IPL 2024: ಅಫ್ಘಾನಿಸ್ತಾನ್​ ತಂಡದ ಮೂವರು ಆಟಗಾರರು ಐಪಿಎಲ್​ಗೆ ಅನುಮಾನ

ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2024) ಸೀಸನ್-17 ಗಾಗಿ ಭರ್ಜರಿ ಸಿದ್ಧತೆಯಲ್ಲಿದ್ದ ಮೂವರು ಆಟಗಾರರಿಗೆ ಅಫ್ಘಾನಿಸ್ತಾನ್ ಕ್ರಿಕೆಟ್ ಬೋರ್ಡ್​ ಬಿಗ್ ಶಾಕ್ ನೀಡಿದೆ. ನವೀನ್ ಉಲ್ ಹಕ್, ಮುಜೀಬ್ ಉರ್ ರೆಹಮಾನ್ ಹಾಗೂ ಫಝಲ್​ಹಕ್ ಫಾರೂಖಿಗೆ ಐಪಿಎಲ್ ಆಡಲು ನಿರಾಕ್ಷೇಪಣಾ ಪತ್ರ ನೀಡಲು ಎಸಿಬಿ ನಿರಾಕರಿಸಿದೆ.

ಈ ಮೂವರು ಆಟಗಾರರು ಅಫ್ಘಾನ್ ತಂಡದ ಕೇಂದ್ರೀಯ ಒಪ್ಪಂದದಿಂದ ಬಿಡುಗಡೆಯಾಗಲು ಬಯಸಿದ್ದರು. ಫ್ರಾಂಚೈಸಿ ಲೀಗ್​ನಲ್ಲಿ ಭಾಗವಹಿಸಲು ಇಂತಹ ನಿರ್ಧಾರಕ್ಕೆ ಬಂದಿದ್ದರು. ಆದರೆ ರಾಷ್ಟ್ರೀಯ ತಂಡಕ್ಕಿಂತ ಫ್ರಾಂಚೈಸಿ ಲೀಗ್​ಗಳಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲು ಮುಂದಾಗಿದ್ದಾರೆಂಬ ಕಾರಣಕ್ಕೆ ಇದೀಗ ಈ ಮೂವರು ಆಟಗಾರರಿಗೆ ಎನ್​ಒಸಿ ನೀಡದಿರಲು ಅಫ್ಘಾನಿಸ್ತಾನ್ ಕ್ರಿಕೆಟ್ ಬೋರ್ಡ್​ ನಿರ್ಧರಿಸಿದೆ.

ಅದರಂತೆ ನವೀನ್ ಉಲ್ ಹಕ್, ಫಝಲ್​ಹಕ್ ಫಾರೂಖಿ ಹಾಗೂ ಮುಜೀಬ್​ ಉರ್ ರೆಹಮಾನ್​ಗೆ ಮುಂದಿನ 2 ವರ್ಷಗಳ ಕಾಲ ನಿರಾಕ್ಷೇಪಣಾ ಪತ್ರ ನೀಡುವುದಿಲ್ಲ ಎಂದು ಅಫ್ಘಾನಿಸ್ತಾನ್ ಕ್ರಿಕೆಟ್​ ಮಂಡಳಿ ತಿಳಿಸಿದೆ.

ಅಂದರೆ ಈ ಆಟಗಾರರು ಐಪಿಎಲ್​ನಲ್ಲಿ ಭಾಗವಹಿಸಬೇಕಿದ್ದರೆ ಅಫ್ಘಾನಿಸ್ತಾನ್ ಕ್ರಿಕೆಟ್ ಮಂಡಳಿಯಿಂದ ಎನ್​ಒಸಿ ಪಡೆಯಬೇಕು. ಆದರೆ ಇದೀಗ ಈ ಮೂವರನ್ನು 2 ವರ್ಷಗಳ ಕಾಲ ಫ್ರಾಂಚೈಸಿ ಲೀಗ್​ನಿಂದ ಬ್ಯಾನ್ ಮಾಡಿ ಶಿಸ್ತು ಕ್ರಮ ಕೈಗೊಳ್ಳಲು ಎಸಿಬಿ ನಿರ್ಧರಿಸಿದೆ.ಇದರಿಂದಾಗಿ ನವೀನ್ ಉಲ್ ಹಕ್, ಮುಜೀಬ್ ಉರ್ ರೆಹಮಾನ್ ಹಾಗೂ ಫಝಲ್​ಹಕ್ ಫಾರೂಖಿ ಮುಂಬರುವ ಐಪಿಎಲ್​ನಲ್ಲಿ ಕಾಣಿಸಿಕೊಳ್ಳುವುದು ಅನುಮಾನ.

