ಮೆಸ್ಸಿ ಪಡೆಗೆ ರತ್ನಗಂಬಳಿ: ಅರ್ಜೆಂಟೀನಾ ಫೈನಲ್ ಹಾದಿ ಸುಲಭ!

ಫಿಫಾ ವಿಶ್ವಕಪ್​ನ ಮೊದಲ ಸುತ್ತಿನ ಪಂದ್ಯಗಳು ಮುಗಿದು, ಇದೀಗ ನಾಕೌಟ್ ರೌಂಡ್ ಶುರುವಾಗಿದೆ. ಈ ಸುತ್ತಿನಲ್ಲಿ ಒಟ್ಟು 32 ತಂಡಗಳು ಕಣಕ್ಕಿಳಿಯಲಿವೆ. ಈ ತಂಡಗಳನ್ನು ಪೂರ್ವ ನಿಗದಿಯಂತೆ ಎರಡು ಗುಂಪುಗಳಾಗಿ ವಿಂಗಡಿಸಲಾಗಿದೆ. ಅಂದರೆ 16 ತಂಡಗಳು ಒಂದೇ ಹಾದಿಯಲ್ಲಿ ಕಣಕ್ಕಿಳಿದರೆ, ಮತ್ತೆ ಹದಿನಾರು ತಂಡಗಳು ಇನ್ನೊಂದು ಹಾದಿಯಲ್ಲಿ ಸಾಗಲಿವೆ. ಇದರ ಬೆನ್ನಲ್ಲೇ ಅರ್ಜೆಂಟೀನಾ ತಂಡದ ನಾಕೌಟ್ ಹಾದಿ ಚರ್ಚೆಗೆ ಕಾರಣವಾಗಿದೆ.

ಅರ್ಜೆಂಟೀನಾ ಹಾದಿ:

ಈ ಬಾರಿಯ ವಿಶ್ವಕಪ್​ನಲ್ಲಿ ಒಟ್ಟು 48 ತಂಡಗಳು ಕಣಕ್ಕಿಳಿದಿದ್ದವು. ಈ ತಂಡಗಳಲ್ಲಿ ಈಗ 32 ಟೀಮ್​ಗಳು ರೌಂಡ್ ಆಫ್ 32 ಅಥವಾ ನಾಕೌಟ್ ಹಂತಕ್ಕೇರಿದೆ. ನಾಕೌಟ್ ಹಂತದ ಬ್ರಾಕೆಟ್ ಅನ್ನು ಎರಡು ಭಾಗಗಳಾಗಿ ವಿಂಗಡಿಸಲಾಗಿದೆ. ಇದರಲ್ಲಿ ಅರ್ಜೆಂಟೀನಾ ಇರುವ ಬದಿಯಲ್ಲಿ ಸಾಂಪ್ರದಾಯಿಕ ಫುಟ್‌ಬಾಲ್ ದೈತ್ಯರ ಸಂಖ್ಯೆ ತೀರಾ ಕಡಿಮೆ.

ರೌಂಡ್ ಆಫ್ 32 ಹಂತದಲ್ಲಿ ಅರ್ಜೆಂಟೀನಾ ಜುಲೈ 3 ರಂದು ಮಿಯಾಮಿಯಲ್ಲಿ ಕೇಪ್ ವರ್ಡೆ ತಂಡವನ್ನು ಎದುರಿಸಲಿದೆ. ಆ ಬಳಿಕ ರೌಂಡ್ ಆಫ್ 16ರಲ್ಲಿ ಆಸ್ಟ್ರೇಲಿಯಾ ಅಥವಾ ಈಜಿಪ್ಟ್ ಎದುರಾಗಬಹುದು. ಕ್ವಾರ್ಟರ್ ಫೈನಲ್‌ನಲ್ಲಿ ಕೊಲಂಬಿಯಾ ಅಥವಾ ಸ್ವಿಟ್ಜರ್ಲೆಂಡ್ ವಿರುದ್ಧ ಕಣಕ್ಕಿಳಿಯಲಿದೆ. ಅಂದರೆ ಸೆಮಿಫೈನಲ್​ವರೆಗೆ ಅರ್ಜೆಂಟೀನಾ ಹಾದಿ ನಿರಾಳ.

ಇನ್ನು ಸೆಮಿಫೈನಲ್​ಗೇರಿದರೆ ಬ್ರೆಝಿಲ್ ಅಥವಾ ಇಂಗ್ಲೆಂಡ್ ತಂಡಗಳು ಎದುರಾಳಿಗಳಾಗಿ ಸಿಗಲಿದೆ. ಅಲ್ಲಿಯವರೆಗೆ ಯಾವುದೇ ಮಾಜಿ ವಿಶ್ವ ಚಾಂಪಿಯನ್ನರು ಮೆಸ್ಸಿ ಪಡೆಗೆ ಅಡ್ಡಬರುವುದಿಲ್ಲ ಎಂಬುದೇ ಅಚ್ಚರಿ.

