂ ಹಳೆಯದು ಎಂದು ಹೇಳಲಾಗುತ್ತದೆ. ಈ ದೇವಾಲಯದಲ್ಲಿ ಭೀಮನ ಡೋಲು ಮತ್ತು 200 ಗ್ರಾಂ ಗೋಧಿ ಧಾನ್ಯಗಳಿವೆ. ಈ ಗೋಧಿ ಧಾನ್ಯವನ್ನು ಪಾಂಡವರು ಬೆಳೆದರು ಎಂದು ನಂಬಲಾಗಿದೆ. ಮಹಾಭಾರತ ಕಾಲದಿಂದಲೂ ನಿರಂತರವಾಗಿ ಉರಿಯುತ್ತಿರುವ ಜ್ವಾಲೆಯು ಈ ದೇವಾಲಯದಲ್ಲಿದೆ.
ಅಘಂಜರ ಮಹಾದೇವ ದೇವಸ್ಥಾನ, ಹಿಮಾಚಲ ಪ್ರದೇಶ(Aghanjar Mahadev Temple): ಈ ದೇವಾಲಯವು ಹಿಮಾಚಲ ಪ್ರದೇಶದ ಕಂಗ್ರಾ ಜಿಲ್ಲೆಯ ಖನಿಯಾರಾ ಗ್ರಾಮದಲ್ಲಿದೆ. ವನವಾಸದ ಸಮಯದಲ್ಲಿ, ಅರ್ಜುನನು ಶ್ರೀಕೃಷ್ಣನ ಮಾರ್ಗದರ್ಶನದೊಂದಿಗೆ ಈ ಸ್ಥಳದಲ್ಲಿ ಶಿವಲಿಂಗವನ್ನು ಸ್ಥಾಪಿಸಿದನು ಎನ್ನಲಾಗುತ್ತೆ. ಹಾಗೂ ಶಿವನು ಅರ್ಜುನನ ಪೂಜೆಯಿಂದ ಸಂತೋಷಪಟ್ಟು ಅರ್ಜುನನಿಗೆ ಪಶುಪತಿ ಆಯುಧವನ್ನು ನೀಡಿದನು.
ಗಂಗೇಶ್ವರ ದೇವಸ್ಥಾನ, ಗುಜರಾತ್(Gangeshwar Temple): ಗಂಗೇಶ್ವರ ದೇವಸ್ಥಾನವು ಗುಜರಾತ್‌ನ ದಿಯು ನಗರದಿಂದ ಸುಮಾರು 3 ಕಿ.ಮೀ ದೂರದಲ್ಲಿರುವ ಪದುಮ ಗ್ರಾಮದಲ್ಲಿದೆ. ಗಂಗಾ ಮತ್ತು ಈಶ್ವರನಿಂದ ಗಂಗೇಶ್ವರ ಎಂಬ ಹೆಸರು ಬಂದಿದೆ. ಇದರ ಅರ್ಥ ಗಂಗೆಯ ಅಧಿಪತಿ ಎಂದು. ಈ ದೇವಾಲಯವು ಕಡಲತೀರದ ಬಂಡೆಗಳ ನಡುವೆ ಇರುವ ಗುಹೆಯಲ್ಲಿದೆ. ಇಲ್ಲಿ ಐದು ಶಿವಲಿಂಗಗಳಿವೆ, ಇದನ್ನು ಪಾಂಡವರು ತಮ್ಮ ದೈನಂದಿನ ಪೂಜೆಗಾಗಿ ಸ್ಥಾಪಿಸಿದರು. ಸಮುದ್ರದ ನೀರು ಏರುವ ಸಮಯದಲ್ಲಿ ಈ ಶಿವಲಿಂಗಗಳು ಸಮುದ್ರದಲ್ಲಿ ಮುಳುಗುತ್ತವೆ ಮತ್ತು ನೀರು ಇಳಿಯುವ ಸಮಯದಲ್ಲಿ ಮಾತ್ರ ಕಾಣಿಸುತ್ತವೆ. ಈ ದೇವಾಲಯವನ್ನು 'ಸಮುದ್ರ ಮಂದಿರ' ಎಂದೂ ಕರೆಯಲಾಗುತ್ತದೆ.
