ಭಾರತ ತಂಡದ ಬ್ಯಾಟಿಂಗ್ ಹೇಗಿತ್ತು? ಮ್ಯಾಚ್​ ನೋಡೋದು ಮಿಸ್ ಆಗಿದ್ರೆ ಡೋಂಟ್​ವರಿ.. ಇಲ್ಲಿದೆ ಕ್ವಿಕ್ ಡಿಟೇಲ್ಸ್

ಆಸ್ಟ್ರೇಲಿಯಾ – ಭಾರತ ಏಕದಿನ ಸರಣಿಯ ಎರಡನೇ ಪಂದ್ಯದಲ್ಲಿ ಕಾಂಗರೂ ಪಡೆ ನೀಡಿದ್ದ 390 ರನ್​ಗಳ ಗುರಿ ಬೆನ್ನತ್ತಿದ ಭಾರತಕ್ಕೆ ಮೊದಲ ಓವರ್​ನಲ್ಲಿ ಎಂಟು ರನ್​ ಸಿಕ್ಕಿತು. ಆಸಿಸ್​ ಬೌಲರ್ ಸ್ಟಾರ್ಕ್​ ಎಸೆದ ಮೊದಲನೇ ಹಾಗೂ ಮೂರನೇ ಎಸೆತಕ್ಕೆ ಮಯಾಂಕ್ ಅಗರ್​ವಾಲ್ ಫೋರ್ ಸಿಡಿಸುವ ಮೂಲಕ ಪಂದ್ಯವನ್ನು ಆರಂಭಿಸಿದರು. ಎರಡನೇ ಓವರ್​ನಲ್ಲಿ ಧವನ್​ ಮತ್ತೆ ಮೊದಲ ಎಸೆತದಲ್ಲೇ ಫೋರ್ ಹೊಡೆದರಾದರೂ ನಂತರದ ಎಸೆತಗಳಲ್ಲಿ ಒಂದು ರನ್ ಸಹ ಸಿಗಲಿಲ್ಲ. ನಾಲ್ಕನೇ ಓವರ್​ ತನಕ ನಿಧಾನಗತಿಯಲ್ಲೇ ಸಾಗಿದ ಭಾರತ ಐದನೇ ಓವರ್​ನಲ್ಲಿ 16 ರನ್ ಪಡೆಯುವ ಮೂಲಕ ಕೊಂಚ ಚೇತರಿಕೆ ಕಂಡಿತು.

ಏಳನೇ ಓವರ್​ ವೇಳೆಗೆ ಮಯಾಂಕ್​ ಅಗರ್​ವಾಲ್ ಹಾಗೂ ಶಿಖರ್​ ಧವನ್​ 56ರನ್​ಗಳ ಜೊತೆಯಾಟವಾಡಿದ್ದರಾದರೂ ಏಳನೇ ಓವರ್​ನ ನಾಲ್ಕನೇ ಎಸೆತದಲ್ಲಿ ಸ್ಟಾರ್ಕ್​ಗೆ ಕ್ಯಾಚ್​ ನೀಡುವ ಮೂಲಕ ಧವನ್ ಹೊನಡೆದರು. ಅವರ ಬೆನ್ನಲ್ಲೇ ಮಯಾಂಕ್​ ಸಹ ಎಂಟನೇ ಓವರ್​ನ ಮೂರನೇ ಎಸೆತದಲ್ಲಿ ಕ್ಯಾಚ್ ನೀಡಿ ಪೆವಿಲಿಯನ್​ ಕಡೆ ಹೆಜ್ಜೆ ಹಾಕಿದರು.

ನಂತರದ ಓವರ್​ಗಳಲ್ಲಿ ಉತ್ತಮ ಪ್ರದರ್ಶನ ತೋರಿದ ವಿರಾಟ್ ಕೊಹ್ಲಿ ಮತ್ತು ಶ್ರೇಯಸ್​ ಅಯ್ಯರ್​ ಭಾರತಕ್ಕೆ ಭರವಸೆ ನೀಡುವಂತೆ ಕಂಡುಬಂದರು. 22ನೇ ಓವರ್ ಅಂತ್ಯದ ವೇಳೆಗೆ ಕೊಹ್ಲಿ 53 (54ಎಸೆತ), ಶ್ರೇಯಸ್ 38 (35 ಎಸೆತ) ರನ್​ ಗಳಿಸುವ ಮೂಲಕ ಭಾರತದ ಮೊತ್ತವನ್ನು 153 ರನ್​ಗಳಿಗೆ ಏರಿಸಿದ್ದರು.

