ಉತ್ತಮ ಆರಂಭದ ಹೊರತಾಗಿಯೂ ಎಡವಿದ ರೋಹಿತ್ ಶರ್ಮಾ..!
ವೆಸ್ಟ್ ಇಂಡೀಸ್ ವಿರುದ್ಧದ ODI ಸರಣಿಯಲ್ಲಿ ರೋಹಿತ್ ಶರ್ಮಾ ಉತ್ತಮ ಆರಂಭ ಪಡೆದರು, ತಂಡಕ್ಕೆ ನೆರವು ನೀಡಿದರು. ಆದರೆ 32 ರನ್‌ಗಳ ಸ್ಕೋರ್‌ ಅನ್ನು ದೊಡ್ಡ ಮೊತ್ತವಾಗಿ ಪರಿವರ್ತಿಸುವಲ್ಲಿ ವಿಫಲರಾದರು. 16 ರನ್ ಗಳಿಸಿದ್ದಾಗ ಜೀವದಾನ ಪಡೆದರೂ, ಅದರ ಲಾಭ ಪಡೆಯಲಿಲ್ಲ. ಅಂತಿಮವಾಗಿ ಅಲ್ಜಾರಿ ಜೋಸೆಫ್ ಅವರ ಬೌಲಿಂಗ್ನಲ್ಲಿ ಔಟಾದರು, ತಮ್ಮ 200ನೇ ODI ಆರಂಭಿಕ ಇನ್ನಿಂಗ್ಸ್ ಅನ್ನು ಸ್ಮರಣೀಯವಾಗಿಸಲಿಲ್ಲ.
Updated on: Sep 28, 2026 | 2:49 PM
2027 ರಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್ನಲ್ಲಿ ರೋಹಿತ್ ಶರ್ಮಾರನ್ನು ಆಡಿಸಬೇಕೋ, ಬೇಡವೋ ಎಂಬ ಚರ್ಚೆಯ ನಡುವೆ ವೆಸ್ಟ್ ಇಂಡೀಸ್ ವಿರುದ್ಧದ ಏಕದಿನ ಸರಣಿಯಲ್ಲಿ ಬ್ಯಾಟಿಂಗ್ಗೆ ಇಳಿದಿದ್ದ ರೋಹಿತ್ ಶರ್ಮಾ ತಂಡಕ್ಕೆ ಉತ್ತಮ ಆರಂಭ ಒದಗಿಸಿಕೊಡುವಲ್ಲಿ ಯಶಸ್ವಿಯಾದರು. ಅಲ್ಲದೆ ತಾವು ಕೂಡ ಉತ್ತಮ ಆರಂಭವನ್ನು ಪಡೆದುಕೊಂಡರು. ಆದರೆ ಆ ಆರಂಭವನ್ನು ದೊಡ್ಡ ಮೊತ್ತವನ್ನಾಗಿ ಪರಿವರ್ತಿಸುವಲ್ಲಿ ಎಡವಿದರು. ತಿರುವನಂತಪುರದಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಎಂದಿನ ಶೈಲಿಯಲ್ಲೇ ಬ್ಯಾಟ್ ಬೀಸಿದ ರೋಹಿತ್ 32 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ಇದರೊಂದಿಗೆ ಏಕದಿನ ಕ್ರಿಕೆಟ್‌ನಲ್ಲಿ ಆರಂಭಿಕನಾಗಿ ತಮ್ಮ 200 ನೇ ಇನ್ನಿಂಗ್ಸ್ ಆಡಿದ ರೋಹಿತ್ ಅದನ್ನು ಸ್ಮರಣೀಯವಾಗಿಸುವಲ್ಲಿ ವಿಫಲರಾದರು.
ಜೀವದಾನದ ಲಾಭ ಪಡೆಯದ ರೋಹಿತ್
ವೆಸ್ಟ್ ಇಂಡೀಸ್ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ ತಂಡ 296 ರನ್‌ಗಳ ಗುರಿಯನ್ನು ಬೆನ್ನಟ್ಟಿತ್ತು. ರೋಹಿತ್ ಶರ್ಮಾ ಮತ್ತು ನಾಯಕ ಶುಭ್ಮನ್ ಗಿಲ್ ಉತ್ತಮ ಆರಂಭ ನೀಡಿದರು. ಮೊದಲ ಮೂರು ರಿಂದ ನಾಲ್ಕು ಓವರ್‌ಗಳಲ್ಲಿ ಇಬ್ಬರೂ ಎಚ್ಚರಿಕೆಯಿಂದ ಆಡಿದರು. ಆ ಬಳಿಕ ತಮ್ಮ ಬ್ಯಾಟಿಂಗ್ ಗೇರ್ ಬದಲಿಸಿದ ರೋಹಿತ್ ವೆಸ್ಟ್ ಇಂಡೀಸ್ ಬೌಲರ್‌ಗಳ ಸತತ ಎರಡು ಓವರ್‌ಗಳಲ್ಲಿ ಸಿಕ್ಸರ್ ಬಾರಿಸಿದರು.
