ವೈಭವ್‌ನನ್ನು ಅಣಕಿಸಿದ ಸೈಮ್‌ಗೆ ಪಾಕ್ ಮಾಜಿ ಆಟಗಾರನಿಂದಲೇ ಸರಿಯಾದ ಶಾಸ್ತಿ!

2026ರ ಏಷ್ಯನ್ ಗೇಮ್ಸ್‌ನ ಪುರುಷರ ಕ್ರಿಕೆಟ್ ಫೈನಲ್ ಪಂದ್ಯದಲ್ಲಿ ಭಾರತದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿಯನ್ನು ಅಣಕಿಸಿದ ಪಾಕಿಸ್ತಾನದ ಆಟಗಾರ ಸೈಮ್ ಅಯ್ಯೂಬ್ ನಡೆಗೆ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ತನ್ವೀರ್ ಅಹ್ಮದ್ ಅವರು ಸೈಮ್ ಅವರ ಈ “ಬೇಬಿ-ಕ್ರಾಡಲ್” (ಮಗುವನ್ನು ತೊಟ್ಟಿಲು ತೂಗುವ) ಸಂಭ್ರಮಾಚರಣೆಯನ್ನು ಕಟುವಾಗಿ ಟೀಕಿಸಿದ್ದಾರೆ.

ಪಂದ್ಯದಲ್ಲಿ ನಡೆದಿದ್ದೇನು?

ಜಪಾನ್​ನಲ್ಲಿ ನಡೆದ ಏಷ್ಯನ್ ಗೇಮ್ಸ್​ನ ಟಿ20 ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಭಾರತ ಮತ್ತು ಪಾಕಿಸ್ತಾನ್ ತಂಡಗಳು ಮುಖಾಮುಖಿಯಾಗಿತ್ತು. ಈ ಪಂದ್ಯದಲ್ಲಿ ಭಾರತದ ಯುವ ಆರಂಭಿಕ ಆಟಗಾರ ವೈಭವ್ ಸೂರ್ಯವಂಶಿ ಪಾಕ್ ಬೌಲರ್‌ಗಳ ವಿರುದ್ಧ ಆಕ್ರಮಣಕಾರಿ ಬ್ಯಾಟಿಂಗ್ ನಡೆಸಿ ಎರಡು ಭರ್ಜರಿ ಸಿಕ್ಸರ್‌ಗಳನ್ನು ಬಾರಿಸಿದ್ದರು. ಇದಾದ ಬಳಿಕ ಸೈಮ್ ಅಯ್ಯೂಬ್ ಎಸೆದ ಓವರ್‌ನಲ್ಲಿ ರಿವರ್ಸ್ ಸ್ವೀಪ್ ಮಾಡಲು ಹೋಗಿ ವಿಕೆಟ್‌ಕೀಪರ್‌ಗೆ ಕ್ಯಾಚ್ ನೀಡಿದರು.

ವಿಕೆಟ್ ಪಡೆದ ತಕ್ಷಣ, ಸೈಮ್ ಅಯ್ಯೂಬ್ ಅವರು ಔಟಾಗಿ ಹೊರನಡೆಯುತ್ತಿದ್ದ 15 ವರ್ಷದ ಸೂರ್ಯವಂಶಿ ಅವರ ವಯಸ್ಸನ್ನು ಅಣಕಿಸುವಂತೆ “ನೀನಿನ್ನೂ ಮಗು” ಎಂಬಾರ್ಥದಲ್ಲಿ ತೊಟ್ಟಿಲು ತೂಗುವ ಸೆಲೆಬ್ರೇಷನ್ ಮಾಡಿದ್ದರು.

Waiting for the next Asia Cup.
When this baby Vaibhav Sooryavanshi will give this idiot Saim Ayub a belt treatment
#INDvsPAK https://t.co/MfCClQ81wc

— Pinkie (@PinkiePragya) October 3, 2026

ತನ್ವೀರ್ ಅಹ್ಮದ್ ಆಕ್ರೋಶ:

ಸೈಮ್ ಅಯ್ಯೂಬ್ ಅವರ ಈ ಸೆಲೆಬ್ರೇಷನ್ ವಿರುದ್ಧ ಪಾಕಿಸ್ತಾನದ ಮಾಜಿ ವೇಗಿ ತನ್ವೀರ್ ಅಹ್ಮದ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ಪಾಕ್ ಆಟಗಾರನ ನಡೆಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

“ಮೊದಲು ನಿಮ್ಮ ಪ್ರದರ್ಶನವನ್ನು ಸುಧಾರಿಸಿಕೊಳ್ಳಿ, ನಂತರ ಎದುರಾಳಿಗಳನ್ನು ಅಣಕಿಸಿ. ನೀವಿನ್ನೂ ಜಾಗತಿಕ ಕ್ರಿಕೆಟ್‌ನಲ್ಲಿ ಸೂಪರ್ ಸ್ಟಾರ್ ಆಗಿಲ್ಲ. ನಿಮ್ಮ ಆಟದಲ್ಲಿ ಸ್ಥಿರತೆಯೇ ಇಲ್ಲದಿರುವಾಗ, ನಿಮ್ಮ ಅರ್ಧ ವಯಸ್ಸಿನ ಯುವ ಬ್ಯಾಟರ್ ವಿರುದ್ಧ ಇಂತಹ ಉದ್ಧಟತನ ತೋರುವುದು ಸರಿಯಲ್ಲ” ಎಂದು ತನ್ವೀರ್ ಕಿಡಿಕಾರಿದ್ದಾರೆ.