ಭಯಹರಣ ಮಹಾದೇವ ದೇವಸ್ಥಾನ, ಉತ್ತರ ಪ್ರದೇಶ(Bhaya Harana Mahadeva Temple): ಉತ್ತರ ಪ್ರದೇಶದ ಪ್ರತಾಪಗಢ ಜಿಲ್ಲೆಯಲ್ಲಿ ಭೀಮನು ತನ್ನ ವನವಾಸದ ಸಮಯದಲ್ಲಿ ಭಯಹರಣ ಮಹಾದೇವ ದೇವಾಲಯವನ್ನು ಸ್ಥಾಪಿಸಿದನು ಎನ್ನಲಾಗಿದೆ. ಈ ದೇವಾಲಯದಲ್ಲಿ ಪ್ರಾರ್ಥನೆ ಸಲ್ಲಿಸುವ ಮೂಲಕ ಭಕ್ತರು ಭಯ ಮತ್ತು ಗೊಂದಲದಿಂದ ಮುಕ್ತರಾಗುತ್ತಾರೆ. ದೇವಾಲಯದಲ್ಲಿ ಶಿವಲಿಂಗದ ಜೊತೆಗೆ, ಹನುಮಂತ, ಶಿವ-ಪಾರ್ವತಿ, ಸಂತೋಷಿ ಮಾತಾ, ರಾಧಾ-ಕೃಷ್ಣ, ವಿಶ್ವಕರ್ಮ, ಬೈಜು ಬಾಬಾ ಮುಂತಾದವರ ದೇವಾಲಯವೂ ಇದೆ. ಶ್ರಾವಣ ಮತ್ತು ಮಹಾಶಿವರಾತ್ರಿಯಂದು ಇಲ್ಲಿ ಭಾರೀ ಜನಸಂದಣಿ ಕಂಡುಬರುತ್ತದೆ. ಪೌರಾಣಿಕ ನಂಬಿಕೆಗಳ ಪ್ರಕಾರ, ರಾಕ್ಷಸ ಬಕಾಸುರನನ್ನು ಕೊಲ್ಲಲು ಭೀಮನು ಈ ಶಿವಲಿಂಗವನ್ನು ಸ್ಥಾಪಿಸಿದನು.
ಲಾಖಾಮಂಡಲ ದೇವಾಲಯ, ಉತ್ತರಾಖಂಡ(Lakha Mandal Temple): ಲಾಖಾಮಂಡಲ ದೇವಾಲಯವು ದೆಹರಾದೂನ್‌ನಿಂದ 128 ಕಿಮೀ ದೂರದಲ್ಲಿ ಯಮುನಾ ನದಿಯ ದಡದಲ್ಲಿದೆ. ಪುರಾಣಗಳ ಪ್ರಕಾರ, ಪಾಂಡವರು ಲಕ್ಷಗೃಹದಿಂದ ತಪ್ಪಿಸಿಕೊಂಡು ಬಹಳ ಕಾಲ ಇಲ್ಲಿಯೇ ಇದ್ದರು. ಈ ಸಮಯದಲ್ಲಿ ಅವರು ಇಲ್ಲಿ ಶಿವಲಿಂಗವನ್ನು ಸ್ಥಾಪಿಸಿದರು. ಇಲ್ಲಿ ಎರಡು ಶಿವಲಿಂಗಗಳು ವಿವಿಧ ಬಣ್ಣಗಳು ಮತ್ತು ಗಾತ್ರಗಳೊಂದಿಗೆ ನೆಲೆಗೊಂಡಿವೆ. ದೇವಾಲಯದ ಒಳಗಿನ ಬಂಡೆಯ ಮೇಲೆ ಪಾರ್ವತಿಯ ಹೆಜ್ಜೆ ಗುರುತುಗಳನ್ನು ಕಾಣಬಹುದು. ಮಹಾಶಿವರಾತ್ರಿಯಂದು ಇಲ್ಲಿಗೆ ಬರುವ ಪ್ರತಿಯೊಬ್ಬ ಭಕ್ತರ ಆಸೆಯು ಈಡೇರುತ್ತದೆ ಎನ್ನುವ ನಂಬಿಕೆಯಿದೆ.