ಮಾಜಿ ಆಟಗಾರನನ್ನೇ ಬೌಲಿಂಗ್ ಕೋಚ್ ಆಗಿ ನೇಮಿಸಿದ ಸಿಎಸ್​ಕೆ

ಇಂಡಿಯನ್ ಪ್ರೀಮಿಯರ್ ಲೀಗ್ ಇತಿಹಾಸದ ಅತ್ಯಂತ ಯಶಸ್ವಿ ಫ್ರಾಂಚೈಸಿಗಳಲ್ಲಿ ಒಂದಾದ ಚೆನ್ನೈ ಸೂಪರ್ ಕಿಂಗ್ಸ್ ಮುಂಬರುವ 2027ರ ಸೀಸನ್‌ಗಾಗಿ ತನ್ನ ಸಪೋರ್ಟ್ ಸ್ಟಾಫ್‌ಗಳನ್ನು ಸಂಪೂರ್ಣವಾಗಿ ಪುನರ್ರಚಿಸುತ್ತಿದೆ. ಇತ್ತೀಚೆಗಷ್ಟೇ ದಿಗ್ಗಜ ವೇಗಿ ಝಹೀರ್ ಖಾನ್ ಅವರನ್ನು ಮುಖ್ಯ ಕೋಚ್ ಆಗಿ ನೇಮಕ ಮಾಡಿದ್ದ ಸಿಎಸ್‌ಕೆ, ಇದೀಗ ಝಹೀರ್ ಅವರ ಸಲಹೆಯಂತೆ ಮಾಜಿ ವೇಗಿ ಮೊಹಿತ್ ಶರ್ಮಾ ಅವರನ್ನು ನೂತನ ಬೌಲಿಂಗ್ ಕೋಚ್ ಆಗಿ ಆಯ್ಕೆ ಮಾಡಿದೆ.

ದೀರ್ಘಕಾಲ ಸಿಎಸ್‌ಕೆ ಕೋಚ್ ಆಗಿದ್ದ ಸ್ಟೀಫನ್ ಫ್ಲೆಮಿಂಗ್ ನಿರ್ಗಮನದ ಬಳಿಕ, ಹೊಸ ಸಪೋರ್ಟ್ ಸ್ಟಾಫ್ ಅನ್ನು ಆಯ್ಕೆ ಮಾಡುವ ಸಂಪೂರ್ಣ ಜವಾಬ್ದಾರಿಯನ್ನು ಝಹೀರ್ ಖಾನ್ ಅವರಿಗೆ ನೀಡಿಲಾಗಿದೆ. ಸ್ವತಃ ವಿಶ್ವದ ಶ್ರೇಷ್ಠ ವೇಗಿಯಾಗಿದ್ದ ಝಹೀರ್, ಸಿಎಸ್‌ಕೆಯ ಬೌಲಿಂಗ್ ವಿಭಾಗವನ್ನು ಮುನ್ನಡೆಸಲು ಮೊಹಿತ್ ಶರ್ಮಾ ಅವರ ಹೆಸರನ್ನು ಸೂಚಿಸಿದ್ದಾರೆ. ಈ ಹಿಂದೆ ಸಿಎಸ್‌ಕೆ ಪರ ದೀರ್ಘಕಾಲ ಸೇವೆ ಸಲ್ಲಿಸಿದ್ದ ಸೌತ್ ಆಫ್ರಿಕಾದ ಎರಿಕ್ ಸಿಮನ್ಸ್ ಅವರ ಸ್ಥಾನಕ್ಕೆ ಮೊಹಿತ್ ಶರ್ಮಾ ನಿಯೋಜನೆಗೊಳ್ಳುತ್ತಿದ್ದಾರೆ.

ಸಿಎಸ್​ಕೆ ತಂಡದ ಮಾಜಿ ಆಟಗಾರ:

38 ವರ್ಷದ ಮೊಹಿತ್ ಶರ್ಮಾ ಅವರಿಗೆ ಸಿಎಸ್‌ಕೆ ಪಾಳಯ ಹೊಸದೇನಲ್ಲ. ಆಟಗಾರನಾಗಿ ಅವರು ಚೆನ್ನೈ ಪರ 4 ಸೀಸನ್‌ಗಳಲ್ಲಿ ಒಟ್ಟು 48 ಐಪಿಎಲ್ ಪಂದ್ಯಗಳನ್ನು ಆಡಿದ್ದಾರೆ. ಮುಖ್ಯವಾಗಿ 2014ರ ಐಪಿಎಲ್‌ನಲ್ಲಿ ಸಿಎಸ್‌ಕೆ ಪರ 23 ವಿಕೆಟ್ ಪಡೆದು ‘ಪರ್ಪಲ್ ಕ್ಯಾಪ್’ ಮುಡಿಗೇರಿಸಿಕೊಂಡಿದ್ದು ಅವರ ವೃತ್ತಿಜೀವನದ ಸುವರ್ಣ ಅಧ್ಯಾಯವಾಗಿತ್ತು. ಮಹೇಂದ್ರ ಸಿಂಗ್ ಧೋನಿ ನಾಯಕತ್ವದಲ್ಲಿ ಭಾರತ ತಂಡ ಹಾಗೂ ಸಿಎಸ್‌ಕೆಯಲ್ಲಿ ಪ್ರಮುಖ ಡೆತ್ ಓವರ್ ಸ್ಪೆಷಲಿಸ್ಟ್ ಆಗಿ ಮೊಹಿತ್ ಶರ್ಮಾ ಗುರುತಿಸಿಕೊಂಡಿದ್ದರು.