“ಸೈಮ್ ಅಯ್ಯೂಬ್ ಮೈದಾನದಲ್ಲಿ ಸನ್‌ಗ್ಲಾಸ್ ಧರಿಸಿ ಬೌಲಿಂಗ್ ಮಾಡುತ್ತಾನೆ. ಸಾದ್ ಮಸೂದ್ ತನ್ನ ಮೊದಲ ಪಂದ್ಯದಲ್ಲೇ ಸನ್‌ಗ್ಲಾಸ್ ಧರಿಸಿ ಆಡುತ್ತಿದ್ದಾನೆ. ಅಸಲಿಗೆ ನಿಮ್ಮನ್ನು ನೀವು ಏನೆಂದುಕೊಂಡಿದ್ದೀರಿ? ನೀವಿನ್ನೂ ಯುವ ಆಟಗಾರರು, ಇವು ನಿಮ್ಮ ವೃತ್ತಿಜೀವನದ ಆರಂಭಿಕ ಪಂದ್ಯಗಳು. ಸೈಮ್ ಅಯ್ಯೂಬ್ ಸರಿಯಾಗಿ ಪ್ರದರ್ಶನ ನೀಡುತ್ತಿಲ್ಲ, ಆದರೂ ಅವರ ಕಣ್ಣಿನಿಂದ ಸನ್‌ಗ್ಲಾಸ್ ಮಾತ್ರ ಕೆಳಗೆ ಇಳಿಯುತ್ತಿಲ್ಲ!” ಎಂದು ತನ್ವೀರ್ ಅಹ್ಮದ್ ವ್ಯಂಗ್ಯವಾಡಿದ್ದಾರೆ.

ವೈಭವ್ ಸೂರ್ಯವಂಶಿ ವಿಕೆಟ್ ಪಡೆದ ನಂತರ ಮಾಡಿದ ‘ಬೇಬಿ ಸೆಲೆಬ್ರೇಷನ್’ ಅನ್ನು ಪ್ರಶ್ನಿಸಿದ ತನ್ವೀರ್, “ಅಷ್ಟೊಂದು ಚಿಕ್ಕ ವಯಸ್ಸಿನ ಬ್ಯಾಟರ್ ವಿಕೆಟ್ ಪಡೆದ ನಂತರ ಆ ತರಹದ ಬೇಬಿ ಆಕ್ಟ್ ಮಾಡುವುದು ಯಾವ ರೀತಿಯ ಪ್ರತಿಭೆ? ವೈಭವ್ ಈಗಾಗಲೇ ಹಲವು ಪ್ರಮುಖ ಬೌಲರ್​ಗಳನ್ನು ದಂಡಿಸಿ ತನ್ನ ಸಾಮರ್ಥ್ಯವನ್ನು ತೆರೆದಿಟ್ಟಿದ್ದಾನೆ. ನೀವುಗಳು ಇಂತಹ ನಾಟಕಗಳನ್ನು ಬಿಟ್ಟು ಆಟದ ಕಡೆ ಗಮನಹರಿಸಿ” ಎಂದು ಪಾಕ್ ಆಟಗಾರರನ್ನು ನೇರವಾಗಿಯೇ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಒಟ್ಟಾರೆಯಾಗಿ, ಏಷ್ಯನ್ ಗೇಮ್ಸ್‌ನಂತಹ ದೊಡ್ಡ ವೇದಿಕೆಯಲ್ಲಿ ಕ್ರೀಡಾ ಸ್ಫೂರ್ತಿಗಿಂತ ಮಿಗಿಲಾದದ್ದು ಮತ್ತೊಂದಿಲ್ಲ. ಭಾರತದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ ಅವರ ವಯಸ್ಸನ್ನು ಅಣಕಿಸಲು ಸೈಮ್ ಅಯ್ಯೂಬ್ ಮಾಡಿದ “ಬೇಬಿ ಸೆಲೆಬ್ರೇಷನ್”, ಅಂತಿಮವಾಗಿ ಪಾಕಿಸ್ತಾನ್ ತಂಡಕ್ಕೇ ದೊಡ್ಡ ಮುಖಭಂಗವಾಗಿ ಪರಿಣಮಿಸಿತು.

ಇದನ್ನೂ ಓದಿ: ಬ್ರಾರ್ ಎಡವಟ್ಟು… ಪ್ರಾಣಾಪಾಯದಿಂದ ಸಿರಾಜ್ ಪಾರು!

ಮೈದಾನದಲ್ಲಿ ಅನಗತ್ಯ ಉದ್ಧಟತನ ಮತ್ತು ಫ್ಯಾಷನ್ ಪ್ರದರ್ಶಿಸುವ ಬದಲು, ಆಟದ ಕಡೆಗೆ ಗಮನಹರಿಸಬೇಕು ಎಂಬ ತನ್ವೀರ್ ಅಹ್ಮದ್ ಅವರ ಮಾತುಗಳು ಇಂದಿನ ಯುವ ಆಟಗಾರರಿಗೆ ಒಂದು ಎಚ್ಚರಿಕೆಯ ಗಂಟೆಯಾಗಿದೆ. ಕ್ರಿಕೆಟ್‌ನಲ್ಲಿ ಎದುರಾಳಿಗೆ ಗೌರವ ನೀಡುವುದು ಮತ್ತು ಮೈದಾನದಲ್ಲಿ ಪ್ರದರ್ಶನದ ಮೂಲಕವೇ ಉತ್ತರ ನೀಡುವುದು ನಿಜವಾದ ಚಾಂಪಿಯನ್ನರ ಲಕ್ಷಣ ಎಂಬುದನ್ನು ಭಾರತ ಈ ಪಂದ್ಯದಲ್ಲಿ ಚಿನ್ನದ ಪದಕ ಗೆಲ್ಲುವ ಮೂಲಕ ಮತ್ತೊಮ್ಮೆ ಸಾಬೀತುಪಡಿಸಿದೆ.