IND vs ENG: ಟೀಮ್ ಇಂಡಿಯಾ…ಇದುವೇ ಬಾಝ್ಬಾಲ್ ಎಫೆಕ್ಟ್..!
India vs England Test: ಭಾರತ ಮತ್ತು ಇಂಗ್ಲೆಂಡ್ ನಡುವಣ 2ನೇ ಟೆಸ್ಟ್ ಪಂದ್ಯವು ಶುಕ್ರವಾರದಿಂದ ಶುರುವಾಗಲಿದೆ. ವಿಶಾಖಪಟ್ಟಣದಲ್ಲಿ ನಡೆಯಲಿರುವ ಈ ಪಂದ್ಯದಲ್ಲಿ ಗೆಲ್ಲುವ ಸರಣಿಯಲ್ಲಿ ಸಮಬಲ ಸಾಧಿಸುವ ಇರಾದೆಯಲ್ಲಿದೆ ಟೀಮ್ ಇಂಡಿಯಾ.
190 ರನ್ಗಳ ಮೊದಲ ಇನಿಂಗ್ಸ್ ಮುನ್ನಡೆ…163 ರನ್ಗಳಿಗೆ 5 ವಿಕೆಟ್….ಸ್ಕೋರ್ ಬೋರ್ಡ್ನಲ್ಲಿ ಈ ಎರಡು ಅಂಕಿಗಳನ್ನು ನೋಡಿದವರೆಲ್ಲರೂ ಈ ಪಂದ್ಯದಲ್ಲಿ ಭಾರತ ಗೆಲ್ಲುವುದು ಖಚಿತ ಎಂದು ಷರಾ ಬರೆದಿದ್ದರು. ಏಕೆಂದರೆ ಈ ಹಂತದಲ್ಲಿ ಇಡೀ ಪಂದ್ಯ ಟೀಮ್ ಇಂಡಿಯಾ (Team India) ಹಿಡಿತದಲ್ಲಿತ್ತು. ಹೀಗಾಗಿಯೇ ಇಂಗ್ಲೆಂಡ್ ತಂಡದ ಸೋಲನ್ನು ನಿರೀಕ್ಷಿಸಲಾಗಿತ್ತು.
ಆದರೆ ಸಂಕಷ್ಟಕ್ಕೆ ಸಿಲುಕಿದರೂ ಇಂಗ್ಲೆಂಡ್ ತನ್ನ ರಣತಂತ್ರವನ್ನು ಮಾತ್ರ ಬದಲಿಸಿರಲಿಲ್ಲ. ಆ ರಣತಂತ್ರದಿಂದಲೇ ಇದೀಗ ಸೋಲುವ ಪಂದ್ಯದಲ್ಲೂ ಇಂಗ್ಲೆಂಡ್ ಗೆದ್ದಿದೆ. ಅದರಲ್ಲೂ ತವರಿನಲ್ಲಿ 190 ರನ್ಗಳ ಮುನ್ನಡೆ ಸಾಧಿಸಿ ಟೀಮ್ ಇಂಡಿಯಾ ಸೋತಿರುವುದು ಇದೇ ಮೊದಲ ಬಾರಿಗೆ…ಅಲ್ಲಿಗೆ ಟೀಮ್ ಇಂಡಿಯಾ ಪಾಲಿಗೂ ಬಾಝ್ಬಾಲ್ ಎಫೆಕ್ಟ್ ಅರ್ಥವಾದಂತಾಗಿದೆ.
ಏಕೆಂದರೆ ಮೊದಲ ಇನಿಂಗ್ಸ್ನಲ್ಲಿ ಆಕ್ರಮಣಕಾರಿ ಬ್ಯಾಟಿಂಗ್ಗೆ ಮುಂದಾಗಿದ್ದ ಇಂಗ್ಲೆಂಡ್ ತಂಡವನ್ನು ಟೀಮ್ ಇಂಡಿಯಾ ಬೌಲರ್ಗಳು 246 ರನ್ಗಳಿಗೆ ಆಲೌಟ್ ಮಾಡಿದ್ದರು. ಇದರ ಬೆನ್ನಲ್ಲೇ ಆಂಗ್ಲರ ಬಾಝ್ಬಾಲ್ ತಂತ್ರಗಾರಿಕೆ ಭಾರತದಲ್ಲಿ ನಡೆಯಲ್ಲ ಎಂದು ಮೂದಲಿಸಲಾಗಿತ್ತು. ಅಷ್ಟೇ ಅಲ್ಲದೆ, ಭಾರತ ತಂಡವು ಪ್ರಥಮ ಇನಿಂಗ್ಸ್ನಲ್ಲಿ ಬರೋಬ್ಬರಿ 436 ರನ್ ಕಲೆಹಾಕಿತು. ಈ ಮೂಲಕ 190 ರನ್ಗಳ ಮುನ್ನಡೆ ಸಾಧಿಸಿ ಅರ್ಧ ಪಂದ್ಯ ಗೆದ್ದಾಗಿತ್ತು.