ರತ್ನಗಂಬಳಿ:

ವಿಶ್ವದ ನಂಬರ್ 1 ರ್ಯಾಂಕಿಂಗ್ ಹೊಂದಿರುವ ಅರ್ಜೆಂಟೀನಾ ತಂಡವು ಸೆಮಿಫೈನಲ್​ವರೆಗೆ ಯಾವುದೇ ಬಲಿಷ್ಠ ತಂಡವನ್ನು ಎದುರಿಸುತ್ತಿಲ್ಲ. ಬದಲಾಗಿ ತನಗಿಂತ ದುರ್ಬಲ ತಂಡಗಳ ವಿರುದ್ಧವೇ ಕಣಕ್ಕಿಳಿಯಲಿದೆ. ಇದಕ್ಕೆ ಸಾಕ್ಷಿ ಅರ್ಜೆಂಟೀನಾ ಎದುರಾಳಿಗಳ ಪ್ರಸ್ತುತ ಫಿಫಾ ರ್ಯಾಂಕಿಂಗ್.

• ಕೇಪ್ ವರ್ಡೆ: 67ನೇ ರ್ಯಾಂಕ್​ ತಂಡ (32ನೇ ಸುತ್ತಿನಲ್ಲಿ)
• ಈಜಿಪ್ಟ್: 26ನೇ ರ್ಯಾಂಕ್​ ತಂಡ (16ನೇ ಸುತ್ತಿನಲ್ಲಿ) or
• ಆಸ್ಟ್ರೇಲಿಯಾ: 28ನೇ ರ್ಯಾಂಕ್​ ತಂಡ  (16ನೇ ಸುತ್ತಿನಲ್ಲಿ)
• ಕೊಲಂಬಿಯಾ: 11ನೇ ರ್ಯಾಂಕ್​ ತಂಡ  (ಕ್ವಾರ್ಟರ್ ಫೈನಲ್​ನಲ್ಲಿ) or
• ಸ್ವಿಟ್ಜರ್ಲೆಂಡ್: 16ನೇ ರ್ಯಾಂಕ್​ ತಂಡ (ಕ್ವಾರ್ಟರ್ ಫೈನಲ್​ನಲ್ಲಿ)
• ಇಂಗ್ಲೆಂಡ್: 4ನೇ ನೇ ರ್ಯಾಂಕ್​ ತಂಡ (ಸೆಮಿಫೈನಲ್​​ನಲ್ಲಿ) or
• ಬ್ರೆಝಿಲ್: 5ನೇ ರ್ಯಾಂಕ್​ ತಂಡ (ಸೆಮಿಫೈನಲ್​ನಲ್ಲಿ)

ಅಂದರೆ  ಅರ್ಜೆಂಟೀನಾ ತಂಡವು ಫಿಫಾ ವಿಶ್ವಕಪ್​ನಲ್ಲಿ ಟಾಪ್-10 ನಲ್ಲಿ ಕಾಣಿಸಿಕೊಂಡಿರುವ ತಂಡವನ್ನು ಎದುರಿಸುವುದು ಸೆಮಿಫೈನಲ್​ನಲ್ಲಿ ಮಾತ್ರ. ಅದುವರೆಗೆ ದುರ್ಬಲ ತಂಡಗಳ ವಿರುದ್ಧವೇ ಕಣಕ್ಕಿಳಿಯಲಿವೆ. ಹೀಗಾಗಿಯೇ ಈ ಬಾರಿ ಅರ್ಜೆಂಟೀನಾ ಪಡೆ ಸೆಮಿಫೈನಲ್​ಗೇರುವುದು ಖಚಿತ ಎನ್ನಲಾಗುತ್ತಿದೆ.

‘ಮರಣ ಮೃದಂಗ’:

ಅರ್ಜೆಂಟೀನಾ ಹಾದಿ ಇಷ್ಟು ಸುಲಭವಾಗಿ ಕಾಣಲು ಮುಖ್ಯ ಕಾರಣ, ಬ್ರಾಕೆಟ್‌ನ ಮತ್ತೊಂದು ಬದಿಯಲ್ಲಿ ಯೂರೋಪಿನ ಘಟಾನುಘಟಿ ತಂಡಗಳು ಮುಖಾಮುಖಿಯಾಗುತ್ತಿರುವುದು.

