IND vs BAN: ಅತ್ಯಲ್ಪ ಮೊತ್ತ ಬೆನ್ನತ್ತಲು ವಿಫಲರಾಗಿ ಸೋತ ಟೀಮ್ ಇಂಡಿಯಾ

India vs Bangladesh: ಢಾಕಾದ ಶೇರೆ ಬಾಂಗ್ಲಾ ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ ಮಹಿಳಾ ತಂಡದ ವಿರುದ್ಧ ಬಾಂಗ್ಲಾದೇಶ್ ಮಹಿಳಾ ತಂಡ ಭರ್ಜರಿ ಜಯ ಸಾಧಿಸಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಭಾರತ ತಂಡದ ನಾಯಕಿ ಹರ್ಮನ್​ಪ್ರೀತ್ ಕೌರ್ ಬೌಲಿಂಗ್ ಆಯ್ಕೆ ಮಾಡಿಕೊಂಡಿದ್ದರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಬಾಂಗ್ಲಾದೇಶ್ ತಂಡ ಉತ್ತಮ ಆರಂಭ ಪಡೆದಿರಲಿಲ್ಲ. ಆರಂಭಿಕ ಆಟಗಾರ್ತಿ ಶರ್ಮಿನ್ ಅಖ್ತರ್ (0) ಶೂನ್ಯಕ್ಕೆ ಔಟಾದರೆ, ಮುರ್ಶಿದಾ ಖಾನ್ 13 ರನ್​ಗಳಿಗೆ ಇನಿಂಗ್ಸ್ ಅಂತ್ಯಗೊಳಿಸಿದರು.

ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಫರ್ಗಾನಾ ಹೋಕ್ (27) ಹಾಗೂ ನಾಯಕಿ ನಿಗರ್ ಸುಲ್ತಾನ 39 ರನ್​ ಬಾರಿಸಿದರು. ಆದರೆ ಆ ಬಳಿಕ ದಿಢೀರ್ ಕುಸಿತಕ್ಕೊಳಗಾದ ಬಾಂಗ್ಲಾದೇಶ್ ತಂಡವು 43 ಓವರ್​ಗಳಲ್ಲಿ 152 ರನ್​ಗಳಿಸಿ ಆಲೌಟ್ ಆಯಿತು.

ಈ ಸುಲಭ ಗುರಿ ಬೆನ್ನತ್ತಿದ ಭಾರತ ತಂಡವು ಉತ್ತಮ ಆರಂಭ ಪಡೆಯಲಿಲ್ಲ. ಆರಂಭಿಕ ಆಟಗಾರ್ತಿಯರಾದ ಪ್ರಿಯಾ ಪುನಿಯಾ (10) ಹಾಗು ಸ್ಮೃತಿ ಮಂಧಾನ (11) ಬೇಗನೆ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ಹರ್ಮನ್​ಪ್ರೀತ್ ಕೌರ್ (5) ಹಾಗೂ ಯಾಸ್ತಿಕಾ ಭಾಟಿಯಾ ಕೂಡ ಔಟಾದರು.

ಕೇವಲ 44 ರನ್​ಗಳಿಗೆ 4 ವಿಕೆಟ್ ಉರುಳಿಸಿ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ ಬಾಂಗ್ಲಾದೇಶ್ ವನಿತೆಯರು ಟೀಮ್ ಇಂಡಿಯಾ ರನ್​ ಗಳಿಕೆಯನ್ನು ನಿಯಂತ್ರಿಸಿದರು. ಇನ್ನು ಜೆಮಿಮಾ ರೊಡ್ರಿಗಾಸ್ (10) ಹಾಗೂ ದೀಪ್ತಿ ಶರ್ಮಾ (20), ಅಮನ್ಜೊತ್ ಕೌರ್ (15) ಹಾಗೂ ಸ್ನೇಹ್ ರಾಣಾ (0) ಕೂಡ ಬಂದ ವೇಗದಲ್ಲೇ ಹಿಂತಿರುಗಿದರು. ಇತ್ತ ಕೇವಲ 91 ರನ್​ಗಳಿಗೆ 8 ವಿಕೆಟ್ ಕಳೆದುಕೊಂಡ ಟೀಮ್ ಇಂಡಿಯಾಗೆ ಖಚಿತವಾಗಿತ್ತು.

ಇನ್ನು 9ನೇ ವಿಕೆಟ್ ಆಗಿ ಪೂಜಾ ವಸ್ತ್ರಾಕರ್ (7) ಔಟಾದರೆ, ಬಾರೆಡ್ಡಿ ಅನುಷಾ (2) ರನೌಟ್ ಆದರು. ಇದರೊಂದಿಗೆ ಟೀಮ್ ಇಂಡಿಯಾ 35.5 ಓವರ್​ಗಳಲ್ಲಿ 113 ರನ್​ಗಳಿಗೆ ಸರ್ವಪತನ ಕಂಡಿತು. ಇತ್ತ ಅತ್ಯಲ್ಪ ಮೊತ್ತ ಕಲೆಹಾಕಿದರೂ ಭರ್ಜರಿ ಬೌಲಿಂಗ್ ಮೂಲಕ ಬಾಂಗ್ಲಾದೇಶ್ ವನಿತೆಯರು 40 ರನ್​ಗಳಿಂದ ಪಂದ್ಯವನ್ನು ಗೆದ್ದುಕೊಂಡರು.

ಬಾಂಗ್ಲಾದೇಶ್ ಪ್ಲೇಯಿಂಗ್ 11: ಮುರ್ಷಿದಾ ಖಾತುನ್ , ಶರ್ಮಿನ್ ಅಖ್ತರ್ , ಫರ್ಗಾನಾ ಹೋಕ್ , ನಿಗರ್ ಸುಲ್ತಾನಾ (ನಾಯಕಿ) , ಶೋರ್ನಾ ಅಕ್ತರ್ , ನಹಿದಾ ಅಕ್ತರ್ , ರಿತು ಮೋನಿ , ಫಾಹಿಮಾ ಖಾತುನ್ , ರಬೇಯಾ ಖಾನ್ , ಮಾರುಫಾ ಅಕ್ತರ್ , ಸುಲ್ತಾನಾ ಖಾತುನ್.

ಇದನ್ನೂ ಓದಿ: Virat Kohli: ಬರೋಬ್ಬರಿ 1673 ದಿನಗಳು…ಮುಂದುವರೆದ ಕಿಂಗ್ ಕೊಹ್ಲಿಯ ಶತಕದ ಕಾಯುವಿಕೆ..!

ಟೀಮ್ ಇಂಡಿಯಾ ಪ್ಲೇಯಿಂಗ್ 11: ಸ್ಮೃತಿ ಮಂಧಾನ , ಪ್ರಿಯಾ ಪುನಿಯಾ , ಜೆಮಿಮಾ ರೊಡ್ರಿಗಸ್ , ಹರ್ಮನ್‌ಪ್ರೀತ್ ಕೌರ್ (ನಾಯಕಿ) , ಯಾಸ್ತಿಕಾ ಭಾಟಿಯಾ (ವಿಕೆಟ್ ಕೀಪರ್) , ದೀಪ್ತಿ ಶರ್ಮಾ , ದೇವಿಕಾ ವೈದ್ಯ , ಅಮಂಜೋತ್ ಕೌರ್ , ಪೂಜಾ ವಸ್ತ್ರಾಕರ್ , ಸ್ನೇಹ ರಾಣಾ , ಬಾರೆಡ್ಡಿ ಅನುಷಾ.