ಆದರೆ ದ್ವಿತೀಯ ಇನಿಂಗ್ಸ್ನಲ್ಲಿ ಇಂಗ್ಲೆಂಡ್ ತಂಡಕ್ಕೆ ಎರಡು ಆಯ್ಕೆಗಳಿದ್ದವು. ಒಂದು ಪಂದ್ಯವನ್ನು ಡ್ರಾ ಮಾಡಿಕೊಳ್ಳುವುದು. ಎರಡನೇಯದು ಸೋಲೊಪ್ಪಿಕೊಳ್ಳುವುದು. ಇಂತಹ ಸಂದಿಗ್ಥ ಸಂದರ್ಭದಲ್ಲೂ ಇಂಗ್ಲೆಂಡ್ ತನ್ನ ರಣತಂತ್ರ ಬದಲಿಸಲಿಲ್ಲ.
ಮತ್ತದೇ ಬಾಝ್ಬಾಲ್ ಆಟ…ದ್ವಿತೀಯ ಇನಿಂಗ್ಸ್ನಲ್ಲೂ ಆಕ್ರಮಣಕಾರಿ ಬ್ಯಾಟಿಂಗ್ ಮುಂದುವರೆಸಿತು. ಆರಂಭಿಕರಾದ ಝಾಕ್ ಕ್ರಾಲಿ, ಬೆನ್ ಡಕೆಟ್ ಹಾಗೂ ಒಲೀ ಪೋಪ್ ಜೊತೆಗೂಡಿ ಕೇವಲ 18 ಓವರ್ಗಳಲ್ಲಿ ತಂಡದ ಮೊತ್ತವನ್ನು 100ರ ಗಡಿದಾಟಿಸಿದ್ದರು.
ಈ ಹಂತದಲ್ಲಿ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ ಟೀಮ್ ಇಂಡಿಯಾ ಬೌಲರ್ಗಳು ಬ್ಯಾಕ್ ಟು ಬ್ಯಾಕ್ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರು. ಪರಿಣಾಮ 113 ರನ್ಗಳಿಗೆ 2 ವಿಕೆಟ್ ಕಳೆದುಕೊಂಡಿದ್ದ ಇಂಗ್ಲೆಂಡ್ ತಂಡವು 50 ರನ್ ಕಲೆಹಾಕುವಷ್ಟರಲ್ಲಿ ಮತ್ತೆ 3 ವಿಕೆಟ್ ಕಳೆದುಕೊಂಡಿತು.
163 ರನ್ಗಳಿಗೆ 5 ವಿಕೆಟ್…ಈ ಸ್ಕೋರ್ ಬೋರ್ಡ್ ನೋಡಿದವರೆಲ್ಲರೂ ಇಂಗ್ಲೆಂಡ್ಗೆ ಸೋಲು ಖಚಿತ ಎಂದಿದ್ದರು. ಆದರೆ ಈ ಹಂತದಲ್ಲೂ ಆಂಗ್ಲರು ಕುಗ್ಗಲಿಲ್ಲ. ತನ್ನ ಆಕ್ರಮಣಕಾರಿ ಬ್ಯಾಟಿಂಗ್ ಶೈಲಿಯನ್ನೇ ಮುಂದುವರೆಸಿತು.
ಬಿರುಸಿನ ಬ್ಯಾಟಿಂಗ್ನೊಂದಿಗೆ ಒಲೀ ಪೋಪ್ 154 ಎಸೆತಗಳಲ್ಲಿ ಶತಕ ಪೂರೈಸಿದರು. ಇಂಗ್ಲೆಂಡ್ ತಂಡದ ಉಪನಾಯಕನಿಗೆ ಉತ್ತಮ ಸಾಥ್ ನೀಡಿದ ಕೆಳ ಕ್ರಮಾಂಕದ ಬ್ಯಾಟರ್ಗಳು ಕೂಡ ಟೀಮ್ ಇಂಡಿಯಾ ಬೌಲರ್ಗಳ ವಿರುದ್ಧ ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದರು.