ಫ್ರಾನ್ಸ್, ಜರ್ಮನಿ, ಸ್ಪೇನ್, ಪೋರ್ಚುಗಲ್, ನೆದರ್ಲ್ಯಾಂಡ್ಸ್, ಕ್ರೊಯೇಷಿಯಾ ಮತ್ತು ಬೆಲ್ಜಿಯಂ ತಂಡಗಳು ಒಂದೇ ಬದಿಯಲ್ಲಿವೆ. ಇದರರ್ಥ, ಈ ಯೂರೋಪಿಯನ್ ದೈತ್ಯರು ರೌಂಡ್ ಆಫ್ 16 ಮತ್ತು ಕ್ವಾರ್ಟರ್ ಫೈನಲ್ ಹಂತಗಳಲ್ಲೇ ಪರಸ್ಪರ ಮುಖಾಮುಖಿಯಾಗಿ ಟೂರ್ನಿಯಿಂದ ಹೊರಬೀಳಲಿದ್ದಾರೆ.

• ಫ್ರಾನ್ಸ್: 2ನೇ ರ್ಯಾಂಕ್
• ಸ್ಪೇನ್: 3ನೇ ರ್ಯಾಂಕ್
• ನೆದರ್ಲ್ಯಾಂಡ್ಸ್: 7ನೇ ರ್ಯಾಂಕ್
• ಪೋರ್ಚುಗಲ್: 8ನೇ ರ್ಯಾಂಕ್
• ಬೆಲ್ಜಿಯಂ: 10ನೇ ರ್ಯಾಂಕ್
• ಜರ್ಮನಿ: 12ನೇ ರ್ಯಾಂಕ್
• ಕ್ರೊಯೇಷಿಯಾ: 13ನೇ ರ್ಯಾಂಕ್

ವಿಶ್ವದ ಟಾಪ್ 10 ತಂಡಗಳ ಪೈಕಿ ಬರೋಬ್ಬರಿ 5 ಸೂಪರ್ ಪವರ್ ತಂಡಗಳು (ಫ್ರಾನ್ಸ್, ಸ್ಪೇನ್, ನೆದರ್ಲ್ಯಾಂಡ್ಸ್, ಪೋರ್ಚುಗಲ್, ಬೆಲ್ಜಿಯಂ) ಮತ್ತು ಅತ್ಯಂತ ಬಲಿಷ್ಠ ಜರ್ಮನಿ ತಂಡ ಇವೆಲ್ಲವೂ ನಾಕೌಟ್ ಬ್ರಾಕೆಟ್‌ನ ಒಂದೇ ಗುಂಪಿನಲ್ಲಿ ಮುಖಾಮುಖಿಯಾಗುತ್ತಿವೆ. ಹೀಗಾಗಿಯೇ ಈ ಬ್ರಾಕೆಟ್ ಅನ್ನು ಇದೀಗ ‘ಮರಣ ಮೃದಂಗ’ ಎಂದು ವಿಶ್ಲೇಷಿಸಲಾಗುತ್ತಿದೆ.

ಅರ್ಜೆಂಟೀನಾಗೆ ಸುವರ್ಣಾವಕಾಶ:

ಇಲ್ಲಿ ಅರ್ಜೆಂಟೀನಾ ತಂಡದ ಬಲಿಷ್ಠತೆಯ ಮುಂದೆ ಉಳಿದ ತಂಡಗಳು ದುರ್ಬಲವಾಗಿ ಕಂಡರೂ ಯಾವುದೇ ತಂಡವನ್ನು ಹಗುರವಾಗಿ ಪರಿಗಣಿಸುವಂತಿಲ್ಲ. ಕೇಪ್ ವರ್ಡೆ ಅಥವಾ ಕೊಲಂಬಿಯಾ ತಂಡಗಳು ಕಾಗದದ ಮೇಲೆ ದುರ್ಬಲವಾಗಿದ್ದರೂ, ಮೈದಾನದಲ್ಲಿ ಯಾವುದೇ ಹಂತದಲ್ಲೂ ಆಘಾತ ನೀಡಬಹುದು.

ಇದನ್ನೂ ಓದಿ: ಟೀಮ್ ಇಂಡಿಯಾದ ಮುಂದಿನ ಎದುರಾಳಿ ಯಾರು? ಇಲ್ಲಿದೆ ವೇಳಾಪಟ್ಟಿ

ಆದಾಗ್ಯೂ, ವಿಶ್ವಕಪ್​ ಇತಿಹಾಸದಲ್ಲೇ ಇಷ್ಟು ಸುಲಭವಾಗಿ ಸೆಮಿಫೈನಲ್ ಅಥವಾ ಫೈನಲ್ ತಲುಪುವ ಅವಕಾಶ ಹಾಲಿ ಚಾಂಪಿಯನ್ನರಿಗೆ ಸಿಕ್ಕಿರುವುದೇ ವಿಶೇಷ. ಈ ಅವಕಾಶವನ್ನು ಬಳಸಿ ಲಿಯೋನೆಲ್ ಮೆಸ್ಸಿ ಪಡೆ ಮತ್ತೊಮ್ಮೆ ವಿಶ್ವಕಪ್ ಕಿರೀಟ ಮುಡಿಗೇರಿಸಿಕೊಳ್ಳಲಿದೆಯಾ ಕಾದು ನೋಡಬೇಕಿದೆ.