Jammu and Kashmir vs Karnataka: ಪಡಿಕ್ಕಲ್ ಸ್ಫೋಟಕ ಆಟಕ್ಕೆ ಬೆಚ್ಚಿಬಿದ್ದ ಜಮ್ಮು: ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ ದಾಖಲೆ ಬರೆದ ಕರ್ನಾಟಕ

ದೇಶೀಯ ಕ್ರಿಕೆಟ್ ಟೂರ್ನಿ ವಿಜಯ್ ಹಜಾರೆ ಟ್ರೋಫಿಗೆ ಇಂದು ಚಾಲನೆ ಸಿಕ್ಕಿದೆ. ಮಯಾಂಕ್ ಅಗರ್ವಾಲ್ ನೇತೃತ್ವದ ಕರ್ನಾಟಕ ತಂಡ ಜಮ್ಮು ಕಾಶ್ಮೀರ (Jammu and Kashmir vs Karnataka) ತಂಡವನ್ನು ಎದುರಿಸುತ್ತಿದೆ. ಅಹ್ಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ರಾಜ್ಯ ತಂಡ 50 ಓವರ್​ಗಳಲ್ಲಿ ಬರೋಬ್ಬರಿ 402 ರನ್ ಕಲೆಹಾಕಿದೆ. ಇದು ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ ಕರ್ನಾಟಕ ತಂಡ ಕಲೆಹಾಕಿದ ಗರಿಷ್ಠ ಮೊತ್ತವಾಗಿದೆ.

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಕರ್ನಾಟಕ ಉತ್ತಮ ಆರಂಭ ಪಡೆಯಿತು. ಓಪನರ್​ಗಳಾದ ರವಿಕುಮಾರ್ ಸಮರ್ಥ್ ಮತ್ತು ಮಯಾಂಕ್ ಅಗರ್ವಾಲ್ ಭರ್ಜರಿ ಬ್ಯಾಟಿಂಗ್ ನಡೆಸಿದರು. ಇವರಿಬ್ಬರು 38.5 ಓವರ್ ವರೆಗೂ ಕ್ರೀಸ್​ನಲ್ಲಿ ನಿಂತರು. 267 ರನ್​ಗಳ ಜೊತೆಯಾಟ ಆಡಿದರು. ಇಬ್ಬರೂ ಶತಕ ಕೂಡ ಪೂರೈಸಿದರು. ರವಿಕುಮಾರ್ 120 ಎಸೆತಗಳಲ್ಲಿ 11 ಫೋರ್, 2 ಸಿಕ್ಸರ್​ನೊಂದಿಗೆ 123 ರನ್ ಸಿಡಿಸಿದರು. ಮಯಾಂಕ್ ಅಗರ್ವಾಲ್ 133 ಎಸೆತಗಳಲ್ಲಿ 11 ಫೋರ್, 8 ಸಿಕ್ಸರ್​ನೊಂದಿಗೆ 157 ರನ್ ಚಚ್ಚಿದರು. 40 ಓವರ್ ಹೊತ್ತಿಗೆ ಬಂದ ದೇವದತ್ ಪಡಿಕ್ಕಲ್ ಕೂಡ ಸ್ಫೋಟಕ ಆಟವಾಡಿದರು.

IND vs AUS, 1st T20I: ರಿಂಕು ಸಿಂಗ್ ಫಿನಿಶರ್: ಆಸೀಸ್ ವಿರುದ್ಧದ ಮೊದಲ ಟಿ20ಗೆ ಭಾರತದ ಪ್ಲೇಯಿಂಗ್ XI ಇಲ್ಲಿದೆ

ಪಡಿಕ್ಕಲ್ ಕೇವಲ 35 ಎಸೆತಗಳಲ್ಲಿ 4 ಫೋರ್, 5 ಸಿಕ್ಸರ್​ನೊಂದಿಗೆ ಅಜೇಯ 71 ರನ್ ಬಾರಿಸಿದರೆ, ಮನೀಶ್ ಪಾಂಡೆ ಅಜೇಯ 23 ರನ್ ಗಳಿಸಿದರು. ಕರ್ನಾಟಕ 50 ಓವರ್​ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 402 ರನ್ ಕಲೆಹಾಕಿತು. ವಿಶೇಷ ಎಂದರೆ, ಮೊದಲ 30 ಓವರ್​ಗಳಲ್ಲಿ ರಾಜ್ಯ ತಂಡ ಕಲೆಹಾಕಿದ್ದು ಕೇವಲ 193 ರನ್. ಅದೇ 40 ಓವರ್ ಆಗುವ ಹೊತ್ತಿಗೆ ತಂಡದ ಮೊತ್ತ 271ಕ್ಕೆ ಬಂತು. 50 ಓವರ್ ಮುಗಿಯುವಾಗ 402 ರನ್ ಕಲೆಹಾಕಿತು. ಪಡಿಕ್ಕಲ್ ಸ್ಫೋಟಕ ಬ್ಯಾಟಿಂಗ್ ತಂಡದ ಮೊತ್ತ 400 ರ ದಾಟಲು ನೆರವಾಯಿತು.

ಕರ್ನಾಟಕ ಪ್ಲೇಯಿಂಗ್ ಇಲೆವೆನ್: ರವಿಕುಮಾರ್ ಸಮರ್ಥ್ , ಮಯಾಂಕ್ ಅಗರ್ವಾಲ್ (ನಾಯಕ) , ದೇವದತ್ ಪಡಿಕ್ಕಲ್ , ಶರತ್ ಬಿಆರ್ (ವಿಕೆಟ್-ಕೀಪರ್) , ನಿಕಿನ್ ಜೋಸ್ , ಮನೀಶ್ ಪಾಂಡೆ , ಕೃಷ್ಣಪ್ಪ ಗೌತಮ್ , ಜಗದೀಶ್ ಸುಚಿತ್ , ವಿಜಯ್ ಕುಮಾರ್ ವೈಶಾಕ್ , ವಾಸುಕಿ ಕೌಶಿಕ್ , ವಿಧ್ವತ್ ಕಾವೇರಪ್ಪ.

ಜಮ್ಮು-ಕಾಶ್ಮೀರ ಪ್ಲೇಯಿಂಗ್ ಇಲೆವೆನ್: ಕಮ್ರಾನ್ ಇಕ್ಬಾಲ್ , ಶುಭಂ ಖಜುರಿಯಾ (ನಾಯಕ) , ಫಾಜಿಲ್ ರಶೀದ್ ( ವಿಕೆಟ್ ಕೀಪರ್ ) , ಹೆನಾನ್ ನಜೀರ್ ಮಲಿಕ್ , ಅಬ್ದುಲ್ ಸಮದ್ , ವಿವ್ರಾಂತ್ ಶರ್ಮಾ , ರಸಿಖ್ ದಾರ್ ಸಲಾಂ , ಯುಧ್ವೀರ್ ಸಿಂಗ್ ಚರಕ್ , ಸಾಹಿಲ್ ಲೋತ್ರಾ , ಅಬಿದ್ ಮುಷ್ತಾಕ್ , ಉಮ್ರಾನ್ ಮಲಿಕ್.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