AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

ರಿಷಭ್ ಪಂತ್-ಪಡಿಕ್ಕಲ್ ಕಣ್ಣಾಮುಚ್ಚಾಲೆಯಾಟದಲ್ಲಿ ಕೈತಪ್ಪಿದ ಕ್ಯಾಚ್!

ವೆಲ್ಲಿಂಗ್ಟನ್‌ನ ಬೇಸಿನ್ ರಿಸರ್ವ್ ಮೈದಾನದಲ್ಲಿ ಆರಂಭವಾಗಿರುವ ಭಾರತ ಮತ್ತು ನ್ಯೂಝಿಲೆಂಡ್ ನಡುವಿನ ಮೊದಲ ಟೆಸ್ಟ್ ಪಂದ್ಯದ ಮೊದಲ ದಿನದಾಟ ರೋಚಕ ತಿರುವು ಪಡೆದುಕೊಂಡಿದೆ. ಆರಂಭಿಕ ಆಘಾತದಿಂದ ಚೇತರಿಸಿಕೊಂಡ ಆತಿಥೇಯ ನ್ಯೂಜಿಲೆಂಡ್ ತಂಡಕ್ಕೆ ಭಾರತೀಯ ಫೀಲ್ಡರ್‌ಗಳ ಕಳಪೆ ಸಂವಹನ ವರದಾನವಾಗಿ ಪರಿಣಮಿಸಿದ್ದು, ಮೊದಲ ದಿನದ ಗೌರವವನ್ನು ಕಿವೀಸ್ ಪಡೆ ತನ್ನದಾಗಿಸಿಕೊಂಡಿದೆ.

ರಿಷಭ್ ಪಂತ್-ಪಡಿಕ್ಕಲ್ ಕಣ್ಣಾಮುಚ್ಚಾಲೆಯಾಟದಲ್ಲಿ ಕೈತಪ್ಪಿದ ಕ್ಯಾಚ್!
Rishabh Pant - Devdutt PadikkalImage Credit source: Sonyliv
ಝಾಹಿರ್ ಯೂಸುಫ್
|

Updated on: Nov 19, 2026 | 1:26 PM

Share

ವೆಲ್ಲಿಂಗ್ಟನ್‌ನ ಬೇಸಿನ್ ರಿಸರ್ವ್ ಮೈದಾನದಲ್ಲಿ ನಡೆಯುತ್ತಿರುವ ನ್ಯೂಝಿಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದ ಮೊದಲ ದಿನದಾಟದಲ್ಲಿ ಭಾರತೀಯ ಆಟಗಾರರ ನಡುವಿನ ಸಂವಹನದ ಕೊರತೆಯು ತಂಡಕ್ಕೆ ದುಬಾರಿಯಾಗಿ ಪರಿಣಮಿಸಿದೆ. ಶತಕವೀರ ಹೆನ್ರಿ ನಿಕೋಲ್ಸ್ ನೀಡಿದ ಸುಲಭ ಕ್ಯಾಚ್ ಅನ್ನು ವಿಕೆಟ್ ಕೀಪರ್ ರಿಷಭ್ ಪಂತ್ ಹಾಗೂ ದೇವದತ್ ಪಡಿಕ್ಕಲ್ ನಡುವಿನ ಗೊಂದಲದಿಂದಾಗಿ ಕೈಚೆಲ್ಲಲಾಗಿದೆ.