ನವೀನ್ ಉಲ್ ಹಕ್ ಐಪಿಎಲ್​ನಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಭಾಗವಾಗಿದ್ದಾರೆ. ಹಾಗೆಯೇ ಫಝಲ್​ಹಕ್ ಫಾರೂಖಿ ಸನ್​ರೈಸರ್ಸ್ ಹೈದರಾಬಾದ್ ತಂಡದಲ್ಲಿದ್ದಾರೆ. ಇನ್ನು ಮುಜೀಬ್ ಉರ್ ರೆಹಮಾನ್ ಈ ಬಾರಿಯ ಹರಾಜಿನ ಮೂಲಕ ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡಕ್ಕೆ ಆಯ್ಕೆಯಾಗಿದ್ದರು.

ಇದೀಗ ಈ ಮೂವರು ಆಟಗಾರರ ಮೇಲೆ ಎಸಿಬಿ ಬ್ಯಾನ್ ವಿಧಿಸಿದೆ. ಒಂದು ವೇಳೆ ಈ ಆಟಗಾರರಿಗೆ ಅಫ್ಘಾನಿಸ್ತಾನ್ ಕ್ರಿಕೆಟ್ ಬೋರ್ಡ್​ ಎನ್​ಒಸಿ ನೀಡಲು ನಿರಾಕರಿಸಿದರೆ, ಐಪಿಎಲ್​ ಫ್ರಾಂಚೈಸಿಗಳು ಇವರ ಬದಲಿ ಆಟಗಾರರನ್ನು ಆಯ್ಕೆ ಮಾಡಲಿದೆ.

ಇದನ್ನೂ ಓದಿ: IPL 2024: ಹಾರ್ದಿಕ್ ಪಾಂಡ್ಯಗಾಗಿ 100 ಕೋಟಿ ರೂ. ನೀಡಿದ ಮುಂಬೈ ಇಂಡಿಯನ್ಸ್..!

ಐಪಿಎಲ್​ನಲ್ಲಿರುವ ಅಫ್ಘಾನಿಸ್ತಾನ್ ಆಟಗಾರರು:

• ರಶೀದ್ ಖಾನ್ (ಗುಜರಾತ್ ಟೈಟಾನ್ಸ್​)
• ಮೊಹಮ್ಮದ್ ನಬಿ (ಮುಂಬೈ ಇಂಡಿಯನ್ಸ್​)
• ನೂರ್ ಅಹ್ಮದ್ (ಗುಜರಾತ್ ಟೈಟಾನ್ಸ್​)
• ರಹಮಾನುಲ್ಲಾ ಗುರ್ಬಾಝ್ (ಕೊಲ್ಕತ್ತಾ ನೈಟ್ ರೈಡರ್ಸ್​)
• ನವೀನ್ ಉಲ್ ಹಕ್ (ಲಕ್ನೋ ಸೂಪರ್ ಜೈಂಟ್ಸ್​)
• ಫಝಲ್​ಹಕ್ ಫಾರೂಖಿ (ಸನ್​ರೈಸರ್ಸ್​ ಹೈದರಾಬಾದ್)
• ಅಝ್ಮತುಲ್ಲಾ ಒಮರ್​ಝಾಹಿ (ಗುಜರಾತ್ ಟೈಟಾನ್ಸ್​)
• ಮುಜೀಬ್ ಉರ್ ರೆಹಮಾನ್ (ಕೊಲ್ಕತ್ತಾ ನೈಟ್ ರೈಡರ್ಸ್​)