ಪರಿಣಾಮ ಸ್ಪಿನ್ನರ್ ರೆಹಾನ್ ಅಹ್ಮದ್ ಬ್ಯಾಟ್ನಿಂದ 53 ಎಸೆತಗಳಲ್ಲಿ 28 ರನ್ ಮೂಡಿಬಂತು. ಮತ್ತೋರ್ವ ಸ್ಪಿನ್ನರ್ ಟಾಮ್ ಹಾರ್ಟ್ಲೆ 52 ಎಸೆತಗಳಲ್ಲಿ 34 ರನ್ ಬಾರಿಸಿದರು. ಇನ್ನು 278 ಎಸೆತಗಳನ್ನು ಎದುರಿಸಿದ ಒಲೀ ಪೋಪ್ 21 ಫೋರ್ಗಳೊಂದಿಗೆ 196 ರನ್ ಸಿಡಿಸಿದರು. ಈ ಮೂಲಕ ದ್ವಿತೀಯ ಇನಿಂಗ್ಸ್ನಲ್ಲಿ ಇಂಗ್ಲೆಂಡ್ 420 ರನ್ ಕಲೆಹಾಕಿತು. ಅಂದರೆ ಸೋಲಿನ ಸುಳಿಯಲ್ಲಿದ್ದ ಇಂಗ್ಲೆಂಡ್ ತಂಡವು ದ್ವಿತೀಯ ಇನಿಂಗ್ಸ್ನಲ್ಲಿ ಪ್ರತಿ ಓವರ್ಗೆ 4.11 ಸರಾಸರಿಯಲ್ಲಿ ರನ್ ಪೇರಿಸಿದ್ದರು.
ಇದು ಕೂಡ ದಾಖಲೆ:
ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲೇ ಭಾರತದಲ್ಲಿ ಯಾವುದೇ ತಂಡ 4 ರನ್ಗಳ ಸರಾಸರಿಯಲ್ಲಿ 400 ರನ್ ಕಲೆಹಾಕಿಲ್ಲ. ಈ ಹಿಂದೆ 1958 ರಲ್ಲಿ ವೆಸ್ಟ್ ಇಂಡೀಸ್ 3.78 ಸರಾಸರಿಯಲ್ಲಿ ರನ್ಗಳಿಸಿದ್ದು ಇದುವರೆಗಿನ ದಾಖಲೆಯಾಗಿತ್ತು. ಆದರೆ ಬಾಝ್ಬಾಲ್ ಎಫೆಕ್ಟ್ಗೆ 66 ವರ್ಷಗಳ ಹಳೆಯ ದಾಖಲೆ ಇದೀಗ ಛಿದ್ರವಾಗಿದೆ.
ಅಲ್ಲದೆ ಕೇವಲ ಒಂದುವರೆ ದಿನದಾಟದಲ್ಲಿ 420 ರನ್ ಪೇರಿಸುವ ಮೂಲಕ ಭಾರತ ತಂಡದ ತೆಕ್ಕೆಯಲ್ಲಿದ್ದ ಪಂದ್ಯವನ್ನು ಇಂಗ್ಲೆಂಡ್ ತನ್ನತ್ತ ವಾಲುವಂತೆ ಮಾಡಿದ್ದರು. ಈ ಮೂಲಕ ಟೀಮ್ ಇಂಡಿಯಾಗೆ 231 ರನ್ಗಳ ಗುರಿ ನೀಡುವ ಮೂಲಕ ಪೈಪೋಟಿಗೆ ಇಳಿಯಿತು.
ಮೊದಲೇ ಬಾಝ್ಬಾಲ್ ಪರಾಕ್ರಮದಿಂದ ಕಂಗೆಟ್ಟಿದ್ದ ಟೀಮ್ ಇಂಡಿಯಾ ಆಟಗಾರರು ಯಾವುದೇ ಹಂತದಲ್ಲೂ ಇಂಗ್ಲೆಂಡ್ಗೆ ಸರಿಸಾಟಿಯಾಗಿ ನಿಲ್ಲಲಿಲ್ಲ. ಪರಿಣಾಮ ಐದನೇ ದಿನದಾಟಕ್ಕೆ ಸಾಗಬೇಕಿದ್ದ ಪಂದ್ಯವನ್ನು ಭಾರತ ತಂಡವು ನಾಲ್ಕನೇ ದಿನದಾಟದಲ್ಲೇ ಕೈಚೆಲ್ಲಿಕೊಂಡಿತು.