ಆದರೆ, 23ನೇ ಓವರ್​ನ ಮೊದಲ ಓವರ್​ನಲ್ಲೇ ಶ್ರೇಯಸ್​ ಅಯ್ಯರ್ ವಿಕೆಟ್ ಕಬಳಿಸಿದ ಹೆನ್ರಿ ಕ್ವೆಸ್, ಬ್ಲ್ಯೂ ಬಾಯ್ಸ್​ ವೇಗಕ್ಕೆ ತಡೆ ಒಡ್ಡಿದರು. ನಂತರ ಮೈದಾನಕ್ಕಿಳಿದ ಕರ್ನಾಟಕದ ಹುಡುಗ ಕೆ.ಎಲ್​.ರಾಹುಲ್ ಕೊಹ್ಲಿಯೊಂದಿಗೆ ಜೊತೆಯಾಗಿ ಗೆಲುವಿನ ಗುರಿಯತ್ತ ಓಟ ಆರಂಭಿಸಿದರು.

34ನೇ ಓವರ್ ಅಂತ್ಯಕ್ಕೆ 221 ರನ್​ಗಳನ್ನು ಕಲೆ ಹಾಕಿದ ಭಾರತಕ್ಕೆ ನಾಯಕ ಕೊಹ್ಲಿ ಹಾಗೂ ಕೆ.ಎಲ್.ರಾಹುಲ್ ಉತ್ತಮ ರೀತಿಯಲ್ಲಿ ಆಸರೆಯಾದರು. ಆದರೆ, 87 ಎಸೆತಗಳಲ್ಲಿ 7 ಫೋರ್ 2 ಸಿಕ್ಸರ್​ಗಳನ್ನು ಸಿಡಿಸಿ 89 ರನ್​ ಕಲೆ ಹಾಕಿದ್ದ ಕೊಹ್ಲಿ ಶತಕದ ಹೊಸ್ತಿಲಿನಲ್ಲಿ ಇರುವಾಗಲೇ ಹೇಜಲ್​ ವುಡ್ ಎಸೆತದಲ್ಲಿ ಬಂದ ಚೆಂಡನ್ನು ನೇರವಾಗಿ ಹೆನ್ರಿ ಕ್ವೆಸ್​ ಕೈಗೆ ಕಳಿಸಿ ಔಟ್ ಆದರು. ಆ ಮೂಲಕ ಭಾರತದ ನಾಲ್ಕನೇ ಮತ್ತು ಬಹುಮುಖ್ಯ ವಿಕೆಟ್ ಉರುಳಿ ಆಸಿಸ್​ ತಂಡಕ್ಕೆ ಗೆಲುವಿನ ಹಾದಿ ಮತ್ತಷ್ಟು ಸಲೀಸಾಯಿತು.

ಐದನೇ ವಿಕೆಟ್​ಗೆ ಜೊತೆಯಾದ ಹಾರ್ದಿಕ್​ ಪಾಂಡ್ಯ ಕೆ.ಎಲ್.ರಾಹುಲ್​ಗೆ ಸಾಥ್​ ನೀಡಿದರಾದರೂ ಆರ್ಭಟದ ಆಟವನ್ನೇನೂ ಆಡಲಿಲ್ಲ. 66 ರನ್​ಗಳಲ್ಲಿ 76 ರನ್​ ಪಡೆದು ಉತ್ತಮ ಪ್ರದರ್ಶನ ನೀಡುತ್ತಿದ್ದ ಕೆ.ಎಲ್​.ರಾಹುಲ್ ಔಟ್ ಆಗುವ ಹೊತ್ತಿಗೆ ಭಾರತ 43.3 ಓವರ್​ಗೆ 288 ರನ್​ ಗಳಿಸಿತ್ತು.

ಕಠಿಣ ಸಂದರ್ಭದಲ್ಲಿ ಉತ್ತಮ ಆಟವಾಡುತ್ತಿದ್ದ ರಾಹುಲ್ ನಿರ್ಗಮನ ಭಾರತಕ್ಕೆ ಮತ್ತಷ್ಟು ಹೊಡೆತ ನೀಡಿತು. ಅವರ ಬೆನ್ನಿಗೆ ಬಂದ ರವೀಂದ್ರ ಜಡೇಜಾ 11 ಎಸೆತಗಳಲ್ಲಿ 24 ರನ್​ ಸಿಡಿಸಿ ತಂಡದ ಲಯವನ್ನು ಕಾಪಾಡಲು ಹೋರಾಡುತ್ತಿರುವಾಗಲೇ ಮ್ಯಾಕ್ಸ್​ವೆಲ್ ಜಡೇಜಾ ಬ್ಯಾಟ್​ನಿಂದ ಚಿಮ್ಮಿದ ಚೆಂಡನ್ನು ಕ್ಯಾಚ್ ಪಡೆಯುವ ಮೂಲಕ ಭಾರತದ ಆರನೇ ವಿಕೆಟ್​ ಉರುಳಲು ಕಾರಣರಾದರು. ಜಡೇಜಾರ ಹಿಂದೆಯೇ ಪೆವಿಲಿಯನ್​ನತ್ತ ಹೆಜ್ಜೆ ಹಾಕಿದ ಪಾಂಡ್ಯ 31 ಎಸೆತಕ್ಕೆ 28 ರನ್​ಗಳಿಸಲಷ್ಟೇ ಶಕ್ಯರಾದರು.