ಆದರೆ ಆ ಎರಡು ಸಿಕ್ಸರ್‌ಗಳ ನಡುವೆ, ರೋಹಿತ್ ಶರ್ಮಾ ಒಂದು ಜೀವದಾನವನ್ನು ಪಡೆದರು. ಆರನೇ ಓವರ್‌ನ ಮೊದಲ ಎಸೆತದಲ್ಲೇ ರೋಹಿತ್ ಪುಲ್ ಶಾಟ್ ಮಾಡಲು ಪ್ರಯತ್ನಿಸಿದರು, ಚೆಂಡು ಸಿಕ್ಸರ್ಗೆ ಹೋಗುವಂತೆ ತೋರುತಿತ್ತು. ಆದರೆ ಡೀಪ್ ಸ್ಕ್ವೇರ್ ಲೆಗ್‌ನಲ್ಲಿ ನಿಂತಿದ್ದ ಅಲ್ಜಾರಿ ಜೋಸೆಫ್ ಕ್ಯಾಚ್ ಹಿಡಿಯಲು ಯತ್ನಿಸಿದರು. ಅದರಲ್ಲಿ ಅವರು ಯಶಸ್ವಿ ಕೂಡ ಆದರು. ಆದರೆ ಬೌಂಡರಿ ಗೆರೆ ಎಲ್ಲಿದೆ ಎಂಬುದನ್ನು ಜಡ್ಜ್ ಮಾಡುವುದರಲ್ಲಿ ಎಡವಿದ ಜೋಸೆಫ್ ನಾನು ಬೌಂಡರಿ ಗೆರೆ ತುಳಿಯಬಹುದು ಎಂಬ ಆತಂಕದಲ್ಲಿ ಹಿಡಿದಿದ್ದ ಚೆಂಡನ್ನು ಕೈಬಿಟ್ಟರು. ಆದರೆ ಜೋಸೆಫ್ ಮುಂಚೆಯೇ ಬೌಂಡರಿ ಗೆರೆ ಮೇಲೆ ನಿಗಾ ಇರಿಸಿದ್ದರೆ ರೋಹಿತ್ ಔಟಾಗುತ್ತಿದ್ದರು.
ಸತತ ಐದು ಎಸೆತಗಳು ಡಾಟ್
ಆ ಸಮಯದಲ್ಲಿ ರೋಹಿತ್ ಕೇವಲ 16 ರನ್ ಗಳಿಸಿದ್ದರು. ಈ ಜೀವದಾನದ ಬಳಿಕ ಎಚ್ಚರಿಕೆಯಿಂದ ಬ್ಯಾಟಿಂಗ್ ಮಾಡಿದ ಹಿಟ್‌ಮ್ಯಾನ್ ಎರಡು ಸಿಕ್ಸರ್‌ಗಳನ್ನು ಬಾರಿಸಿದರು. ಆದರೆ ಯಾವ ಅಲ್ಜಾರಿ ಜೋಸೆಫ್ ರೋಹಿತ್ಗೆ ಜೀವದಾನ ನೀಡಿದ್ದರೋ, ಅದೇ ಅಲ್ಜಾರಿ ಜೋಸೆಫ್, ರೋಹಿತ್ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರು. ಇನ್ನಿಂಗ್ಸ್‌ನ 12 ನೇ ಓವರ್‌ ಎಸೆದ ಅಲ್ಜಾರಿ ಜೋಸೆಫ್ ಬೌಲಿಂಗ್ನಲ್ಲಿ ರೋಹಿತ್ ರನ್ ಗಳಿಸಲು ಕಷ್ಟಪಡಬೇಕಾಯಿತು.
ಏಕದಿನ ವಿಶ್ವಕಪ್ ಆಡ್ತೀರಾ? ಅಚ್ಚರಿಯ ಉತ್ತರ ನೀಡಿದ ರೋಹಿತ್ ಶರ್ಮಾ
ಇದರಿಂದ ಸತತ ಐದು ಎಸೆತಗಳು ಡಾಟ್ ಆದವು. ಇದರಿಂದ ತಾಳ್ಮೆ ಕಳೆದುಕೊಂಡ ರೋಹಿತ್ ಕೊನೆಯ ಎಸೆತವನ್ನು ಸಿಕ್ಸರ್ಗಟ್ಟಲು ಯತ್ನಿಸಿದರು. ಆದರೆ ಚೆಂಡಿನ ವೇಗದ ಕೊರತೆ ಮತ್ತು ಶಾಟ್‌ಗೆ ಶಕ್ತಿಯ ಕೊರತೆ ಇತ್ತು. ಹಿಗಾಗಿ ರೋಹಿತ್ ಡೀಪ್ ಮಿಡ್‌ವಿಕೆಟ್‌ನಲ್ಲಿ ಕ್ಯಾಚ್ ನೀಡಿ ಔಟಾದರು. ಏಳು ಏಕದಿನ ಇನ್ನಿಂಗ್ಸ್‌ಗಳಲ್ಲಿ ಅಲ್ಜಾರಿ ಜೋಸೆಫ್ ರೋಹಿತ್ ಅವರನ್ನು ಔಟ್ ಮಾಡಿದ್ದು ಇದು ನಾಲ್ಕನೇ ಬಾರಿ. ಈ ಪಂದ್ಯದಲ್ಲಿ ರೋಹಿತ್ 35 ಎಸೆತಗಳನ್ನು ಎದುರಿಸಿ ಎರಡು ಬೌಂಡರಿ ಮತ್ತು ಮೂರು ಸಿಕ್ಸರ್‌ಗಳನ್ನು ಒಳಗೊಂಡಂತೆ 32 ರನ್ ಬಾರಿಸಿ ಪೆವಿಲಿಯನ್ ಸೇರಿಕೊಂಡರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