ಘಟನೆಯ ವಿವರ:

ನ್ಯೂಝಿಲೆಂಡ್ ಇನ್ನಿಂಗ್ಸ್‌ನ 74ನೇ ಓವರ್‌ನಲ್ಲಿ ವೇಗಿ ಪ್ರಸಿದ್ಧ್ ಕೃಷ್ಣ ಎಸೆದ ಶಾರ್ಟ್ ಪಿಚ್ ಎಸೆತವನ್ನು ಹೆನ್ರಿ ನಿಕೋಲ್ಸ್ ಪುಲ್ ಮಾಡಲು ಯತ್ನಿಸಿದರು. ಆದರೆ ಚೆಂಡು ಬ್ಯಾಟಿನ ಮೇಲ್ಭಾಗಕ್ಕೆ ತಾಗಿ ಬ್ಯಾಕ್‌ವರ್ಡ್ ಸ್ಕ್ವೇರ್ ಲೆಗ್ ದಿಕ್ಕಿನಲ್ಲಿ ಮೇಲಕ್ಕೆ ಚಿಮ್ಮಿತು. ಆ ಸ್ಥಾನದಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ದೇವದತ್ ಪಡಿಕ್ಕಲ್ ಕ್ಯಾಚ್ ಹಿಡಿಯಲು ಸಿದ್ಧರಾಗಿದ್ದರು.

ಆದರೆ, ವಿಕೆಟ್ ಹಿಂದಿನಿಂದ ಓಡಿ ಬಂದ ರಿಷಭ್ ಪಂತ್ ನೇರವಾಗಿ ಪಡಿಕ್ಕಲ್ ಅವರ ದೃಷ್ಟಿಗೆ ಅಡ್ಡ ಬಂದರು. ಆರಂಭದಲ್ಲಿ ತಾವೇ ಕ್ಯಾಚ್ ಹಿಡಿಯಲು ಮುಂದಾದ ಪಂತ್, ಕೊನೆಯ ಕ್ಷಣದಲ್ಲಿ ಮನಸು ಬದಲಿಸಿದರು. ಪಂತ್ ಅವರ ಈ ದಿಢೀರ್ ಚಲನೆಯಿಂದ ವಿಚಲಿತರಾದ ಪಡಿಕ್ಕಲ್, ತಡವಾಗಿ ಪ್ರತಿಕ್ರಿಯಿಸಿ ಸಮತೋಲನ ಕಳೆದುಕೊಂಡರು. ಪರಿಣಾಮವಾಗಿ, ಸುಲಭವಾಗಿ ಕೈಸೇರಬೇಕಿದ್ದ ಚೆಂಡು ಬೆರಳುಗಳ ತುದಿಗೆ ತಾಗಿ ನೆಲಕ್ಕೆ ಬಿತ್ತು.

ನಿಕೋಲ್ಸ್‌ಗೆ ಜೀವದಾನ:

ಈ ಕ್ಯಾಚ್ ಕೈಜಾರಿದಾಗ ಹೆನ್ರಿ ನಿಕೋಲ್ಸ್ 102 ರನ್ ಗಳಿಸಿ ಬ್ಯಾಟಿಂಗ್ ಮಾಡುತ್ತಿದ್ದರು. ಒಂದು ಹಂತದಲ್ಲಿ 70 ರನ್‌ಗಳಿಗೆ 5 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ನ್ಯೂಝಿಲೆಂಡ್ ತಂಡಕ್ಕೆ ಹೆನ್ರಿ ನಿಕೋಲ್ಸ್ ಮತ್ತು ಗ್ಲೆನ್ ಫಿಲಿಪ್ಸ್ ಆಸರೆಯಾದರು. ಸಿಕ್ಕ ಜೀವದಾನದ ಸಂಪೂರ್ಣ ಲಾಭ ಪಡೆದ ನಿಕೋಲ್ಸ್ ಮೊದಲ ದಿನದಂತ್ಯಕ್ಕೆ ಅಜೇಯ 113 ರನ್ ಗಳಿಸಿದರೆ, ಅವರಿಗೆ ಉತ್ತಮ ಸಾಥ್ ನೀಡಿದ ಫಿಲಿಪ್ಸ್ ಅಜೇಯ 94 ರನ್ ಗಳಿಸಿ ಕ್ರೀಸ್‌ನಲ್ಲಿದ್ದಾರೆ. ಇದರಿಂದಾಗಿ ನ್ಯೂಝಿಲೆಂಡ್ ಮೊದಲ ದಿನದಂತ್ಯಕ್ಕೆ 5 ವಿಕೆಟ್ ನಷ್ಟಕ್ಕೆ 243 ರನ್ ಗಳಿಸಿ ಸುಸ್ಥಿತಿಗೆ ತಲುಪಿದೆ.