ಅಷ್ಟರಲ್ಲಾಗಲೇ ಭಾರತ ಸೋಲಿನ ದವಡೆಗೆ ಸಿಕ್ಕಿಹಾಕಿಕೊಂಡಿತ್ತು. ನಂತರ ಬಂದ ನವದೀಪ್​ ಸೈನಿ ಔಟಾಗದೇ 10 ಎಸೆತಕ್ಕೆ 10 ರನ್ ಗಳಿಸಿದರೆ ಅವರ ನಂತರದಲ್ಲಿ ಬಂದು ಔಟ್​ ಆದ ಮಹಮ್ಮದ್​ ಶಮಿ 4 ಎಸೆತಕ್ಕೆ 1 ರನ್​, ಜಸ್​ಪ್ರೀತ್​ ಬೂಮ್ರಾ 2 ಬಾಲ್​ಗೆ ಒಂದು ರನ್​ ಸಹ ಪಡೆಯದೆ ಹೊರ ನಡೆದರು. ಕೊನೆಯ ಒಂಬತ್ತು ಎಸೆತಗಳು ಬಾಕಿ ಇರುವಾಗ ಬಂದ ಯಜುವೇಂದ್ರ ಚಹಲ್​ ಆರು ಎಸೆತಕ್ಕೆ ನಾಲ್ಕು ರನ್​ ಪಡೆದು ತಂಡದ ಮೊತ್ತವನ್ನು 338 ರನ್​ಗಳಿಗೆ ತಲುಪಿಸಿ, ಆಲ್​ ಔಟ್​ ಆಗುವುದರಿಂದ ತಂಡವನ್ನು ಪಾರುಮಾಡಿದರು.

ಆಸ್ಟ್ರೇಲಿಯಾ ಪರ ಬೌಲಿಂಗ್​ನಲ್ಲಿ ಸ್ಟಾರ್ಕ್​ 9 ಓವರ್​ಗಳಲ್ಲಿ ಯಾವುದೇ ವಿಕೆಟ್ ಪಡೆಯದೆ ಉದಾರವಾಗಿ 82 ರನ್ ನೀಡಿದರೆ ಉಳಿದವರು​ ಭಾರತ ತಂಡಕ್ಕೆ ಕಬ್ಬಿಣದ ಕಡಲೆಯಂತಾದರು. ಹೇಜಲ್​ ವುಡ್ 9 ಓವರ್​ಗೆ 59 ರನ್ ನೀಡಿ 2 ವಿಕೆಟ್, ಕಮ್ಮಿನ್ಸ್ 10 ಓವರ್​ಗೆ 67 ರನ್​ ನೀಡಿ 3 ವಿಕೆಟ್, ಆ್ಯಡಮ್ ಜಂಪಾ 10 ಓವರ್​ಗೆ 62 ರನ್​ ನೀಡಿ 2 ವಿಕೆಟ್, ಹೆನ್ರಿ ಕ್ವೆಸ್ 7 ಓವರ್​ಗಳಲ್ಲಿ 34 ರನ್​ ನೀಡಿ 1 ವಿಕೆಟ್ ಹಾಗೂ ಮ್ಯಾಕ್ಸ್​ವೆಲ್ 5 ಓವರ್​ಗಳಲ್ಲಿ 34 ರನ್​ ನೀಡಿ 1 ವಿಕೆಟ್ ಪಡೆಯುವ ಮೂಲಕ ಪ್ರವಾಸಿ ತಂಡ ಭಾರತವನ್ನು ಅತ್ಯಂತ ಸುಲಭವಾಗಿ ಮಣಿಸಿದರು.

ಇದನ್ನೂ ಓದಿ: India vs Australia, 2nd ODI: ಭಾರತಕ್ಕೆ ಎರಡು ಸೋಲು.. ಏಕದಿನ ಸರಣಿ ಆಸಿಸ್ ಪಾಲು!
ಕೊಹ್ಲಿ ನಾಯಕತ್ವದ ಕುರಿತು ಅಸಮಾಧಾನ ಹೊರಹಾಕಿದ ಕ್ರಿಕೆಟ್ ಪ್ರೇಮಿಗಳು!
ಟಿ20 ಕ್ರಿಕೆಟ್ ನನ್ನ ಬ್ಯಾಟಿಂಗ್ ಮೇಲೆ ದೊಡ್ಡ ಪ್ರಭಾವ ಬೀರಿದೆ: ಸ್ಟೀವ್ ಸ್ಮಿತ್