ವೃತ್ತಿಜೀವನದ ಸಂಕ್ಷಿಪ್ತ ನೋಟ:

• ನಿವೃತ್ತಿ: ಮೊಹಿತ್ ಶರ್ಮಾ ಡಿಸೆಂಬರ್ 2025 ರಲ್ಲಿ ಎಲ್ಲಾ ಮಾದರಿಯ ವೃತ್ತಿಪರ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರು.
•  ಐಪಿಎಲ್ ದಾಖಲೆ: ಒಟ್ಟು 120 ಐಪಿಎಲ್ ಪಂದ್ಯಗಳಿಂದ 134 ವಿಕೆಟ್ ಪಡೆದಿದ್ದಾರೆ. ಸಿಎಸ್‌ಕೆ ಹೊರತಾಗಿ ಪಂಜಾಬ್ ಕಿಂಗ್ಸ್, ಗುಜರಾತ್ ಟೈಟನ್ಸ್ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ಪರವೂ ಆಡಿದ್ದಾರೆ.
• ಅಂತರರಾಷ್ಟ್ರೀಯ ಕ್ರಿಕೆಟ್: ಭಾರತದ ಪರ 26 ಏಕದಿನ ಹಾಗೂ 8 ಟಿ20 ಪಂದ್ಯಗಳನ್ನು ಆಡಿದ್ದು, 2015ರ ವಿಶ್ವಕಪ್‌ನಲ್ಲಿ ಧೋನಿ ನೇತೃತ್ವದ ಭಾರತ ತಂಡದಲ್ಲಿ ಕಾಣಿಸಿಕೊಂಡಿದ್ದರು.

ಸಿಎಸ್​ಕೆಗೆ ದೇಶಿ ಟಚ್:

ಕಳೆದ ಮೂರು ಸೀಸನ್‌ಗಳಲ್ಲಿ ಪ್ಲೇ-ಆಫ್ ತಲುಪಲು ವಿಫಲವಾಗಿ ಹಿನ್ನಡೆ ಅನುಭವಿಸಿರುವ ಸಿಎಸ್‌ಕೆ, ಹೊಸ ರಣತಂತ್ರದೊಂದಿಗೆ ಕಣಕ್ಕಿಳಿಯುತ್ತಿದೆ. ವಿದೇಶಿ ಕೋಚ್‌ಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಿ, ಝಹೀರ್ ಖಾನ್ ಮತ್ತು ಮೊಹಿತ್ ಶರ್ಮಾ ಅವರಂತಹ ಅನುಭವಿ ದೇಶೀಯ ಆಟಗಾರರ ನೇತೃತ್ವದಲ್ಲಿ ‘ಇಂಡಿಯನ್ ಕೋರ್’ ಸಪೋರ್ಟ್ ಸ್ಟಾಫ್ ರಚಿಸಲು ಫ್ರಾಂಚೈಸಿ ಮುಂದಾಗಿದೆ. ಮುಂಬರುವ ದಿನಗಳಲ್ಲಿ ನೂತನ ಬ್ಯಾಟಿಂಗ್ ಕೋಚ್ ನೇಮಕಾತಿಯೂ ಅಂತಿಮಗೊಳ್ಳುವ ಸಾಧ್ಯತೆ ಇದೆ.

ಇದನ್ನೂ ಓದಿ: ವೈಭವ್​ ಬಗ್ಗೆ ಯಾವುದೇ ಅಸೂಯೆ ಇಲ್ಲ: ಟೀಮ್ ಇಂಡಿಯಾ ಆಟಗಾರನ ಸ್ಪಷ್ಟನೆ!

ಒಟ್ಟಾರೆಯಾಗಿ, ಝಹೀರ್ ಖಾನ್ ಅವರ ಮುಂದಾಳತ್ವದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು ಹೊಸ ರೂಪ ಪಡೆದುಕೊಳ್ಳುತ್ತಿದ್ದು, ಈ ಹೊಸ ರಣತಂತ್ರದೊಂದಿಗೆ ಮುಂಬರುವ ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಸಿಎಸ್‌ಕೆ ತನ್ನ ಗತವೈಭವವನ್ನು ಮರುಕಳಿಸುವಂತೆ ಮಾಡುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.