Daily Devotional: ಬೇರೆಯವರಿಂದ ಪೂಜೆ, ಹೋಮ ಮಾಡಿಸಿದರೆ ನಮಗೆ ಅದರ ಫಲ ಸಿಗುತ್ತದೆಯೇ?

ಪ್ರಾರ್ಥನೆ, ಪೂಜೆ, ಹರಕೆಗಳು ಅಥವಾ ದೇವಸ್ಥಾನಕ್ಕೆ ನಾವೇ ಹೋಗಿ ದೇವರ ದರ್ಶನ ಮಾಡುವುದಕ್ಕೆ ಸಮಾನವಾಗಿ, ಬೇರೆಯವರ ಮುಖಾಂತರ ಕಾಣಿಕೆಗಳನ್ನು ಹುಂಡಿಗೆ ಹಾಕುವುದು, ಅರ್ಚನೆ ಮಾಡಿಸುವುದು ಅಥವಾ ದೇವರ ಹೆಸರಿನಲ್ಲಿ ಹಣವನ್ನು ಕಟ್ಟುವುದರಿಂದ ಫಲ ಸಿಗುತ್ತದೆಯೇ ಎಂಬ ಪ್ರಶ್ನೆ ಅನೇಕರಲ್ಲಿದೆ. ಯಾರೋ ದೇವಸ್ಥಾನಕ್ಕೆ ಹೋಗುವಾಗ ಹಣವನ್ನು ಕೊಟ್ಟು ‘ಇದನ್ನು ಹುಂಡಿಗೆ ಹಾಕಿ’ ಎಂದು ಹೇಳುವುದು, ಅಥವಾ ನಮ್ಮ ಪರವಾಗಿ ಬೇರೆಯವರಿಂದ ಪೂಜೆ, ವ್ರತ ಮಾಡಿಸುವುದು ಶುಭ ಫಲಗಳನ್ನು ನೀಡುತ್ತದೆಯೇ ಎಂಬ ಅನುಮಾನಕ್ಕೆ ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯ ಭಕ್ತಿ ಕಾರ್ಯಕ್ರಮದಲ್ಲಿ ಉತ್ತರ ನೀಡಿದ್ದಾರೆ.

ಗುರೂಜಿಯವರು ಹೇಳುವಂತೆ, ಕೆಲವೊಮ್ಮೆ ನಮ್ಮ ಹುಟ್ಟುಹಬ್ಬ, ವಿವಾಹ ದಿನ ಅಥವಾ ದೈನಂದಿನ ಕಾರ್ಯಗಳಲ್ಲಿ ಹೆಚ್ಚು ನಿರತರಾಗಿರುವಾಗ ದೇವತಾ ಕ್ಷೇತ್ರಗಳಿಗೆ ಹೋಗಲು ಸಾಧ್ಯವಾಗುವುದಿಲ್ಲ. ಅಂತಹ ಸಂದರ್ಭಗಳಲ್ಲಿ ನಮ್ಮ ಪರವಾಗಿ ಬೇರೆಯವರಿಂದ ಧರ್ಮ ಕಾರ್ಯಗಳನ್ನು, ಪೂಜೆಗಳನ್ನು ಮಾಡಿಸಿದರೆ ಅದು ಶುಭವನ್ನು ತರುತ್ತದೆ. ಉದಾಹರಣೆಗೆ, ಒಬ್ಬ ಆತ್ಮೀಯ ಸ್ನೇಹಿತ ದೇವಸ್ಥಾನಕ್ಕೆ ಹೋಗುವಾಗ ಆತನ ಹೆಸರಿನಲ್ಲಿ ಅರ್ಚನೆ ಮಾಡಿಸುವುದರಿಂದಲೂ ದುಪ್ಪಟ್ಟು ಫಲ ಸಿಗುತ್ತದೆ ಎಂದು ಹೇಳಲಾಗಿದೆ. ಬೇರೆಯವರ ಹೆಸರಿನಲ್ಲಿ ಅರ್ಚನೆ, ಪೂಜೆ, ಅನ್ನದಾನ ಮಾಡಿಸುವುದು ಅಥವಾ ಹೋಮ, ಹವನಗಳನ್ನು ಅವರ ಸಂಕಲ್ಪ ಹೇಳಿ ಮಾಡಿಸುವುದರಿಂದ ಸಾಕಷ್ಟು ಫಲಗಳು ಲಭಿಸುತ್ತವೆ.