ಇತ್ತ ಗೆದ್ದೇ ಗೆಲ್ಲುವೆವು ಎಂದುಕೊಂಡಿದ್ದ ಟೀಮ್ ಇಂಡಿಯಾಗೆ ಬಾಝ್ಬಾಲ್ ಎಫೆಕ್ಟ್ ತೋರಿಸಿ ಇಂಗ್ಲೆಂಡ್ ತಂಡ 28 ರನ್ಗಳ ರೋಚಕ ಜಯ ಸಾಧಿಸಿತು. ಈ ಮೂಲಕ ಸೋಲುವ ಪಂದ್ಯವನ್ನು ಗೆದ್ದು ಇಂಗ್ಲೆಂಡ್ ಮತ್ತೊಮ್ಮೆ ವಿಶ್ವ ಕ್ರಿಕೆಟ್ಗೆ ಬಾಝ್ಬಾಲ್ ಎಫೆಕ್ಟ್ ಹೇಗಿರುತ್ತೆ ಎಂಬುದನ್ನು ತೋರಿಸಿಕೊಟ್ಟಿದ್ದಾರೆ.
ಏನಿದು ಬಾಝ್ಬಾಲ್?
ನ್ಯೂಝಿಲೆಂಡ್ನ ಮಾಜಿ ಆಟಗಾರ, ಪ್ರಸ್ತುತ ಇಂಗ್ಲೆಂಡ್ ಟೆಸ್ಟ್ ತಂಡದ ಕೋಚ್ ಬ್ರೆಂಡನ್ ಮೆಕಲಂ ಅವರ ಅಡ್ಡ ಹೆಸರು ಬಾಝ್. ಕ್ರಿಕೆಟ್ ಅಂಗಳದಲ್ಲಿ ಬಾಝ್ ಎಂದೇ ಗುರುತಿಸಿಕೊಂಡಿರುವ ಮೆಕಲಂ ಅವರ ಆಕ್ರಮಣಕಾರಿ ಆಟದ ವಿಧಾನವನ್ನು ಇದೀಗ ಬಾಝ್ಬಾಲ್ (BazBall) ಕ್ರಿಕೆಟ್ ಎಂದು ಕರೆಯಲಾಗುತ್ತಿದೆ.
ಇದನ್ನೂ ಓದಿ: IND vs ENG: ರವೀಂದ್ರ ಜಡೇಜಾ ಬದಲಿ ಆಟಗಾರ ಯಾರು?
ವಿಶೇಷ ಎಂದರೆ ಬಾಝ್ಬಾಲ್ ಆಟ ಶುರು ಮಾಡಿದ ಬಳಿಕ ಇಂಗ್ಲೆಂಡ್ 20 ಟೆಸ್ಟ್ ಪಂದ್ಯಗಳನ್ನಾಡಿದೆ. ಇದರಲ್ಲಿ 14 ಮ್ಯಾಚ್ಗಳಲ್ಲಿ ಜಯ ಸಾಧಿಸಿದೆ. ಇನ್ನು 5 ಪಂದ್ಯಗಳಲ್ಲಿ ಮಾತ್ರ ಸೋಲನುಭವಿಸಿದೆ. ಹಾಗೆಯೇ ಕೇವಲ 1 ಮ್ಯಾಚ್ ಅನ್ನು ಡ್ರಾ ಮಾಡಿಕೊಂಡಿದೆ. ಅಂದರೆ ಬಾಝ್ಬಾಲ್ ಕ್ರಿಕೆಟ್ನೊಂದಿಗೆ ಇಂಗ್ಲೆಂಡ್ ಡ್ರಾ ಮಾಡಿಕೊಳ್ಳುವುದಕ್ಕಿಂತ ಪಂದ್ಯವನ್ನು ಗೆಲ್ಲಲು ಹೋರಾಡುತ್ತಿರುವುದು ಸ್ಪಷ್ಟ.
Published On - 3:28 pm, Mon, 29 January 24