ಇದನ್ನೂ ಓದಿ: ಯಾಕೆ ಹೊರಗಿಟ್ರಿ ಹೇಳಿ?.. ಸಿರಾಜ್ ಕೈಬಿಟ್ಟಿದ್ದಕ್ಕೆ ಸುನಿಲ್ ಗವಾಸ್ಕರ್ ಗರಂ!

ಒಂದು ವೇಳೆ ರಿಷಭ್ ಪಂತ್ ಅಥವಾ ದೇವದತ್ ಪಡಿಕ್ಕಲ್ ಈ ಕ್ಯಾಚ್ ಹಿಡಿದಿದ್ದರೆ, ಮೊದಲ ದಿನದಾಟದ ಅಂತ್ಯಕ್ಕೆ ಹೆನ್ರಿ ನಿಕೋಲ್ಸ್ ಪೆವಿಲಿಯನ್ ಸೇರುತ್ತಿದ್ದರು. ಅಲ್ಲದೆ, ಟೀಮ್ ಇಂಡಿಯಾ ಪಂದ್ಯದ ಮೇಲೆ ಮತ್ತೆ ಹಿಡಿತ ಸಾಧಿಸಲು ಉತ್ತಮ ಅವಕಾಶವಿತ್ತು. ಆದರೆ ಇಬ್ಬರು ಆಟಗಾರರ ನಡುವಿನ ಸಂವಹನದ ಕೊರತೆಯಿಂದಾಗಿ ಈ ಸುಲಭ ಕ್ಯಾಚ್ ಕೈಚೆಲ್ಲಲ್ಪಟ್ಟಿತು. ಪರಿಣಾಮ ಹೆನ್ರಿ ನಿಕೋಲ್ಸ್ 113 ರನ್​ಗಳೊಂದಿಗೆ ಅಜೇಯರಾಗಿ ಉಳಿದಿದ್ದು, ಎರಡನೇ ದಿನದಾಟದಲ್ಲಿ ಬ್ಯಾಟಿಂಗ್ ಮುಂದುವರೆಸಲಿದ್ದಾರೆ.

Follow Us
ಝಾಹಿರ್ ಯೂಸುಫ್
ಝಾಹಿರ್ ಯೂಸುಫ್

ಟಿವಿ9 ಡಿಜಿಟಲ್ ಚೀಫ್ ಸಬ್ ಎಡಿಟರ್. 10 ವರ್ಷಗಳಿಂದ ಕನ್ನಡ ಡಿಜಿಟಲ್​ ಮಾಧ್ಯಮದಲ್ಲಿ ಪತ್ರಿಕಾ ವೃತ್ತಿ. ಕ್ರೀಡಾ ಸುದ್ದಿ, ದೀರ್ಘ ಲೇಖನ, ವಿಶ್ಲೇಷಣೆ, ಹೀಗೆ ಎಲ್ಲ ತರಹದ ಬರಹದಲ್ಲೂ ಅನುಭವ. ಪ್ರಸ್ತುತ ವಿದ್ಯಮಾನಗಳ ವ್ಯಾಖ್ಯಾನ, ಚರ್ಚೆಯಲ್ಲಿ ನೈಪುಣ್ಯ. ಈ ಹಿಂದೆ ಉದಯವಾಣಿ, ನ್ಯೂಸ್ 18 ಕನ್ನಡ ಡಿಜಿಟಲ್​​ನಲ್ಲಿ ಕೆಲಸ ಮಾಡಿದ ಅನುಭವ. ಆಸಕ್ತಿದಾಯಕ ವಿಷಯ ಕ್ರೀಡೆ, ಸಿನಿಮಾ ಮತ್ತು ರಾಜಕೀಯ.

Read More