ವಿಡಿಯೋ ಇಲ್ಲಿದೆ ನೋಡಿ:

ಆದರೆ ಇಲ್ಲಿ ಒಂದು ಪ್ರಮುಖ ಅಂಶವನ್ನು ಗಮನಿಸಬೇಕು. ನಾವು ಯಾರಿಗಾದರೂ ಹಣವನ್ನು ಕೊಟ್ಟು ದೇವಸ್ಥಾನಕ್ಕೆ ತಲುಪಿಸಲು ಹೇಳಿದಾಗ, ಆ ಹಣವನ್ನು ಪ್ರಾಮಾಣಿಕವಾಗಿ ಹುಂಡಿಗೆ ಅರ್ಪಿಸಬೇಕು ಅಥವಾ ದೇವರಿಗೆ ತಲುಪಿಸಬೇಕು. ಒಂದು ವೇಳೆ ಹಾಗೆ ಮಾಡದೆ, ಆ ಹಣವನ್ನು ದುರುಪಯೋಗಪಡಿಸಿಕೊಂಡರೆ ಅದು ಮಹಾಪಾಪವಾಗುತ್ತದೆ. ಅಲ್ಲದೆ, ಕೊಟ್ಟ ಹಣಕ್ಕೆ ದುಪ್ಪಟ್ಟು ನಷ್ಟವನ್ನು ಅನುಭವಿಸಬೇಕಾಗಬಹುದು. ಹಣವನ್ನು ಸ್ವೀಕರಿಸಿದವರು ಅದನ್ನು ತಪ್ಪದೇ ಕ್ಷೇತ್ರಕ್ಕೆ ಅಥವಾ ಕ್ಷೇತ್ರಜ್ಞನಿಗೆ ಅರ್ಪಿಸಿದಾಗ ಕಳುಹಿಸಿದವರಿಗೂ ಹಾಗೂ ತಲುಪಿಸಿದವರಿಗೂ ಪುಣ್ಯ ಪ್ರಾಪ್ತವಾಗುತ್ತದೆ. ದೇವಸ್ಥಾನಗಳಲ್ಲಿ ಬೇರೆಯವರ ಹೆಸರಿನಲ್ಲಿ ಮಾಡುವ ಪೂಜೆ, ವ್ರತಗಳ ಫಲವು ಶುಭಕರವಾಗಿರುತ್ತದೆ.

ಇದನ್ನೂ ಓದಿ: ಹಳೆಯ ಬಟ್ಟೆಗಳನ್ನು ನೆಲ ಒರೆಸಲು ಬಳಸುತ್ತಿದ್ದೀರಾ? ಈ ಸಮಸ್ಯೆ ತಪ್ಪಿದ್ದಲ್ಲ!

ನಮ್ಮ ಭಾರತೀಯ ಸನಾತನ ಸಂಸ್ಕೃತಿಯಲ್ಲಿ ಸನಾತನೋ ನಿತ್ಯ ನೂತನ ಎಂಬ ಮಾತಿದೆ. ಅಂದರೆ, ನಮ್ಮ ಸಂಪ್ರದಾಯಗಳು ಅನಾದಿ ಕಾಲದಿಂದಲೂ ಚಾಲ್ತಿಯಲ್ಲಿವೆ. ಅಯ್ಯಪ್ಪ ಸ್ವಾಮಿ ಮಾಲೆ ಹಾಕಿಕೊಂಡು ಹೋಗುವವರಿಗೆ ಕಾಣಿಕೆ ನೀಡಿ, ಅವರ ಮುಖಾಂತರ ಭಗವಂತನಿಗೆ ಅರ್ಪಿಸುವುದು. ತಿರುಪತಿ, ಧರ್ಮಸ್ಥಳದಂತಹ ಕ್ಷೇತ್ರಗಳಿಗೆ ಹೋಗುವವರಿಗೆ ಹಣ ನೀಡಿ ತಲುಪಿಸಲು ಹೇಳುವುದು, ಇವೆಲ್ಲವೂ ಪುಣ್ಯಕಾರ್ಯಗಳೇ. ಇಂತಹ ಕಾರ್ಯಗಳಿಂದ ನಮಗೆ ಬರುವ ಕಂಟಕಗಳು ಕೂಡ ದೂರವಾಗುತ್ತವೆ. ಇದು ಅನಾದಿ ಕಾಲದಿಂದಲೂ ನಡೆದುಕೊಂಡು ಬಂದಿರುವ ಪದ್ಧತಿಯಾಗಿದೆ ಎಂದು ಗುರೂಜಿ ವಿವರಿಸಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